Fɔʼɔ 25

Bɔɔ tə́nə bəshʉ Fɛsto

1 Chîbə kʉ̂ʉ tíŋ itia ndə Fɛsto gɛ̀ dàa mu mbʉ bie, ɔ lɔ̀ hə Kasalia kóʼ gwè Jɛlosalɛŋ. 2 Bətiefɛ̀ʼndɛŋNyii ghɔŋbə bʉəkwɛʼtəŋ-Juu gwè kwə́ʼ tʉ ɔŋ te Bɔɔ, kə́ kwèʼhə ɔŋ, 3 kə́ fʉ̀ʉtə Fɛsto mbɔ ɔ̈ dʉ̀ʼ buuŋjyu tʉ bɔŋ, tə́ŋ Bɔɔ kɔ́ Jɛlosalɛŋ, bʉʼka bɔ̂ŋ nɔʼ kə shʉ̀tə ndə məyí ɔ sêfia. 4 Fɛsto bə̀ŋhə mbɔ Bɔɔ la káa Kasalia, mbəŋ-ɔŋ bɔŋ bɛ ndə məgwè chɔ kʉʉkə məniʼ. 5 Ndʉʉmɛ, ɔ ghɔ̀ŋ mbɔ, "Bʉəkwɛʼtəŋ ndə bɔ̂ŋ bɛ mu bii, b̈aʼa bɔŋ shíʼ gɛ̀ chɔ. Kaʼ nu-bʉə-kə bɛ ghɔ ndə ɔ nɔʼ chìi, b̈ɔ̂ŋ gìe."

6 Ɔ chí chɔ tə i kə́ gɛ̀ nə chîbə fɔ̂ŋ byuunɔ chîbə wuŋ, ɔ lɔ̀ gɛ̀ Kasalia. Mbi kʉ̂ʉ sɛŋ fíi, ɔ dùʼ mu njaafɛ̀ʼ, kàhə mbɔ b̈ə la gwè nə Bɔɔ. 7 Ndʉʉ ndə ɔ gwè dàa, mbʉ bəntəŋbəshʉ-bʉə-Juu ndə bɔ̂ŋ shíʼ gwè hə Jɛlosalɛŋ, tə́ŋtə yə̀ŋhə ɔŋ, kə́ fyìʼ mbi kətʉ Bɔɔ təmə bɔ̂ŋ mə dʉ̀ʼ bə nyíɛ mbɔ bɛ shʉəŋ fɛ. 8 Bɔɔ túŋ bəŋʉʉ ndə mətúunə tʉkə-i kə́ ghɔ̀ŋ mbɔ, "Mɔ chʉʼ mɔ̀ʼ nuʼ-bʉə-Juu bɛ́ fɛ, təmə nɔʼ chìi bʉ̂ʼʉ ndəŋ njaafɛ̀ʼndɛŋNyii mɔ̀ʼ bɛ́ fɛ, təkɔmə Fɔŋ-Luŋ."

9 Bɔŋ bʉʼka Fɛsto kə́ kʉ́ʉ ndə mədʉ̀ʼ buuŋjyu tʉ bʉə-Juu, ɔ bíʼtə tʉ Bɔɔ mbɔ, "A kʉ̀ʉ ndə məkóʼ gɛ̀ Jɛlosalɛŋ gɛ̀ bə kwɛ̀ fɛʼɛ-a ndə nubə-ɔ̄ŋ ndə bə gìe kətʉ-a nɔ bəshʉ mɔ mɛ?"

10 Bɔŋ Bɔɔ bə̀ŋhə mbɔ, "Mɔ nɔ tə́nə mu njaafɛ̀ʼ-Fɔŋ-Luŋ kəyəŋ ndə mɔ kie ndə məkwɛ̀ fɛʼɛ-ɔ chɔ. Mɔ chʉʼ chìi nu-bʉəbʉəbɛʼ-kə tʉ bʉə-Juu fɛ, mbəŋ-aŋ nɔ kínə jyujyu. 11 Kaʼ mɔ nɔʼ chìi nu-bʉəbʉə-kə ndə bəkɔ bə yí mɔ bʉʼka yɔŋ, mɔ tʉʼ tɛ́ŋ kwu fɛ. Bɔŋ kaʼ bɛ mbɔ nubə ndə bɔ̂ŋ tʉʼ gìe kətʉ-mɔ gòʼ təmə bɛ shʉəŋ fɛ, təmə wo mə byʉ̀hə mɔ kɔ́ kəghɔ-bɔŋ fɛ. Mɔ nɔ tʉʼ fʉ̀ʉtə mbɔ fɛʼɛ-ɔ̄ gɛ̀ tʉ Fɔŋ-Luŋ."

12 Fɛsto kʉ̂ʉ jìʼtə ghɔŋbə bʉə-kaŋsotə-bi, bə̀ŋhə mbɔ, "Bʉʼka a tʉʼ fʉ̀ʉtə mbɔ f̈ɛʼɛ-a gɛ̀ tʉ Fɔŋ-Luŋ, bə bu gɛ̀ nə aŋ tʉ Fɔŋ-Luŋ."

Bɔɔ nduɔ bəshʉ Fɔŋ Agliba ghɔŋ Bɛni

13 Chîbə kʉ̂ʉ nɔʼ tíŋ, Fɔŋ Agliba ghɔŋ Bɛni gɛ̀ dàa Kasalia, gɛ̀ gìe tʉ Fɛsto. 14 Bɔ̂ŋ chí chɔ ndə chîbə yɔ́ŋyɔ́ŋ, Fɛsto lʉ̀ fɛʼɛ-Bɔɔ fʉ̀ʼtə tʉ mbʉ Fɔŋ, ghɔ̀ŋ mbɔ, "Wobɛʼ nɔ nə bɛ ghɔ ndə Fɛli kə fʉ̀əŋ ɔŋ chaŋ, 15 mɔ kʉ̂ʉ kə tòʼ dàa Jɛlosalɛŋ, bətiefɛ̀ʼndɛŋNyii ghɔŋbə bəntəŋbəshʉ-bʉə-Juu mɔ̀ʼ nubə sê ndə bɔ̂ŋ kie tʉ ɔŋ, kə́ fʉ̀ʉtə mɔ mbɔ m̈ɔ la chʉ̀ə ŋkwɛ mbɔ ɔ la nɔʼ gwù fɛʼɛ. 16 Mɔ ghɔ̀ŋ tʉ bɔŋ mbɔ la kaa nuʼ-bʉə-Luŋ ndə məchʉ̀ə fɛʼɛ wo mbɔ ɔ nɔʼ gwù ɔ buŋ fə́nə ghɔŋ wo ndə ɔ gwè nə nɔŋ mu njaafɛ̀ʼ bə kɔ́ saa tʉ ɔŋ ndə túu chu-i fɛ.

17 "Ndʉʉ ndə bɔ̂ŋ kə chə̀ŋtə fɛ̄ŋ, təmə mɔ kwìhə fɛ, bɔŋ mbi kʉ̂ʉ sɛŋ fíi, mɔ gɛ̀ dùʼ ndəŋ kʉəkə-ɔŋ mu njaafɛ̀ʼ kàhə mbɔ b̈ə téʼ ɔ gwè mu njaa. 18 Ndʉʉ ndə bʉə ndə bɔ̂ŋ kie nukə te ɔ lɔ̀ hə sê tə́nə ndə məkwə́ʼ, təmə mɔ yʉ́ bɔ̂ŋ gìe ntɛ-kənu bʉ̂ʼʉ ndə mɔ kə́ kwɔ̀ʼtə mbɔ ɔ kə chìi fɛ. 19 Bɔŋ bɔ̂ŋ buŋ leʼ kə́ gìe nubə te bɛ ntɛ ndə bɔ̂ŋ lə̀ʼtə Nyii-yʉə leʼnə Jisobɛʼ ndə ɔ nɔʼ kə́ kwú, bɔŋ ndə Bɔɔ ghɔ̀ŋ mbɔ ɔ bíe mbi. 20 I chàa mɔ ndə ntɛ ndə bəkɔ mɔ tyúutə mbiʼtə-ɔ̄ŋ, mɔ bíʼtə tʉ ɔŋ mbɔ ɔ kʉ̀ʉ ndə məgɛ̀ Jɛlosalɛŋ bə kwɛ̀ fɛʼɛ-ɛ chɔ te nubə-ɔ̄ŋ mɛɛ. 21 Bɔŋ ndʉʉ ndə Bɔɔ fʉ̀ʉtə mbɔ b̈ə gɛ̀ nə fɛʼɛ-ɛ bəshʉ, mɔ kàhə mbɔ b̈ə yá ɔ tʉ́ʼ tə mɔ yi tə́ŋ ɔŋ kɔ́ tʉ Fɔŋ-Luŋ."

22 Ndʉʉmɛ, Agliba ghɔ̀ŋ tʉ Fɛsto mbɔ, "Mɔ bu kʉ̀ʉ ndə məyʉ́ hə chu mbʉ wo-ghɔ̄ nə mbəŋ-ɔŋ."

Fɛsto bə̀ŋhə mbɔ, "Yɔ̂ŋ, a bu yʉ́ hə kəghɔ-ɔ."

Bɔɔ kwə́ʼ tʉ Agliba

23 Mbi kʉ̂ʉ sɛŋ fíi, Agliba ghɔŋ Bɛni gwè nə kuŋkwɛʼtəŋhə mbʉə-bɔŋ, gwè ŋíi mu njaa-nchəŋtəkwɛʼtəŋ ghɔŋbə bəntəŋbəshʉ-bʉəkwɛʼtəŋ-bəsɔge leʼnə bʉəkwɛʼtəŋ mu mbʉ kəyəŋkwɛʼtəŋ. Ndʉʉmɛ, Fɛsto kàhə b̈ə gwè nə Bɔɔ mu njaa. 24 Fɛsto ghɔ̀ŋ mbɔ, "Fɔŋ Agliba ghɔŋbə bʉə bənchəŋ ndə bɔ̂ŋ bɛ fɛ̄ŋ, nɔ wo nɔ ndə bʉə-Juu bənchəŋ mu Jɛlosalɛŋ leʼnə fɛ̄ŋ fʉ̀ʉtə mɔ te ɔ, kə́ tíitə mbɔ ɔ la kie ndə mə-kə́-chí mbi fɛ. 25 Bɔŋ mɔ nyíɛ nu-bʉəbʉə-kə ndə ɔ nɔʼ chìi tə bəkɔ bə yí ɔ fɛ. Ndə mbəŋ-ɛŋ kə fʉ̀ʉtə mbɔ b̈ə gɛ̀ nə fɛʼɛ-ɛ tʉ Fɔŋ-Luŋ, mɔ gɛ̀ nə shʉbə ndə mətə́ŋ ɔŋ kɔ́ tʉ ɔŋ, 26 bɔŋ təmə kie ŋkɛŋ kənu ndə mənyɔ̀ʼ tʉ tie-ɔ te ɔ fɛ. Nɔ chìi yɔŋ-yə, mɔ gwè nə nɔŋ bəshʉ bii bənchəŋ, kɛŋ tʉ mbəŋ-aŋ, Fɔŋ Agliba, mbɔ ndʉʉ ndə bʉʼʉ bu tyúutə ɔŋ nɔ, mɔ chʉʼ kie nukə ndə mənyɔ̀ʼ. 27 Bʉʼka i nɔ bɛ nə nu-bənɔ̌ʼɔ-kə tʉ mɔ ndə mətə́ŋ wo hə njaa-chaŋ kɔ́ tʉ Fɔŋ-Luŋ, təmə gìe nukə ndə ɔ chìi fɛ."