1 Bɔŋ Sɔɔ kə́ kàatə haʼ bələŋ ndə məyítə vâafɔʼɔ-Tiekətʉ. Ndʉʉmɛ, ɔ gɛ̀ bìatə Tiefɛ̀ʼndɛŋkwɛʼtəŋNyii, 2 bíʼtə tʉ ɔŋ mbɔ ɔ kɔ́ bəŋwɔʼnə tʉ ɔŋ, ndə məkie ghʉəʼkə ndə məgɛ̀ mu-njaagháaNyii-hə mu kəyəŋkwɛʼtəŋ Damasiko, gɛ̀ yátə bʉə ndə bɔ̂ŋ nɔʼ bɛ́ŋ mbʉ Fia-Nyii, bəke ghɔŋbə bələŋ, kɔ́ʼtə gwè nə bɔŋ Jɛlosalɛŋ gwè fʉ̀əŋ chaŋ.

3 Ndʉʉ ndə ɔ kə gɛ̀ tə kə́ kə́ŋhə mbʉə Damasiko, kə́ kwɔnə nyíɛ, kɛʼɛbɛʼ báa hə yuo lèʼnə mbʉə-ɔ. 4 Sɔɔ gwù sê yʉ́ gyʉʉ, i kə́ ghɔ̀ŋ mbɔ, "Sɔɔ! Sɔɔ! A tʉʼ chɔ́ŋhə mɔ mbuka?"

5 Sɔɔ bíʼtə mbɔ, "A buŋ bɛ nda lɔɔŋ, Tiekətʉ?"

Mbʉ gyʉʉ bə̀ŋhə mbɔ, "Mɔ nɔ bɛ Jiso, wo ndə a tʉʼ chɔ́ŋhə ɔŋ le. 6 Nduɔ, lɔ̀ hə sê gɛ̀ mu kəyəŋkwɛʼtəŋ, bə bu shyíi a nə nukə ndə a kie ndə məchìi."

7 Mbʉ bʉə ndə ghɔŋbə Sɔɔ kə bɛ mɔʼɔ, faa-kwu-kə yá bɔŋ, chu-yʉə chíe, bʉʼka bɔ̂ŋ yʉ́ gyʉʉ-wo bɔŋ təmə kə́ nyíɛ wo fɛ.Sɔɔ fia Damasiko 8 Sɔɔ lɔ̀ hə sê, shʉ-i ŋɔ́ʼnə bɔŋ təmə ɔ kə́ nyíɛ yəŋkə fɛ. Ndʉʉghɔfii, bɔ̂ŋ yá kwii-i, gɛ̀ nə nɔŋ Damasiko. 9 Ɔ chí chɔ ndə chibə itia, təmə nyíɛ yəŋkə fɛ, təmə kɔ́ fɔkə chu-ɔ fɛ.

10 Ndʉʉ-ghɔ̄, wobɛʼ nɔ kə bɛ ghɔ mu Damasiko bə kə́ tíi ɔ nə Anania ndə ɔ kə bɛ vaafɔ̀ʼ-Jiso. Mbʉ Tiekətʉ kwə́ʼ tʉ ɔŋ mu njəŋ təmə ɔ kə́ bɛ́ŋbɛ́ŋ fɛ, tíi ɔ mbɔ, "Anania!"

Ɔ bə̀ŋhə mbɔ, "Yʉ́, Tie-ɔ."

11 Mbʉ Tiekətʉ ghɔ̀ŋ mbɔ, "Gɛ̀ mu fia ndə bə tíi nə Fia Ndyʉndyʉ, gɛ̀ mu njaa-Juda. Kʉ̂ʉ gɛ̀ dàa chɔ nɔ bíʼtə Sɔɔ ndə ɔ lɔ̀ hə Taashuʼ, ɔ tʉʼ gwía tʉ mɔ nduɔnduɔ. 12 Mɔ nɔʼ dʉ̀ʼ wo tʉ ɔŋ mu njəŋ təmə ɔ kə́ bɛ́ŋbɛ́ŋ fɛ, wo ndə bə tíi ɔ nə Anania, ɔ sʉ́ʉ mɔ̀ʼ ghɔkə-i ndəŋ ɔŋ, chʉ́ʼ ɔ, ɔ bʉ̀nə nyíɛ yəŋkə."

13 Bɔŋ Anania bə̀ŋhə mbɔ, "Tiekətʉ, mɔ nɔʼ yʉ́ nu-bʉəbʉə-bə ndə wo-ɔ̄ nɔʼ fɔ̀ʼ tʉ bʉə-ba mu Jɛlosalɛŋ. 14 Baʼa bɔŋleʼ yʉ́ mbɔ bətiefɛ̀ʼndɛŋNyii la nɔʼ kɔ́ ghʉəʼkə tʉ ɔŋ ndə məyátə bʉə ndə bɔ̂ŋ tʉʼ tíi yie-a fɛ̀ŋ mbɔ a kwáa bɔŋ."

15 Bɔŋ Tiekətʉ ghɔ̀ŋ mbɔ, "Gɛ̀ chìi nukə ndə mɔ ghɔ̀ŋ tʉ a. Bʉʼka Sɔɔ nɔ bɛ fɔ-fɔʼɔ-kə-ɔŋ ndə mɔ nɔʼ séʼ ndə məlɔ̀ʼ yie-ɔ tʉ bʉə ndə bɔ̂ŋ gòʼ təmə bɛ bʉə-Juu fɛ ghɔŋbə bəfɔŋ leʼnə bʉə-Isilɛ. 16 Bɔŋ mɔ bu leʼ dʉ̀ʼ tʉ ɔŋ ntyʉʉ ndə ɔ kie ndə mənyíɛ ŋgʉəʼ yie-mɔ."

17 Ndʉʉghɔfii, Anania gɛ̀ sʉ́ʉ mu njaa-ghɔ̄ ndə Sɔɔ kə bɛ chɔ le, mɔ̀ʼ ghɔkə-i ndəŋ ɔŋ, ghɔ̀ŋ mbɔ, "Liŋ-ɔŋ Sɔɔ, Jiso Tiekətʉ ndə ɔ fyú tʉ a sêfia ndʉʉ ndə a kə́ gwè fɛ̄ŋ le, nɔ tə́ŋ mɔ tʉ a mbɔ a chʉʼ bʉ̀nə nyíɛ yəŋkə, LyʉʉhəNyiikə bɔŋleʼ jyʉ́ʉhə a." 18 Haʼ ndʉʉghɔfii, fɔbɛʼkə nə wuo-mbɔʼ-bə fyú gwùtə hə shʉ Sɔɔ, ɔ bʉ̀nə nyíɛ yəŋkə. Ɔ lɔ̀ hə sê, fí muu. 19 Yɔ̄ŋ-yə kʉ̂ʉ tíŋ, Sɔɔ yú fɔkə, ghʉəʼkə gwè mbʉə-ɔ.

Sɔɔ chí ghɔŋbə vâafɔʼɔ-Jiso mu Damasiko ndə mbyu-bəchî-hə. 20 Haʼ ndʉʉghɔfii, ɔ lɔ̀ʼ ŋgieNyiikə te Jiso mu-njaagháaNyii-hə, kə́ ghɔ̀ŋ mbɔ, "Ɔ nɔ bɛ VaaNyii shʉəŋ."

21 Bʉə bənchəŋ ndə bɔ̂ŋ yʉ́ ɔ, i chíe chu-yʉə. Bɔ̂ŋ kə́ bíʼtə mbɔ, "Kaa wo nɔ ndə ɔ kə́ chɔ́ŋhə bʉə daa ndə bɔ̂ŋ kə́ tíi yie-Jiso ndə məbɛ ŋkwaa-yʉə mu Jɛlosalɛŋ le fe? Baʼa bɔŋleʼ kínə ghɔ mbɔ ɔ nɔ kə gwè fɛ̄ŋ ndə məyátə bɔŋ, kɔ́ bəchaŋ təkwii-bɔŋ, gɛ̀ nə bɔŋ tʉ bətiefɛ̀ʼndɛŋNyii."

22 Sɔɔ bìʼ lɔ̀ʼ ŋgieNyiikə i gɛ̀ nə shʉbə shʉ́əshʉ́ə. Ɔ kɛŋ dʉ̀ʼ shʉ́əshʉ́ə mbɔ Jiso la bɛ Wo ndə Nyii Kùŋ Tə́ŋ təmə bʉə-Juu ndə bɔ̂ŋ bɛ Damasiko mə tɛ́ŋ fɛ. 23 Ndə chîbə kə́ tíŋ, bəntəŋbəshʉ-bʉə-Juu shʉ̀tə ndə məyí ɔ.

24 Bɔŋ bə shyíi Sɔɔ nə nubə ndə bɔ̂ŋ nɔʼ shʉ̀tə yie-ɔ. Bɔ̂ŋ bɔŋ-nɔ-kə́-leʼ kʉ̀ʼ Sɔɔ ndʉʉnəchî ghɔŋbə ndʉʉbətyuʼ ndəŋ chu-lɔ̂ŋ-tə ndə i ŋíi mu lɔʼɔ, ndə məyí ɔ. 25 Bɔŋ kʉ̂ʉ bɛ ndʉʉbətyuʼ, vâafɔʼɔ Sɔɔ dùʼhə ɔŋ mu kəshyii, sʉ́ʉhə ɔŋ ndəŋ mbyuu ndəŋ sɔʼ-lɔ̂ŋ-kə shúʼhə ɔŋ tʉ́ʼ mbi.Bə shúʼhə Bɔɔ mu kəshyii ndəŋ mbyuu lɔ̌ŋ tʉ́ʼ mbi

26 Ndʉʉ ndə Sɔɔ dàa Jɛlosalɛŋ, ɔ kɔ̀ɔtə ndə məbìa vâafɔʼɔ-Jiso, bɔŋ bɔ̂ŋ kə́ fàa ɔ, kə́ kwɔ̀ʼtə mbɔ ndʉʉbɛʼ ɔ bɛ vaafɔ̀ʼ-Jiso fɛ. 27 Ndʉʉmɛ, Banaba lʉ̀ ɔ gwè nə nɔŋ tʉ bəlɔntəŋNyii, shyíi bɔŋ ndə Sɔɔ nɔʼ nyíɛ Tiekətʉ sêfia Damasiko. Bɔŋleʼ ndə Tiekətʉ nɔʼ kwə́ʼ tʉ Sɔɔ leʼnə ntɛ ndə ɔ lɔ̀ʼ ŋgieNyiikə yie-Jiso nə fyii tə̀ŋnə mu Damasiko. 28 Ndʉʉmɛ, Sɔɔ káa ghɔŋ bɔŋ kə́ tòʼ gɛ̀ bəyəŋbəyəŋ mu Jɛlosalɛŋ, kə́ lɔ̀ʼ ŋgieNyiikə te yie-Tiekətʉ nə fyii tə̀ŋnə. 29 Ɔ túŋ bəŋʉʉ ghɔŋbə bʉə-Juubɛʼbə ndə bɔ̂ŋ kə́ kwə́ʼ ŋgie-Gili-kə, bɔŋ bɔ̂ŋ kə́ kʉ́ʉ fia ndə məyí ɔ. 30 Ndʉʉ ndə bʉə-Nyii yʉ́ yɔ̄ŋ-yə, bɔ̂ŋ lʉ̀ ɔ, tíŋ nə nɔŋ Kasalia, tə́ŋ ɔŋ kɔ́ lɔʼɔbə-ɔŋ Taashuʼ.

31 Fyiighʉ́ənə bɛ mu-bəchɔshi-hə mu Judia, Galili leʼnə mu Samalia. LyʉʉhəNyiikə kə́ kwèʼhə chɔshi, i kə́ shʉ́ə gɛ̀ nə shʉbə, bʉə buŋmbi kə́ bìʼ bɔŋ ndə məchimbi-yʉə tʉʼ kɔ́ kuŋhə tʉ Tiekətʉ.

32 Bita kə́ tòʼ gɛ̀ bəyəŋbəyəŋ ndə mənyíɛ bʉə-Nyii. Ɔ gɛ̀ bìatə bʉə-Nyii mu Lida ndə bɛ yəŋkwɛʼtəŋkə. 33 Nɔ yəŋkə nɔ ndə ɔ kə bìatə wobɛʼ chɔ ndə bə kə́ tíi ɔ nə Ania ndə ɔ nɔʼ kə kwú kəviakəmɔʼ bɔŋ-nɔʼ-leʼ kə nʉ̀ʉ kəbɔ ndə ŋgʉʼhə fɔ̂ŋ. 34 Bita ghɔ̀ŋ tʉ ɔŋ mbɔ, "Ania, Jiso Klai chìi a kie nchʉʼ-a! Lɔ̀ hə sê shʉ̀tə bɔkə-a!" Haʼ ndʉʉmɛ, ɔ kie nchʉʼ lɔ̀ hə sê. 35 Ndʉʉmɛ, i chìi bʉə-Lida ghɔŋ Shalɔŋ bənchəŋ kíahə fyiihə-ʉə tʉ Tiekətʉ ndʉʉ ndə bɔ̂ŋ kə nyíɛ Ania, ɔ lɔ̀ hə sê kə́ tòʼ.

36 Wokebɛʼ nɔ nə bɛ ghɔ Joba ndə ɔ nɔʼ bɛ́ŋ Nyii, bə kə́ tíi ɔ nə Tabita (i kə́ bɛ kəŋgie Gili mbɔ Doka). Ɔ kə́ chʉʼ fɔ̀ʼ nu-jyujyu-bə tʉ bəbɛʼbʉə bɔŋ-kə́-leʼ kwáa bʉə-mbʉʼ. 37 Kʉ̂ʉ bɛ ndʉʉ-ghɔ̄, ɔ yɔ́ʼ tə buŋ kwú. Bəwoke-bi shʉ̀tə ɔŋ mbɔ b̈ə tyúu ɔ, mɔ̀ʼ ɔ mu njəŋ-njaa-kweghɔʼ. 38 Bɔŋ ndʉʉ ndə vâafɔʼɔ-Jiso mu Joba kə yʉ́ mbɔ Bita nɔʼ kə́ŋhə mbʉə bɔŋ Lida, ndʉʉmɛ, bɔ̂ŋ tə́ŋ bʉə bəbûu tʉ ɔŋ mbɔ b̈ɔ̂ŋ gɛ̀ fʉ̀ʉtə ɔŋ mbɔ ɔ̈ kɔ̀ɔtə gwè haʼ ndʉʉmɛ.

39 Bita bʉ̀nə gɛ̀ ghɔŋ bɔŋ. Kɛŋ ndə bɔ̂ŋ tuŋ dàa haʼ ndʉʉghɔfii, bɔ̂ŋ lʉ̀ ɔ kóʼ gɛ̀ nə nɔŋ mu mbʉ njəŋ-njaa-kweghɔʼ. Mbʉ njəŋ njaa kə́ bɛ ilə́ŋnə nə bəkwuʼ bəke, kə́ gwía, dʉ̀ʼ ndyi-mu-mbʉə-hə ghɔŋbə ndyi-fəʼə-hə ndə mbʉ Doka kə chìi ndʉʉ ndə ghɔŋ bɔŋ kə bɛ mɔʼɔ. 40 Bɔŋ Bita téʼ tʉ bɔŋ bənchəŋ bɔ̂ŋ fyú mbi. Ɔ bè kweʼtəbə-i sê, gháaNyii, kíahə ŋwɔŋ-ɛŋ tʉ mbʉ kəŋkwu wo, ghɔ̀ŋ mbɔ, "Tabita, lɔ̀ hə sê!" Ɔ yɔ́ʼ shʉ-i, kʉ̂ʉ nyíɛ Bita, bə̀ŋhə ŋwɔŋ-ɛŋ dùʼ. 41 Bita chɔ̀ʼhə ghɔkə-i kɔ́ tʉ ɔŋ kwáa ɔ ndə mətə́nə, ɔ lɔ̀ tə́nə. Ndʉʉmɛ, ɔ tíi bʉə-Nyii ghɔŋbə mbʉ bəkwuʼ-bəke mu njaa, dʉ̀ʼ tʉ bɔŋ mbɔ ɔ la bɛ ŋɛnə.

42 Bəsɔʼka wɔ̀ʼnə mu mbʉ kəyəŋkwɛʼtəŋ Joba inchəŋ, bʉə buŋmbi kɔ́ fyiihə-ʉə tʉ Tiekətʉ. 43 Bita chí mu Joba tə dɔ̀ŋnə, kə́ chí ghɔŋ Samu mɔʼɔ, kə́ bɛ wo ndə ɔ kə́ núʼ gwo-nyaa-hə.