1 Nuʼ Mushi nɔ nə bɛ bə haʼ lyʉʉhə-bənu-jyujyu-bə ndə i kə bíe bəshʉ ndə məgwè, kə bɛ ŋkɛŋ-bənu-hə nə mbəŋ-yʉə fɛ. Bʉʼka yɔ̄ŋ-yə, məfɛ̀ʼndɛŋhə ndə bə kə́ fɛ̀ʼ təvɛʼtəvɛʼ, ŋgʉʼʉ tə mì ŋgʉʼʉ, təmə i bɔŋ kə mə chìi bʉə ndə bɔ̂ŋ kə́ gwè ndə mələ̀ʼtə Nyii ndə bɛ nchəŋnchəŋ-ɛŋ ndə Nyii kə kʉ̀ʉ mbɔ b̈ɔŋ bɛ fɛ. 2 Kaʼ kʉ̌ʉ bɛ mbɔ məfɛ̀ʼndɛŋ kʉ̌ʉ nɔʼ kə́ sʉ̀ bʉ̂ʼ-bʉə-tə ndə bɔ̂ŋ kə́ gháaNyii tə bɔ̂ŋ bɛ tʉ́ʉnə, bɔ̂ŋ káa məfɛ̀ʼndɛŋ, təmə tʉkə-ʉə mə leʼ vyíi ndəŋ bʉ̂ʼʉ fɛ.

3 Bɔŋ məfɛ̀ʼndɛŋ ŋgʉʼŋgʉʼhə nɔ kə bɛ bə ndə məkwɛ́nə bʉ̂ʼ-bʉə-tə tʉ bɔŋ. 4 Bʉʼka fɔbʉə-bələŋ-naʼ-kə ghɔŋbə fɔbʉə-biŋgoʼhə-kə kə kie ghʉəʼkə ndə məsʉ̀ bʉ̂ʼtə fɛ. 5 Bʉʼka yɔ̄ŋ-yə, ndʉʉ ndə Klai kə bɛ ndə məgwè mu kəwʉʉnəmbi, ɔ ghɔ̀ŋ tʉ Nyii mbɔ,

"A kə kʉ̀ʉ mə fɛ̀ʼndɛŋ ghɔŋbə kɔkə fɛ,

a bɔŋ nɔʼ shʉ̀tə mbʉə tʉ mɔ ndə məkɔ́ tʉ a.

6 Tʉʉ-a kə bʉ̀ʉ ndəŋ nyaa-tɔ̀ŋ-hə inchəŋ ndəŋ yəŋ-fɛ̀ʼndɛŋ-kə*-a fɛ,

byuunɔ bəbɛʼkɔkə yie bʉ̂ʼʉ fɛ.

7 Ndʉʉmɛ, mɔ ghɔ̀ŋ mbɔ, ‘Mɔ nɔ, Oo Nyii, mɔ nɔʼ gwè ndə məfɔ̀ʼ nukə ndə a kʉ̀ʉ

haʼ ndə bə kə nyɔ̀ʼ te mɔ mu ŋwɔʼnə-nuʼ.’ "*

8 Klai nɔ kə fəŋ ghɔ̀ŋ mbɔ, "A kə kʉ̀ʉ byuunɔ i kə bʉʉ-a mbɔ b̈ə fɛ̀ʼndɛŋ tʉ a nə nyaahə byuunɔ kɔ́ kɔkə byuunɔ tɔ̀ŋ nyaahə ndəŋ kəyəŋ fɛ̀ʼndɛŋ byuunɔ ibɛʼ-yə kɔkə ndə i sʉ̀ bʉ̂ʼʉ fɛ." Ɔ nɔ kə gìe yɔ̄ŋ-yə bɔŋ ndə nuʼ-Mushi kə gìe mbɔ b̈ə fɔ̀ʼ nɔ. 9 Ɔ bʉ̀nə bìʼ ghɔ̀ŋ mbɔ, "Mɔ nɔ, Oo Nyii ndə məfɔ̀ʼ nukə ndə a kʉ̀ʉ." Nɔ, Nyii nɔ kə kíahə ntɛ ndə bə kə́ fəŋ fɛ̀ʼndɛŋ mbɔ ɔ chʉʼ gwè nə yi-fefe-yə. 10 Bʉʼka Jiso Klai kə fɔ̀ʼ nukə ndə Nyii kə kʉ̀ʉ mbɔ ɔ̈ fɔ̀ʼ, bə nɔʼ sʉ̀ bʉʼʉ nduɔ, bʉʼʉ bɛ tʉ́ʉnə ndəŋ bʉ̂ʼʉ tíŋ hə bɔ̌ŋ yi-yə mbɔʼ-mbʉə ndə ɔ kɔ́, bə yí, vɛʼ mɔʼɔ tə mbi nə lìʼ.

11 Mu nduɔŋ məŋkaa, wofɛ̀ʼndɛŋNyii bʉə-Juu nɔ kə́ tə́nə mbʉə kəyəŋ fɛ̀ʼndɛŋ bəchibəchi kə́ fɛ̀ʼ haʼ ntɛ ndɛŋ imɔʼ bìʼ fɛ̀ʼ, təmə i mə nə sʉ̀ bʉ̂ʼtə fɛ. 12 Bɔŋ ndʉʉ ndə Klai kə fɛ̀ʼ mbyu ndɛŋ imɔʼ ndə i bu yʉ́ təmə liʼ-i ghɔ fɛ te bʉ̂ʼtə, ɔ yétə sê kwiiləŋ Nyii ndə i bɛ yuo, 13 kə́ bíe chyìi lʉ̀ hə vɛʼ ghɔ, tə ndʉʉ yi gwè ndə bə bu chìi bʉə-bàa-bi nʉ̀ʉ sê ɔ̈ tʉ́ʼ nchɔʼhə-i ndəŋ bɔŋ. 14 Nɔ, tíŋ hə bɔ̌ŋ mbyu ndɛŋ imɔʼ ndə ɔ fɛ̀ʼ, ɔ chìi bʉə ndə bə tʉʼ chìi bɔŋ ndə məbɛ ŋkʉ̂ʉ təmə bɔ̂ŋ leʼ kie kwɔtəkə təmə liʼ-i ghɔ fɛ.

15 Bɔŋ LyʉʉhəNyiikə bɔŋleʼ nú gwù tʉ bʉʼʉ mbɔ nukə-ɔ̄ŋ la bɛ shʉəŋ, ndə ɔ fəŋ ghɔ̀ŋ mbɔ,

16 "Tiekətʉ nɔ ghɔ̀ŋ mbɔ, nɔ bɛ ŋkaamə nɔ ndə mɔ bu gwìa baʼabə bʉə-Isilɛ ndʉʉ ndə chî-ghɔ̄-bə tíŋ,

mɔ bu chìi bɔŋ kie nuʼ-ɔŋ mu fyii-bɔŋ,

bɔŋ-bu-leʼ nyɔ̀ʼ mu ŋkwɔʼtə-yʉə."*

17 Ɔ bìʼ ghɔ̀ŋ mbɔ,

"Mɔ bieleʼ nə kwɛ́nə bʉ̂ʼtə-ʉə ghɔŋbə nu-bʉəbʉə-bə-ʉə fɛ."*

18 Nɔ, ndʉʉ ndə bə nɔʼ sʉ̀fyii hə ndəŋ bʉ̂ʼʉ, bə leʼ kie ndə məfɛ̀ʼndɛŋ bʉʼka bʉ̂ʼʉ fɛ.

19 Nduɔ bəliŋ-bɔŋ, fyiihə-ʉʼʉ nɔ bɛ shʉ́əshʉ́ə mbɔ bəkɔ bʉʼʉ ŋíi mu Fɔŋ kəYəŋ kəChɔŋ tíŋ hə bɔ̌ŋ fɔbʉə-Jiso-kə. 20 Ɔ nɔʼ ŋɔ́ʼhə fia fefe ndə ĩ kɔ́ məchímbi tʉ bʉʼʉ ndə məgɛ̀ tʉ Nyii tíŋ hə bɔ̌ŋ mbɔʼ-mbʉə-e ndə i bɛ nə mbʉ ndyi ndə i kə kyʉ̀hə Fɔŋ kəYəŋ kəChɔŋ mu njaafɛ̀ʼndɛŋNyii.

21 Bʉʼʉ bɔŋleʼ kie fɔŋ wofɛ̀ʼndɛŋNyii ndə ɔ tʉʼ gìe kətʉ njaa-Nyii. 22 Bʉʼka nubə-ɔ̄ŋ, b̈ʉʼʉ kwɛ̀ʼtə gwè mbʉə Nyii nə fyii shʉəŋ ndə i yʉ́əʼnə ndəŋ məmɔ̀ʼfyii ndəŋ Nyii inchəŋ, ghɔŋbə fyii ndə bə nɔʼ ŋwìʼ fɔbʉə-Klai-kə ndəŋ ghɔ mbɔ i chʉʼ bɛ itʉ́ʉnə ndəŋ ŋkwɔʼtə bʉəbʉə, ghɔŋbə mbʉə ndə bə nɔʼ sʉ̀ nə muu-tʉʉnə-mə.*

23 B̈ʉʼʉ yá yəŋkə ndə bʉʼʉ ghɔ̀ŋ mbɔ bʉʼʉ yʉ́əʼnə ndəŋ ghɔ tə́nə chɔ shʉ́əshʉ́ə təmə kə́ yá fɛ̄ŋ yá fɛ̄ŋ fɛ, bʉʼka Nyii bu fɔ̀ʼ nukə ndə ɔ kɔ̀ʼnə. 24 B̈ʉʼʉ kwɔ̀ʼtə ntɛhə ndə bəkɔ bʉʼʉ kwèʼhə ŋwɔŋtə-ʉʼʉ ndə məkie ŋkʉ̂ʉ bɔŋleʼ kə́ fɔ̀ʼ fɔʼ-jyujyu-tə, 25 təmə lèʼnə ndə mə-kə́-chə̀ŋtə kəyəŋ kəmɔʼ fɛ, ndə bəbɛʼbʉə nɔʼ lʉ̀ bɛ nuʼ-yʉə, b̈ʉʼʉ bɔŋ kə́ kwèʼhə ŋwɔŋtə-ʉʼʉ, fɔŋ ɛŋ kə́ bɛ ndə bii tʉʼ nyíɛ ndə mbʉ kəChî Tiekətʉ tʉʼ kə́ŋhə gwè.

26 Bʉʼka mbɔ kaʼ bʉʼʉ kə́ shʉəŋshʉəŋ chìi bʉ̂ʼʉ ndʉʉ ndə bʉʼʉ nɔʼ kɛŋ kie mbʉ kəŋgie shʉəŋ, b̈ʉʼʉ kə́ kínə mbɔ fɔ-fɛ̀ʼndɛŋbɛʼ-kə leʼbie ndə məsʉ̀ bʉ̂ʼʉ nə yɔŋ fɛ. 27 Bɔŋ fɔkə ndə i bíe nɔ bɛ mə-kə́-chyìi məchʉ̀ə ŋkwɛ bʉəbʉə nə faa-kwu-kə mu fyii-a ghɔŋbə viʼi shʉ́əshʉ́ə ndə i tʉʼ gwè ndə mətɔ̀ŋ bʉə ndə bɔ̂ŋ tʉʼ dʉ̀ʉhə Nyii. 28 Wo nɔ nə kə́ chɔ́ʼ nuʼ-Mushi nɔ, bə yí ɔ təmə tʉvyiikə fɛ, kaʼ bʉə bəbûu byuunɔ bʉə bətia nú gwù mbʉ kənu ndə ɔ chìi. 29 Kwɔ̀ʼtə ndʉʉmɛ, ntɛ ŋgʉəʼ shʉ́əshʉ́ə ndə i bu bɛ tʉ wo ndə ɔ jɛ́ŋhə VaaNyii, lʉ̀ fɔbʉə-mbʉ-məŋkaa-kə ndə i kə sʉ̀ ɔ ndəŋ bʉ̂ʼʉ-e fi nə bɛ fɔ-njʉnjʉ-kə, kə́ chɛ̀ŋ Lyʉʉhə-buuŋjyu-Nyii-kə.

30 Bʉʼka bʉʼʉ nɔ kínə wo ndə ɔ kə ghɔ̀ŋ mbɔ,

"Mətyú bʉ̂ʼʉ nɔ bɛ yəŋkə-ɔŋ,

mɔ bu tyú."*

Ɔ bɔŋleʼ ghɔ̀ŋ ghɔ mbɔ,

"Tiekətʉ bu chʉ̀ə ŋkwɛ bʉə-bi."*

31 Nɔ bɛ nu-ŋkwɔŋŋkwɔŋ-kə tʉ Nyii ndə ɔ bɛ ghɔ ndə mə-nə-mɔ̀ʼ ghɔkə-i ndəŋ ɔŋ.

32 B̈ii bɔŋ kwɛ́nə fəŋ bəchî ndʉʉ ndə bə nə fəŋ ŋɔ́ʼhə shʉ-yii, b̈ii kínə shʉəŋ, b̈ii lyʉ̀ʉtə́nə ndə mənyíɛ ŋgʉəʼ shʉ́əshʉ́ə təmə bɔŋleʼ gwù fɛ. 33 Nɔ nə kə́ bɛ vɛʼbɛʼ nɔ bə mɔ̀ʼ tʉvyiikə-ii mu bʉə, gwúu bii bɔŋleʼ bɛ vɛʼbɛʼ nɔ bii bìa bʉə ndə bə kɔ́ haʼ ntɛ ŋgʉəʼ-ɔ̄ tʉ bɔŋ, bii bɔŋ nyíɛ mbʉ ŋgʉəʼ mɔʼɔ. 34 Bʉʼka bii nɔ kə kie tʉvyiikə tʉ bʉə ndə bɔ̂ŋ kə bɛ mu njaa-chaŋ bɔŋleʼ kə bɛ ndʉʉ ndə bə kə yá fɔbə-ii fí, bii fí haʼ nə tʉʉjyu, kə́ kínə mbɔ bii nɔ kie fɔbə ndə i bʉ̀ʉ chàa yɔŋ, bɔŋ kə́ bɛ yi-yə ndə i bu chí dɔ̀ŋnə təmə liʼ-i ghɔ fɛ.

35 Nɔ, kə bii mə mɛ̀ʼ fyii tə́nə-yii fɛ, bʉʼka i bu gwè nə lɔʼ-yɔ́ŋyɔ́ŋ-bə tʉ bii. 36 Bii nɔ kie ndə məlyʉ̀ʉtə́nə, kə mbɔ ndʉʉ ndə bii nɔʼ fɔ̀ʼ nukə ndə Nyii kʉ̀ʉ nɔ bii chʉʼ kie fɔbə ndə ɔ kə kɔ̀ʼnə. 37 Bʉʼka ŋwɔʼnə-Nyii nɔ ghɔ̀ŋ mbɔ,

"Ndə vaa kəkʉʉ məniʼ,

Wo ndə ɔ tʉʼ gwè bu gwè, ɔ kʉʉ tùu fɛ.

38 W̃o ndə ɔ bɛ ndyʉndyʉ nɔ chí mbi bə nə məmɔʼfyii-i ndəŋ mɔ.

Təmə tʉʉ-ɔ bɔŋ kʉʉ bʉ̀ʉ ndəŋ wo ndə ɔ bʉ̀nə bɔ̌ŋ fɛ."*

39 Bʉʼʉ bɔŋ kaa nuɔ-bʉə ndə bɔ̂ŋ bʉ̀nə bɔ̌ŋ Nyii kwú bɛ́ fɛ. Bʉʼʉ nɔ bɛ nuɔ-bʉə ndə bɔ̂ŋ mɔ̀ʼfyiihə-ʉʼʉ ndəŋ Nyii, bu kie ŋkwaa.