1 Ndʉʉghɔfii, ndə nuɔ bʉə-bɔ̄ŋ buŋmbi yə̀ŋhə bʉʼʉ fúu ndə bɔ̂ŋ nɔʼ dʉ̀ʼ nə məchimbi-yʉə ndə bɔ̂ŋ kə mɔ̀ʼfyiihə-ʉə ndəŋ Nyii nɔ, b̈ʉʼʉ mɛ̀ʼtə nubə inchəŋ ndə bəkɔ i byùutə bʉʼʉ ghɔŋbə bʉ̂ʼtə ndə i yùhə ndə məlʉ́əŋ bʉʼʉ, lyʉ̀ʉtə́nə ndə mənyʉ́ʉ mbʉ ndʉʉ ndə Nyii nɔʼ shʉ̀tə tʉ́ʼ bəshʉ-bʉʼʉ, 2 kə́ tʉ́ʼ shʉtə-ʉʼʉ ndəŋ Jiso, kə́ bɛ wo ndə məmɔʼfyiihə-ʉʼʉ ndəŋ Nyii gwè hə kəghɔ-ɔ, ɔ bɔŋleʼ kə́ bɛ wo ghɔ ndə ɔ chìi məmɔʼfyiihə-ʉʼʉ bɛ tə gɛ̀ kùu. Bʉʼka tʉʉjyu ndə i kə bɛ bəshʉ-ɔ, i chìi ɔ yá fyii-i tə kwú ndəŋ tyʉntɔɔnəkə, lʉ̀ tʉvyiinəkə ndə məkwú ndəŋ tyʉntɔɔnəkə ndə məbɛ njʉnjʉ. Bə nɔ kə dùʼhə ɔŋ ndəŋ kwiiləŋ Nyii ndəŋ fɔŋ kəyəŋ məgʉ́ə ndə i bɛ yuo. 3 B̈ii kwɔ̀ʼtə ntyʉʉ ŋgʉəʼ shʉ́əshʉ́ə ndə ɔ kə nyíɛ kəghɔ-bʉə bʉ̂ʼʉ, bʉʼka mbʉəhə-ii mə yi lʉ́ʉtə, bii káa. 4 Bʉʼka mətúunə tʉkə ndə bii tʉʼ túunə tʉkə-ii ndəŋ bʉ̂ʼʉ, chʉʼ shʉ́ə tə dàa kəyəŋ ndə fɔbʉəkə-ii bu bɛ́ chɔ fɛ.

5 Bii nɔ̂ʼ lèʼnə ŋgiebə ndə Nyii kə kwèʼhə bii nə yɔŋ nə vâa-bi le mɛ? Ndə i kə ghɔ̀ŋ mbɔ,

"Ŋaʼ, kə a mə yá sɔ́ʼ-Tiekətʉ nə ŋkwie ndʉʉ ndə ɔ tʉʼ sɔ́ʼ a,

kə mbʉə-a mə lʉ́ʉtə ndʉʉ ndə ɔ tʉʼ sɔ́ʼ a fɛ.

6 Bʉʼka ɔ̃ nɔ sɔ́ʼ wo ndə ɔ kʉ̀ʉ ɔ,

kə́ gwúu vaa təmiyɔŋ ndə ɔ bɛ́ŋ ɔŋ ndə məbɛ vaa-ɛ."*

7 B̈ii yá fyiihə-ii ndə ŋgʉəʼ ndə bii bɛ muŋgɔ ndə i bɛ nə ŋgwɔŋ ndə tie-vaa gwúu vâa-bi nə yɔŋ. Ŋgʉəʼ-yii nɔ tʉʼ dʉ̀ʼ mbɔ Nyii nɔ tʉʼ lʉ̀ bii nə vâa-bi. Vaa bɛ ghɔ ndə tie-e gòʼ təmə kə́ gwúu ɔ fɛ mɛ? 8 Kaʼ ɔ gòʼ təmə kə́ gwúu bii ndə ɔ gwúu vâa-bi bənchəŋ fɛ, i dʉ̀ʼ mbɔ bii kaa ŋkɛŋ vâa-bi fɛ, təmə bii nɔ bɛ vâa-bəghaa. 9 Nɔ bɛ haʼ nɔ ndə bʉʼʉ nɔʼ kə kie bətie-bʉʼʉ kəchisê fɛ̄ŋ ndə bɔ̂ŋ kə́ gwúu bʉʼʉ, bʉʼʉ bɔŋleʼ kə́ yʉ́ chu-yʉə. Nɔ, bii kwɔ̀ʼtə ndʉʉghɔfii mbɔ bʉʼʉ kie ndə məké ŋwɔŋtə-ʉʼʉ tʉ Tie-yʉʼʉ yɔ́ŋyɔ́ŋ ndə kie ɔ kie lyʉʉhəbə-ʉʼʉ, mbɔ bʉʼʉ chʉʼ kə́ chí mbi fe?

10 Bʉʼka bətie-bʉʼʉ kəchisê nɔ kə gwúu bʉʼʉ ndə vaa kəŋkwutə məniʼ ndə ntɛ ndə bɔ̂ŋ kə kwɔ̀ʼtə mbɔ i kʉ̀ʼnə tʉ bɔŋ, bɔŋ T̃ie-yʉʼʉ nɔ gwúu bʉʼʉ ndə bʉʉ-yʉʼʉ mbɔ bʉʼʉ chʉʼ bɛ ŋkʉʉ haʼ ndə ɔ bɛ ŋkʉʉ. 11 Sɔ́ʼ kaa ghɔ ndə ĩ gwè nə tʉʉjyu vɛʼ-ghɔ̄ fɛ, ĩ bɔŋ nɔ líŋ. I bɔŋ kwìhə nɔ gwè nə fyiighʉ́ənə ghɔŋbə məchímbi ndyʉndyʉ tʉ wo ndə ɔ yétə nukə chɔ.

12 Nɔ, b̈ii tə́nə shʉ́əshʉ́ə kie fyii, 13 kə́ chìi nubə ndyʉndyʉ bʉʼka bii mə yi lʉ́ʉtə, bɔŋ nɔ bɛ mbɔ bii tə́nə shʉ́əshʉ́ə.

14 B̈ii kɔ̀ɔtə ndə məkie fyiighʉ́ənə tʉ bʉə bənchəŋ bɔŋleʼ kie məchímbi ndə i bɛ ŋkʉʉ. Bʉʼka bʉə ndə bɔ̂ŋ gòʼ təmə bɛ ŋkʉʉ fɛ, mə nə nyíɛ Tiekətʉ fɛ. 15 B̈ii láa mbɔ wo mu bii mə yi bɛ́ buuŋjyu-Nyii fɛ. B̈ii nyíɛ mbɔ wo mu bii mə yi bɛ ghûu-buuŋbʉə-tə ndə i tʉʼ chʉ́ʼ, ndə məkoʼ-e gwè nə ntɔŋntɔŋ mu bʉə, kə́ bʉ́əhə bʉə buŋmbi fɛ. 16 B̈ii láa mbɔ wo mu bii mə yi bɛ ŋgaa bəsəŋ byuunɔ mɛ̀ʼtə fia-Nyii ndə Ɛso ndə ɔ kə fɛ̀ŋ yəŋkə-i nə fəŋ vaa ndə mbe bəfɔyu imɔʼ fɛ. 17 Bii nɔ kínə mbɔ ndʉʉ ndə ɔ kə́ bʉ̀nə kʉ̀ʉ mbʉ kəbiʼ bə tɛ́ŋ bʉʼka fia kə bɛ ghɔ tʉ ɔŋ ndə məbʉ̀nə kwɛ́nə ndəŋ nukə ndə ɔ nɔʼ kə fɔ̀ʼ fɛ, buŋ ndə nɔ, ɔ nɔ kə́ kʉ́ʉ mbʉ kəbiʼ nə shʉmə.

18 Bii chʉʼ gwè ndəŋ ŋkoʼ ndə bəkɔ b̈ii nyíɛ nə shʉ-yii, nə viʼi kwíinə bɛ chɔ ghɔŋbə njəŋkə, njəŋ-shʉ́əshʉ́ə-kə, leʼnə fʉ̂əŋ ndə bʉə-Isilɛ kə nyíɛ ndʉʉ ndə bɔ̂ŋ kə gwè dàa ŋkoʼ Sina fɛ. 19 Bɔ̂ŋ nɔ kə yʉ́ gyʉəʼə Nyii ndə i gìe, bɔŋleʼ yʉ́ ŋgiebə ndə i gwè hə ndə gyʉʉ. Ndʉʉ ndə mbʉ bʉə kə yʉ́ mbʉ gyʉʉ, bɔ̂ŋ fʉ̀ʉtə mbɔ bɔ̂ŋ mə leʼ yʉ́ ibɛʼ-yə ntəŋhə fɛ, 20 bʉʼka ŋkahə ndə i kə gwè tʉ bɔŋ nɔ kə shʉ́ə daa ndə i kə ghɔ̀ŋ mbɔ, "Kaʼ nyaa yi tʉ́ʼ wukə-i ndəŋ mbʉ ŋkoʼ, bə túŋtə ɔŋ nə ŋgoʼhə yí." 21 Mbʉ mbʉə ŋkoʼ nɔ kə fɛ̀ŋhə daa ndə i kə chìi Mushi ghɔ̀ŋ mbɔ, "I nɔ fɛ̀ŋhə mɔ, tʉ mɔ kə́ gwònə."

22 Bii bɔŋ nɔʼ gwè ndəŋ ŋkoʼ Sayɔŋ ndə bɛ yəŋkwɛʼtəŋ-Nyii-kə ndə ɔ bɛ ghɔ, kə́ bɛ Jɛlosalɛŋ ndə i bɛ yuo, nə ŋkɔŋŋkɔŋ-bʉəntəŋNyii-hə-i chɔ mu nchəŋtə tʉʉjyu. 23 Bii nɔʼ gwè ndəŋ nchəŋtə fəŋ vâa-Nyii ndə bə nɔʼ nyɔ̀ʼ yietə-ʉə yuo bɔŋleʼ gwè tʉ Nyii ndə ɔ tʉʼ chʉ̀ə ŋkwɛ bʉə bənchəŋ bɔŋ-nɔʼ-leʼ gwè ndəŋ kəyəŋ ndə lyʉʉhə-bʉə-bə ndə bɔ̂ŋ kə tə́nə ndyʉndyʉ bɛ chɔ, ndə bɔ̂ŋ gòʼ təmə kie kwɔtəkə fɛ. 24 Bii nɔʼ gwè tʉ Jiso, lìʼ ntuu ndə ɔ kə shʉ̀tə fia ndə ŋkaa-fefe-mə bɔŋleʼ gwè ndə fɔbʉə-ŋwìʼ-kə ndə i kɔ̀ʼnə fia jyujyu tə chàa fɔbʉə-Abɛ-kə.

25 B̈ii láa mbɔ bii mə chɔ́ʼ chu-wo ndə ɔ tʉʼ kwə́ʼ tʉ bii fɛ. Buŋ bʉə ndə bɔ̂ŋ kə tɛ́ŋ məyʉ́ chu-wo ndə ɔ kə gwè nə ntəŋ Nyii kəchisê kə mə líi fɛ, nɔ, bəkɔ bʉʼʉ yi líi təka, kaʼ bʉʼʉ tɛ́ŋ məyʉ́ chu-wo ndə ɔ tʉʼ hə kwə́ʼ yuo! 26 Nɔ kə bɛ vɛʼ ghɔ, gyʉʉ-i ŋɛ̀hə chisêkə, bɔŋ nduɔ ɔ nɔʼ kɔ̀ʼnə mbɔ, "Mɔ bieleʼ bìʼ ŋɛ̀hə bə haʼ chisêkə nduɔ fɛ, mɔ bu ŋɛ̀hə yuo ghɔ." 27 Ndə məghɔ̀ŋ mbɔ, "Biʼ " nɔ dʉ̀ʼ mbɔ fɔbə ndə Nyii kə bɔ́ŋ bə bu ŋɛ̀hə bɔŋleʼ fyúhə mbɔ shi káa haʼ fɔbə ndə bə mə ŋɛ̀hə fɛ.

28 Nɔ, b̈ʉʼʉ kə́ kɔ́ ndɔ Nyii ndə ghʉəʼkə ndə ɔ kɔ́ tʉ bʉʼʉ ndə mə-kə́-sɔ́ʼ ndə fɔkə mə nə ŋɛ̀hə fɛ. B̈ʉʼʉ kə́ kɔ́ ndɔ Nyii bɔŋleʼ lə̀ʼtə ɔŋ ndə ntɛ ndə i kʉ̀ʼnə tʉ ɔŋ, kɔ́ kuŋhə tʉ ɔŋ nə faakə, 29 bʉʼka Nyii-yʉʼʉ nɔ bɛ viʼi ndə i tɔ̀ŋ fɔbə inchəŋ i kyʉ́ʉ mì.