1 Bʉʼka yɔ̄ŋ-yə, b̈ʉʼʉ mɛ̀ʼtə fəŋ-bənu-tə ndə bʉʼʉ kə fəŋ yétə te Klai, ndʉʉ ndə bə kə lɔ̀ʼ ntəŋjyujyu tʉ bʉʼʉ, kə́ yétə nubə ndə i bu chìi bʉʼʉ tə̀ŋ. B̈ʉʼʉ məbʉ̀nə kə́ bìʼ yiesê te məshìe liɛŋ ndəŋ ŋkwu-təfɔʼ-bə ghɔŋbə məmɔ̀ʼfyii ndəŋ Nyii fɛ, 2 byuunɔ mədàhə te ntɛ-məfì-muu-hə, byuunɔ te məmɔ̀ʼ ghɔkə ndəŋ bʉə-Nyii gháaNyii tʉ bɔŋ ndʉʉ ndə bɔ̂ŋ fí muu, byuunɔ te məbʉnə-kóʼ-bʉə ndə bɔ̂ŋ nɔʼ kwú byuunɔ te məkwɛ̀ fɛʼɛ bəshʉ-Nyii təmə liʼ-i ghɔ fɛ. 3 Nɔ, kaʼ Nyii bɛ́ŋ, bʉʼʉ gɛ̀ nə shʉbə ndə mədàhə bʉə ndə mətə̀ŋ.

4 Bʉʼʉ bu gɛ̀ nə shʉbə bʉʼka nubɛʼkə kaa ghɔ ndə bəkɔ bə chìi tʉ bʉə bʉ̀nə shìe liɛŋtə-ʉə ndəŋ bʉ̂ʼtə-ʉə bʉə ndə bɔ̂ŋ nɔʼ gwù ndəŋ fia-Nyii fɛ. Shʉtə-ʉə nɔʼ kə fəŋ ŋɔ́ʼnə ndə məkínə shʉəŋ Nyii, bɔ̂ŋ nɔʼ kə fəŋ yúotə kɔ-Nyii-kə bɔŋleʼ kie yʉʉ ndə LyʉʉhəNyiikə. 5 Bɔ̂ŋ nɔʼ kə yúotə, nyíɛ ndə ŋgieNyiikə bʉ̀ʉ leʼnə ghʉəʼkə ndə Nyii bu yi dʉ̀ʼ ndə mbi ndə i bu yi gwè. 6 Kaʼ ndʉʉmɛ, bɔ̂ŋ bʉ̀nə gwù ndə mbʉ fia, nukə kaa ghɔ ndə məchìi b̈ɔ̂ŋ shìe liɛŋtə-ʉə ndəŋ bʉ̂ʼtə-ʉə fɛ, bʉʼka bɔ̂ŋ nə mbəŋtə-ʉə nɔ tʉʼ bʉ̀nə bìʼ kwɛ̀ŋ VaaNyii yí, mɔ̀ʼ tʉvyiikə-i ŋgwʉʉnə.

7 Ndʉʉ ndə wyuu tʉʼ fyíi təvɛʼtəvɛʼ, sê kə́ nú muu, kə́ kʉ́ʉnə ntɔŋ-jyujyu-mə tʉ wo ndə ɔ shùɔ ŋgwie, i kie biʼ-Nyii-kə chɔ. 8 Bɔŋ kaʼ i kóʼ bɛ ŋkwenjʉ ghɔŋbə ŋkinəŋkia, i kwáa ndə nubɛʼkə fɛ. I kə́ kə́ŋhə gwè tʉ Nyii ndə mətúu ndɔŋ kɔ́ mbʉ mutɔ, ndyiʼtə-i bɛ mbɔ b̈ə tɔ̀ŋ nə viʼi.

9 Kaʼ baʼa kə́ kwə́ʼ mənɔ, bɔŋ te bii, ŋkɛŋ bətieŋkɔŋ-baʼa, fyiihə-aʼ nɔ bɛ i tə́nə baʼa kə́ kwɔ̀ʼtə mbɔ bii nɔ tə́nə ndəŋ yʉʼ bənu, nubə ndə ĩ gwè nə ŋkwaaNyii. 10 Bʉʼka Nyii bɛ wo ndə ɔ kwɛ̀ fɛʼɛ ndyʉndyʉ, ɔ mə lèʼnə fɔʼtə-ii ghɔŋbə ŋkʉ̂ʉ ndə bii tʉʼ dʉ̀ʼ tʉ ɔŋ ndə məkwáa bəbɛʼbʉə-Nyii bɔŋ-kə́-leʼ bíe kwáa bɔŋ fɛ. 11 Baʼa nɔ tʉʼ kɛŋ mʉ̀ʉ shʉ́əshʉ́ə mbɔ b̈ii kɛŋ lyʉ̀ʉtə́nə haʼ nə ntɛ fyii ndə bii kie tə gɛ̀ lìʼ, mbɔ nubə ndə bii tʉʼ yʉ́əʼnə ndəŋ ghɔ, ï fyú shʉəŋ. 12 Baʼa kʉ̀ʉ mbɔ bii ghʉ̀ʉhə fɛ, bɔŋ mbɔ b̈ii bɛ nə bʉə ndə bɔ̂ŋ mɔ̀ʼfyiihə-ʉə ndəŋ Nyii, kə́ yá fyiihə-ʉə tə nə kia kie fɔbə ndə Nyii kə kɔ̀ʼnə tʉ bɔŋ.

13 Bʉʼka ndʉʉ ndə Nyii kə kɔ̀ʼnə nukə tʉ Ablahaŋ, bʉʼka mbɔ ɔ kə kie ibɛʼ-yə wo ndə ɔ kə gʉ́ə chàa ɔ fɛ, ndə bəkɔ ɔ kàa yie-e fɛ, ɔ nɔ kə kàa yi-yə yie ghɔ̀ŋ mbɔ,

14 "Mɔ nɔ tʉʼ kɔ̀ʼnə a mbɔ, mɔ bu bìʼ a

bɔŋleʼ bìʼ ŋgwie wo-a yɔ́ŋyɔ́ŋ."*

15 Ablahaŋ yá fyii-i tə nə kia kie fɔkə ndə Nyii kə kɔ̀ʼnə tʉ ɔŋ.

16 Ndʉʉ ndə bʉə kàa nukə, b̃ɔ̂ŋ nɔ kàa nə yie-wo ndə ɔ chàa bɔ̂ŋ, mbʉ kənu ndə bɔ̂ŋ kàa lìʼ ntuuhə-ʉə inchəŋ. 17 Tʉ bʉə ndə ŋkɔʼnə-Nyii kie ndə məgwè tʉ bɔŋ, Nyii nɔ kʉ̀ʉ ndə mə-kɛŋ-dʉ̀ʼ tʉ bɔŋ itʉ́ʉnə mbɔ ɔ mə yi kwɛ́nə nukə ndə ɔ nɔʼ kə shʉ̀tə fɛ, ndʉʉghɔfii ɔ kàa nukə bìʼ ndəŋ mbʉ ŋkɔʼnə. 18 Nɔ, nubə-ɔ̄ŋ nɔ bɛ ibûu ndə i mə nə kwɛ́nə fɛ, təmə Nyii bɔŋ mə leʼ chʉ̀ə lɛɛŋkə chɔ fɛ. Nɔ tíŋ hə bɔ̌ŋ nubə-ɔ̄ŋ, mbɔ mbəŋtə-ʉʼʉ ndə bʉʼʉ nɔʼ lə̀ŋ tʉkə-ʉʼʉ tɔʼɔ Nyii, chʉʼ kie fyii shʉ́əshʉ́ə ndə məyʉ́əʼnə ndəŋ ŋkɔʼnə ndə i bɛ bəshʉ bʉʼʉ. 19 Bʉʼʉ nɔ kie ŋkɔʼnə-ɔ̄ŋ ndə bʉʼʉ yʉ́əʼnə ndəŋ ghɔ, nə ŋkɔʼnə ndə fyiihə-ʉʼʉ tʉʼ tə́nə chɔ, nə ŋkɔʼnə ndə i yá bʉʼʉ tʉ́ʼ. Ŋkɔʼnə-ɔ̄ŋ ndə bʉʼʉ yʉ́əʼnə ndəŋ ghɔ nɔ, nɔ bɛ Jiso Klai, ndə ɔ yɛ́ʼ ŋkyʉʉhəkə ndə i bɛ mu njaafɛ̀ʼndɛŋNyii yuo ŋíi mu kətyʉəŋNyii. 20 Nɔ bɛ yəŋkə ndə Jiso nɔʼ kə fəŋ sʉ́ʉ muŋgɔ nə ntəŋbəshʉ yie-bʉʼʉ, bɛ tiefɛ̀ʼndɛŋkwɛʼtəŋNyii təmə liʼ-i ghɔ fɛ, ndə ntɛ ndə Mɛkisɛdɛ kə bɛ tiefɛ̀ʼndɛŋkwɛʼtəŋNyii.