1 Məmɔ̀ʼfyii nɔ bɛ məkínə shʉəŋ mbɔ nukə ndə a yʉ́əʼnə ndəŋ ghɔ kə́ chyìi bu yi fyú sê, nɔ bɛ məkie fyii shʉ́əshʉ́ə te nubə ndə a gòʼ təmə nɔʼ nyíɛ fɛ. 2 Nɔ bɛ yɔŋ ndə i kə chìi bʉə-bəshʉ kie yie jyujyu hə kəghɔ-Nyii.

3 Nɔ bɛ məmɔ̀ʼfyii ndəŋ Nyii ndə i chìi bʉʼʉ kínə mbɔ Nyii nɔ nə bɔ́ŋ wʉʉnəmbikə nə ŋgie-chu-kə-i, mbɔ fɔkə ndə bʉʼʉ tʉʼ nyíɛ laa, bə nɔ chìi nə fɔkə ndə bə mə nyíɛ fɛ.

4 Nɔ bɛ məmɔ̀ʼfyii ndə i kə chìi Abɛ kɔ́ yʉʼ bəfɔ fɛ̀ʼndɛŋ tʉ Nyii chàa Kɛɛŋ, Nyii nɔ kə bɛ́ŋ ɔŋ mbɔ ɔ la bɛ ndyʉndyʉ bʉʼka Nyii nɔ kə kwə́ʼ jyujyu te kɔkə-i. Bʉʼka məmɔ̀ʼfyii ndəŋ Nyii, Abɛ nɔ bíe kwə́ʼ laa, buŋ ndə ɔ nɔʼ kə kwú.

5 Nɔ kə bɛ bʉʼka Ɛnɔ kə mɔ̀ʼfyii ndəŋ Nyii ndə Nyii kə lʉ̀ ɔ yuo mbɔ ɔ mə nyíɛ kwú fɛ. Bə lʉ̀ ɔ təmə wo leʼnə nyíɛ ɔŋ fɛ bʉʼka Nyii nɔʼ kə lʉ̀ ɔ. Bə nɔ nə kə lʉ̀ ɔ yuo, tʉ Nyii nɔʼ kə kwə́ʼ jyujyu te ɔ mbɔ tʉʉ-i la bʉ̀ʉ ndəŋ ɔŋ. 6 Kaʼ wo gòʼ təmə mɔ̀ʼfyii-i ndəŋ Nyii fɛ, tʉʉ-Nyii mə nə bʉ̀ʉ ndəŋ ɔŋ fɛ. Bʉʼka wotəmiyɔŋ ndə ɔ tʉʼ gwè tʉ Nyii, nɔ kie ndə məyá mu fyii-ɔ mbɔ Nyii la bɛ ghɔ, ɔ bɔŋ-kə́-leʼ kɛ̀ŋ bʉə ndə bɔ̂ŋ tʉʼ kʉ́ʉ ɔ ndə məkínə ɔŋ.

7 Nɔ kə bɛ bʉʼka məmɔ̀ʼfyii ndəŋ Nyii ndə Nua kə bɔ́ŋ buukwɛʼtəŋkə ndə i kə kwáa ɔ ghɔŋbə ŋgwie-wo-e ndəŋ hə ŋkenənduhə. Ɔ nɔ kə yʉ́ gyʉʉ Nyii ndə ɔ kə shyùu tyunəkə-i te nubə ndə i gòʼ təmə nɔʼ fyú sê fɛ. Bʉʼka məmɔʼfyii-i ndəŋ Nyii, ɔ nɔ nə chʉ̀ə ŋkwɛ kəwʉʉnəmbi bʉəbʉə, bə lʉ̀ ɔ ndə wo ndə ɔ bɛ ndyʉndyʉ shʉ-Nyii bʉʼka məmɔʼfyii-i.

8 Nɔ kə chìi ndə Ablahaŋ kə məmɔʼfyii-i ndəŋ Nyii ndə ɔ kə yʉ́ chu-Nyii ndʉʉ ndə ɔ kə tíi ɔ ndə məgɛ̀ mu kəyəŋ ndə Nyii nɔʼ kə kɔ̀ʼnə tʉ ɔŋ. Ɔ lɔ̀ gɛ̀ təmə kínə yəŋkə ndə ɔ kə́ gɛ̀ chɔ fɛ. 9 Nɔ kə chìi bʉʼka ɔ mɔ̀ʼfyii-i ndəŋ Nyii ndə ɔ kə lɔ̀ gɛ̀ lɔʼɔ kətə̂ŋ ndə Nyii nɔʼ kə kɔ̀ʼnə tʉ ɔŋ, kə́ chí chɔ nə ntoʼŋgwe. Ɔ kə́ chí mu lɛʼbə ghɔŋbə Aisi leʼnə Jakɔ ndə Nyii kə chìi mbʉ ŋkɔʼnə ghɔ tʉ bɔŋ. 10 Bʉʼka Ablahaŋ nɔ nə kə́ kʉ̀ʼ ndə mənyíɛ yəŋkwɛʼtəŋkə ndə i kie yiesê shʉ́əshʉ́ə, ndə Nyii bɛ wo ndə ɔ nə shʉ̀tə nukə-i, bɔŋleʼ bɔ́ŋ mbʉ kəyəŋ.

11 Nɔ kə bɛ bʉʼka məmɔ̀ʼfyii ndəŋ Nyii ndə i kə chìi Sala kie ghʉəʼkə ndə məgʉ̀ʼ, bí vaa, ndʉʉ ndə ɔ nɔʼ kə dùɔŋ tíŋ ndə məbí, bʉʼka ɔ nɔ nə kwɔ̀ʼtə mbɔ Nyii bu fɔ̀ʼ nukə ndə ɔ nɔʼ kə kɔ̀ʼnə. 12 Buŋ ndə Ablahaŋ nɔʼ kə bɛ nə ŋkwuwokə, tíŋ hə bɔ̌ŋ mbyu wo-ɔ̄ imɔʼ, vâa-bi yɔ́ŋ tə bɛ nə bəlɔʼɔ-yuo, bɔŋleʼ yɔ́ŋ tə bɛ nə sɛkə ŋgwuu-muu ndə bə mə nə súu fɛ.

13 Bʉə-bɔ̄ŋ bənchəŋ nɔ nə kə́ mɔ̀ʼ haʼ fyiihə-ʉə ndəŋ Nyii tə kwútə təmə nyíɛ nukə ndə Nyii nɔʼ kə kɔ̀ʼnə fɛ. Bɔ̂ŋ nɔ kə yíɛʼhə nyíɛ dɔdɔ bɔŋleʼ kə́ kʉ̀ʼ nə fyii jyujyu mbɔ ï gwè. Bɔ̂ŋ nɔ kɛŋ kə gìe nə chu-yʉə mbɔ bɔ̂ŋ la kə bɛ bəntoʼŋgwe bɔŋleʼ kə́ bɛ bʉə ndə wʉʉnəmbikə-ɔ̄ŋ gòʼ təmə bɛ chunjaa-yʉə fɛ. 14 Bʉʼka bʉə ndə bɔ̂ŋ kə́ kwə́ʼ ntɛ kwəʼ-maa-ɔ̄ŋ nɔ chìi i bɛ itʉ́ʉnə mbɔ bɔ̂ŋ la tʉʼ kʉ́ʉ lɔʼɔ kətə̂ŋ ndə bu bɛ yʉə-yə. 15 Kaʼ bɔ̂ŋ kʉ̌ʉ nɔʼ kə kwɔ̀ʼtə lɔʼɔ kətə̂ŋ ndə bɔ̂ŋ kə lɔ̀ hə chɔ, təmə bɔ̂ŋ nɔʼ kə kie fia ndə məbʉ̀nə gɛ̀ chɔ. 16 Bɔŋ ndə nɔ, bɔ̂ŋ kə́ mʉ̀ʉ lɔʼɔ kətə̂ŋ jyujyu ndə bɛ yi-yə ndə i bɛ yuo. Nɔ, tʉ-Nyii-kə tʉʼ vyíi ndə məyʉ́ bə kə́ tíi ɔ nə Nyii-yʉə fɛ, bʉʼka ɔ nɔʼ shʉ̀tə yəŋkwɛʼtəŋkə tʉ bɔŋ.

17 Nɔ kə bɛ bʉʼka Ablahaŋ kə mɔ̀ʼfyii-i ndəŋ Nyii, ndə ɔ kə kɔ́ vaa-ɛ Aisi ndə fɔ-fɛ̀ʼndɛŋ-kə ndʉʉ ndə Nyii kə́ yúotə ɔŋ. Ablahaŋ ndə Nyii kə chìi mbʉ ŋkɔʼnə tʉ ɔŋ nɔ kə bɛ ndə məkɔ́ mbyu vaa-ɛ vaabələŋ imɔʼ ndə fɔ-fɛ̀ʼndɛŋ-kə tʉ Nyii. 18 Nyii nɔʼ kə ghɔ̀ŋ tʉ ɔŋ mbɔ, "Nɔ tíŋ hə bɔ̌ŋ Aisi ndə a bu kie ŋgwie-wo ndə mɔ kə kɔ̀ʼnə tʉ a." 19 Ablahaŋ nɔ nə kwɔ̀ʼtə mu fyii-ɔ mbɔ kaʼ Aisi kwú, Nyii nɔ kie ghʉəʼkə ndə məbʉ̀nə kóʼhə ɔŋ, ndə fʉʼkənu, Ablahaŋ bʉ̀nə kie vaa-ɛ ndə ɔ nɔʼ kə kwú.

20 Nɔ bɛ bʉʼka məmɔ̀ʼfyii ndəŋ Nyii ndə i kə chìi Aisi túu biʼ-Nyii-bə kɔ́ tʉ Jakɔ ghɔŋ Ɛso ndə nubə ndə i bíe bəshʉ gwè.

21 Nɔ kə bɛ bʉʼka məmɔ̀ʼfyii ndəŋ Nyii ndə i kə chìi Jakɔ túu biʼ-Nyii-bə kɔ́ tʉ vaa-Jɔsɛ təmiyɔŋ ndʉʉ ndə ɔ kə́ kwú, ndə ɔ kə yʉ́əʼnə ndəŋ mbuu-i, kə́ lə̀ʼtə Nyii.

22 Bʉʼka Jɔsɛ kə mɔ̀ʼfyii-i ndəŋ Nyii, ndʉʉ ndə ɔ kə́ kwú, ɔ kwə́ʼ nə fyii tə́nə tʉ bʉə-Isilɛ te ndə Nyii bu fyúhə bɔŋ mu Iji. Ɔ kàhə bɔŋ mbɔ bɔ̂ŋ kʉ̂ʉ yi kə́ fyú chɔ nɔ, lʉ̀ ghʉəʼbə-i gɛ̀ nə yɔŋ.

23 Nɔ kə bɛ bʉʼka bətie Mushi kə mɔ̀ʼfyiihə-ʉə ndəŋ Nyii ndə i kə chìi bɔ̂ŋ lə̀ŋ ɔŋ ndə bəchi itia ndʉʉ ndə bə kə bí ɔ bʉʼka bɔ̂ŋ nɔ kə nyíɛ ndə ɔ kə bʉ̀ʉ daa, təmə bɔ̂ŋ fàa ndə məchɔ́ʼ chu fɔŋ fɛ.

24 Nɔ kə bɛ bʉʼka Mushi kə mɔ̀ʼfyii-i ndəŋ Nyii ndə i kə chìi ɔ ndʉʉ ndə ɔ kə kóʼ, ɔ tɛ́ŋ mbɔ b̈ə mə tíi ɔ nə vaa, vaa-fɔŋ Fɛlo woke fɛ. 25 Ɔ nɔ nə séʼ ndə mənyíɛ ŋgʉəʼ ghɔŋbə bʉə-Nyii mɔʼɔ, tə chàa ndə məyú bʉʉ mu bʉ̂ʼʉ haʼ ndə kʉʉkə məniʼ. 26 Yɔ̄ŋ-yə nɔ nə bɛ bʉʼka ɔ nɔ kə nyíɛ mbɔ nɔ bʉ̀ʉ ndə məkie tʉvyiikə yie Wo ndə Nyii Kùŋ Tə́ŋ bʉʼka i nɔ kie sii tə chàa ndə mə-kə́-yú bʉʉ Iji bʉʼka ɔ nɔ kə́ tʉ́ʼ shʉ-i ndəŋ kɛŋbə ndə i bɛ bəshʉ gwè. 27 Bʉʼka Mushi kə mɔ̀ʼfyii ndəŋ Nyii, ɔ nɔ nə fyú hə mu Iji təmə kə́ fàa tʉʉbʉə fɔŋ fɛ. Ɔ nɔ nə lyʉ̀ʉtə́nə haʼ ndə məgɛ̀ nə shʉbə bʉʼka ɔ nɔ nə tʉ́ʼ shʉ-i bə haʼ ndə Nyii ndə bə mə nyíɛ ɔŋ fɛ. 28 Nɔ kə bɛ bʉʼka Mushi kə mɔ̀ʼfyii-i ndəŋ Nyii ndə i kə chìi ɔ mɔ̀ʼ nchəŋtə-Yíɛʼsii bɔŋleʼ kàhə mbɔ b̈ɔ̂ŋ ŋwìʼ fɔbʉəkə ndəŋ tʉ-sii-kə, mbɔ Fɔŋ Kwú ndə ɔ yítə fəŋ vaabələŋ mə yítə yʉə-yə vâa fɛ.

29 Nɔ kə bɛ bʉʼka bʉə-Isilɛ kə mɔ̀ʼfyiihə-ʉə ndəŋ Nyii ndə bɔ̂ŋ kə dàa muukwɛʼtəŋmə ndə bə kə́ tíi nə muu-kəMbuu-mə sê, fi nə bɛ sê njəŋtə, bɔŋ bʉə-Iji kʉ̂ʉ mùutə ghɔ ndə mədàa, muu lìhə bɔŋ.

30 Nɔ kə bɛ bʉʼka bʉə-Isilɛ kə mɔ̀ʼfyiihə-ʉə ndəŋ Nyii ndə i kə chìi bɔ̂ŋ yə̀ŋ lɔ̂ŋ ndə i kə kyʉ̀hə Jɛliko, yəŋkwɛʼtəŋkə ndə chîbə təkwiitia, i gwù sê.

31 Bʉʼka Laha ndə ɔ kə bɛ sɔkʉʉ kə mɔ̀ʼfyii-i ndəŋ Nyii, nɔ nə chìi təmə ɔ kwú ghɔŋbə bʉə ndə bɔ̂ŋ kə́ chɔ́ʼ chu-Nyii fɛ, bʉʼka ɔ nɔ kə lʉ̀ bʉə ndə bɔ̂ŋ kə gwè hə lɔʼɔ Isilɛ ndə məkíi yəŋbə kɔ́ mu njaa-ɔ nə fyiighʉ́ənə.

32 M̈ɔ bìʼ kə́ súu gɛ̀ nə shʉbə mɛ? I bu lʉ̀ ŋgwɔʼmbi dàa tʉ mɔ ndə məsúu ntɛ ndə Gidiɔŋ, Bala, Samsəŋ, Jɛfta, Dɛbi leʼnə Samuɛ ghɔŋbə bʉəyʉkəŋgieNyii bənchəŋ kə mɔ̀ʼfyiihə-ʉə ndəŋ Nyii. 33 Ndə bɔ̂ŋ kə mɔ̀ʼfyiihə-ʉə ndəŋ Nyii, bɔ̂ŋ mɔ̀ʼ lɔʼ-bətə̂ŋ-tə nə chɔ̂tə ghɔ́ʼ bɔŋ, sɔ́ʼ ndyʉndyʉ, kie fɔbə ndə Nyii nɔʼ kə kɔ̀ʼnə tʉ bɔŋ. Bɔ̂ŋ fʉ̀əŋ chu-bəbʉʼ-tə, 34 bɔ̂ŋ lʉ́əŋhə lɛɛŋhə-viʼi-shʉ́əshʉ́ə-bə, bɔ̂ŋ nyʉ́ʉ setəkə ndə i bɛ ndə məkʉ́ʉ bɔŋ. Bɔ̂ŋ nɔ nə lʉ́ʉtə, Nyii bɔŋ kɔ́ ghʉəʼkə tʉ bɔŋ, bɔ̂ŋ shʉ́ə ndə chɔ̂tə, ghɔ́ʼ bəsɔge ndə bɔ̂ŋ kə lɔ̀ hə ndə bəbɛʼlɔʼ-bətə̂ŋ-tə, bɔ̂ŋ nyʉ́ʉ. 35 Bʉʼka bəke kə mɔ̀ʼfyiihə-ʉə ndəŋ Nyii, bɔ̂ŋ bʉ̀nə nyíɛ bʉə-bʉə ndə bɔ̂ŋ nɔʼ kə kwútə bʉ̀nə kóʼtə.

Bə bɔŋleʼ chɔ́ŋhə bəbɛʼbə shʉ́əshʉ́ə, bɔ̂ŋ tɛ́ŋ ndə məfyú mu ŋgʉəʼ mbɔ bɔ̂ŋ yi kie məchímbi ndə i bʉ̀ʉ daa ndʉʉ ndə bɔ̂ŋ bʉ̀nə kóʼ. 36 Bə dʉ̀ʉhə bəbɛʼbə bɔŋleʼ gwúu bɔŋ, bə kɔ́ʼtə bəbɛʼbə lʉ̀ bɔŋ gɛ̀ fʉ̀əŋ chaŋ. 37 Bə túŋtə bəbɛʼbə nə ŋgoʼhə yítə, bə sáa bəbɛʼbə ndə viabə ibûu, bə yítə bɔŋ nə setəkə. Bəbɛʼbʉə kə́ mɔ̀ʼ gwo-binjyʉʉ-hə leʼnə gwo-biŋgoʼ-hə mbʉə-bɔŋ, kə́ dùʼ nə jyʉʉ, bə kə́ kɔ́ ŋgʉəʼ tʉ bɔŋ bɔŋleʼ chɔ́ŋhə bɔŋ. 38 Wʉʉnəmbikə kə kʉ̀ʼnə tʉ bɔŋ fɛ. Bɔ̂ŋ kə́ tòʼ ghʉ́ʉ mu kwɔŋkəyəŋnəhə, kə́ tòʼ mu kwɔŋhə, kə́ chí tɔʼ-ŋgoʼ-hə leʼnə mu mbyuʼhə.

39 Nyii nɔ nə bɛ́ŋ bʉə-bɔ̄ŋ bənchəŋ bʉʼka fyiihə-ʉə ndə bɔ̂ŋ kə mɔ̀ʼ ndəŋ ɔŋ, təmə bɔŋ wo mu bɔŋ kia kie fɔkə ndə ɔ kə kɔ̀ʼnə fɛ. 40 Bʉʼka Nyii kie yʉʼ ŋkwɔʼtə ndə i chàa maa-yɔ̄ŋ te bʉʼʉ, mbɔ nɔ bu yi bɛ haʼ ndʉʉ ndə bʉʼʉ bɔŋ bu bɛ mɔʼɔ ndə bʉʼʉ bu bɛ nubə inchəŋ ndə ɔ kə kʉ̀ʉ mbɔ bʉʼʉ bɛ.