1 Nɔ, bʉʼka yɔ̄ŋ-yə, bʉʼʉ nɔ kie ndə mə-kɛŋ-kɔ́ fyiihə-ʉʼʉ ndə nukə ndə bʉʼʉ nɔʼ kə yʉ́ byuunɔ təmə bʉʼʉ bu shìnə mɛ̀ʼtə. 2 Mbʉ ntəŋ ndə bʉəntəŋNyii kə téʼ tʉ bətietie-bʉʼʉ nɔ kə dʉ̀ʼ mbɔ bəkɔ bə yʉ́əʼnə ndəŋ ghɔ, bʉə ndə bɔ̂ŋ kə bə́ʼ mbʉ nuʼ-Nyii, byuunɔ kə gòʼ təmə yʉ́ nukə ndə i ghɔ̀ŋ fɛ, bɔ̂ŋ nɔ kə kie lɔʼɔbə-ʉə haʼ ndə i kie ndə məbɛ. 3 Bʉʼʉ bu nyʉ́ʉ təka ndʉʉmɛ, kaʼ bʉʼʉ tɛ́ŋ fɔŋ ŋkwaa ndə i gwè hə kəghɔ-Nyii. Nɔ kə fəŋ lɔ̀ʼ Tiekətʉ, bʉə ndə bɔ̂ŋ kə yʉ́, nú gwù tʉ bʉʼʉ mbɔ la bɛ shʉəŋ. 4 Nyii bʉ̀nə leʼ bìʼ mɔ̀ʼ ghɔkə-i chɔ ndə məchìi nubəcheʼbə ghɔŋbə nuchíechubə leʼnə nufinəbə ntɛntɛhə bɔŋleʼ gyʉ̀ə kɔ-kəLyʉʉhəNyii-kə haʼ ndə tʉʉ-i kə kʉ̀ʉ.

5 Nyii kə dùʼhə bʉəntəŋ-bi ndə məsɔ́ʼ wʉʉnəmbikə ndə i tʉʼ gwè fɛ, mbʉ kəwʉʉnəmbi ndə mɔ tʉʼ kwə́ʼ te yɔŋ. 6 Bə nɔ nə nyɔ̀ʼ kəyəŋbɛʼ mu ŋwɔʼnə-Nyii mbɔ,

"Woməsʉʉ bɛ ka, ndʉʉghɔfii, ndə a tʉʼ kwɛ́nə ɔŋ,

byuunɔ vaa-woməsʉʉ, ndə a tʉʼ lɛ́nə ɔŋ?

7 A nɔ kə chìi ɔ, ɔ fəŋ tə́ʼ chàa bʉəntəŋ-ba ndə kʉʉkə məniʼ.

A fùɔ ŋgʉʼʉ məgʉ́ə ghɔŋbə kuŋhə kətʉ-ɔ,

8 bɔŋleʼ kə kɔ́ ghʉəʼkə tʉ ɔŋ ndə məgìe kətʉ fɔbə inchəŋ."*

Nduɔ, kaʼ bə ghɔ̀ŋ mbɔ, "Fɔbə inchəŋ," i nɔ dʉ̀ʼ mbɔ fɔbɛʼkə kaa ghɔ ndə i káa bɔ̌ŋ fɛ. Təmə bʉʼʉ bɔŋ nɔʼ nyíɛ ndə ɔ tʉʼ gìe kətʉ fɔbə inchəŋ nduɔ fɛ. 9 Bʉʼʉ bɔŋ nyíɛ Jiso ndə bə kə dùʼhə ɔŋ, ɔ tə́ʼ chàa bʉəntəŋNyii ndə kʉʉkə məniʼ, mbɔ tíŋ hə bɔ̌ŋ buuŋjyu-Nyii, ɔ chʉʼ kwú yie bʉə bənchəŋ. Bʉʼʉ nɔ nyíɛ ɔŋ nduɔ nə ŋgʉʼʉ məgʉ́ə ghɔŋbə kuŋhə kətʉ-ɔ bʉʼka kwú ndə ɔ nyíɛ ŋgʉəʼ chɔ.

10 Bʉʼka Nyii ndə ɔ kə chìi fɔbə inchəŋ, fɔbə inchəŋ bɔŋleʼ kə́ bɛ ndə məgʉə-e, nɔ kə séʼ ndə məgwè nə vâa buŋmbi ndə məkie yʉʉ ndə məgʉə-e. Nɔ, I nɔ kə kʉ̀ʼnə tʉ ɔŋ ndə məchìi Jiso ɔ bɛ təmə kwɔtəkə mbʉə-ɔ fɛ tíŋ hə ndəŋ ŋgʉəʼ ndə ɔ kə nyíɛ, mbɔ ɔ chʉʼ ŋɔ́ʼhə fia tʉ bɔŋ ndə məkie ŋkwaaNyii.

11 Wo ndə ɔ chìi bʉə ndə məbɛ ŋkʉʉ, mbəŋ-ɛŋ ghɔŋbə bʉə bənchəŋ ndə ɔ kə chìi bɔŋ bɛ ŋkʉʉ, nɔ kie mbyu Tie imɔʼ. Nɔ bɛ nukə ndə i chìi təmə Jiso kie tʉvyiikə ndə mətíi bɔŋ nə bəliŋ-bi fɛ. 12 Ɔ ghɔ̀ŋ tʉ Nyii mbɔ,

"Mɔ bu núhə tʉ bəliŋ-bɔŋ te yie-a.

Mɔ bu yùɔ lyuutə tʉ a mu nchəŋtə bʉə-ba bənchəŋ."*

13 Ɔ bìʼ ghɔ̀ŋ mbɔ, "Mɔ bu mɔ̀ʼfyii-ɔ ndəŋ ɔŋ." Ɔ bʉ̀nə bìʼ ghɔ̀ŋ mbɔ, "B̈ii nyíɛ! Mɔ baʼabə vâa ndə Nyii nɔʼ kɔ́ tʉ mɔ."

14 Bʉʼka mbʉ vâa nɔ bɛ bʉə ndə bɔ̂ŋ kie mbɔʼ-mbʉə ghɔŋbə fɔbʉəkə, Jiso nə mbəŋ-ɛŋ ghɔ nɔ kə gwè bɛ nə bɔŋ, kie mbɔʼ-mbʉə ghɔŋ fɔbʉəkə. Ɔ nɔ kə kie ntɛ mbʉə-ɔ̄ mbɔ tíŋ hə ndəŋ kwú, ɔ chʉʼ ghɔ́ʼ ghʉəʼ-Debulu-kə ndə ɔ kə kie ghʉəʼ-kwú-kə. 15 Bɔŋleʼ tíŋ hə bɔ̌ŋ yɔ̄ŋ-yə, mbɔ ɔ chʉʼ fí tʉ-bʉə-kə ndə bɔ̂ŋ nɔʼ kə bɛ fʉəhə ndə chîmbibə-ʉə nchəŋnchəŋ-ɛŋ bʉʼka bɔ̂ŋ nɔ nə kə́ fàa mbɔ bɔ̂ŋ bu kwú.

16 Ndə ŋgie-shʉəŋ-kə, ɔ kə kwáa bə bʉəntəŋ-bi fɛ, ɔ nɔ kwáa bə ŋgwie Ablahaŋ. 17 Bʉʼka nchəŋnchəŋ yɔ̄ŋ-yə, bə nɔʼ kə kie ndə məchìi ɔ, ɔ bɛ nə bəliŋ-bi ndə nubə inchəŋ, mbɔ ɔ chʉʼ bɛ Tiefɛ̀ʼndɛŋkwɛʼtəŋNyii-yʉə ndə ɔ tʉʼ gìe shʉəŋ bɔŋleʼ kie tʉvyiikə ndə fɔʼɔ-ɛ bəshʉ-Nyii, mbɔ ɔ fɛ̀ʼndɛŋ bə chʉʼ sʉ̀fyii hə ndəŋ bʉ̂ʼ-mbʉ-bʉə-tə. 18 Bʉʼka mbɔ ɔ kə nyíɛ ŋgʉəʼ ndʉʉ ndə bə kə mùutə ɔŋ, bəkɔ ɔ kwáa bʉə ndə bə tʉʼ mùutə bɔŋ nduɔ.