1 Fəŋ məŋkaa nɔ nə kie ntɛ núʼhə ndə bə kie ndə mə-kə́-lə̀ʼtə Nyii nə yɔŋ, bɔŋleʼ kie yəŋkə kəchisê ndə bə kie ndə mələ̀ʼtə Nyii chɔ. 2 Bə nɔ nə fʉ̀ə lɛʼkə, fəŋ njəŋ bə kə́ tíi nə yəŋ-kəchɔŋ-kə, nɔ kə kie f̃ɔkə ndə bə mɔ̀ʼ kɛʼɛ ndəŋ ghɔ, ghɔŋbə tebele nə bele chɔ ndə bə nɔʼ kɔ́ tʉ Nyii. 3 Bɔ̌ŋ kəŋkyʉʉhə, biitə-njəŋ-kə nɔ nə bɛ chɔ, ndə bə kə́ tíi nə yəŋ-kəchɔŋkwɛʼtəŋ-kə. 4 Yəŋfɛ̀ʼndɛŋNyiikə nɔ nə bɛ muŋgɔ ndə bə chìi nə goo ndə mə-kə́-tɔ̀ŋ lyiikə ndəŋ ghɔ, leʼnə tɔŋ-məŋkaa-Nyii-kə ndə bə bɔ̀ŋ ndəŋ ɛŋ inchəŋ nə goo. Mu mbʉ kətɔŋ, bɔʼ-goo-kə nɔ nə bɛ muŋgɔ nə fɔyubə ndə bə tíi nə mana, leʼnə mbuu Alo ndə i nɔʼ fyùʼtə kɔ́ fyuŋbə, leʼnə baaŋ-ŋgoʼhə-bə ibûu ndə bə nyɔ̀ʼ bəŋkahə-Nyii ndəŋ ghɔ. 5 Ndəŋ mbʉ kətɔŋ, fɔ-kɔŋbɛʼ-bə nɔ kə bɛ chɔ. Bə nɔ nə kə́ tíi bɔ̂ŋ nə bəchelobiŋ* bɔ̂ŋ kə́ dʉ̀ʼ məgʉə-Nyii. Ghɔŋnətə-ʉə kwóhə mbʉ chu kətɔŋ ndə tiefɛ̀ʼndɛŋkwɛʼtəŋNyii ŋwìʼ fɔbʉəkə chɔ mbɔ Nyii chʉʼ sʉ̀fyii-i hə ndəŋ bʉ̂ʼ-bʉə-tə. Bʉʼʉ məfʉ̀ʼtə nubə inchəŋ nduɔ fɛ.

6 Nɔ bɛ ntɛ nɔ ndə bə nɔʼ kə shʉ̀tə mbʉ bəfɔ tʉ́ʼtə. Bʉəfɛ̀ʼndɛŋNyii kə́ chʉʼ gɛ̀ mu fəŋ njəŋ ndə məfɔ̀ʼ fɔʼtə-ʉə. 7 Bɔŋ nɔ nə bɛ haʼ tiefɛ̀ʼndɛŋkwɛʼtəŋNyii ndə ɔ kə́ ŋíi mu biitə-njəŋ-kə tətɛʼ ɛ haʼ vɛʼ mɔʼɔ ndə ŋgʉʼʉmbi. Ɔ lʉ̀ fɔbʉəkə ndə məfɛ̀ʼndɛŋ nə yɔŋ kətʉ-ɔ ghɔŋbə bʉ̂ʼtə ndə mbʉ bʉə chìi təmə kínə fɛ. 8 Nə nubə-ɔ̄ŋ, LyʉʉhəNyiikə nɔ kə dàhə ntaa mbɔ fia la chʉʼ ŋɔ́ʼnə ndə məŋíi mu yəŋ-kəchɔŋkwɛʼtəŋ-kə nə mbʉ fəŋ kəlɛʼ Nyii kə́ bíe tə́nə fɛ. 9 Nɔ bɛ cheʼkə nɔ ndə i tʉʼ dʉ̀ʼ mbi-ɔ̄ laa nɔ. I nɔ dʉ̀ʼ mbɔ kɔkə ghɔŋbə nyaahə ndə b̃ə kə fɛ̀ʼndɛŋ nə yɔŋ tʉ Nyii, kə mə chìi ŋkwɔʼtə bʉə ndə bɔ̂ŋ tʉʼ lə̀ʼtə Nyii, i bɛ tʉ́ʉnə bəshʉ-Nyii təmə kwɔtəkə chɔ fɛ. 10 Yɔ̄ŋ-yə nɔ bɛ haʼ nu-bəfɔyu-bə, ghɔŋbə ndʉʼmə leʼnə ntɛ-məbúu-ŋwɔŋ-hə. Maa-bɔ̄ŋ nɔ nə bɛ haʼ ntɛ-nuʼ-hə te mbɔʼ-mbʉə ndə bɔ̂ŋ kə kie ndə məfɔ̀ʼ tə ndʉʉ nə kʉ̀ʼnə tʉ Nyii ndə məchìi nubə bɛ fefe.

11 Bɔŋ nduɔ, Klai nɔʼ gwè nə Tiefɛ̀ʼndɛŋkwɛʼtəŋNyii, kɔ́ nu-jyujyu-bə tʉ bʉʼʉ ndə i nɔʼ gwè. Ɔ gwè ŋíi mu lɛʼkə ndə i chàa fəŋ i bɔŋleʼ kə́ bɛ təmə vaakəkwɔtə chɔ fɛ. Kaa lɛʼkə ndə woməsʉʉ fʉ̀ə nə ghɔkə-i fɛ, i dʉ̀ʼ mbɔ kaa fɔkə kəchisê fɛ̄ŋ ndə bə chìichìi fɛ. 12 Ndʉʉ ndə Klai kə tíŋ hə mu lɛʼkə-ɔ̄ŋ gɛ̀ ŋíi mu yəŋ-kəchɔŋkwɛʼtəŋ-kə vɛʼ mɔʼ tə mbi nə lìʼ, ɔ kə lʉ̀ fɔbʉə-biŋgoʼhə-kə byuunɔ fɔbʉə-vâa-bənaʼa-kə ndə məgɛ̀ kɔ́ Nyii nə yɔŋ fɛ. Ɔ nɔ nə kɔ́ yi-yə fɔbʉəkə, nɔ, ɔ chʉ̀ʼ tʉkə-ʉʼʉ təmə liʼ-i ghɔ fɛ. 13 Ndʉʉ ndə fɔbʉə-biŋgoʼhə-kə, fɔbʉə-bənaʼa-ləŋ-kə leʼnə bu-vaaŋgwɔŋ-naʼ-ke-bə ndə bə tɔ̀ŋ, bə nɔ nə kə́ ŋwìʼ ndəŋ bʉə ndə bɔ̂ŋ nɔʼ bʉ́əhə ŋwɔŋtə-ʉə nɔ, i sʉ̀ bɔŋ ndəŋ ŋwɔŋ nyàatə. 14 Kaʼ yɔ̄ŋ-yə bɛ shʉəŋ, a kwɔ̀ʼtə mbɔ fɔbʉə-Klai-kə ndə ɔ kɔ́ ŋwɔŋ-ɛŋ tʉ Nyii təmə vaakəkwɔtə chɔ fɛ tíŋ hə bɔ̌ŋ LyʉʉhəNyiikə təmə liʼ-i ghɔ fɛ bu sʉ̀ ŋkwɔʼtə-yʉʼʉ ntyʉʉ təka? I bu sʉ̀ ŋkwɔʼtə-yʉʼʉ ndəŋ fɔʼ-bʉəbʉə-tə ndə i chìi wo kwú, ndə mə-kə́-fɔ̀ʼ tʉ Nyii ndə ɔ bɛ ghɔ. 15 Bʉʼka yɔ̄ŋ-yə, Klai nɔ bɛ lìʼ ntuu ndə ɔ shʉ̀tə fia tʉ bʉʼʉ ndə ŋkaa-fefe-mə, mbɔ bʉə ndə Nyii nɔʼ tíi bɔŋ chʉʼ kie biʼbə ndə Nyii nɔʼ kə kɔ̀ʼnə tʉ bɔŋ təmə liʼ-i ghɔ fɛ. Bəkɔ yɔ̄ŋ-yə fɔ̀ʼ bʉʼka kwú nɔ bɛ ghɔ ndə ĩ chʉ̀ʼ tʉ-bʉə-kə ndə mɔ̀ʼmbɛ ndə bɔ̂ŋ kə chìi ndʉʉ ndə nduɔŋ məŋkaa kə́ bíe fɔ̀ʼ.

16 Kaʼ wo tɛ́nɛ njaa-ɛ buŋ kwú, bə nɔ kie ndə mənyíɛ ŋkwukə-i bə buŋ fɔ̀ʼ mbʉ bənu ndə ɔ kə gìe. 17 Bʉʼka, kaʼ wo tɛ́nɛ njaa-ɛ, təmə nɔʼ kwú fɛ, bə mə chìi nubɛʼkə nə mbʉ bəŋgie fɛ, i bu fɔ̀ʼ haʼ ndʉʉ ndə ɔ nɔʼ kwú.

18 Nɔ kə buŋ chìi yɔŋ fəŋ məŋkaa fɔ̀ʼ haʼ bʉʼka fɔbʉəkə. 19 Mushi nɔ nə fəŋ tíi mbʉ bəŋkahə tʉ bʉə bənchəŋ haʼ ndə nuʼ-Nyii kə dʉ̀ʼ mbɔ b̈ə chìi. Ndʉʉmɛ, ɔ fìnə fɔbʉə-bənaʼa-kə, fɔbʉə-biŋgoʼhə-kə ghɔŋbə muu, túɔtə nə ntɔŋ kətyʉbɛʼ ndə bə tíi nə hisob ghɔŋbə nyu-kəmbuu-buuŋ-hə, ŋwìʼ ndəŋ mbʉ bəŋwɔʼnə-nuʼ ghɔŋbə bʉə bənchəŋ. 20 Ɔ ghɔ̀ŋ mbɔ, "Nɔ bɛ fɔbʉəkə nɔ ndə i kɔ́ʼ mbʉ məŋkaa ndə Nyii kə kàhə bii nə yɔŋ mbɔ b̈ii kə́ yʉ́." 21 Nɔ bɛ haʼ nɔ ndə Mushi kə ŋwìʼ mbʉ kəfɔbʉə ndəŋ mbʉ kəlɛʼ Nyii ndə i bɛ ŋkʉʉ leʼnə fɔbə inchəŋ ndə bə kə́ lə̀ʼtə Nyii nə yɔŋ. 22 Ndə ŋgie-shʉəŋ-kə, nuʼ-Mushi nɔ dʉ̀ʼ mbɔ nɔ kə gòʼ məniʼ fɔbə inchəŋ bɛ ŋkʉʉ tíŋ hə ndəŋ fɔbʉəkə, kaʼ bə bɔŋ gòʼ təmə leʼ tyù fɔbʉəkə fɛ, bə mə sʉ̀fyii hə ndəŋ bʉ̂ʼʉ fɛ.

23 Nɔ, fɔbə-ɔ̄ŋ, ndə bɛ finə ŋkɛŋ-bəfɔ-hə ndə i bɛ yuo nɔ, bə nɔ kie ndə məchìi bɔ̂ŋ bɛ ŋkʉ̂ʉ nə yɔ̄ŋ-yə ntɛ fia. Bɔŋ mbʉ ŋkɛŋ bəfɔ ndə i bɛ yuo, bə nɔ kie ndə məchìi i bɛ ŋkʉʉ nə yʉʼ bəfɔ fɛ̀ʼndɛŋ ndə i chàa bɔ̄ŋbə.

24 Bʉʼka Klai kə ŋíi mu yəŋ-kəchɔŋ-kə ndə bə kə chìi nə ghɔkə, ndə bɛ finə ŋkɛŋ bəfɔ fɛ, ɔ bɔŋ nɔ kə ŋíi bə mu mbʉ yuo, ndə ɔ bɛ nduɔ bəshʉ-Nyii yie-bʉʼʉ. 25 Ndə məbìʼ ndəŋ yɔ̄ŋ-yə, Tiefɛ̀ʼndɛŋkwɛʼtəŋNyii nɔ kə́ ŋíi mu yəŋ-kəchɔŋkwɛʼtəŋ-kə ŋgʉʼʉ tə mì ŋgʉʼʉ nə fɔbʉə-nyaahə-kə. Təmə bɔŋ Jiso kə ŋíi chɔ ndə məfɛ̀ʼndɛŋ təvɛʼtəvɛʼ nə tʉkə-i fɛ, 26 bʉʼka kaʼ ɔ kʉ̌ʉ kə chìi nɔ təmə ɔ nɔ nə nyíɛ ŋgʉəʼ təvɛʼtəvɛʼ lʉ̀ hə nə mbi nə gwù. Bɔŋ kaa nɔ fɛ, ɔ nɔ gwè vɛʼ mɔʼ tə mbi nə lìʼ, ndə ndʉʉ ndə ndyiʼtə bəchî-ɔ̄, ndə məfyúhə bʉ̂ʼʉ tíŋ hə bɔ̌ŋ kwu-i ndə fɔ-fɛ̀ʼndɛŋ-kə yie-bʉʼʉ.

27 Wotəmiyɔŋ nɔ kie ndə məkwú vɛʼ mɔʼ, i kʉ̂ʉ tíŋ nɔ ɔ tə́nə bəshʉ-Nyii mu fɛʼɛ. 28 Nɔ bɛ haʼ nɔ ndə bə kə fɛ̀ʼndɛŋ nə Klai vɛʼ mɔʼ tə mbi nə lìʼ ndə məfì bʉ̂ʼ-bʉə-buŋmbi-tə. Ɔ bu bʉ̀nə bìʼ gwè, təmə gwè ndə məsʉ̀ bʉ̂ʼʉ fɛ, ɔ nɔ tʉʼ gwè bə ndə məkwáa bʉə ndə bɔ̂ŋ tʉʼ kʉ̀ʼ ɔ shʉ́əshʉ́ə.