1 Nɔ, bəliŋ-bɔŋ ndə bii bɛ ŋkʉʉ, ndə bii nɔʼ fúu nuɔ biibə bʉə ndə Nyii kə tíi, b̈ii kwɔ̀ʼtə jyujyu te Jiso-ɔ̄ ndə ɔ bɛ mbʉ lɔntəŋ bɔŋleʼ kə́ bɛ Tiefɛ̀ʼndɛŋkwɛʼtəŋ ndə mbʉ məmɔ̀ʼfyii ndəŋ Nyii ndə bʉʼʉ ghɔ̀ŋ mbɔ bʉʼʉ nɔʼ chìi nɔ, 2 ɔ nɔ kə fɔ̀ʼ nubə inchəŋ ndə Nyii ndə ɔ kə séʼ ɔ, kə kɔ́ tʉ ɔŋ mbɔ ɔ fɔ̀ʼ, haʼ ndə Mushi kə fɔ̀ʼ fɔʼɔ-ɛ inchəŋ mu njaa-Nyii. 3 Bʉʼka Jiso nɔ kʉ̀ʼnə ndə məkie məgʉ́ə chàa Mushi, kie məgʉ́ə i yɔ́ŋ daa haʼ ndə w̃o bɔ́ŋ njaa kie məgʉ́ə yɔ́ŋyɔ́ŋ tə chàa mbʉ njaa ndə ɔ bɔ́ŋ. 4 Bʉʼka njaa təmiyɔŋ nɔ bɔ́ŋ wo, bɔŋ wo ndə ɔ bɔ́ŋ fɔbə inchəŋ nɔ bɛ Nyii.

5 Nduɔ, Mushi nə vaafɔ̀ʼ mu njaa-Nyii nɔ nə gìe shʉəŋ ndə nubə inchəŋ. Fɔʼɔ-ɛ nɔ kə bɛ fʉʼkənu ndəŋ nu-shʉəŋ-bə ndə Nyii kə bɛ ndə məkɛ̀ʼ yɔŋbɛʼ. 6 Bɔŋ Klai nə Vaa, nɔ tʉʼ lɛ́nə mu njaa-Nyii inchəŋ. Bʉʼʉ bɔŋ kə́ bɛ njaa-ɛ, kaʼ bʉʼʉ kie fyii shʉ́əshʉ́ə, lyʉ̀ʉtə́nə ndəŋ məyʉ́əʼnə-yʉʼʉ ndəŋ Klai. 7 Nɔ ndʉʉmɛ, ndə LyʉʉhəNyiikə ghɔ̀ŋ mbɔ,

"Kaʼ bii yʉ́ gyʉʉ-i laa,

8 kə bii mə shʉ́əhə fyiihə-ii fɛ, haʼ ndə i nə bɛ ndʉʉ ndə bətietie-bii kə kwɛ̀ŋhə tʉ Nyii chɔ́ʼ chu-i le,

vɛʼ-ghɔ̄ mu kwɔŋkəyəŋnə ndʉʉ ndə bɔ̂ŋ kə yúotə Nyii,

9 kəyəŋ ndə bətie-bii kə yúotə mɔ chɔ, nyíɛ fɔʼɔ-ɔ ndə ŋgʉʼhə wuŋ kwi.

10 Tʉʉ-ɔ nɔ nə byʉ́ʼ ndə maa-yīŋ kwinə-wo-kə, mɔ ghɔ̀ŋ mbɔ,

‘B̃ɔ̂ŋ nɔ chʉʼ kíahə fyiihə-ʉə ndəŋ fia-ɔ.

Bɔ̂ŋ tɛ́ŋ nukə ndə mɔ gìe tʉ bɔŋ mbɔ bɔ̂ŋ fɔ̀ʼ.’

11 Tʉʉ-ɔ byʉ́ʼ, mɔ kàa mbɔ,

‘Bɔ̂ŋ kʉʉ ŋíi mu yəŋkə-ɔŋ ndə mɔ kʉ̀ʉ mbɔ b̈ɔ̂ŋ káa chɔ sê fɛ.’ "*

12 B̈ii láa, bəliŋ-bɔŋ, mbɔ wo mə bɛ mu bii ndə ɔ kie mu fyii bʉəbʉə daa təmə mə bɛ́ŋ Nyii fɛ, ntɛ fyii ndə bəkɔ i chìi ɔ̈ shìe liɛŋ-ɛŋ tʉ Nyii ndə ɔ bɛ ghɔ. 13 B̈ii kə́ kwèʼhə ŋwɔŋtə-ii bəchibəchi, ndə kaʼ bii buŋ yʉ́, bə tíi chîmbikə nə "Laa," bʉʼka bʉ̂ʼʉ mə yi fə́ʼhə bii, bii shʉ́əhə fyiihə-ii tʉ Nyii. 14 Bʉʼka bʉʼʉ nɔʼ lʉ̀ yʉʉ ndə fɔbə nchəŋnchəŋ ndə Jiso Klai kie kaʼ bʉʼʉ lyʉ̀ʉtə́nə ndə ntɛ məmɔ̀ʼfyii ndəŋ Nyii ndə bʉʼʉ kə chʉ́ʉhə nə yɔŋ tə gɛ̀ lìʼ. 15 Nɔ nukə ndə ŋwɔʼnə-Nyii ghɔ̀ŋ mbɔ,

"Kaʼ bii yʉ́ gyʉʉ Nyii laa,

kə bii mə shʉ́əhə fyiihə-ii fɛ,

haʼ ndə i nə bɛ ndʉʉ ndə bətietie-bii kə kwɛ̀ŋhə tʉ Nyii chɔ́ʼ chu-i le."*

16 Bɛ bənda ndə bɔ̂ŋ kə yʉ́ ŋgieNyiikə bɔŋ chɔ́ʼ chu-ɔ la? Kaa bʉə bənchəŋ ndə Mushi kə bɛ ntəŋbəshʉ-yʉə ghɔŋ bɔŋ fyú hə mu Iji fe? 17 Bɛ bənda ndə tʉʉ-Nyii kə byʉ́ʼ tʉ bɔŋ ndə ŋgʉʼhə wuŋ kwi? Bɔ̂ŋ kaa bʉə ndə bɔ̂ŋ kə chìi bʉ̂ʼʉ, gwùtə sê kwútə mu kwɔŋkəyəŋnə fe? 18 Kaa bʉə ndə bɔ̂ŋ kə kwɛ̀ŋhə tʉ ɔŋ, ndə ɔ kə kàa mbɔ bɔ̂ŋ kʉʉ yi ŋíi mu kəyəŋ ndə ɔ kə kɔ̀ʼnə tʉ bɔŋ, ndə məkáa chɔ sê fɛ fe? 19 Bʉʼʉ nɔ nyíɛ mbɔ bɔ̂ŋ kə mə ŋíi fɛ, bʉʼka bɔ̂ŋ kə bɛ́ŋ ŋgieNyiikə fɛ.