Fɔʼɔ 4

Bə lʉ̀ Bita ghɔŋ Jɔŋ gɛ̀ nə bɔŋ mu kaŋsotə-bʉə-Juu

1 Bʉəfɛ̀ʼndɛŋNyii, wokwɛʼtəŋ-bəsɔge mu njaafɛ̀ʼndɛŋNyii leʼnə bʉə-Sadusi gwè tʉ Bita ghɔŋ Jɔŋ ndʉʉ ndə bɔ̂ŋ tʉʼ kwə́ʼ tʉ bʉə. 2 Tʉ tʉʉ-yʉə nɔʼ byʉ́ʼ daa bʉʼka mbʉ bəlɔntəŋNyii bəbûu nɔ nə kə́ dàhə bɔŋ, kə́ leʼ lɔ̀ʼ mbɔ Jiso la nɔʼ bʉ̀nə kóʼ, i dʉ̀ʼ mbɔ bʉə ndə bɔ̂ŋ tʉʼ kwútə bu yi bʉ̀nə kóʼ ghɔ. 3 Bɔ̂ŋ yá Bita ghɔŋ Jɔŋ, fʉ̀əŋ chaŋ bʉʼka nɔ nə bɛ ndʉʉbuumbi, tə mbi sɛŋ fíi ŋkəŋ. 4 Bɔŋ bʉə buŋmbi ndə bɔ̂ŋ kə yʉ́ mbʉ kəŋgieNyii bɛ́ŋ, nuɔ-bələŋ bìʼ tə gɛ̀ nə ŋkɔŋhə itaa.

5 Mbi kʉ̂ʉ sɛŋ fíi, bəntəŋbəshʉ, bəbɛʼbə ŋguu-kaŋsotə-hə leʼnə bʉə dàhə nuʼ-Mushi chə̀ŋtə Jɛlosalɛŋ. 6 Anashi tiefɛ̀ʼndɛŋkwɛʼtəŋNyii nɔ nə bɛ chɔ ghɔŋbə Kaifa, Jɔŋ, Alɛsaŋnda leʼnə bəbɛʼbʉə ndə bɔ̂ŋ lɔ̀ hə kəlɔŋ-tiefɛ̀ʼndɛŋkwɛʼtəŋNyii. 7 Bɔ̂ŋ gwè nə Bita ghɔŋ Jɔŋ téʼ bɔ̂ŋ tə́nə bəshʉ bɔŋ, bɔ̂ŋ chʉ́ʉhə kə́ bíʼtə nubə tʉ bɔŋ mbɔ, "Bii tʉʼ fɔ̀ʼ nubə-ɔ̄ŋ nə ghʉəʼ-ndaa-kə byuunɔ nə yie nda?"

8 Ndʉʉmɛ, Bita ndə ɔ nɔʼ jyʉ́ʉ hə kəghɔ-LyʉʉhəNyiikə, ghɔ̀ŋ mbɔ, "Bətie-bɔŋ, bəntəŋbəshʉ-bʉəkwɛʼtəŋ-Isilɛ, 9 kaʼ bii tíi baʼa laa fɛ̄ŋ ndə məfʉ̀ʼtə nu-jyujyu-bə ndə bə chìi tʉ wo-ɔ̄, kə́ bíʼtə ntɛ ndə bə chìi ndə məchʉ́ʼ ɔ, 10 b̈ii bəbəʼ-bʉə-Isilɛ-kə bənchəŋ kínə mbɔ nɔ bɛ ghʉəʼ-Jiso-Klai-kə ndə ɔ lɔ̀ hə Nasalɛ, ndə bii kə kwɛ̀ŋ ɔŋ yí, bɔŋ Nyii bʉ̀nə kóʼhə ɔŋ hə ndəŋ kwu, ndə i chìi wo-ɔ̄, ɔ kə́ tə́nə bəshʉ bii shʉ́əshʉ́ə nɔ. 11 Ɔ kə́ bɛ wo ndə bə kə nyɔ̀ʼ te ɔ mu ŋwɔʼnə-Nyii mbɔ,

‘Mbʉ ŋgoʼ ndə bii bʉə bɔ́ŋ njaa kə chɔ́ʼ mɛ̀ʼ,

nɔ bɛ ŋgoʼ-fûu-njaa nduɔ.’*4:11 Ŋwɔʼnə-təLyuu 118:22.

12 Ibɛʼ-yə wo kaa ghɔ ndə ɔ kie ghʉəʼkə ndə məkwáa bʉə fɛ, bʉʼka mbɔ yiebɛʼ bɛ ghɔ kəwʉʉnəmbi-fɛ̄ŋ, ndə Nyii kɔ́ tʉ woməsʉʉ ndə bəkɔ i kɔ́ ŋkwaa tʉ bʉʼʉ fɛ."

13 Ndʉʉ ndə bɔ̂ŋ nyíɛ ntɛ fyii ndə Bita ghɔŋ Jɔŋ kə kie, bɔŋleʼ chèʼnə mbɔ bɔ̂ŋ mə tíi shʉ ŋwɔʼnə fɛ, i chàa bɔŋ. Bɔ̂ŋ chèʼnə mbɔ ghɔŋbə Jiso nɔ nə bɛ mɔʼɔ. 14 Bɔŋ bʉʼka mbɔ bɔ̂ŋ nyíɛ mbʉ wo ndə ɔ nɔʼ kə kie nchʉʼ kə́ tə́nə bəshʉ bɔŋ, təmə bɔ̂ŋ leʼ kie ŋgie-gìe-kə fɛ. 15 Ndʉʉmɛ, bɔ̂ŋ kàhə bɔŋ ndə məfyúu mbi, bɔ̂ŋ shi chúʼtə tʉbə-ʉə, kə́ bíʼtə mbɔ,

16 "Bʉʼʉ bu bɛ təka nə bʉə-bɔ̄ŋ? Bʉʼʉ mə tɛ́ŋ nubə ndə bɔ̂ŋ nɔʼ fɔ̀ʼ fɛ. Bʉə bənchəŋ ndə bɔ̂ŋ tʉʼ chí mu Jɛlosalɛŋ nɔ kínə mbɔ bɔ̂ŋ nɔʼ chìi fɔŋ-kəcheʼ. 17 Bɔŋ ndə məchíe nubə-ɔ̄ŋ mbɔ i mə leʼ kə́ sɛŋ gɛ̀ nə shʉbə mu bʉə fɛ, bʉʼʉ nɔ kie ndə məshyùu tyunəkə-ʉə mbɔ kə bɔ̂ŋ mə leʼ kwə́ʼ tʉ wotəmiyɔŋ te yie-Jiso fɛ." 18 Ndʉʉmɛ, bɔ̂ŋ tíi mbʉ bəlɔntəŋNyii, kàhə bɔŋ mbɔ kə bɔ̂ŋ mə leʼ kwə́ʼ byuunɔ dàhə te yie-Jiso fɛ.

19 Bɔŋ Bita ghɔŋ Jɔŋ bə̀ŋhə mbɔ, "Bii kwɔ̀ʼtə mbɔ i kʉ̀ʼnə tʉ Nyii mbɔ b̈aʼa yʉ́ chu-yii, chɔʼ yi-yə mɛ? 20 Bʉʼka mbɔ baʼa mə mɛ̀ʼtə ndə məfʉ̀ʼtə nuchíechubə ndə baʼa nɔʼ nyíɛ bɔŋleʼ yʉ́ fɛ."

21 Bɔ̂ŋ kʉ̂ʉ bìʼ fìe shʉ-yʉə tʉ bɔŋ yɔ́ŋyɔ́ŋ, yɔ̀ʼ ghɔkə-ʉə ndəŋ bɔŋ, bɔ̂ŋ gɛ̀ bʉʼka mbɔ bɔ̂ŋ kə kínə ntɛhə ndə bəkɔ bɔ̂ŋ kɔ́ ŋgʉəʼ tʉ bɔŋ təmə ntɔŋntɔŋ i fyú sê fɛ. Bʉʼka bʉə bənchəŋ nɔ kə kə́ lə̀ʼtə Nyii ndə nubə ndə i nɔʼ kə fyú, 22 bʉʼka mbʉ wo ndə ɔ kə kie nchʉʼ ndə i kə gwè hə ndəŋ nukəcheʼkə le, nɔʼ kə tíŋ ŋgʉʼhə wuŋ kwi.

MəghaaNyii-bʉə ndə bɔ̂ŋ nɔʼ bɛ́ŋ Nyii

23 Ndʉʉ ndə bə yɔ̀ʼ ghɔkə ndəŋ Bita ghɔŋ Jɔŋ, bɔ̂ŋ bʉ̀nə gɛ̀ nyíɛ bəʼ-bʉə-kə ndə bɔ̂ŋ nɔʼ bɛ́ŋ Nyii, fʉ̀ʼtə nubə inchəŋ tʉ bɔŋ ndə bətiefɛ̀ʼndɛŋNyii ghɔŋbə bəntəŋbəshʉ gìe tʉ bɔŋ. 24 Ndʉʉ ndə bɔ̂ŋ yʉ́ yɔ̄ŋ-yə, bɔ̂ŋ bənchəŋ chɔ̀ʼhə gyʉʉhə-ʉə ghɔʼ gháaNyii ghɔ̀ŋ mbɔ, "Tiekətʉ-yaʼ, ndə a tʉʼ sɔ́ʼ wʉʉnəmbikə, ndə a chìi sê, chìi yuo, chìi muu ghɔŋbə fɔbə inchəŋ ndə i bɛ muŋgɔ, 25 a nɔʼ nə bʉ́ nə ghʉəʼ-kəLyʉʉhə-kə-a, tíŋ hə bɔ̌ŋ tietie-yaʼ Dɛbi vaafɔ̀ʼ-a mbɔ,

‘Chìi ka, lɔʼ-bətə̂ŋ-tə kə bə̀ŋtə,

bʉə-Juu kə́ nyíɛ ŋgʉəʼ-yʉə kə́ shʉ̀tə nubə ndə i mə tòʼ fɛ?

26 Bəfɔŋ-kəwʉʉnəmbi-bɔ̄ŋ, shyʉ̀ʉ gyʉʉ ndə məmɔ̀ʼ chɔ̂,

bəntəŋbəshʉ chə̀ŋtə ŋwɔŋtə-ʉə

ndə mənyʉ́ʉ bɔ̌ŋ Tiekətʉ

bɔŋleʼ nyʉ́ʉ bɔ̌ŋ Wo ndə ɔ Kùŋ Tə́ŋ.’*4:26 Ŋwɔʼnə-təLyuu 2:1-2.

27 M̈ɔ shyíi bii nə shʉəŋ, Hɛlo ghɔŋ Bɔŋtio Bale leʼnə bʉə ndə bɔ̂ŋ gòʼ təmə kínə Nyii fɛ ghɔŋbə bʉə-Isilɛ mu kəyəŋkwɛʼtəŋ-fɛ̄ŋ, shyʉ̀ʉ gyʉʉ ndə mənyʉ́ʉ bɔ̌ŋ Jiso, vaafɔ̀ʼ-a ndə ɔ bɛ ŋkʉʉ bɔŋleʼ kə́ bɛ wo ndə a kə kùŋ. 28 Nubə inchəŋ ndə bɔ̂ŋ tʉʼ fɔ̀ʼ, nɔ bɛ haʼ ndə a kʉ̀ʉ mbɔ i bɛ, bɔŋ-nɔʼ-leʼ kə shʉ̀tə mbɔ i bɛ lʉ̀ hə bəshʉ. 29 Tiekətʉ, kíahə shʉ-a nduɔ, lɛ́nə nubə ndə bɔ̂ŋ nɔʼ fɔ̀ʼ, kwáa vâafɔʼɔ-ba ndə məkwə́ʼ ŋgiekə-a nə fyii shʉ́əshʉ́ə. 30 Tə́ŋ ghʉəʼ-nchʉʼ-kə-a, chìi fɔŋ-bəcheʼ leʼnə nuchíechubə tíŋ hə bɔ̌ŋ vaafɔ̀ʼ-a Jiso ndə ɔ kə bɛ ŋkʉʉ."

31 Ndʉʉ ndə bɔ̂ŋ gháaNyii liʼ, mbʉ kəyəŋ ndə bɔ̂ŋ tə́nə chɔ ŋʉ̀ʼnə. LyʉʉhəNyiikə ŋíi mu bɔŋ tə lə́ŋ, bɔ̂ŋ jyʉ́ʉ kəghɔ-ɔ, bɔ̂ŋ chʉ́ʉhə məkwə́ʼ ŋgieNyiikə nə fyii shʉ́əshʉ́ə.

Bʉə ndə bɔ̂ŋ nɔʼ bɛ́ŋ Nyii kə́ gyʉ̀ə fɔbə-ʉə

32 Bʉə bənchəŋ ndə bɔ̂ŋ bɛ́ŋ Nyii dùʼ nə ŋgiekə imɔʼ, təmə wo kie yi-yə fɔkə ŋkʉʉ fɛ, bɔŋ bɔ̂ŋ kə́ gyʉ̀ətə fɔkə təmiyɔŋ ndə wo kie. 33 Mbʉ bəlɔntəŋNyii bìʼ lɔ̀ʼ məbʉ̀nə kóʼ Jiso Tiekətʉ shʉ́əshʉ́ə, Nyii kə́ dʉ̀ʼ buuŋjyu yɔ́ŋyɔ́ŋ tʉ bɔŋ bənchəŋ. 34 Wo kə bɛ mu bɔŋ ndə ɔ byúu fɔkə fɛ, bʉʼka mbɔ bʉə ndə bɔ̂ŋ kə kie tɔ̂bə leʼnə bʉə ndə bɔ̂ŋ kə kie njaahə nɔ nə kə́ fɛ̀ŋ gwè nə kyʉə-ɛ, 35 mɔ̀ʼ bəshʉ mbʉ bəlɔntəŋNyii, bɔ̂ŋ kə́ gyʉ̀ə tʉ bəbɛʼbʉə haʼ ghʉə kənu ndə i yá bɔŋ.

36 Ndə fʉʼkənu, Jɔsɛ ndə ɔ kə lɔ̀ hə kəlɔŋ Lɛvi mu lɔʼɔ Siblɔ, bəlɔntəŋNyii nɔ kə tyú yie kətʉ-ɔ nə Banaba (ndə i bɛ mbɔ wo ndə ɔ kwèʼhə bʉə), 37 nɔ kə fɛ̀ŋ tɔ̂kə ndə ɔ kie, gwè nə kyʉə-ɛ, mɔ̀ʼ bəshʉ mbʉ bəlɔntəŋNyii, ndə mə-kə́-gyʉ̀ə tʉ bʉə haʼ ghʉə-kənu ndə i yá bɔŋ.