Fɔʼɔ 23

1 Ndʉʉ ndə Bɔɔ tʉ́ʼ shʉ-i ndəŋ mbʉ bʉə mu kaŋsotəkwɛʼtəŋ lɛ́nə mu shʉhə-ʉə shʉ́əshʉ́ə, ɔ ghɔ̀ŋ mbɔ, "Bəliŋ-bɔŋ, məchimbi-ɔ tə gwè dàa laa, ghɔŋbə ŋkwɔʼtə-ɔŋ nɔ bɛ itʉ́ʉnə bəshʉ-Nyii."

2 Anania tiefɛ̀ʼndɛŋkwɛʼtəŋNyii kàhə bʉə ndə bɔ̂ŋ kə tə́ŋtə mbʉə ɔ mbɔ b̈ɔ̂ŋ la gwúu ghɔkə chu-ɔ. 3 Ndʉʉmɛ, Bɔɔ ghɔ̀ŋ tʉ ɔŋ mbɔ, "Nyii bu gwúu ghɔkə chu-a, wo làhə shʉ! A dùʼ fɛ̄ŋ ndə məchʉ̀ə ŋkwɛ nə nuʼ-Nyii bɔŋ bʉ̀nə kə́ bə́ʼ mbʉ nuʼ tə kàhə mbɔ b̈ə gwúu ghɔkə chu-mɔ?"

4 Bʉə ndə bɔ̂ŋ tə́nə mbʉə ɔ ghɔ̀ŋ mbɔ, "A tʉʼ chɛ̀ŋtə tiefɛ̀ʼndɛŋkwɛʼtəŋNyii mɛ?"

5 Bɔɔ bə̀ŋhə mbɔ, "Bəliŋ-bɔŋ, mɔ kínə mbɔ ɔ bɛ tiefɛ̀ʼndɛŋkwɛʼtəŋNyii fɛ, bʉʼka bə nɔ nyɔ̀ʼ mu ŋwɔʼnə-Nyii mbɔ, ‘Kə a məgìe kətʉ-ntəŋbəshʉ-bʉə-ba, bʉəbʉə fɛ.’ "

6 Ndʉʉ ndə Bɔɔ nyíɛ mbɔ ibɛʼ-yə via-bʉə-kə bɛ bʉə-Sadusi ibɛʼ-yə kə́ bɛ bʉə-Falasi, ɔ tíi nə ghʉəʼkə mu mbʉ kaŋsotə mbɔ, "Bəliŋ-bɔŋ, mɔ nɔ bɛ wo-Falasi, kə́ bɛ vaa-wo-Falasi. Nɔ chìi bʉʼka ndə mɔ tʉʼ chyìi nə fyii shʉ́əshʉ́ə mbɔ bʉə ndə bɔ̂ŋ nɔʼ kə kwú bu bʉ̀nə kóʼ, ndə bə gwè nə mɔ fɛ̄ŋ kə́ tyúutə mɔ nɔ."

7 Ndʉʉ ndə ɔ kə gìe yɔ̄ŋ-yə mbyuutəmbyuutə gwù mu mbʉ bʉə-Falasi ghɔŋbə bʉə-Sadusi, mbʉ nuɔ-bʉə gyʉ̀əhə. 8 Bʉʼka bʉə-Sadusi kə bɛ́ŋ mbɔ w̃o bʉ̀nə kóʼ fɛ, təmə bʉəntəŋNyii bɛ ghɔ fɛ, təmə lyʉʉhəbə bɛ ghɔ fɛ, bɔŋ bʉə-Falasi bɛ́ŋ nubə-bɔ̄ŋ inchəŋ. 9 Ndʉʉmɛ, mbyuutəmbyuutə shʉ́əshʉ́ə gwù, bəbɛʼbʉə-Falasi ndə bɔ̂ŋ kə́ dàhə nuʼ-Mushi lɔ̀ hə sê kɛŋ dùu lyʉʼʉ shʉ́əshʉ́ə kə́ ghɔ̀ŋ mbɔ, "Baʼa nyíɛ nu-bʉəbʉə-kə ndə wo-ɔ̄ chìi fɛ. Ndʉʉbɛʼ kwə́ʼ lyʉʉhəkə byuunɔ wontəŋNyii tʉ ɔŋ." 10 Ndʉʉ ndə mbʉ mbyuutəmbyuutə kə shʉ́ə daa, mbʉ ntəŋbəshʉ-bʉəkwɛʼtəŋ-bəsɔge, nɔ kə kə́ fàa mbɔ bə bu jɔ̀ʼtə Bɔɔ, ɔ kàhə mbʉ bəsɔge ndə məshíʼ gɛ̀ yá ɔ fí hə kəghɔ-bɔŋ nə ghʉəʼkə gwè nə nɔŋ mu njaa-bəsɔge.

11 Mbi kʉ̂ʉ bìʼ jʉ́, Tiekətʉ gwè tə́nə mbʉə ɔ, ghɔ̀ŋ tʉ ɔŋ mbɔ, "Kie fyii shʉ́əshʉ́ə, bʉʼka ntɛ ndə a kwə́ʼ te mɔ tʉ bʉə-Jɛlosalɛŋ nɔ, a nɔ kie ndə məkwə́ʼ haʼ nɔ ghɔ te mɔ tʉ bʉə-Luŋ."

Bə tyúutə wu-Bɔɔ-kə ndə məyí ɔ

12 Mbi kʉ̂ʉ sɛŋ fíi, bʉə-Juu shʉ̀tə kàa nukə mbɔ bɔ̂ŋ la kʉʉ kɔ́ fɔkə chu-bɔŋ fɛ, tə bɔ̂ŋ yaʼ yí Bɔɔ. 13 Bʉə ndə bɔ̂ŋ kə shyʉ̀ʉ gyʉʉ ndə nukə-ɔ̄ŋ nɔ nə tíŋ bʉə wuŋ kwi. 14 Bɔ̂ŋ gɛ̀ tʉ bətiefɛ̀ʼndɛŋNyii ghɔŋbə bəntəŋbəshʉ ghɔ̀ŋ mbɔ, "Baʼa nɔʼ kɛŋ kàa shʉ́əshʉ́ə ndə məyí Bɔɔ, fɔkə buŋ ŋíi chu-baʼa. 15 Nduɔ, b̈ii bəbʉə-mbʉ-kaŋsotə dùhə ntəŋ tʉ ntəŋbəshʉ-bʉəkwɛʼtəŋ-bəsɔge mbɔ ɔ̈ lʉ̀ Bɔɔ shíʼ gwè nə nɔŋ, kɔ́ tʉ bii, fi nə bii bu chʉ̀ə fɛʼɛ-ɛ jyujyu. Baʼa bu lìʼ lʉʉ-i sêfia ɔ buŋ dàa."

16 Vaabələŋ, vaa-liŋ-Bɔɔ woke yʉ́ chùŋ-yʉə, gɛ̀ sʉ́ʉ mbʉ mu njaa-bəsɔge, fʉ̀ʼtə tʉ Bɔɔ. 17 Bɔɔ tíi mbyu wokwɛʼtəŋ-bəsɔge ghyʉʉ, imɔʼ gìe tʉ ɔŋ mbɔ, "Lʉ̀ vaabələŋ-ɔ̄ŋ gɛ̀ nə nɔŋ tʉ ntəŋbəshʉ-bʉəkwɛʼtəŋ-bəsɔge, bʉʼka ɔ nɔ kie nukə ndə məgìe tʉ ɔŋ."

18 Ndʉʉmɛ, ɔ lʉ̀ ɔ gɛ̀ nə nɔŋ tʉ mbʉ ntəŋbəshʉ-bʉəkwɛʼtəŋ-bəsɔge ghɔ̀ŋ mbɔ, "Bɔɔ ndə ɔ bɛ mu njaa-chaŋ le, nɔ tíi mɔ ghɔ̀ŋ mbɔ m̈ɔ lʉ̀ vaabələŋ-ɔ̄ŋ gwè nə nɔŋ tʉ a bʉʼka ɔ nɔ kie nukə ndə məgìe tʉ a."

19 Mbʉ ntəŋbəshʉ-bʉəkwɛʼtəŋ-bəsɔge yá kwii-i ghɔŋ fí ŋwɔŋ-yʉə-ɔ bɔ̌ŋ, ɔ bíʼtə tʉ ɔŋ mbɔ, "A kie ka ndə məgìe tʉ mɔ?"

20 Ɔ bə̀ŋhə mbɔ, "Bʉə-Juu nɔʼ shyʉ̀ʉ gyʉʉ ndə mətéʼ tʉ a mbɔ ä la shíʼ gwè nə Bɔɔ mu mbʉ kaŋsotə yɔ̂ŋ, fi nə bɔ̂ŋ tʉʼ kʉ́ʉ tyúutə jyujyu ndə məkínə nukə te ɔ. 21 Bɔŋ kə a mə mɛ̀ʼtə bɔŋ lóʼtə a fɛ, bʉʼka bʉə-bʉə tə tíŋ wuŋ kwi nɔ nʉ̀ʉ sêfia kə́ chyìi ndə məyí ɔ, nɔʼ kàa nukə mbɔ bɔ̂ŋ kʉʉ yú fɔkə byuunɔ nú fɔkə fɛ tə yaʼ yí ɔ. Nduɔ, bɔ̂ŋ nɔʼ shʉ̀tə ŋwɔŋ-yʉə, kə́ chyìi ndə məyʉ́ ŋgiekə hə kəghɔ-a."

22 Ndʉʉmɛ, mbʉ ntəŋbəshʉ-bʉəkwɛʼtəŋ-bəsɔge téʼ tʉ mbʉ vaabələŋ ɔ̈ bʉ̀nə gɛ̀ nə wi, ghɔ̀ŋ tʉ ɔŋ mbɔ, "Kə a mə chìi wo kínə mbɔ a nɔʼ shyíi mɔ nə nubə-ɔ̄ŋ fɛ."

Bə tə́ŋ Bɔɔ kɔ́ Kasalia

23 Ndʉʉmɛ, ɔ tíi bʉəkwɛʼtəŋ-bəsɔge bəbûu, ghɔ̀ŋ tʉ bɔŋ mbɔ, "B̈ii shʉ̀tə bəsɔge təghyʉʉ təbûu, leʼnə bəsɔge ndəŋ bənyaa-bəkatə wuŋ təkwiitia, leʼnə bʉə mɔ̀ʼ ghʉ̂ʉ təghyʉʉ təbûu ndə məgɛ̀ Kasalia ndə bəchî bɔmɔʼ ndʉʉbətyuʼ. 24 B̈ii shʉ̀tə nyaahə ghɔ tʉ Bɔɔ, ndə məbɛ̀ʼ ɔ, gwè nə nɔŋ buɔbuɔ, tə gwè dàa nə nɔŋ tʉ Gɔməna Fɛli." 25 Ndʉʉmɛ, ɔ nyɔ̀ʼ ŋwɔʼnə-ɔ̄ŋ tʉ mbʉ gɔməna mbɔ,

26 "I nɔ lɔ̀ hə kəghɔ-Kladio Lisia, tʉ tie-ɔ Gɔməna Fɛli. Mɔ chàʼtə a! 27 Bʉə-Juu nɔ nə yá wo-ɔ̄, tə kə́ kʉ́ʉ yí ɔ, ndʉʉ ndə mɔ gwè bìatə bɔŋ nə bəsɔge, chʉ̀ʼ tʉkə-i, kʉ̂ʉ yʉ́ mbɔ ɔ bɛ wo-Luŋ, 28 mɔ kə́ kʉ́ʉ ndə məkínə nukə ndə bə tʉʼ chɔ́ŋhə ɔŋ bʉʼka yɔŋ-yə, ndʉʉghɔfii, mɔ lʉ̀ ɔ shíʼ gɛ̀ nə nɔŋ mu kaŋsotəkwɛʼtəŋ-bɔŋ. 29 Mɔ chèʼnə mbɔ bə nɔ nə kə́ chɔ́ŋhə ɔŋ bʉʼka nuʼ-yʉə bɔŋ təmə i bɛ nukə ndə bəkɔ bə yí ɔ bʉʼka yɔŋ-yə byuunɔ ɔ gɛ̀ chaŋ fɛ. 30 Bɔŋ ndʉʉ ndə bə kə kɛ̀ʼ tʉ mɔ mbɔ bə tʉʼ kʉ́ʉ fia ndə məyí ɔ, mɔ tuŋ tə́ŋ ɔŋ haʼ tʉ a ndʉʉmɛ bɔŋleʼ kàhə bʉə ndə bɔ̂ŋ tʉʼ chə́ŋ bɔ̌ŋ ɛŋ ndə məgwè fʉ̀ʼtə nubə tʉ a ndə bɔ̂ŋ kie te ɔ nə mbəŋ-yʉə."

31 Ndʉʉmɛ, mbʉ bəsɔge yʉ́ chu-i, lʉ̀ Bɔɔ gwè nə nɔŋ ndʉʉbətyuʼ tʉ Antibatili. 32 Mbi kʉ̂ʉ sɛŋ fíi, bɔ̂ŋ bʉ̀nə gɛ̀ mu njaa-bəsɔge, mɛ̀ʼtə mbʉ bəsɔge bənyaa-bəkatə ndə məgɛ̀ ghɔŋ bɔŋ. 33 Ndʉʉ ndə bɔ̂ŋ gwè dàa Kasalia, kʉ̂ʉ kɔ́ mbʉ ŋwɔʼnə tʉ mbʉ gɔməna bɔŋleʼ dʉ̀ʼ Bɔɔ ghɔ tʉ ɔŋ. 34 Ndʉʉ ndə mbʉ gɔməna tíi mbʉ ŋwɔʼnə lìʼ, bíʼtə mbɔ ɔ lɔ̀ hə ndə yɔ̂ŋ-yə bie. Ɔ kʉ̂ʉ yʉ́ mbɔ ɔ lɔ̀ hə Silisia, ɔ ghɔ̀ŋ mbɔ, 35 "Mɔ bu yʉ́ ya-yə ndʉʉ ndə bʉə ndə bɔ̂ŋ tʉʼ chə́ŋ bɔ̌ŋ aŋ gwè dàa." Ndʉʉmɛ, ɔ kàhə mbɔ b̈ə fʉ̀əŋ Bɔɔ mu chaŋ ndə i bɛ ntoʼ-Hɛlo, kə́ chyìi ɔ.