1 Ndʉʉghɔfii, Bɔɔ ghɔŋ Sila tòʼ tíŋ hə mu Aŋfiboli leʼnə Abolonia gɛ̀ dàa Tɛsalonika, kəyəŋ ndə njaagháaNyii-bʉə-Juu bɛ chɔ. 2 Bɔɔ gɛ̀ mu mbʉ njaagháaNyii haʼ ndə ɔ̃ chìi, ɔ kə́ kɔ̀ɔtə ndə məŋɔ́ʼhə shʉ-yʉə ndə ŋgieNyiikə ndə Chîlɔʼbə itia. 3 Ɔ kə́ fʉ̀ʼtə bɔŋ-kə́-leʼ dʉ̀ʼ mbɔ Wo ndə Nyii Kùŋ Tə́ŋ la kie ndə mənyíɛ ŋgʉəʼ, bʉ̀nə kóʼ hə ndəŋ kwu, ghɔŋ ndʉʉghɔfii mbɔ, "Jiso-ɔ̄ ndə mɔ tʉʼ lɔ̀ʼ ntəŋ-ɔ̄ŋ tʉ bii te ɔ nɔ, nɔ bɛ mbʉ Wo ndə Nyii Kùŋ Tə́ŋ." 4 Bə lóʼtə bəbɛʼbʉə, bɔ̂ŋ bɛ́ŋ Nyii bìa Bɔɔ ghɔŋ Sila, ghɔŋbə bəbɛʼbʉə-Gili buŋmbi ndə bɔ̂ŋ tʉʼ fàa Nyii ghɔŋbə ŋkɛŋ-bəke-hə buŋmbi ghɔ.

5 Bɔŋ bəntəŋbəshʉ-bʉə-Juu kie bəfyuʼ, kə́nə bʉə-mbunə ndə buuŋtə-ʉə byʉ́ʼ. Bɔ̂ŋ fúu nuɔ chʉ́ʉhə ntɔŋntɔŋ mu mbʉ kəyəŋkwɛʼtəŋ. Bɔ̂ŋ gɛ̀ ŋíi mu njaa-Jasɛŋ kə́ kʉ́ʉ ndə məyá bɔŋ fyú gwè nə bɔŋ tʉ mbʉ bʉə. 6 Ndʉʉ ndə bɔ̂ŋ kʉ̂ʉ bɔŋ kəŋkaa, bɔ̂ŋ dùu Jasɛŋ ghɔŋbə bəbɛʼbʉə ndə bɔ̂ŋ nɔʼ bɛ́ŋ Nyii, gɛ̀ nə bɔŋ tʉ mbʉ bʉə ndə bɔ̂ŋ kə́ sɔ́ʼ mbʉ mu kəyəŋkwɛʼtəŋ kə́ tíitə ghɔ̀ŋ mbɔ, "Bʉə-bɔ̄ŋ ndə bɔ̂ŋ nɔʼ bə̀ŋtə wʉʉnəmbikə, nɔʼ leʼ gwè ghɔ nduɔ fɛ̄ŋ. 7 Jasɛŋ nɔʼ lʉ̀ bɔŋ bənchəŋ kɔ́ njaa-ɔ. Bʉə-bɔ̄ŋ nɔʼ leʼ chɔ́ʼ chu Fɔŋ-Luŋ, kə́ ghɔ̀ŋ mbɔ Fɔŋbɛʼ la bɛ ghɔ, bə kə́ tíi ɔ nə Jiso."

8 Ndʉʉ ndə bɔ̂ŋ yʉ́ nubə-ɔ̄ŋ, i chɔ́ŋhə mbʉ nuɔ-bʉə ghɔŋbə mbʉ bəntəŋbəshʉ mu mbʉ kəyəŋkwɛʼtəŋ. 9 Ndʉʉ ndə mbʉ bəntəŋbəshʉ fí chʉʼkətʉbə hə kəghɔ-bɔŋ, bɔ̂ŋ fyúhə Jasɛŋ leʼnə bəbɛʼbʉə ndə bɔ̂ŋ nɔʼ bɛ́ŋ Nyii, bɔ̂ŋ gɛ̀.

10 Haʼ ndʉʉbətyuʼ-ghɔ̄, bʉə ndə bɔ̂ŋ nɔʼ bɛ́ŋ Nyii dùhə Bɔɔ ghɔŋ Sila kɔ́ Bɛlia. Ndʉʉ ndə bɔ̂ŋ dàa chɔ, bɔ̂ŋ gɛ̀ mu njaagháaNyii-bʉə-Juu. 11 Yɔ̄ŋ-yə bʉə-Juu nɔ kə kie kuŋhə mbʉə-bɔŋ chàa bìbə ndə bɔŋ bɛ Tɛsalonika, bʉʼka bɔ̂ŋ nɔ kə fí ŋgieNyiikə ndə Bɔɔ kə́ lɔ̀ʼ nə fyii jyujyu. Bɔ̂ŋ kə́ tíetə ŋgieNyiikə bəchibəchi ndə mənyíɛ mbɔ nukə ndə Bɔɔ ghɔŋ Sila tʉʼ dàhə bɛ shʉəŋ mɛɛ. 12 Ndʉʉghɔfii, bʉə buŋmbi bɛ́ŋ Nyii, ŋkɛŋ-bəke-hə ndə bɔ̂ŋ lɔ̀ hə Gili leʼnə buŋmbi bələŋ.

13 Bɔŋ ndʉʉ ndə bʉə-Juu mu Tɛsalonika chèʼnə mbɔ Bɔɔ bɛ ghɔ mu Bɛlia lɔ̀ʼ ŋgieNyiikə chɔ, bɔ̂ŋ dàa gɛ̀ chɔ kə́ ŋìitə bɔŋleʼ kɔ́ buŋ bʉə-kəyəŋ-ghɔ̄bə ndə məchʉ́ʉhə ntɔŋntɔŋ. 14 Ndʉʉghɔfii, haʼ ndʉʉmɛ, bʉə ndə bɔ̂ŋ nɔʼ bɛ́ŋ Nyii tə́ŋ Bɔɔ kɔ́, ɔ gɛ̀ chu-muukwɛʼtəŋ, bɔŋ Sila ghɔŋ Timɔti shi káa chɔ. 15 Bʉə ndə bɔ̂ŋ kə gɛ̀ tíŋhə Bɔɔ, gɛ̀ tə dàa Atɛŋ. Ndʉʉ ndə ɔ byʉ̀hə ntəŋ tʉ bɔŋ mbɔ Sila ghɔŋ Timɔti yi shi chʉʼ gwè bìatə ɔŋ, bɔ̂ŋ bʉ̀nə.

16 Ndə Bɔɔ kə́ chyìi bɔŋ Atɛŋ, fyii-i chɔ́ŋhə ɔŋ, ndə ɔ nyíɛ mbʉ bʉə mu kəyəŋkwɛʼtəŋ, bɔ̂ŋ nɔʼ kɔ́ fyiihə-ʉə ndə bənyii kədɔŋ. 17 Bɔɔ gɛ̀ mu njaagháaNyii kə́ túŋ bəŋʉʉ ghɔŋbə bʉə-Juu leʼnə bəbɛʼbʉə ndə bɔ̂ŋ kə́ lə̀ʼtə Nyii, bɔŋleʼ túŋ bəŋʉʉ ghɔ mu yəŋ-vyii-kə ghɔŋbə bʉə ndə bɔ̂ŋ gɛ̀ bìatə bɔŋ chɔ.

18 Bəchichabɛʼbə ndə bə kə́ tíi bɔŋ nə bəEbikolia* ghɔŋbə bəSitɔɛ * kə́ túŋ bəŋʉʉ ghɔŋ ɔŋ. Bəbɛʼbə kə́ ghɔ̀ŋ mbɔ, "Wo-kənjuɔnə-ɔ̄ŋ tʉʼ ghɔ̀ŋ mbuka la?" Bəbɛʼbə kə́ ghɔ̀ŋ mbɔ, "Ɔ nɔ tʉʼ kwə́ʼ te bənyii kətə̂ŋbɛʼbə." Bʉʼka ɔ nɔ kə́ lɔ̀ʼ ntəŋjyujyu tʉ bɔŋ te Jiso leʼnə məbʉnə-kóʼ-e.

19 Bɔ̂ŋ lʉ̀ ɔ gɛ̀ nə nɔŋ mu kaŋsotəbɛʼ ndə bə kə́ tíi nə Alubago*, ghɔ̀ŋ tʉ ɔŋ mbɔ, "Bəkɔ a chìi baʼa kínə nukə te nu-fefe-kə-ɔ̄ŋ ndə a tʉʼ dàhə nɔ mɛ?" 20 Bʉʼka a nɔʼ gwè nə nu-fefe-bɛʼbə ndə baʼa tʉʼ yʉ́, baʼa kə́ kʉ́ʉ kínə nubə ndə i bɛ yɔŋ. 21 Bʉʼka bʉə-Atɛŋ ghɔŋbə bəntoʼŋgwe ndə bɔ̂ŋ bɛ chɔ nɔ nə kə́ kɔ́ ŋwɔŋ-yʉə bəchibəchi ndə mə-kə́-yʉ́ nu-fefe-bə bɔŋleʼ dàhə haʼ nu-fefe-bə ghɔ.

22 Ndʉʉmɛ, Bɔɔ lɔ̀ tə́nə ntəŋntəŋ bʉə-ghɔ̄bə ndəŋ mbʉ kwɔŋ Alubago, ghɔ̀ŋ mbɔ, "Bətie-bɔŋ, bəliŋ-bɔŋ, bʉə-Atɛŋ, mɔ nɔ nyíɛ mbɔ b̃ii nɔ kɛŋ lɛ́ɛŋ bənyii daa. 23 Ndə mɔ kə́ tíŋ, kə́ nyíɛ yəŋ-lɛ́ɛŋ-bənyii-bə-ii, mɔ nyíɛ ndə bə nyɔ̀ʼ ndəŋ tyʉəŋnyiibɛʼkə mbɔ, Tʉ nyii ndə bə gòʼ təmə kinə ɔŋ fɛ. Ndə bii tʉʼ lɛ́ɛŋ ɔŋ təmə kə́ kínə fɛ, nɔ bɛ ɔ ndə mɔ bu fʉ̀ʼtə tʉ bii nduɔ.

24 "Ɔ nɔ bɛ Nyii ndə ɔ chìi wʉʉnəmbikə ghɔŋ fɔbə ndə i bɛ muŋgɔ inchəŋ, kə́ bɛ Tiekətʉ-yuo ghɔŋbə chisêkə, nɔ, ɔ mə chí mu mbaahə ndə gə̀ŋ woməsʉʉ nə ghɔkə-i fɛ. 25 Təmə bɔŋ kə́ byúu fɔbɛʼkə ndə bəkɔ woməsʉʉ fɔ̀ʼ tʉ ɔŋ fɛ, fi nə ɔ byúu fɔkə fɛ. Bʉʼka nɔ tʉʼ kɔ́ ɔ, kɔ́ məchímbi tʉ bʉə bənchəŋ, kɔ́ bəyihə bɔŋleʼ kɔ́ fɔbə inchəŋ. 26 Hə ndəŋ mbyu wo-imɔʼ, ɔ chìi lɔʼ-bətə̂ŋ-tə inchəŋ kəwʉʉnəmbi ndə mə-kə́-chí ndəŋ yəŋbə inchəŋ chisêkə, ɔ nɔʼ kə shʉ̀tə ŋgwɔʼmbi-yʉə lʉ̀ hə bəshʉ, ghɔŋbə ŋkyʉə-bəyəŋ-bə ndə bɔ̂ŋ kie ndə məchí chɔ.

27 "Nyii nɔ kə chìi nɔ, mbɔ bɔ̂ŋ bu kʉ́ʉ ɔ, ndʉʉbɛʼ nɔ miɛnə ɔŋ yi nyíɛ ɔŋ, bɔŋ bɛ le ɔ dɔ̀ŋnə hə mbʉə wotəmiyɔŋ mu bʉʼʉ fɛ. 28 Bʉʼka bʉʼʉ nɔ tʉʼ chí mbi kə́ tòʼ, kə́ bɛ bʉə ndə bʉʼʉ bɛ yɔŋ bʉʼka mbəŋ-ɛŋ. Haʼ ndə bəmɔʼlyuu-bii-bɛʼbə kə ghɔ̀ŋ mbɔ, ‘Baʼa nɔ kɛŋ bɛ haʼ ŋgwie-wo-e ghɔ.’ 29 Nduɔ ndə bʉʼʉ bɛ ŋgwie-wo-Nyii nɔ, kə bʉʼʉ mə kə́ kwɔ̀ʼtə mbɔ, mbʉ Nyii bɛ nə goo, siliba byuunɔ ŋgoʼhə ndə woməsʉʉ kwɔ̀ʼtə kɔ́ŋ byuunɔ chìi nə ghɔkə-i fɛ. 30 Nɔ kə bɛ ndə vɛʼ-tʉŋkwɔŋ-ghɔ̄, Nyii jyùu shʉ-i, bɔŋ nduɔ ɔ tʉʼ kàhə bʉə bənchəŋ ndə yəŋbə inchəŋ mbɔ bɔ̂ŋ shìe liɛŋtə-ʉə hə ndəŋ bʉ̂ʼtə-ʉə. 31 Bʉʼka ɔ nɔʼ shʉ̀tə chîkə tʉ́ʼ ndə məkwɛ̀ fɛʼɛ kəwʉʉnəmbi ndyʉndyʉ tíŋ hə bɔ̌ŋ wo ndə ɔ nɔʼ séʼ. Ɔ nɔʼ dʉ̀ʼ yɔ̄ŋ-yə tʉ bʉə bənchəŋ ndə məbʉ̀nə kóʼhə mbʉ wo ndʉʉ ndə ɔ kə kwú."

32 Ndʉʉ ndə bɔ̂ŋ yʉ́ ɔ tíi yie məbʉnə-kóʼ hə ndəŋ kwu, bəbɛʼbʉə kə́ dʉ̀ʉhə ɔŋ, bɔŋ bəbɛʼbə ghɔ̀ŋ mbɔ, "Baʼa nɔ kʉ̀ʉ ndə mə-bìʼ-yʉ́ nukə-ɔ̄ŋ kəghɔ-a." 33 Ndʉʉmɛ, Bɔɔ lɔ̀ hə mu bɔŋ gɛ̀ nə wi. 34 Bɔŋ bəbɛʼbʉə bɛ́ŋ Nyii, chə̀ŋ bɔ̌ŋ ɔŋ. Mu bɔŋ nɔ kə bɛ Dionashu ndə ɔ bɛ ŋguu-kaŋsotə-Alubago leʼnə wokebɛʼ ndə bə kə́ tíi ɔ nə Damali ghɔŋbə bəbɛʼbʉə.