1 Yɔ̄ŋ-yə kʉ̂ʉ tíŋ, Tiekətʉ séʼ bəbɛʼbʉə njuɔ bûu nə wuŋ təkwiitia, tə́ŋ bɔŋ bəbûubəbûu mbɔ b̈ɔ̂ŋ kə́ gɛ̀ hə bəshʉ ɔ ndə yəŋkwɛʼtəŋbə ghɔŋbə yəŋbə inchəŋ ndə ɔ bu gɛ̀ chɔ. 2 Jiso ghɔ̀ŋ tʉ bɔŋ mbɔ, "Fɔbə nɔ yɔ́ŋ daa ndə məlʉ̀ mutɔ, bɔŋ bʉə-fɔʼɔ tə́ʼ, nɔ, b̈ii gwía shʉ́əshʉ́ə tʉ Tiekətʉ-bəfɔ-mutɔ, mbɔ ɔ̈ tə́ŋ bʉə-fɔʼɔ mutɔ-ɔ ndə məlʉ̀ fɔbə. 3 Nduɔ, b̈ii gɛ̀! B̈ii nyíɛ! Mɔ nɔ tʉʼ tə́ŋ bii nə vâabinjyʉʉhə mu bəbuu. 4 Kə bii mə lʉ̀ kyʉə fɛ, kə bii mə lʉ̀ kwo fɛ, təkɔmə takwubə. Kə bii mə kə́ kwə́ʼ dùhə fɛ.

5 "Ndʉʉtəmiyɔŋ ndə bii ŋíi mu njaa, b̈ii fəŋ ghɔ̀ŋ mbɔ, ‘Tə Nyii bìʼ bii nə fyiighʉ́ənə mu njaa-fɛ̄ŋ.’ 6 Kaʼ wo fyiighʉ́ənə bɛ mu njaa-ghɔ̄, məghaaNyii-yii tʉ ɔŋ te fyiighʉ́ənə káa ndəŋ ɔŋ. Bɔŋ byuunɔ i bʉ̀nə tʉ bii. 7 Kə bii mə kə́ tòʼ chítə bəyəŋbəyəŋ fɛ. B̈ii káa mu njaa imɔʼ, kə́ nú bɔŋ yú fɔkə təmiyɔŋ ndə bə bu kɔ́ tʉ bii. Kə bii mə tɛ́ŋ fɔkə fɛ bʉʼka mbɔ wo-fɔ̀ʼ nɔ kie ndə məkie lɔʼɔbə-i.

8 "Kaʼ bii ŋíi mu kəyəŋkwɛʼtəŋ, bɔ̂ŋ fí bii, b̈ii yú fɔkə təmiyɔŋ ndə bɔ̂ŋ kɔ́ tʉ bii. 9 B̈ii chʉ́ʼ bʉə-bəyɔʼ ndə bɔ̂ŋ bɛ chɔ, shyíi bʉə-kəyəŋ-ghɔ̄bə mbɔ, ‘Ndʉʉ nɔʼ kʉ̀ʼnə tʉ Nyii ndə məsɔ́ʼ bii ndə fɔŋ.’ 10 Kaʼ bii bɔŋ ŋíi mu kəyəŋkwɛʼtəŋ təmə bɔ̂ŋ fí bii fɛ, b̈ii gɛ̀ mu fiatə inchəŋ chɔ ghɔ̀ŋ mbɔ, 11 ‘Baʼa nɔʼ yʉ̀əʼtə bʉə-lɔʼɔ-kə-i kəwu-baʼa, ndə mədʉ̀ʼ mbɔ ndɔŋ-yii nɔ kətʉ-bii. B̈ii bɔŋ kínə mbɔ Nyii nɔʼ gwè ndə məsɔ́ʼ bii.’ 12 M̈ɔ shyíi bii mbɔ i bu yi shʉ́ə ndəŋ chî-kwɛ̀-fɛʼɛ-kə tʉ bʉə-lɔʼɔ-ghɔ̄bə, tə chàa ndə i bu bɛ tʉ bʉə-Sodɔŋ.

13 "Ŋgʉəʼ ndəŋ bii bʉə-Kolasiŋ! Ŋgʉəʼ ndəŋ bii bʉə-Bɛsieda! Bʉʼka nufinəbə ndə bə kə fɔ̀ʼ mu bii, bə kʉ̌ʉ kə fɔ̀ʼ mu Taa ghɔŋ Sidɔŋ, təmə bɔ̂ŋ nɔʼ kə shìe liɛŋ ndəŋ bʉ̂ʼtə-ʉə lʉ̀ hə mbibɛʼ, nə ndyi-kəfʉəŋ-hə kùŋ bubə ndə mədʉ̀ʼ mbɔ bɔ̂ŋ la nɔʼ kɔ́ŋ lɛɛŋhəkə-ʉə, tɔ̀ŋ mu kyʉ. 14 I bɔŋ bu yi bʉ̀ʉ tʉ bʉə-Taa ghɔŋbə bʉə-Sidɔŋ ndəŋ chî-kwɛʼ-fɛʼɛ-kə tə chàa ndə i bu bɛ tʉ bii. 15 Bii bʉə-Kabanu, bə bɔŋ-bu-leʼ kóʼhə bii ghɔʼ mɛ? Bə bu shúʼhə bii mu viʼi.

16 "Wo ndə ɔ yʉ́ chu-yii, nɔ yʉ́ chu-ɔ. Wo ndə ɔ tɛ́ŋ bii, nɔ tɛ́ŋ mɔ, bɔŋ wo ndə ɔ tɛ́ŋ mɔ, nɔ tɛ́ŋ mbəŋ-ɛŋ ndə ɔ tə́ŋ mɔ."

17 Ndə mbi tʉʼ gɛ̀, bʉə-bīŋ njuɔ bûu nə wuŋ təkwiitia le, bʉ̀nə nə tʉʉjyu, ghɔ̀ŋ mbɔ, "Tie-yaʼ, lyʉʉhəbʉəbʉəbə nɔ buŋ bʉ́ʉnə haʼ bʉ́ʉnə ghɔ tʉ baʼa yie-a."

18 Jiso bə̀ŋhə mbɔ, "Mɔ nɔʼ kə nyíɛ ndə Sata gwù yuo nə ghʉəʼkə ndə leʼnə-wyuu-kə leʼnə le. 19 Mɔ nɔʼ kɔ́ ghʉəʼkə tʉ bii, ndə bəkɔ bii tòʼ ndəŋ yɔhə ghɔŋbə bəŋɔŋ, bɔŋleʼ məghɔ́ʼ ghʉəʼ-Sata-kə, nubɛʼkə mə chìi bii fɛ. 20 Kə bii mə sɛ́ʼ ŋgʉʼʉ mbɔ lyʉʉhəbʉəbʉəbə bʉ́ʉnə tʉ bii fɛ, b̈ii sɛ́ʼ bə mbɔ bə la nɔʼ nyɔ̀ʼ yietə-ii yuo."

21 Ndʉʉ-ghɔ̄, LyʉʉhəNyiikə kɔ́ tʉʉjyu mu fyii Jiso ilə́ŋnə, ɔ ghɔ̀ŋ mbɔ, "Mɔ nɔ kɔ́ ndɔ a Tie-ɔ, Tiekətʉ ndə a kie yuo ghɔŋbə chisêkə, mbɔ a nɔʼ lə̀ŋ nubə-ɔ̄ŋ kəghɔ-bʉə ndə bɔ̂ŋ kie mukətʉ súunə ghɔŋbə ndaa, kɛ̀ʼ tʉ vâambuɔ. Ɔŋ, Tie-ɔ, bʉʼka nɔ nə bɛ ŋkʉʉnə-tʉʉ-a mbɔ ï bɛ nɔ.

22 "Tie-ɔ nɔʼ kɔ́ fɔbə inchəŋ tʉ mɔ, wo kaa ghɔ ndə ɔ kínə mbʉ Vaa fɛ yaʼkɛŋ mbʉ Tie, təmə wo bɔŋ bɛ ghɔ ndə ɔ kínə mbʉ Tie fɛ yaʼkɛŋ mbʉ Vaa, leʼnə wotəmiyɔŋ ndə mbʉ Vaa kʉ̀ʉ ndə məkɛ̀ʼ ɔ tʉ ɔŋ."

23 Jiso kíahə ŋwɔŋ-ɛŋ, chùŋ tʉ vâafɔʼɔ-bi mbɔ, "Biʼbə nɔ bɛ tʉ bʉə ndə bɔ̂ŋ nyíɛ nukə ndə b̈ii nyíɛ. 24 Mɔ tʉʼ gìe nɔ bʉʼka mbɔ buŋmbi bʉəyʉkəŋgieNyii ghɔŋbə bəfɔŋ nɔ kə́ kʉ́ʉ ndə mənyíɛ nukə ndə b̈ii nyíɛ, təmə bɔŋ nyíɛ fɛ, kə́ kʉ́ʉ ndə məyʉ́ nukə ndə bii yʉ́, təmə bɔŋ yʉ́ fɛ."

25 Kə nyíɛ, wo ndə ɔ kínə nuʼ-Mushi daa lɔ̀ hə sê ndə məmùutə Jiso, tíi ɔ mbɔ, "Chicha, mɔ kie ndə məchìi ka ndə məkie məchímbi təmə liʼ-i ghɔ fɛ?" 26 Jiso bə̀ŋhə mbɔ, "Bə nyɔ̀ʼ mbuka mu ŋwɔʼnə-nuʼ-Mushi? A tíi təka?" 27 Ɔ bə̀ŋhə ghɔ̀ŋ mbɔ, "Kʉ̀ʉ Nyii Tiekətʉ-a nə fyii-a inchəŋ, nə lyʉʉhəkə-a inchəŋ, nə ghʉəʼkə-a inchəŋ leʼnə ndaahə-a inchəŋ bɔŋleʼ kʉ̀ʉ wo-kətoʼ-a ndə a kʉ̀ʉ ŋwɔŋ-aŋ." 28 Jiso bə̀ŋhə mbɔ, "A nɔ bə̀ŋhə i kʉ̀ʼnə, fɔ̀ʼ yɔ̄ŋ-yə, a bu chí mbi."

29 Ndʉʉmɛ, mbʉ wo dàhə nuʼ kə́ kʉ́ʉ dʉ̀ʼ mbɔ ɔ la bɛ ndyʉndyʉ, bíʼtə tʉ Jiso mbɔ, "Wo-kətoʼ-ɔ bɛ nda?"

30 Jiso bə̀ŋhə ndə fʉʼkənu, ghɔ̀ŋ mbɔ, "Wo-Juubɛʼ nɔ nə bɛ ghɔ kə́ tòʼ fia lɔ̀ hə Jɛlosalɛŋ kə́ shíʼ gɛ̀ Jɛliko, bəlʉʼʉ shùɔ bʉə yá ɔ, shùɔ ndyihə-i, gwúu ɔ tə ɔ kə́ kʉ́ʉ kwú, bɔ̂ŋ mɛ̀ʼ ɔŋ sêfia.

31 "Wofɛ̀ʼndɛŋNyiibɛʼ kə́ shíʼ gɛ̀ hə fia-ghɔ̄, kwɔnə kə́ tòʼ gwè fyú ndəŋ ɔŋ, kʉ̂ʉ nyíɛ ɔŋ bɛ̀nə tíŋ nə wi. 32 Vaafɔ̀ʼbɛʼ mu njaafɛ̀ʼndɛŋNyii kə́ leʼ shíʼ gwè hə fia-ghɔ̄, kwɔnə fyú ndəŋ ɔŋ fia-ghɔ̄ bɛ̀nə haʼ bɛ̀nə.

33 "Wo-Samaliabɛʼ kə́ gɛ̀ sêfia-ghɔ̄, kwɔnə fyú ndəŋ ɔŋ, tʉkə-i vyíi ndəŋ ɔŋ. 34 Ɔ gɛ̀ mbʉə ɔ véʼ ŋgwomə ghɔŋ ndʉʼmə ndəŋ dyʉʼbə-i kɔ́ʼtə. Chɔ̀ʼhə ɔŋ dùʼhə ndəŋ jakashi-i, gɛ̀ nə nɔŋ mu njaa ndə bə lɔ̀ʼ chí chɔ, kə́ lɛ́nə ɔŋ. 35 Mbi kʉ̂ʉ sɛŋ fíi, ɔ fyúhə kyʉə, kɔ́ tʉ wo ndə ɔ tʉʼ fɔ̀ʼ mu njaa-ghɔ̄ mbɔ ɔ chʉʼ shi kə́ lɛ́nə ɔŋ. Shyíi ɔ mbɔ, ‘Kaʼ i shi tə́ʼ, mɔ yi kə bʉ̀nə mɔ bìʼ.’ "

36 Jiso ndə məlìʼ chəŋkə-ɔ̄ŋ bíʼtə mbɔ, "Mu bʉə-bɔ̄ŋ bətia nɔ, bɛ nda ndə ɔ fɔ̀ʼ ndə wo-kətoʼ-wo-ɔ̄, ndə bəlʉʼʉ shùɔ bʉə gwúu ɔ le?"

37 Wo-ghɔ̄ bə̀ŋhə mbɔ, "Nɔ bɛ wo ndə ɔ dʉ̀ʼ tʉvyiikə tʉ ɔŋ."

Jiso ghɔ̀ŋ mbɔ, "Gɛ̀ kə́ fɔ̀ʼ haʼ nɔ."Wo buuŋjyu Samalia

38 Ndə Jiso tʉʼ gɛ̀ hə sêfia ghɔŋ vâafɔʼɔ-bi, ɔ gɛ̀ dàa lɔʼɔbɛʼ ndə wokebɛʼ bɛ chɔ yie-e kə́ bɛ Mata, mbʉ woke-ghɔ̄ kɔ̀ʼnə ɔŋ chunjaa-ɔ. 39 Ɔ nɔ kə kie liŋ-iŋbɛʼ bə kə́ tíi ɔ nə Mɛli. Mɛli gwè shíʼ dùʼ sê bəshʉ Tiekətʉ kə́ yʉ́ nukə ndə ɔ tʉʼ gìe. 40 Nu-bəfɔ-kə ndə Mata kə́ chìi kə́ chɔ́ŋhə ɔŋ. Ɔ gɛ̀ tʉ Jiso ghɔ̀ŋ tʉ ɔŋ mbɔ, "Tiekətʉ, a tʉʼ nyíɛ ndə liŋ-ɔŋ mɛ̀ʼtə fɔbə kətʉ-mɔ tətɛʼ mɔ fe? Téʼ tʉ ɔŋ, ɔ̈ kwáa mɔ." 41 Tiekətʉ bə̀ŋhə mbɔ, "Mata, Mata, mu fyii-a tʉʼ chɔ́ŋhə aŋ, kə́ kɔ́ ŋgʉəʼ tʉ a ndə nubə buŋmbi. 42 Nɔ bɛ haʼ mbyu kənu imɔʼ ndə a kie ndə məkɔ́ fyii-a chɔ. Mɛli nɔʼ séʼ nu-jyujyu-kə, təmə bə kʉʉnə fí hə kəghɔ ɔ fɛ."