1 Ndʉʉ ndə Jiso nɔʼ kə mìʼtə ndə məgìe nubə-ɔ̄ŋ inchəŋ tʉ bʉə-ghɔ̄bə, ɔ ŋíi mu Kabanu. 2 Vaafɔ̀ʼ-wokwɛʼtəŋ-bəsɔge-ghyʉʉ mu Luŋ ndə tiefɔʼ-ɛ kə kʉ̀ʉ ɔ daa, kə́ yɔ́ʼyɔ́ʼ tə nɔʼ bɛ ndə məkwú. 3 Mbʉ wokwɛʼtəŋ-bəsɔge kʉ̂ʉ yʉ́ nubə te Jiso, tə́ŋ bəntəŋbəshʉ-bʉə-Juu tʉ ɔŋ mbɔ ɔ̈ la gwè chʉ́ʼ vaafɔ̀ʼ-ɛ. 4 Ndʉʉ ndə bɔ̂ŋ gwè tʉ Jiso, bɔ̂ŋ fʉ̀ʉtə ɔŋ tə nʉ̀ʉ sê, ghɔ̀ŋ mbɔ, "Wo-ɔ̄ nɔ kʉ̀ʼnə ndə məkie ŋkwaa kəghɔ-a, 5 bʉʼka mbɔ, ɔ nɔ kʉ̀ʉ lɔʼɔ-yʉʼʉ bɔŋ-nɔʼ-leʼ bɔ́ŋ njaaghaaNyii-yʉʼʉ."

6 Jiso gɛ̀ ghɔŋ bɔŋ tə kə́ dàa mbʉə mbʉ njaa, mbʉ wokwɛʼtəŋ-bəsɔge tə́ŋ bətiekənu-bi ndə məgìe tʉ ɔŋ mbɔ, "Tiekətʉ-ɔ, kə a mə chɔ́ŋhə ŋwɔŋ-aŋ fɛ, bʉʼka mɔ kʉ̀ʼnə wo ndə bəkɔ a gwè mu njaa-mɔ fɛ. 7 Nɔ bɛ yɔŋ nɔ, ndə mɔ nyíɛ ŋwɔŋ-ɔŋ mbɔ mɔ kʉ̀ʼnə wo mɔ gwè tʉ a fɛ. Bɔŋ gìe mbʉ mbyu kəŋgie, vaafɔ̀ʼ-ɔ bu kie nchʉʼ. 8 Bʉʼka mbəŋ-ɔŋ ghɔ nɔ bɛ tɔʼɔ wokwɛʼtəŋ-ɔŋ, bɔŋ leʼnə bəsɔge tɔʼɔ mɔ. M̃ɔ nɔ gìe tʉ mbyu sɔge təmiyɔŋ mbɔ, ‘Gɛ̀,’ nɔ ɔ gɛ̀, tʉ ibɛʼ-yə mbɔ, ‘Gwè,’ nɔ ɔ gwè. Mɔ gìe tʉ vaafɔ̀ʼ-ɔ mbɔ, ‘Chìi mənɔ,’ ɔ chìi haʼ nɔ."

9 Ndʉʉ ndə Jiso yʉ́ yɔ̄ŋ-yə, i nɔ kə chíe chu-i te nə nɔŋ. Ɔ kíahə ŋwɔŋ-ɛŋ gìe tʉ nuɔ-bʉə ndə bɔ̂ŋ kə́ gwè hə bɔ̌ŋ ɔŋ mbɔ, "M̈ɔ shyíi bii, mɔ chʉʼ nyíɛ wo ndə ɔ kɔ́ fyii-i tʉ Nyii nə wo-ɔ̄ buŋ mu Isilɛ fɛ." 10 Ndʉʉghɔfii, bʉə ndə bə kə tə́ŋ bɔŋ, bʉ̀nə chunjaa nyíɛ mbʉ vaafɔ̀ʼ tʉ ɔ nɔʼ kie nchʉʼ.

11 Ndʉʉ kʉ̂ʉ tíŋ məniʼ, Jiso gɛ̀ mu lɔʼɔbɛʼ bə kə́ tíi nə Nɛŋ, vâafɔʼɔ-bi ghɔŋbə nuɔ-bʉə-buŋmbi kə́ gɛ̀ hə bɔ̌ŋ ɔŋ. 12 Ndʉʉ ndə ɔ kə gɛ̀ kə́ŋhə mbʉə chulɔŋ lɔʼɔ-ghɔ̄, bə nɔ kə bɛ̀ʼ vaa-kwuʼwoke ndə ɔ nɔʼ kwú kə́ fyú nə nɔŋ mbi, ɔ kə́ bɛ haʼ mbyu vaabələŋ imɔʼ kəghɔ-ŋkwê-i. Bʉə buŋmbi ndə bɔ̂ŋ lɔ̀ hə lɔʼɔ-ghɔ̄ nɔ kə́ gwè hə bɔ̌ŋ kwuʼ woke-ghɔ̄. 13 Ndʉʉ ndə Tiekətʉ nyíɛ mbʉ woke-ghɔ̄, tʉkə-i vyíi ndəŋ ɔŋ. Ɔ gìe tʉ ɔŋ mbɔ, "Kə a mə leʼ gwía fɛ." 14 Ndʉʉghɔfii, Tiekətʉ kóʼ gɛ̀ kə̀ŋ mbʉ kətɔŋ-kəŋkwu-wo, bɔŋ bʉə ndə bɔ̂ŋ kə bɛ̀ʼ tə́nə kəyəŋ kəmɔʼ. Ɔ ghɔ̀ŋ mbɔ, "Ŋaʼ, lɔ̀ hə sê." 15 Mbʉ kəŋkwu wo bə̀ŋhə ŋwɔŋ-ɛŋ dùʼ, chʉ́ʉhə kə́ kwə́ʼ. Jiso kɔ́ ɔ tʉ ŋkwê-i.

16 Faa-kwu-kə yá bʉə bənchəŋ ndə bɔŋ kə bɛ chɔ, bɔ̂ŋ kə́ lə̀ʼtə Nyii, ghɔ̀ŋ mbɔ, "WoyʉkəŋgiekwɛʼtəŋNyii nɔʼ kóʼ mu bʉʼʉ, Nyii nɔʼ gwè ndə məkwáa bʉə-bi." 17 Bəsɔʼka-ɔ̄ te Jiso wɔ̀ʼnə mu Judia inchəŋ ghɔŋbə lɔʼ-bətə̂ŋ-tə ndə i yə̀ŋ bɔŋ fúu.

18 Vâafɔʼɔ-Jɔŋ ndə ɔ̃ kɔ́ muu shyíi ɔ te nə nubə inchəŋ ndə Jiso tʉʼ fɔ̀ʼ. Ɔ tíi bɔŋ bəbûu, 19 tə́ŋ bɔŋ tʉ Tiekətʉ ndə məbíʼtə mbɔ, "A bɛ mbʉ wo ndə ɔ kie ndə məgwè le mɛ, kə b̈aʼa kə́ kʉ̀ʼ wokədɔŋ?"

20 Ndʉʉ ndə mbʉ vâafɔʼɔ Jɔŋ kə gwè tʉ Jiso, bɔ̂ŋ gìe tʉ ɔŋ mbɔ, "Jɔŋ wo ndə ɔ̃ kɔ́ muu nɔ tə́ŋ baʼa ndə məgwè bíʼtə tʉ a mbɔ, ‘A bɛ wo ndə ɔ kie ndə məgwè le mɛ, kə baʼa kə́ kʉ̀ʼ wokədɔŋ?’ "

21 Mu ŋgwɔʼmbi-ghɔ̄ Jiso chʉ́ʼ bʉə buŋmbi ndə bɔ̂ŋ kə kie yɔʼbə, lyʉʉhəbʉəbʉəbə, bɔŋleʼ chʉ́ʼ bʉə ndə shʉtə-ʉə nɔʼ fʉ̀əŋtə. 22 Jiso bə̀ŋhə tʉ bɔŋ mbɔ, "B̈ii gɛ̀ shyíi Jɔŋ nə nubə ndə b̈ii nyíɛ bɔŋleʼ yʉ́, mbɔ bʉə ndə shʉtə-ʉə nɔʼ kə fʉ̀əŋtə nɔ tʉʼ nyíɛ nduɔ, bʉə ndə bɔ̂ŋ nɔʼ kə lɛ́ŋ nɔ tʉʼ tòʼ nduɔ, bʉə ndə bɔ̂ŋ kə kie lɔkə mbʉə-bɔŋ, mbʉəhə-ʉə nɔʼ bɛ jyujyu nduɔ, bʉə ndə tyunəbə-ʉə nɔʼ kə fʉ̀əŋtə nɔ tʉʼ yʉ́ nukə nduɔ, bʉə ndə bɔ̂ŋ nɔʼ kə kwútə nɔʼ bʉ̀nə kóʼ, bʉə-mbʉʼ bɔŋ-nɔʼ-leʼ yʉ́ ntəŋjyujyu ndə bə lɔ̀ʼ tʉ bɔŋ. 23 Tʉʉjyu nɔ bɛ yi-bʉə-yə ndə bɔ̂ŋ gòʼ təmə kə́ jínə mɔ fɛ."

24 Ndʉʉ kʉ̂ʉ tíŋ ndə vâafɔʼɔ Jɔŋ kə bʉ̀nə, Jiso chʉ́ʉhə ndə məkwə́ʼ tʉ mbʉ nuɔ-bʉə te Jɔŋ mbɔ, "Bii nə kə́ gwè mu kwɔŋkəyəŋnə ndə mənyíɛ ka? Bii nə kə́ gɛ̀ ndə mənyíɛ ŋginəŋgʉəʼbə ndə fʉʉkə tʉʼ gháahə mɛ? 25 Bii kə gɛ̀ ndə mənyíɛ ka ndʉʉghɔfii? Mɛ kə bii kə́ gɛ̀ nyíɛ bə wo ndə ɔ̃ kə mɔ̀ʼ ndyi-kyʉə-hə mbʉə-ɔ? B̈ii yʉ́, b̃ʉə ndə bɔ̂ŋ mɔ̀ʼ ndyi-kyʉə-hə mbʉə-bɔŋ, bɔŋ-kə́-leʼ yú bəfɔŋ, nɔ bɛ ntoʼ. 26 Bii kə́ gɛ̀ ndʉʉghɔfii mbi ndə məgɛ̀ nyíɛ ka? YʉkəŋgieNyii mɛ? Ɔŋ, m̈ɔ shyíi bii nə shʉəŋ mbɔ ɔ nɔ buŋ gʉ́ə chàa yʉkəŋgieNyii. 27 Nɔ bɛ mbəŋ-ɛŋ ndə bə kə nyɔ̀ʼ te ɔ mbɔ,

‘B̈ii nyíɛ, mɔ bu tə́ŋ wontəŋ-ɔŋ, ɔ kə́ gɛ̀ hə bəshʉ a,

ndə ɔ bu shʉ̀tə fia tʉ a bəshʉ.’ *

28 M̈ɔ shyíi bii mbɔ, hə mu bʉə ndə bɔ̂ŋ fyú hə bətɔ-bəke, wo kaa chɔ ndə ɔ gʉ́ə chàa Jɔŋ fɛ. Bɔŋ wo ndə ɔ bɛ ndyiʼtəkə mu Sɔ́ʼ-Nyii nɔ gʉ́ə chàa Jɔŋ."

29 Ndʉʉ ndə bʉə bənchəŋ ghɔŋbə bʉə fí tashi ŋkwo kə yʉ́ kwə́ʼ Jiso, bɔ̂ŋ nɔ kə bɛ́ŋ mbɔ nukə ndə Nyii nɔʼ fɔ̀ʼ nɔ bɛ ndyʉndyʉ, bʉʼka bɔ̂ŋ nɔ kə fí muu kəghɔ-Jɔŋ. 30 Bɔŋ bʉə-Falasi ghɔŋbə bʉə ndə bɔ̂ŋ kɛŋ nɔʼ yétə nuʼ-Mushi kə tɛ́ŋ nukə ndə Nyii nɔʼ kə shʉ̀tə te bɔŋ, bʉʼka bɔ̂ŋ kə fí muu kəghɔ-Jɔŋ fɛ.

31 "Bɛ ka bɛʼkə ndʉʉmɛ ndə bəkɔ mɔ fʉ̀ʼ ŋgwie-bʉə-bɔ̄ŋ laa ndəŋ ghɔ? Bɔ̂ŋ bɛ nə ka? 32 Bɔ̂ŋ nɔ bɛ nə vâambuɔ ndə bɔ̂ŋ dùʼtə mu vyii kə́ tíi ŋwɔŋtə-ʉə, ghɔ̀ŋ mbɔ, ‘Baʼa tʉ́ʉ vâandʉ̂ʉ tʉ bii təmə bii kʉ̀ʉ fɛ, baʼa tɔ́ kwú təmə bii gwía fɛ.’ 33 Bʉʼka Jɔŋ ndə ɔ̃ kɔ́ muu nɔ kə gwè təmə kyinə yú bele fɛ təmə bɔŋ-kə́-leʼ nú ndʉʼmə ghɔ fɛ, bii bɔŋ kə́ ghɔ̀ŋ mbɔ, ‘Ɔ nɔ kie lyʉʉhəbʉəbʉəkə mu mbʉə-ɔ.’ 34 Mbʉ Vaa-Woməsʉʉ nɔʼ gwè kə́ yú bɔŋleʼ nú, bii kə́ ghɔ̀ŋ mbɔ, ‘B̈ii nyíɛ ɔŋ nyíɛ! Wo-məntɔ ghɔŋ mbuuməndʉʼ, tiekənu-bʉə-fí-tashi ghɔŋbə bʉə-bʉ̂ʼʉ!’ 35 Bɔŋ m̃ukətʉ súunə nɔ dʉ̀ʼ mbɔ i nɔ bɛ kʉ̀ʼnə nə bʉə bənchəŋ ndə bɔ̂ŋ tʉʼ gɛ̀ hə bɔ̌ŋ ghɔ."

36 Mbyu wo-Falasibɛʼ nɔ nə kɔ̀ʼnə Jiso ndə məgwè yú fɔbə ghɔŋ ɔŋ, ndʉʉghɔfii ɔ gɛ̀ mu njaa mbʉ wo-Falasi, bɔ̂ŋ dùʼtə yə̀ŋ tebele fúu. 37 Kə nyíɛ, wokebɛʼ ndə ɔ nə bɛ wo-bʉ̂ʼʉ tʉ Nyii mu kəyəŋkwɛʼtəŋ-ghɔ̄, kʉ̂ʉ yʉ́ mbɔ Jiso tʉʼ yú fɔbə mu njaa-wo-Falasi, ɔ gwè nə vaakətəŋ-məŋgwo ndə bə chìi nə ŋgoʼbɛʼ bə kə́ tíi nə alabasta, 38 gwè tə́nə mbʉə ɔ, kə́ gwía, shʉmə-i kə́ chə́ŋtə ndəŋ wukə-i. Ɔ kə́ yʉ̀əʼtə nə nyu-kətʉ-hə-i, kə́ yá wukə-i bɔ́nə* fyii-ɔ, véʼ lamənda chɔ yóʼ.

39 Ndʉʉghɔfii, mbʉ wo-Falasi ndə ɔ kə kɔ̀ʼnə ɔŋ nyíɛ yɔ̄ŋ-yə, gìe tʉ ŋwɔŋ-ɛŋ mbɔ, "Kaʼ wo-ɔ̄ kʉ̌ʉ bɛ yʉkəŋgieNyii, təmə ɔ nɔ kínə wo ndə ɔ tʉʼ kə̀ŋ ɔŋ, bɔŋleʼ kínə ntɛ-woke-hə ndə ɔ bɛ yɔ̄ŋ-yə, mbɔ ɔ nɔ bɛ wo-bʉ̂ʼʉ."

40 Jiso bə̀ŋhə ghɔ̀ŋ mbɔ, "Samu, mɔ nɔ kie nukə ndə məgìe tʉ a." Ɔ bə̀ŋhə tʉ ɔŋ mbɔ, "Gìe tʉ mɔ, chicha."

41 Jiso ghɔ̀ŋ mbɔ, "Bʉə bəbûu nɔ nə kie kyʉə bətɔ-bɔŋ, ndə bɔ̂ŋ chɔ́ʼhə kəghɔ-wobɛʼ. Womɔʼ kie ŋkɔŋhə təghyʉʉ tətaa bətɔ-ɔ, ibɛʼ-yə kie ŋkɔŋhə wuŋ taa. 42 Wo mu bɔŋ kə kie mbʉ kyʉə ndə məbyʉ̀hə fɛ. Bʉʼka tʉvyiikə-i, ɔ sʉ̀fyii-i hə ndəŋ bɔŋ, chɔʼ mbʉ ŋkwo-yʉə bəbûu mɛ̀ʼ. Nduɔ bɛ nda mu bʉə-bɔ̄ŋ ndə ɔ bu kʉ̀ʉ ɔ yɔ́ŋyɔ́ŋ?"

43 Samu bə̀ŋhə mbɔ, "Mɔ nɔ kwɔ̀ʼtə mbɔ, nɔ wo ndə bə chɔʼ ŋkwo yɔ́ŋyɔ́ŋ bətɔ-ɔ mɛ̀ʼ le."

Jiso bə̀ŋhə mbɔ, "A nɔ kwɛ̀ jyujyu." 44 Ɔ kíahə ŋwɔŋ-ɛŋ tʉ mbʉ woke-ghɔ̄, gìe tʉ Samu mbɔ, "A nyíɛ woke-ɔ̄ mɛ? Mɔ nɔ gwè mu njaa-a təmə a kɔ́ muu tʉ mɔ ndə məlíʼtə wukə-ɔŋ chɔ fɛ. Ɔ nɔ sʉ̀ wukə-ɔŋ nə shʉmə-i, bɔŋleʼ bʉ̀nə yʉ̀əʼtə nə nyu-kətʉ-hə-i. 45 A kə bɔ́nə mɔ fɛ, bɔŋ yɔ̄ŋ-yə woke chʉʼ nə mɛ̀ʼtə ndə məbɔ́nə wukə-ɔŋ fɛ, lʉ̀ hə ndʉʉ ndə mɔ ŋíi mu njaa-a. 46 A yóʼ ŋgwomə kətʉ-mɔ ndə nuʼ-yʉʼʉ fɛ, bɔŋ woke-ɔ̄ nɔʼ dʉ̀ʼ gyʉəʼə-chʉ́əʼ tʉ mɔ ndə məshyìi lamənda kəwu-mɔ. 47 Nduɔ, mɔ nɔ tʉʼ shyíi a mbɔ mɔ nɔʼ kə sʉ̀fyii-ɔ ndəŋ bʉ̂ʼtə-i buŋmbi, bʉʼka yɔ̄ŋ-yə, ɔ nɔ dʉ̀ʼ mbɔ ɔ nɔ kʉ̀ʉ mɔ yɔ́ŋyɔ́ŋ, bɔŋ wo ndə mɔ sʉ̀fyii-ɔ ndəŋ bʉ̂ʼʉ-e məniʼ, nɔ kʉ̀ʉ mɔ məniʼ." 48 Ndʉʉghɔfii, Jiso gìe tʉ woke-ghɔ̄ mbɔ, "Mɔ nɔʼ sʉ̀fyii-ɔ ndəŋ bʉ̂ʼtə-a."

49 Bəbɛʼbʉə ŋkɔʼnə kə́ kwə́ʼ tʉ ŋwɔŋtə-ʉə mbɔ, "Bɛ nda nɔ ndə ɔ tʉʼ sʉ̀fyii-i hə ndəŋ bʉ̂ʼ-bʉə-tə?" 50 Jiso gìe tʉ mbʉ woke mbɔ, "Məmɔʼfyii-a ndəŋ Nyii nɔʼ kwáa a. Tòʼ jyu."