1 Jiso ghɔ̀ŋ tʉ vâafɔʼɔ-bi mbɔ, "Ndə nubə ndə i mùutə wo mbɔ ɔ chìi bʉ̂ʼʉ nɔ kie ndə məgwè, bɔŋ ŋgʉəʼ bu bɛ kətʉ wo ndə nubə-ɔ̄ŋ bu gwè hə kəghɔ-ɔ. 2 I nɔ bʉ̀ʉ mbɔ b̈ə chyúu lɔkɔʼ tê mii-ɔ, mɛ̀ʼ ɔŋ mu muukwɛʼtəŋmə, ndə kaʼ kʉ̀ʼnə mbɔ ɔ̈ shyùu mbyu vaa mu vâa-bɔ̄ŋ ɔ chìi bʉ̂ʼʉ. 3 B̈ii láa le!

"Kaʼ liŋ-aŋ chìi bʉ̂ʼʉ, ä sɔ́ʼ ɔ, kaʼ ɔ shìe liɛŋ-ɛŋ ndəŋ nu-ghɔ̄-kə, ä sʉ̀fyii-a. 4 Kaʼ ɔ chìi bʉ̂ʼʉ tʉ a vɛʼ təkwiitia mu chîmbikə imɔʼ, bʉ̀nə gwè vɛʼ təkwiitia ghɔ̀ŋ tʉ a mbɔ, ‘Mɔ nɔʼ shìe liɛŋ-ɔŋ ndəŋ mbʉ bʉ̂ʼʉ,’ ä sʉ̀fyii-a ndəŋ ɔŋ."

5 Mbʉ bəlɔntəŋNyii gìe tʉ Tiekətʉ mbɔ, "Chìi məmɔʼfyii-yaʼ ndəŋ Nyii bìʼ shʉ́ə gɛ̀ nə shʉbə."

6 Ɔ bə̀ŋhə mbɔ, "Kaʼ məmɔʼfyiihə-ii ndəŋ Nyii tə́ʼ tə bɛ nə ŋgwie-kîa, bəkɔ bii gìe tʉ ŋkwê kətyʉ-ɔ̄ mbɔ, ‘Sòʼnə sê gɛ̀ bè ŋwɔŋ-aŋ mu muukwɛʼtəŋmə,’ i bɔŋ yʉ́ chu-a.

7 "Lʉ̀ nduɔ mbɔ mbyu wo mu bii nɔ kie vaafɔ̀ʼ-ɛ, ɔ kə́ lə̀ŋ ndəŋkə byuunɔ kə́ chyìi binjyʉʉhə. Ɔ məghɔ̀ŋ tʉ ɔŋ vɛʼ ndə ɔ bʉ̀nə muŋkɔ mbɔ, ‘Gwè dùʼ sê yú fɔbə’ mɛ? 8 Ɔ kʉʉ ghɔŋ bə mbɔ, ‘Chìi fɔbə, shʉ̀tə ŋwɔŋ-aŋ ndə məkɔ́ fɔbə tʉ mɔ, kwìhə m̈ɔ yú bɔŋ nú a buŋ yú ya-yə’ fe? 9 Ɔ bu kɔ́ ndɔ tʉ vaafɔ̀ʼ-ɛ ndəŋ fɔ̀ʼ ndə ɔ kie ndə məfɔ̀ʼ mɛ? Mɔ laa fɛ. 10 Mbəŋ-aŋ ghɔ ndʉʉ ndə a nɔʼ fɔ̀ʼ nubə nchəŋnchəŋ ndə Nyii ghɔ̀ŋ mbɔ a fɔ̀ʼ nɔ, a gìe tʉ ɔŋ mbɔ, ‘Baʼa nɔ bɛ haʼ vâafɔʼɔ-ba, kə́ fɔ̀ʼ haʼ nukə ndə kə bɛ fɔʼɔ-yaʼ.’ "

11 Ndʉʉ ndə Jiso kə́ gɛ̀ Jɛlosalɛŋ, ɔ tíŋ hə ndəŋ bia Samalia ghɔŋ Galili. 12 Ndə ɔ kə́ ŋíi mu ntəʼəbɛʼ, bʉə-kəlɔ wuŋ nyíɛ ɔŋ dɔdɔ, 13 tíi nə gyʉʉ dədə ghɔ̀ŋ mbɔ, "Tiekətʉ! Jiso! Kə tʉkə-a vyíi ndəŋ baʼa le!"

14 Ndʉʉ ndə ɔ nyíɛ bɔŋ, ɔ gìe tʉ bɔŋ mbɔ, "B̈ii gɛ̀ dʉ̀ʼ ŋwɔŋ-yii tʉ bʉəfɛ̀ʼndɛŋNyii."

Ndə bɔ̂ŋ kə́ gɛ̀ le bɔ̂ŋ kie nchʉʼ. 15 Wo-imɔʼ mu bɔŋ kʉ̂ʉ nyíɛ mbɔ ɔ nɔʼ kie nchʉʼ, bʉ̀nə gɛ̀ kə́ tòʼ lə̀ʼtə Nyii nə gyʉʉ dədə. 16 Ɔ gɛ̀ kwíʼtə bəshʉ Jiso nə shʉ-i sê, kə́ kɔ́ ndɔ ɛ. Ɔ nɔ nə bɛ wo-Samalia. 17 Jiso bə̀ŋhə mbɔ, "Bii kə bɛ wuŋ, ndə bii kie nchʉʼ fe? Bəbɛʼbʉə bɔmɔʼ ba? 18 Wobɛʼ kə bɛ ghɔ ndə bəkɔ ɔ gwè lə̀ʼtə Nyii fɛ, yaʼkɛŋ wokətə̂ŋ-ɔ̄ŋ mɛ?" 19 Ndʉʉghɔfii, ɔ gìe tʉ ɔŋ mbɔ, "Lɔ̀ hə sê gɛ̀ nə aŋ, məmɔʼfyii-a tʉ Nyii nɔʼ chʉ́ʼ a."

20 Nɔ nə bɛ vɛʼbɛʼ nuɔ-bʉə-Falasi bíʼtə tʉ Jiso mbɔ, "Bɛ yɔ̂ŋ-yə ndʉʉ ndə Sɔ́ʼ-Nyii bu gwè?"

Ɔ bə̀ŋhə tʉ bɔŋ mbɔ, "Məgwè Sɔ́ʼ-Nyii kaa fɔkə ndə bəkɔ bii nyíɛ cheʼkə-i fɛ. 21 Bʉə mə gìe mbɔ, ‘B̈ii nyíɛ! Sɔ́ʼ-Nyii nɔ bɛ fɛ̄ŋ byuunɔ fīi!’ fɛ, bʉʼka Sɔ́ʼ-Nyii nɔ bɛ mu bii."

22 Ɔ gìe tʉ vâafɔʼɔ-bi mbɔ, "Mbʉ bəchî tʉʼ gwè ndə bii bu kʉ̀ʉ ndə mənyíɛ mbyu kəchî Vaa-Woməsʉʉ, təmə bɔŋ kʉʉ nyíɛ fɛ. 23 Bʉə bu gìe tʉ bii mbɔ, ‘B̈ii nyíɛ! Ɔ nɔ bɛ fɛ̄ŋ byuunɔ fīi!’ Kə bii mə gɛ̀ hə bɔ̌ŋ bɔŋ fɛ. 24 Bʉʼka haʼ ndə leʼnə-wyuu-kə leʼnə yuo, i báa lʉ̀ hə ndəŋ viakə imɔʼ gɛ̀ tə liʼ ndəŋ ibɛʼ-yə viakə nɔ, nɔ bɛ haʼ nɔ ndə Vaa-Woməsʉʉ bu yi gwè. 25 Ɔ bɔŋ bu fəŋ nyíɛ ŋgʉəʼ ndəŋ nubə buŋmbi, ŋgwie-wo-ɔ̄ kəchisê fɛ̄ŋ nɔ tɛ́ŋ mɔ.

26 "Haʼ ndə i nə bɛ ndəŋ vɛʼ Nua, i bu nə bɛ haʼ nɔ, ndəŋ vɛʼ ndə Vaa-Woməsʉʉ bu yi bʉ̀nə gwè. 27 Bʉə nɔ nə kə́ yú, kə́ nú, kə́ gɛ̀ lɔŋ, bɔŋ bə kə́ leʼ kɔ́ lɔŋ tə gɛ̀ dàa ndəŋ chîkə ndə Nua kə ŋíi chɔ mu kəbuukwɛʼtəŋ. Fɔŋ muu gwè yítə bɔŋ bənchəŋ.

28 "I nɔ nə bɛ haʼ nɔ ndəŋ chî-wo-kə ndə wo ndə bə nə kə́ tíi ɔ nə Lɔt. Bʉə kə́ yú, kə́ nú, kə́ chìi mbɛʼnə, kə́ bè fɔyubə, kə́ bɔ́ŋ njaahə. 29 Bɔŋ chîkə ndə Lɔt fyú hə mu Sodɔŋ, viʼi fyìʼnə yuo ghɔŋbə ŋgoʼ-tɔ̀ŋ-hə kyʉ́ʉ bɔŋ bənchəŋ.* 30 Nɔ haʼ nɔ ndə i bu yi bɛ vɛʼ ndə Vaa-Woməsʉʉ bu yi bʉ̀nə gwè, bə kɛ̀ʼ ɔ.

31 "Kʉ̂ʉ yi bɛ yɔ̂ŋ-ghɔ̄ nɔ, wo ndə ɔ bɛ kətʉ njaa, * kə ɔ mə shíʼ sê ndə məlʉ̀ fɔkə mu njaa fɛ. Wo ndə ɔ bɛ mutɔ, kə ɔ məbʉ̀nə ndə məlʉ̀ fɔkə fɛ. 32 B̈ii kwɛ́nə nukə ndə i nə fyú tʉ vi-Lɔt! 33 Wotəmiyɔŋ ndə ɔ tʉʼ kɔ̀ɔtə ndə məkwáa ŋkwiitʉ-e bu bɛ́, bɔŋ wo ndə ɔ kɔ́ ŋkwiitʉ-e, bu kie ŋkwiitʉ-e. 34 M̈ɔ shyíi bii, bʉə bəbûu bu nʉ̀ʉ kəbɔ ndʉʉbətyuʼ-ghɔ̄, bə lʉ̀ mbyu wo-imɔʼ, mɛ̀ʼtə ibɛʼ-yə. 35 Bəke bəbûu bu kə́ gɔ̀ baakə, bə lʉ̀ mbyu wo-imɔʼ, mɛ̀ʼtə imɔʼ. 36 [Bələŋ bəbûu bu kə́ fɔ̀ʼ mutɔ, bə lʉ̀ mbyu wo-imɔʼ, mɛ̀ʼtə mbyu wo-imɔʼ.]"

37 Bɔ̂ŋ bíʼtə tʉ ɔŋ mbɔ, "Tiekətʉ, i bu bɛ fa?"

Ɔ bə̀ŋhə mbɔ, "Yəŋkə ndə ŋkwu-wo-kə bɛ chɔ nɔ yəŋkə ndə wuwubə bu chə̀ŋtə chɔ."