1 Chîbə kʉ̂ʉ bìʼ tíŋ ibûu mbi sɛŋ fíi, bə kə́ yú lɔŋ Kana ndə i bɛ mu Galili, ŋkwê-Jiso kə́ bɛ chɔ. 2 Bə nɔ nə kɔ̀ʼnə Jiso ghɔ ndə mbʉ lɔŋ ghɔŋbə vâafɔʼɔ-bi. 3 Kʉ̂ʉ bɛ ndʉʉ ndə ndʉʼmə kə mì, ŋkwê-Jiso ghɔ̀ŋ tʉ ɔŋ mbɔ, "Bɔ̂ŋ leʼ kie ndʉʼmə fɛ." 4 Bɔŋ Jiso bíʼtə tʉ ɔŋ mbɔ, "Naa, maa-yɔ̄ŋ kie ka ndə məchìi nə mɔ? Ndʉʉ-ɔ chʉʼ kʉ̀ʼnə fɛ." 5 Ŋkwê-i gìe tʉ bʉə ndə bɔ̂ŋ kə́ gyʉ̀ə ndʉʼmə mbɔ, "B̈ii fɔ̀ʼ nukə təmiyɔŋ ndə ɔ bu gìe tʉ bii."

6 Kyʉʉ-muu-tə ntʉʼʉ ndə bɛ kyʉʉ ŋgoʼhə nɔ nə tə́nə chɔ tʉ bʉə-Juu ndə mə-kə́-sʉ̀ ŋwɔŋ-yʉə chɔ ndə nu-kəchɔŋ-bə. Mbyu kyʉʉ imɔʼ nɔ kə́ bɛ ndə bəkɔ bə véʼ muu muŋgɔ tə i kə́ gɛ̀ nə bəleta muu lʉ̀ hə ndəŋ bəleta wuŋ təkwiitia tə gɛ̀ dàa ndə bəleta ghyʉʉ. 7 Jiso ghɔ̀ŋ tʉ mbʉ bʉə ndə bɔ̂ŋ kə́ gyʉ̀ə ndʉʼmə mbɔ, "B̈ii véʼ muu mu mbʉ təkyʉʉ i lə́ŋtə." Bɔ̂ŋ véʼ mbʉ təkyʉʉ i lə́ŋtə chu ghɔ. 8 Ɔ ghɔ̀ŋ tʉ bɔŋ mbɔ, "B̈ii ŋwìa ibɛʼ-yə, kɔ́ tʉ ŋgʉəkwɛʼtəŋ ndə ɔ bɛ ndə mbʉ lɔŋ." Bɔ̂ŋ chìi haʼ nɔ. 9 Ndʉʉ ndə mbʉ ŋgʉəkwɛʼtəŋ kə yúotə mbʉ muu tʉ i nɔʼ bə̀ŋ ndʉʼmə, təmə ɔ kínə yəŋkə ndə i lɔ̀ hə chɔ fɛ, bɔŋ mbʉ ŋgyʉəhə ndə bɔ̂ŋ kə gwè nə yɔŋ nɔ kə kínə. Ndʉʉmɛ, mbʉ ŋgʉəkwɛʼtəŋ tíi mbʉ woləŋ ndə ɔ kə́ chìi lɔŋ, 10 ghɔ̀ŋ tʉ ɔŋ mbɔ, "W̃otəmiyɔŋ nɔ fəŋ kɔ́ ndʉʼ-jyujyu-mə bə nú, bʉə kʉ̂ʉ nú tə búutə nɔ, ɔ buŋ gwè nə ndʉʼ-bʉəbʉə-mə. A bɔŋ tʉ́ʼ ya-yə ndʉʼ-jyujyu-mə i gwè tə dàa nduɔ!"

11 Jiso nɔ nə chìi fəŋ kəcheʼ-ɔ̄ Kana ndə i bɛ mu Galili, ndə i kə dʉ̀ʼ məgʉə-e. Vâafɔʼɔ-bi bɛ́ŋ ɔŋ.

12 Yɔ̄ŋ-yə kʉ̂ʉ tíŋ, ɔ shíʼ gɛ̀ Kabanu, ghɔŋbə ŋkwê-i leʼnə bəliŋ-bi bələŋ leʼnə vâafɔʼɔ-bi ghɔŋ bɔŋ chí chɔ ndəŋ mbyu-bəchî-hə.

13 Ndʉʉ ndə bʉə-Juu yú Yíɛʼsii chɔ nɔ nə kə́ kʉ̀ʼnə gwè, Jiso kóʼ gɛ̀ Jɛlosalɛŋ. 14 Ɔ kʉ̂ʉ dàa mu chunjaafɛ̀ʼndɛŋNyii, nyíɛ bʉə fɛ̀ŋ vyii, bɔ̂ŋ kə́ fɛ̀ŋ bənaʼa-ləŋ, binjyʉʉhə, bətambʉətə leʼnə bʉə ndə bɔ̂ŋ kə́ fɛ̀ŋ kyʉə bɔŋleʼ kwɛ́nə. 15 Ɔ bɔ́ ŋgwɔŋ nə ghyʉʉ, jə̀ŋ bɔŋ bənchəŋ nə yɔŋ fyúhə mu mbʉ njaafɛ̀ʼndɛŋNyii ghɔŋbə mbʉ binjyʉʉhə leʼnə mbʉ bənaʼa-ləŋ. Ɔ tʉ́ʉhə kyʉə-mbʉ-bʉə-kwɛ́nə-kyʉə tyù sê, kíahə mbʉ bətebele-bʉə kwóhə sê. 16 Ɔ kàhə bʉə ndə bɔ̂ŋ tʉʼ fɛ̀ŋ bətambʉətə mbɔ, "B̈ii lʉ̀ fɔbə-ɔ̄ŋ hə fɛ̄ŋ, fyú nə yɔŋ, kə bii mə chìi njaa-Tie-ɔ, ï bɛ yəŋ-vyii-kə fɛ."

17 Vâafɔʼɔ-bi kwɛ́nə mbɔ bə nɔ nə nyɔ̀ʼ mu ŋwɔʼnə-Nyii mbɔ, "Ŋkʉ̂ʉ ndə mɔ kie ndəŋ njaa-a, nɔ bɛ yi-yə ndə bəkɔ i yí mɔ."

18 Ndʉʉmɛ, bəntəŋbəshʉ-bʉə-Juu gìe tʉ ɔŋ mbɔ, "Bɛ ntɛ kəcheʼ ka ndə a bu dʉ̀ʼ tʉ baʼa ndə mədʉ̀ʼ mbɔ a kie ghʉəʼkə ndə məchìi nubə-ɔ̄ŋ?"

19 Jiso bə̀ŋhə tʉ bɔŋ mbɔ, "B̈ii kùu njaafɛ̀ʼndɛŋNyii-ɔ̄ŋ, mɔ bu bʉ̀nə bɔ́ŋ ndə chîbə itia."

20 Mbʉ bʉə-Juu ghɔ̀ŋ tʉ ɔŋ ndʉʉmɛ mbɔ, "Baʼa nɔ lʉ̀ ŋgʉʼhə njuɔ ntʉʼʉ nə wuŋ kwi ndə məbɔ́ŋ njaafɛ̀ʼndɛŋNyii-ɔ̄ŋ, a bu bʉ̀nə bɔ́ŋ ndəŋ chîbə itia la?" 21 Bɔŋ ɔ nɔ kə́ kwə́ʼ te mbʉ njaafɛ̀ʼndɛŋNyii ndə bɛ mbʉə-e. 22 Ndʉʉghɔfii, ndʉʉ ndə ɔ kə kwú bʉ̀nə kóʼ, vâafɔʼɔ-bi kwɛ́nə mbɔ ɔ la nɔʼ kə gìe yɔ̄ŋ-yə. I chìi bɔ̂ŋ bɛ́ŋ nubə ndə ŋwɔʼnə-Nyii kə́ gìe leʼnə ŋgiebə ndə Jiso nɔʼ kə kwə́ʼ tʉ bɔŋ.

23 Ndʉʉ ndə Jiso kə bɛ Jɛlosalɛŋ ndə nchəŋtə-Yíɛʼsii, bʉə buŋmbi kʉ̂ʉ nyíɛ nubəcheʼbə ndə ɔ kə́ chìi, bɔ̂ŋ bɛ́ŋ ɔŋ. 24 Bɔŋ təmə Jiso mɛ̀ʼ ŋwɔŋ-ɛŋ ndəŋ bɔŋ fɛ bʉʼka ɔ nɔ nə kínə fyiihə-ʉə inchəŋ. 25 Wo kə kie ndə məshyíi ɔ nə ntɛhə ndə bʉəməsʉʉ bɛ yɔ̂ŋ-yə fɛ bʉʼka ɔ nɔ nə kínə woməsʉʉ nchəŋnchəŋ.