1 Ndʉʉmɛ, Bale lʉ̀ Jiso kɔ́ mbɔ b̈ə gwúu ɔ. 2 Bəsɔge túŋ bɛnə nə ŋkinəŋkia, bìa kətʉ-Jiso, véʼ ndyi kəmbuu fʉ́əŋ mbʉə-ɔ. 3 Bɔ̂ŋ kóʼ gwè tʉ ɔŋ kə́ ghɔ̀ŋ mbɔ, "C̈hichi báa b̈ə yóʼ bənchəŋ, Fɔŋ-bʉə-Juu!" kə́ gwúutə ghɔbə shʉ-ɔ. 4 Bale bìʼ fyú gɛ̀ ghɔ̀ŋ tʉ bɔŋ mbɔ, "B̈ii nyíɛ, mɔ nɔ tʉʼ gwè nə nɔŋ mbi kɔ́ ɔ tʉ bii, bii chʉʼ kínə mbɔ, mɔ nyíɛ fyùufyùu kəghɔ-ɔ fɛ." 5 Ndʉʉmɛ, Jiso fyú gwè mbi nə mbʉ bɛnə ŋkinəŋkia kətʉ-ɔ leʼnə ndyi kəmbuu fʉ́əŋ mbʉə-ɔ. Bale ghɔ̀ŋ tʉ bɔŋ mbɔ, "B̈ii nyíɛ, mbʉ wo nɔ!" 6 Ndʉʉ ndə bətiefɛ̀ʼndɛŋNyii ghɔŋbə bənchyii-njaafɛ̀ʼndɛŋNyii kə nyíɛ ɔŋ, bɔ̂ŋ tíitə mbɔ, "Kwɛ̀ŋ ɔŋ yi, kwɛ̀ŋ ɔŋ yí!" Bale ghɔ̀ŋ mbɔ, "B̈ii lʉ̀ ɔ nə mbəŋ-yii gɛ̀ kwɛ̀ŋ yi, bʉʼka mɔ nyíɛ mɔ̀ʼmbɛ ndəŋ ɔŋ fɛ."

7 Bəntəŋbəshʉ-bʉə-Juu bə̀ŋhə mbɔ, "Baʼa nɔ kie nuʼ-Mushi ndə i dʉ̀ʼ mbɔ ɔ nɔ kie ndə məkwú bʉʼka ɔ nɔʼ lʉ̀ ŋwɔŋ-ɛŋ ndə məbɛ VaaNyii."

8 Ndʉʉ ndə Bale kə yʉ́ nukə-ɔ̄ŋ, ɔ bìʼ fàa gɛ̀ nə shʉbə. 9 Bale bʉ̀nə bìʼ ŋíi mu ntoʼ-ɔ gìe tʉ Jiso mbɔ, "A lɔ̀ hə fa la?" Bɔŋ təmə Jiso bə̀ŋhə nukə tʉ ɔŋ fɛ. 10 Ndʉʉmɛ, Bale gìe tʉ ɔŋ mbɔ, "A kʉʉ kwə́ʼ tʉ mɔ fe? A kínə mbɔ mɔ kie ghʉəʼkə ndə məfyúhə a byuunɔ kwɛ̀ŋ aŋ yi fe?"

11 Jiso bə̀ŋhə tʉ ɔŋ mbɔ, "A mə kie ghʉəʼkə ndə məchìi nubɛʼkə təmiyɔŋ nə mɔ fɛ, yaʼkɛŋ mbɔ b̈ə kɔ́ tʉ a hə yuo. Nɔ, wo ndə ɔ kɔ́ mɔ mu kəghɔ-a, yi-yə bʉ̂ʼʉ nɔ leʼ gʉ́ə chàa ya-yə."

12 Lʉ̀ hə mbi-ghɔ̄ gɛ̀ nə shʉbə, Bale kə́ kʉ́ʉ fia ndə məfyúhə ɔŋ, bɔŋ bəntəŋbəshʉ-bʉə-Juu tíitə ghɔ̀ŋ mbɔ, "Kaʼ a fyúhə wo-ɔ̄, təmə a kaa tiekənu-Fɔŋ-Luŋ fɛ. Wotəmiyɔŋ ndə ɔ chìi ŋwɔŋ-ɛŋ ndə fɔŋ, nɔ tʉʼ shùɔ shʉ Fɔŋ-Luŋ."

13 Ndʉʉ ndə Bale yʉ́ yɔ̄ŋ-yə ŋgiebə, ɔ fyúhə Jiso gwè nə nɔŋ, ɔ gwè dùʼ ndəŋ kʉə-kwɛ̀-fɛʼɛ-kə ndə sêfubɛʼ ndə bə kə́ tíi nə Sêfu-Ŋgoʼhə, (bə bɔŋ-kə́-leʼ tíi kəŋgie Alamiak nə Gabata). 14 Nɔ kə bɛ chîkə ndə b̃ə kə́ búu ŋwɔŋ chɔ ndə məyú Yíɛʼsii. I kʉ̂ʉ gɛ̀ tə bɛ nə ndʉʉbeʼ, ɔ ghɔ̀ŋ tʉ bʉə-Juu mbɔ, "B̈ii nyíɛ, Fɔŋ-yii nɔ!" 15 Bɔ̂ŋ tíitə ghɔ̀ŋ mbɔ, "Kwɛ̀ʼtə nə nɔŋ, kwɛ̀ʼtə nə nɔŋ, kwɛ̀ŋ ɔŋ yí!" Bale bíʼtə tʉ bɔŋ mbɔ, "M̈ɔ kwɛ̀ŋ Fɔŋ-yii, yi la?" Mbʉ bətiefɛ̀ʼndɛŋNyii bə̀ŋhə mbɔ, "Baʼa kie fɔŋbɛʼ tə chàa Fɔŋ-Luŋ fɛ."

16 Ndʉʉmɛ, ɔ chɔ̀ʼhə ɔŋ kɔ́ tʉ bɔŋ, mbɔ b̈ə kwɛ̀ŋ ɔŋ yí.

Ndʉʉmɛ, bɔ̂ŋ lʉ̀ Jiso gɛ̀ nə nɔŋ, 17 ɔ fyú mbi bɛ̀ʼ tyʉntɔɔnəkə-i, gɛ̀ nə yɔŋ kəyəŋ ndə bə kə́ tíi nə "Yəŋ-kəGhʉəʼ-kəTʉ-Wo-kə," (ndə bə tíi kəŋgie-Hibulu nə Gogota). 18 Bɔ̂ŋ kwɛ̀ŋ ɔŋ chɔ yi, ghɔŋbə bʉəbɛʼbə bəbûu mɔʼɔ, kwɛ̀ŋ mbyu wo-imɔʼ kwii-fɛ̄ŋ, leʼnə ibɛʼ-yə kwii-fīi, nə Jiso ntəŋntəŋ bɔŋ. 19 Bale leʼ nyɔ̀ʼ fɔkə ndəŋ via-kətyʉ-kə, bíahə ndəŋ mbʉ kətyʉntɔɔnə ndə i kə ghɔ̀ŋ mbɔ, "Jiso ndə ɔ lɔ̀ hə Nasalɛ, Fɔŋ-bʉə-Juu." 20 Buŋmbi bʉə-Juu tíi ŋwɔʼnə-ɔ̄ŋ, bʉʼka yəŋkə ndə bə kə kwɛ̀ŋ Jiso chɔ kə kə́ŋhə mbʉə kəyəŋkwɛʼtəŋ, bə nɔ nə nyɔ̀ʼ kəŋgie-Hibulu, Latəŋ leʼnə ŋgie-Gili-kə.

21 Ndʉʉmɛ, bətiefɛ̀ʼndɛŋNyii-bʉə-Juu, ghɔ̀ŋ tʉ Bale mbɔ, "Kə a mə nyɔ̀ʼ mbɔ, ‘Fɔŋ-bʉə-Juu’ fɛ, bɔŋ nyɔ̀ʼ bə mbɔ, ‘Wo-ɔ̄ nɔ ghɔ̀ŋ mbɔ, "Mɔ nɔ bɛ Fɔŋ-bʉə-Juu." ’ " 22 Bale bə̀ŋhə mbɔ, "Fɔkə ndə mɔ nɔʼ nyɔ̀ʼ, mɔ nɔʼ nyɔ̀ʼ."

23 Ndʉʉ ndə mbʉ bəsɔge kwɛ̀ŋ Jiso, bɔ̂ŋ lʉ̀ ndyi-fəʼə-hə-i sáatə ndə viabə kwi, mbyu wo bəsɔge kə́ kie viakə imɔʼ, leʼnə ndyi mu mbʉə-e ghɔ. Bɔŋ mbʉ ndyi mu mbʉə kə kie fuuhə fɛ, bə túŋ kəshyiintɔŋ lʉ̀ kwe gɛ̀ dàa mbɔŋ. 24 Ndʉʉmɛ, bɔ̂ŋ ghɔ̀ŋ tʉ ŋwɔŋtə-ʉə mbɔ, "Kə bʉʼʉ mə jɔ̀ʼtə fɛ, b̈ʉʼʉ mɔ̀ʼ njoʼ nə yɔŋ, nyíɛ wo ndə i bu bɛ yi-yə." Yɔ̄ŋ-yə nɔ nə bɛ ndə məchìi ŋwɔʼnə-Nyii fyú shʉəŋ ndə i kə ghɔ̀ŋ mbɔ,

"Bɔ̂ŋ gyʉ̀əhə ndyi-fəʼə-hə-ɔŋ kətʉ-bɔŋ,

leʼ lʉ̀ ndyi mu mbʉə-ɔ mɔ̀ʼ njoʼ nə yɔŋ."*

Nɔ bɛ nubə nɔ ndə mbʉ bəsɔge kə chìi. 25 Bəkebɛʼbə nɔ nə tə́nə mbʉə tyʉntɔɔnə-Jiso-kə, ŋkwê-i leʼnə liŋ ŋkwê-i woke, Mɛli vi-Koloba ghɔŋbə Mɛli Matalina. 26 Ndʉʉ ndə Jiso kə nyíɛ ŋkwê-i leʼnə vaafɔ̀ʼ-ɛ ndə ɔ kə kʉ̀ʉ kə tə́nə mbʉə ɔ, ɔ gìe tʉ ŋkwê-i mbɔ, "Naa, nyíɛ, nɔ bɛ vaa-a nɔ!" 27 Ɔ ghɔ̀ŋ tʉ mbʉ vaafɔ̀ʼ-ɛ mbɔ, "Nyíɛ! Nɔ bɛ naa-aŋ nɔ!" Lʉ̀ hə ndə ŋgwɔʼmbi-ghɔ̄ mbʉ vaafɔ̀ʼ lʉ̀ ɔ gɛ̀ nə nɔŋ chunjaa-ɔ.

28 Yɔ̄ŋ-yə kʉ̂ʉ tíŋ, Jiso, kə́ kínə mbɔ nubə nɔʼ mì nduɔ inchəŋ, ɔ gìe ndə məchìi ŋwɔʼnə-Nyii f̈yú shʉəŋ mbɔ, "Jyʉʉ muu tʉʼ yɔ́ʼ mɔ." * 29 Kuu-məndʉʼ-chyʉ́ʉtə kə́ tə́nə mbʉə ghɔ, bɔ̂ŋ lʉ̀ kɔŋ-búɔnə-kə ndə i bɛ ilə́ŋnə nə mbʉ məndʉʼ chyʉ́ʉtə fùɔ kətʉ kətyʉbɛʼ ndə bə kə́ tíi nə hisob, chɔ̀ʼhə kie kweghɔʼ chu-ɔ. 30 Ndʉʉ ndə Jiso nɔʼ nú mbʉ məndʉʼ chyʉ́ʉtə, ɔ ghɔ̀ŋ mbɔ, "I nɔʼ mì," mii-i bə́ʼnə, lyʉʉhəkə-i mɛ̀ʼtə ɔŋ.

31 Bʉʼka kə bɛ Chî-búu-ŋwɔŋ-kə, bɔŋ ndə mə-leʼ-nyíɛ mbɔ ŋkwubə-ʉə mə káa ndəŋ tyʉntɔɔnəbə fɛ, bʉʼka mbʉ kəChîlɔʼ-ghɔ̄ nɔ nə bɛ chîkwɛʼtəŋkə, bəntəŋbəshʉ-bʉə-Juu fʉ̀ʉtə Bale mbɔ b̈ə la bə́ʼtə fʉəŋtə-ʉə, bɔ̂ŋ chʉʼ kwutəkwutə, b̈ə shúʼhə ŋkwubə-ʉə gɛ̀ nə yɔŋ. 32 Ndʉʉmɛ, mbʉ bəsɔge gwè bə́ʼtə fʉəŋ-fəŋ-wo-tə leʼ bə́ʼtə yi-ibɛʼ-wo-yə ndə bə kə kwɛ̀ŋ ghɔŋ ɔŋ mɔʼɔ. 33 Bɔŋ ndʉʉ ndə bɔ̂ŋ gwè dàa ndəŋ Jiso, nyíɛ mbɔ ɔ nɔʼ kwú, təmə bɔ̂ŋ leʼ bə́ʼtə fʉəŋtə-i fɛ. 34 Bɔŋ mbyu wo-bəsɔgebɛʼ kwɛ̀ŋ ghʉ̂ʉ ŋkyii-ɔ, haʼ ndʉʉmɛ, fɔbʉəkə fyú ghɔŋ muu. 35 Wo ndə ɔ kə nyíɛ yɔ̄ŋ-yə nɔʼ fʉ̀ʼtə, bɔŋ nubə ndə ɔ leʼ gìe nɔ kɛŋ bɛ shʉəŋ, ɔ bɔŋleʼ kínə mbɔ ɔ nɔ tʉʼ gìe shʉəŋ, mbɔ a chʉʼ bɛ́ŋ. 36 Nubə-ɔ̄ŋ nɔ nə fyú sê mbɔ ŋgieNyiikə chʉʼ fyú shʉəŋ ndə i ghɔ̀ŋ mbɔ, "Mbyu kəghʉəʼ kʉʉ bə́ʼnə mbʉə-ɔ fɛ." 37 Ibɛʼ-yə yəŋkə mu ŋwɔʼnə-Nyii nɔ ghɔ̀ŋ mbɔ, "Bɔ̂ŋ bu tʉ́ʼ shʉ-yʉə ndəŋ wo ndə bɔ̂ŋ nɔʼ kə shùɔ."

38 Yɔ̄ŋ-yə kʉ̂ʉ tíŋ, Jɔsɛ ndə ɔ lɔ̀ hə Alamatia, ndə ɔ kə bɛ mbyu vaafɔ̀ʼ-Jiso, bɔŋ kə́ gwè líilíi bʉʼka ɔ nɔ nə kə́ fàa bəntəŋbəshʉ-bʉə-Juu, gwè bíʼtə tʉ Bale ndə məlʉ̀ ŋkwu-Jiso-kə gɛ̀ nə yɔŋ. Bale bɛ́ŋ mbɔ ɔ lʉ̀. Ndʉʉmɛ, ɔ gwè lʉ̀ ŋkwukə-i gɛ̀ nə yɔŋ. 39 Nikodemu-ghɔ̄ ndə ɔ nɔʼ kə fəŋ gwè tʉ Jiso ndʉʉbətyuʼ, gwè nə ŋgwobɛʼmə ndə bə tíi nə məə leʼnə alu ndə ɔ nɔʼ fìnə, i dìe tə kə́ gɛ̀ nə bəkiluŋ njuɔ kwi nə wuŋ tia. 40 Ndʉʉmɛ, ɔ lʉ̀ ŋkwu-Jiso-kə, lʉ́əŋtə mu ndyihə ghɔŋ mbʉ məŋgwo-ghɔ̄, haʼ ndə nuʼ tyúu wo bʉə-Juu bɛ. 41 Mbʉə kəyəŋ ndə bə kə kwɛ̀ŋ ɔŋ chɔ yí, mutɔbɛʼ nɔ nə bɛ chɔ, mbʉ mutɔ-ghɔ̄, sě fefebɛʼ nɔ nə bɛ chɔ, təmə bə nɔʼ nə tyúu wo chɔ fɛ. 42 Bʉʼka i kə bɛ Chî-búu-ŋwɔŋ-kə tʉ bʉə-Juu, bɔŋ bʉʼka mbʉ sě-ghɔ̄ kə leʼ kə́ŋhə, bɔ̂ŋ tyúu Jiso muŋgɔ.