1 LyʉʉhəNyiikə chóʼ Jiso kóʼ gɛ̀ nə nɔŋ mu kwɔŋkəyəŋnə mbɔ Debulu mùutə ɔŋ mbɔ ɔ̈ gwù mu bʉ̂ʼʉ. 2 Ndʉʉ ndə ɔ nɔʼ kə jì muu ndə bəndʉʉnəchî wuŋ kwi ghɔŋbə bəndʉʉbətyuʼ wuŋ kwi, jyʉʉ yɔ́ʼ ɔ. 3 Mbʉ Debulu gwè ghɔ̀ŋ tʉ ɔŋ mbɔ, "Kaʼ bɛ mbɔ a bɛ VaaNyii, téʼ tʉ ŋgoʼhə-ɔ̄, i bə̀ŋ bele."

4 Ɔ bɔŋ bə̀ŋhə mbɔ, "Bə nɔ nyɔ̀ʼ mu ŋwɔʼnə-Nyii mbɔ,

‘Wo mə kə́ chí mbi bə haʼ bʉʼka bele fɛ,

bɔŋ bəkɔ ɔ chí bʉʼka ŋgiekə təmiyɔŋ ndə i fyú hə chu-Nyii.’ " *

5 Ndʉʉmɛ, mbʉ Debulu lʉ̀ ɔ, gɛ̀ nə nɔŋ mu yəŋkwɛʼtəŋNyiikə ndə i bɛ ŋkʉʉ, gɛ̀ chìi ɔ kóʼ tə́nə jɔŋ kətʉ njaafɛ̀ʼndɛŋNyii*, 6 ghɔ̀ŋ tʉ ɔŋ mbɔ, "Kaʼ a bɛ VaaNyii, ä sɛ́ʼ fɛ̄ŋ chə́ŋ sê, bʉʼka ŋwɔʼnə-Nyii nɔ ghɔ̀ŋ mbɔ,

‘Ɔ bu kàhə bʉəntəŋ-bi bɔ̂ŋ kə́ chyìi a jyujyu.

Bɔ̂ŋ bɔŋ-bu-leʼ bɛ̀ʼ a kəghɔ-bɔŋ,

bʉʼka a mə yi kwɔ̀ŋ wukə-a ndəŋ ŋgoʼ.’"*

7 Jiso bə̀ŋhə tʉ ɔŋ mbɔ, "Bə nɔ bìʼ nyɔ̀ʼ mu ŋwɔʼnə-Nyii mbɔ, ‘A kie ndə məyúotə Nyii Tiekətʉ-a fɛ.’ " *

8 Debulu bìʼ lʉ̀ ɔ, kóʼ gɛ̀ nə nɔŋ ndəŋ kwɔŋ ndə i də̀ʼ daa, dʉ̀ʼ lɔʼ-bətə̂ŋ-tə inchəŋ ndə i kə bɛ kəwʉʉnəmbi ghɔŋbə məgʉə-yʉə tʉ ɔŋ, 9 ghɔ̀ŋ tʉ ɔŋ mbɔ, "Mɔ bu kɔ́ fɔbə-ɔ̄ŋ tʉ a inchəŋ, kaʼ a bʉ́ʉnə sê lə̀ʼtə mɔ."

10 Ndʉʉmɛ, Jiso bə̀ŋhə tʉ ɔŋ mbɔ, "Lɔ̀ hə fɛ̄ŋ gɛ̀, Sata! Bə nɔ nyɔ̀ʼ mu ŋwɔʼnə-Nyii mbɔ, ‘A nɔ kie ndə mələ̀ʼtə Nyii Tiekətʉ-a, kə́ fɔ̀ʼ haʼ tʉ ɔŋ tətɛʼ ɔ.’ " *

11 Ndʉʉmɛ, mbʉ Debulu lɔ̀ hə mbʉə ɔ gɛ̀, bʉəntəŋNyii gwè, kə́ fɔ̀ʼ tʉ ɔŋ.

12 Ndʉʉ ndə Jiso kə yʉ́ mbɔ bə nɔʼ yá Jɔŋ gɛ̀ fʉ̀əŋ chaŋ, ɔ fyúhə ŋwɔŋ-ɛŋ gɛ̀ mu Galili. 13 Ɔ mɛ̀ʼtə ndə məchí mu Nasalɛ, gɛ̀ kə́ chí mu Kabanu ndə i bɛ mbʉə taanə-kəghəŋ-kə, ndə i bɛ mu bie Sɛbulɔŋ ghɔŋ bie Natali, 14 mbɔ nukə ndə Adaya yʉkəŋgieNyii nɔʼ kə ghɔ̀ŋ chʉʼ fyú shʉəŋ, ndə i kə ghɔ̀ŋ mbɔ,

15 "Lɔ̂ʼɔ Sɛbulɔŋ ghɔŋbə lɔʼɔ Natali ndə i bɛ fia ndə məgɛ̀ chu muukwɛʼtəŋ, ndə i bɛ njəŋ ŋgwɛŋ Jodaŋ, mu Galili, lɔʼɔ bʉə ndə bɔ̂ŋ gòʼ təmə bɛ bʉə-Juu fɛ,

16 bʉə ndə bɔ̂ŋ tʉʼ chí mu kənjəŋ

nɔʼ nyíɛ fɔŋ kɛʼɛ.

Bʉə ndə bɔ̂ŋ tʉʼ leʼ chí lɔʼɔ ndə lyʉʉhə-kwú-kə kwóhə bɔŋ,

kɛʼɛ nɔʼ báa mu bɔŋ."*

17 Lʉ̀ hə vɛʼ-ghɔ̄ Jiso chʉ́ʉhə məlɔ̀ʼ ŋgieNyiikə, kə́ ghɔ̀ŋ mbɔ, "B̈ii shìe liɛŋtə-ii hə ndəŋ bʉ̂ʼtə-ii, bʉʼka ndʉʉ nɔʼ kʉ̀ʼnə tʉ Fɔŋ Yuo ndə məsɔ́ʼ bii."

18 Nɔ nə bɛ yɔŋbɛʼ, Jiso kə́ tòʼ ŋgwuu-kətaanə-kəghəŋ Galili, ɔ nyíɛ bʉəbɛʼbə bəbûu ndə bɔ̂ŋ bɛ bəliŋ, Samu ndə bə kə́ tíi ɔ nə Bita leʼnə Andolo ndə bɛ liŋ-iŋ, bɔ̂ŋ kə́ mɔ̀ʼ kasinɛ mu mbʉ taanə-kəghəŋ-kə bʉʼka bɔ̂ŋ nɔ nə bɛ bənjuŋgwɔŋ. 19 Ɔ ghɔ̀ŋ tʉ bɔŋ mbɔ, "B̈ii gwè hə bɔ̌ŋ mɔ, mɔ bu dàhə bii ndə məyá bʉəməsʉʉ." 20 Haʼ ndʉʉmɛ, bɔ̂ŋ mɛ̀ʼtə bəkasinɛ-bʉə, gɛ̀ hə bɔ̌ŋ ɔŋ. 21 Ndə ɔ lɔ̀ hə chɔ kə́ gɛ̀, ɔ nyíɛ ibɛʼ-yə bʉə bəbûu ndə bɔ̂ŋ bɛ bəliŋ, kə́ bɛ Jɛŋ vaa-Sabɛdi leʼnə Jɔŋ liŋ-iŋ, mu kəbuu ghɔŋbə tie-yʉə, kə́ tɛ́nɛ bəkasinɛ-bʉə, ɔ tíi bɔŋ. 22 Haʼ ndʉʉmɛ, bɔ̂ŋ mɛ̀ʼtə mbʉ kəbuu leʼnə tie-yʉə gɛ̀ hə bɔ̌ŋ ɔŋ.

23 Ɔ kə́ tòʼ yə̀ŋ mu Galili inchəŋ, kə́ tòʼ dàhə mu-njaagháaNyii-hə*-ʉə bɔŋleʼ lɔ̀ʼ ntəŋjyujyu te Sɔ́ʼ Fɔŋ Yuo, kə́ leʼ chʉ́ʼ ntɛ-bəyɔʼ-hə leʼnə mbʉə liŋnə ntɛntɛhə ndə i bɛ mu bɔŋ. 24 Bə lɔ̀ʼ bəsɔʼka te ɔ yə̀ŋ mu Silia inchəŋ, mbʉ bʉə gwè nə bʉə ndə bɔ̂ŋ kie ntɛ-bəyɔʼ-hə inchəŋ ghɔŋbə yəŋ-líŋ-bə, bʉə ndə lyʉʉhəbʉəbʉəbə* tʉʼ chɔ́ŋhə bɔŋ, bʉə ndə bɔ̂ŋ kie ŋgwubə mbʉə-bɔŋ, leʼnə bʉə ndə bɔ̂ŋ nɔʼ kwú kəviakəmɔʼ, ɔ chʉ́ʼ bɔŋ bənchəŋ. 25 Nuɔ-bʉə-buŋmbi gɛ̀ hə bɔ̌ŋ ɔŋ ndə bɔ̂ŋ kə lɔ̀ hə Galili, Dɛkaboli, Jɛlosalɛŋ, Judia leʼnə njəŋ ŋgwɛŋ Jodaŋ.