1 Kʉ̂ʉ bɛ haʼ yɔ̂ŋ-ghɔ̄, Jiso fyú hə mu njaa gɛ̀ ŋgwuu taanə-kəghəŋ-kə. 2 Nuɔ-bʉə-buŋmbi chə̀ŋtə mbʉə ɔ, i chìi ɔ kóʼ mu kəbuu shíʼ dùʼ ndəŋ ghɔ mu muu. Mbʉ nuɔ-bʉə bənchəŋ tə́ŋtə ŋgwuu-muu njəŋmbi. 3 Ɔ kə́ gìe nubə tʉ bɔŋ buŋmbi ndə mbɔ̂hə, ghɔ̀ŋ mbɔ,

"B̈ii yʉ́, wo-mutɔbɛʼ nɔ nə gɛ̀ mutɔ ndə məgɛ̀ mɔ̀ʼ ŋgwie. 4 Ndə ɔ tʉʼ mɔ̀ʼ, bəbɛʼbə gwùtə bətʉghʉʉ, nuɔmə gwè chʉ́ʼtə. 5 Bəbɛʼŋgwie gwùtə mu ŋgoʼhə, təmə chɔʼkə bɛ chɔ yɔ́ŋyɔ́ŋ fɛ, haʼ ndʉʉmɛ ndə i kə byùʼ, bʉʼka chɔʼkə kə bɛ chɔ yɔ́ŋyɔ́ŋ fɛ, 6 bɔŋ ndʉʉ ndə chichi kóʼ, i tɔ̀ŋtə. Bʉʼka i kə kie ghûutə fɛ, i yúɔnə kwútə. 7 Bəbɛʼŋgwie gɛ̀ gwù mu təgyii, mbʉ təgyii kóʼ kwóhə, i kwú. 8 Bəbɛʼŋgwie gwùtə ndəŋ chɔʼ-jyujyu-kə kóʼ kʉ́ʉnə, bəbɛʼbə kə́ kʉ́ʉnə ntɔŋmə ghyʉʉ, bəbɛʼbə wuŋ ntʉʼʉ, bəbɛʼbə wuŋ tia tə tíŋ ndə bə kə shùɔ. 9 Wotəmiyɔŋ ndə ɔ kie tyunəkə ndə məyʉ́, ɔ̈ yʉ́."

10 Vâafɔʼɔ-bi gwè bíʼtə tʉ ɔŋ mbɔ, "Chìi ka a kə́ kwə́ʼ ndə mbɔ̂hə ndʉʉ ndə a tʉʼ kwə́ʼ tʉ bʉə?"

11 Ɔ bə̀ŋhə tʉ bɔŋ mbɔ, "Bii nɔ kie ndaa ndə bə kɔ́ tʉ bii, ndə məkínə nubə ndə bə tʉʼ lə̀ŋ kəghɔ-wʉʉnəmbikə te Sɔ́ʼ Fɔŋ Yuo təmə bə bɔŋ nɔʼ kɔ́ ndaa-ɔ̄ tʉ bɔŋ fɛ. 12 Bʉʼka mbɔ wo ndə ɔ kie, bə bu bìʼ yi-yɔ́ŋyɔ́ŋ-yə chɔ, ɔ chʉʼ kie buŋmbi daa, bɔŋ wo ndə ɔ gòʼ təmə kie fɛ, buŋ vaadyʉʼʉ ndə ɔ kie, bə bu fí hə kəghɔ-ɔ. 13 Nɔ bɛ nukə ndə i chìi mɔ kə́ kwə́ʼ tʉ bɔŋ ndə mbɔ̂hə bʉʼka bɔ̂ŋ tʉʼ lɛ́nə təmə bɔŋ kə́ nyíɛ fɛ, kə́ yʉ́, təmə bɔŋ kə́ yʉ́ fɛ byuunɔ kə́ kínə fɛ. 14 Yɔ̄ŋ-yə nɔ chìi nukə ndə Adaya yʉkəŋgieNyii kə gìe te bɔŋ i fyú shʉəŋ, ndə ɔ kə ghɔ̀ŋ mbɔ,

‘Bii bu kɛŋ kə́ yʉ́ haʼ yʉ́ təmə bɔŋ kə́ kínə fɛ,

bii bɔŋ-bu-leʼ kɛŋ kə́ nyíɛ haʼ nyíɛ təmə bɔŋ kə́ chèʼnə fɛ.

15 Bʉʼka bɔ̂ŋ nɔʼ fʉ̀əŋ fyiihə-ʉə,

təmə kə́ yʉ́ nə tyunəbə-ʉə jyujyu fɛ,

bɔ̂ŋ nɔʼ kwétə shʉtə-ʉə,

mbɔ bɔ̂ŋ mə nyíɛ nə shʉtə-ʉə

bɔŋleʼ yʉ́ nə tyunəbə-ʉə

kínə nə fyiihə-ʉə,

kíahə ŋwɔŋ-yʉə, mɔ chʉʼ yi chʉ́ʼ bɔŋ fɛ.’ *

16 "Bɔŋ bii nɔ bɛ bʉə ndə Nyii nɔʼ bìʼ bii bʉʼka mbɔ shʉtə-ii nɔ tʉʼ nyíɛ, tyunəbə-ii bɔŋleʼ kə́ yʉ́. 17 M̈ɔ shyíi bii nə shʉəŋ mbɔ bʉəyʉkəŋgieNyii buŋmbi, ghɔŋbə bʉə ndə bɔ̂ŋ tə́nə ndyʉndyʉ, nɔʼ kə, kə́ kʉ́ʉ ndə mənyíɛ nukə ndə b̈ii nyíɛ, təmə bɔŋ nyíɛ fɛ, kə́ kʉ́ʉ ndə məyʉ́ nukə ndə bii yʉ́, təmə bɔŋ yʉ́ fɛ.

18 "Nduɔ, b̈ii yʉ́ nukə ndə mbʉ kəchəŋ bɛ yɔŋ, 19 ndʉʉ ndə wo yʉ́ ŋgiekə te Sɔ́ʼ Fɔŋ Yuo təmə kínə fɛ, ndʉʉmɛ, mbʉ wo bʉəbʉə gwè jɔ̀ nukə ndə bə nɔʼ kə bè mu fyii-ɔ, gɛ̀ nə yɔŋ. Yɔ̄ŋ-yə nɔ bɛ nə ŋgwie ndə i kə gwùtə bətʉghʉʉ. 20 Ndə ŋgwie ndə i kə gwùtə mu ŋgoʼhə, nɔ bɛ wo ndə ɔ̈ yʉ́ mbʉ kəŋgie, fí nə mu fyii sʉ́ʼnə haʼ ndʉʉmɛ, 21 təmə bɔŋ kie ghûutə nə mbəŋ-ɛŋ fɛ, bɔŋleʼ yá fyii-i haʼ məniʼ, kʉ̂ʉ bɛ ndʉʉ ndə nubə tʉʼ shʉ́ə byuunɔ bə kə́ chɔ́ŋhə ɔŋ bʉʼka mbʉ kəŋgie, haʼ ndʉʉmɛ, ɔ tuŋ bʉ̀nə gwù. 22 Ndə ŋgwie ndə i kə gwùtə mu təgyii, nɔ bɛ bʉə ndə bɔ̂ŋ yʉ́ mbʉ kəŋgieNyii, bɔŋ ŋkwɔʼtə kəwʉʉnəmbi leʼnə fə́ʼhə ndə i gwè hə ndəŋ fʉʼkə kwóhə mbʉ kəŋgieNyii, təmə i mə kʉ́ʉnə ntɔŋmə fɛ. 23 Ndə ŋgwie ndə i kə gwùtə ndəŋ chɔʼ-jyujyu-kə, nɔ bɛ bʉə ndə bɔ̂ŋ yʉ́ mbʉ kəŋgieNyii kínə. I kʉ́ʉnə ntɔŋmə tə tiɛŋ ŋgwie kə́ kɔ́ nə ntɔŋmə ghyʉʉ, ibɛʼ-yə kə́ kɔ́ nə wuŋ ntʉʼʉ, ibɛʼ-yə kə́ kɔ́ nə ntɔŋmə wuŋ tia."

24 Ɔ bìʼ mɔ̀ʼ ibɛʼ-yə chəŋkə tʉ bɔŋ ghɔ̀ŋ mbɔ, "Bəkɔ bə fʉ̀ʼ Sɔ́ʼ Fɔŋ Yuo ndəŋ wo ndə ɔ mɔ̀ʼ ŋgwie-jyujyu-hə mutɔ-ɔ, 25 bɔŋ ndʉʉ ndə bʉə-fɔ̀ʼ-bi kə́ bɛ́ŋbɛ́ŋ wobàa-ɛ gwè mɔ̀ʼ ŋgwie ŋkɔ mutɔ gɛ̀ nə wi. 26 Ndʉʉ ndə mbʉ ŋgwie kóʼ kʉ́ʉnə ntɔŋmə, mbʉ ŋkɔ kóʼ ghɔ.

27 "Vâafɔʼɔ mbʉ ŋwɔ̌ŋ-njaa gwè, ghɔ̀ŋ tʉ ɔŋ mbɔ, ‘Tiefɔʼ, a kə shùɔ bə ŋkɛŋ ŋgwie mutɔ a fe? Fyuʼu bʉ̀nə lɔ̀ hə fa chɔ ndʉʉghɔfii?’ 28 Ɔ ghɔ̀ŋ tʉ bɔŋ mbɔ, ‘Nɔ chìi wo-bàa chìi yɔ̄ŋ-yə.’ Ndʉʉmɛ, mbʉ vâafɔʼɔ ghɔ̀ŋ tʉ ɔŋ mbɔ, ‘A kʉ̀ʉ mbɔ b̈aʼa gɛ̀ chɔ́ʼtə mɛ?’ 29 Bɔŋ ɔ ghɔ̀ŋ mbɔ, ‘Mbee, kaʼ bii kə́ chɔ́ʼtə, bii sòʼtə mbʉ ŋgwie ghɔŋbə yɔŋ. 30 B̈ii mɛ̀ʼtə ï kóʼ inchəŋ tə dàa ndʉʉ lʉ̀ ŋgwiehə, kʉ̂ʉ bɛ ndʉʉ kwètə ŋgwiehə nɔ mɔ téʼ tʉ bʉə ndə bɔ̂ŋ tʉʼ kwètə, b̈ɔ̂ŋ fəŋ chɔ́ʼtə mbʉ fyuʼu chə̀ŋtə kɔ́ʼtə təbyʉʉtəbyʉʉ tɔ̀ŋ, bɔŋ chə̀ŋtə mbʉ ŋgwie gɛ̀ mɔ̀ʼ mu ghɔ̂ʼ-mɔ.’ "

31 Ɔ bìʼ mɔ̀ʼ ibɛʼ-yə chəŋkə tʉ bɔŋ ghɔ̀ŋ mbɔ, "Sɔ́ʼ Fɔŋ Yuo nɔ bɛ nə vaa-ŋgwie-kîa ndə wo lʉ̀ shùɔ mutɔ-ɔ. 32 Nɔ bɛ ŋgwie ndə i tə́ʼ chàa ŋgwiehə inchəŋ, bɔŋ ndʉʉ ndə i kóʼ, i gʉ́ə chàa tyʉbə inchəŋ mutɔ, nuɔ-mbi-mə kə́ chʉʼ gwè fʉ̀ə ndəŋ ntɔŋtə-i."

33 Ɔ bìʼ mɔ̀ʼ chəŋbɛʼkə tʉ bɔŋ ghɔ̀ŋ mbɔ, "Sɔ́ʼ Fɔŋ Yuo nɔ bɛ nə vaadyʉʼʉ yî ndə woke lʉ̀ mɔ̀ʼ mu mbʉ̂ətə bobo buŋmbi, i chìi mbʉ mbʉ̂ətə kóʼ nchəŋnchəŋ-ɛŋ."

34 Jiso nɔ nə kwə́ʼ nubə-ɔ̄ŋ inchəŋ tʉ mbʉ nuɔ-bʉə ndə chəŋkə, nubɛʼkə kə bɛ ghɔ ndə ɔ nə kə́ kwə́ʼ tʉ bɔŋ təmə mɔ̀ʼ ndə chəŋkə fɛ. 35 Yɔ̄ŋ-yə nɔ nə bɛ ndə məchìi nubə ndə yʉkəŋgieNyii kə gìe i fyú shʉəŋ ndə i kə ghɔ̀ŋ mbɔ,

"Mɔ bu kwə́ʼ tʉ bɔŋ ndə chəŋbə.

Mɔ bu kɛ̀ʼ nubə tʉ bɔŋ ndə i nɔʼ kə líi lʉ̀ hə ndəŋ ŋgwunə-mbi."*

36 Ndʉʉmɛ, ɔ mɛ̀ʼtə mbʉ nuɔ-bʉə, sʉ́ʉ mu njaa. Vâafɔʼɔ-bi gwè tʉ ɔŋ ghɔ̀ŋ mbɔ, "Fʉ̀ʼtə nukə tʉ baʼa ndə mbʉ kəchəŋ te fyuʼu kə bɛ yɔŋ."

37 Jiso bə̀ŋhə mbɔ, "Wo ndə ɔ shùɔ ŋgwie-jyujyu-hə, nɔ bɛ Vaa-Woməsʉʉ. 38 Mbʉ mutɔ kə́ bɛ wʉʉnəmbikə, mbʉ ŋgwie jyujyu kə́ bɛ bʉə ndə Nyii tʉʼ sɔ́ʼ bɔŋ. Mbʉ fyuʼu kə́ bɛ ŋgwie-wo bʉəbʉə, 39 mbʉ wo-bàa ndə ɔ gwè shùɔ mbʉ ŋgwie kə́ bɛ Debulu. Mbʉ ndʉʉ kwètə ntɔŋmə, kə́ bɛ ndʉʉ ndə mbi bu liʼ, mbʉ bʉə kwètə kə́ bɛ bʉəntəŋNyii.

40 "Haʼ ndə bə bu chə̀ŋtə mbʉ fyuʼu tɔ̀ŋ nə viʼi, nɔ bɛ haʼ nɔ ndə i bu bɛ ndʉʉ ndə mbi bu liʼ. 41 Vaa-Woməsʉʉ bu tə́ŋ bʉəntəŋ-bi, bɔ̂ŋ chə̀ŋtə fɔbə inchəŋ ndə ĩ chìi bʉə kə́ chìi bʉ̂ʼʉ leʼnə bʉə bənchəŋ ndə bɔ̂ŋ tʉʼ bə́ʼ nuʼ-Nyii, mu bʉə ndə ɔ tʉʼ sɔ́ʼ, fyúhə bɔŋ, 42 mɛ̀ʼ bɔŋ mu kyʉʉ viʼi shʉ́əshʉ́ə, kəyəŋ ndə gwia ghɔŋbə mbʉə liŋnə shʉ́əshʉ́ə bu bɛ chɔ. 43 Ndʉʉmɛ, bʉə ndə bɔ̂ŋ bɛ ndyʉndyʉ bu kə́ báa nə chichi ndʉʉ ndə Tie-yʉə tʉʼ sɔ́ʼ bɔŋ. Wotəmiyɔŋ ndə ɔ kie tyunəkə, ɔ̈ yʉ́.

44 "Sɔ́ʼ Fɔŋ Yuo nɔ bɛ ndə kyʉʉmbəŋ ndə bə gwɛ̀ŋ mutɔ, wobɛʼ tòʼ gɛ̀ fyú chɔ kʉ̂ʉ tyúu nyíɛ, bʉ̀nə bɔŋ. Bʉʼka tʉʉjyu ɔ gɛ̀ fɛ̀ŋ fɔbə inchəŋ ndə ɔ kie, gwè nyúɔ mbʉ mutɔ nə yɔŋ.

45 "Sɔ́ʼ Fɔŋ Yuo nɔ bìʼ bɛ nə wo mbɛʼnə ndə ɔ tʉʼ kʉ́ʉ kɛŋ yʉʼ bəsə̌ŋ ŋgwuŋ chuɔŋ chyʉʉchyʉʉ, * 46 ndʉʉ ndə ɔ nyíɛ yi-yə ndə chuɔŋ-ɛŋ chyʉ́ʉ daa, ɔ gɛ̀ fɛ̀ŋ fɔbə inchəŋ ndə ɔ kie, gwè nyúɔ.

47 "Sɔ́ʼ Fɔŋ Yuo nɔ bìʼ bɛ nə kasinɛ ndə bə yʉ̀ʼ mu muukwɛʼtəŋmə, yá ntɛ-mbɔʼ-hə chɔ inchəŋ. 48 Ndʉʉ ndə mu-i kə lə́ŋ, bʉə dùu kóʼhə mbi, kʉ̂ʉ dùʼ sê tíetə fyúhə yʉʼtə-i, kə́ŋhə mu-bəkwo-hə, lʉ̀ ŋkwubə-i mɛ̀ʼtə. 49 Nɔ bɛ haʼ nɔ ndə i bu yi bɛ ndʉʉ ndə mbi bu yi kə lìʼ. BʉəntəŋNyii bu fyú tíetə bʉə-bʉəbʉə mu bʉə ndə bɔ̂ŋ tə́nə ndyʉndyʉ, 50 mɛ̀ʼ bɔŋ mu kyʉʉ viʼi shʉ́əshʉ́ə, kəyəŋ ndə gwia ghɔŋbə mbʉə liŋnə shʉ́əshʉ́ə bu bɛ chɔ.

51 "Bii kínə nubə-ɔ̄ŋ inchəŋ mɛ?" Bɔ̂ŋ bɛ́ŋ mbɔ, "Ɔŋ, baʼa nɔ kínə." 52 Ɔ ghɔ̀ŋ tʉ bɔŋ mbɔ, "Ndʉʉmɛ, wo dàhə nuʼ-Mushi təmiyɔŋ ndə bə nɔʼ dàhə ɔŋ te nə nu-Sɔ́ʼ-Fɔŋ-Yuo-bə nɔ bɛ nə ŋwɔ̌ŋ-njaa ndə ɔ fyúhə fɔ-fefe-bə ghɔŋbə fɔ-kənduɔŋ-bə mu njaa tʉ́ʼtə bəfɔ-ɛ."

53 Ndʉʉ ndə Jiso kə mìʼtə chəŋbə-ɔ̄ŋ, ɔ lɔ̀ hə chɔ gɛ̀ nə wi. 54 Ndʉʉ ndə Jiso gɛ̀ dàa mu Nasalɛ, mu lɔʼɔbə-ɔŋ, ɔ dàhə mu njaagháaNyii-bɔŋ, tə i chíe chutə-ʉə, bɔ̂ŋ kə́ bíʼtə mbɔ, "Wo-ɔ̄ lʉ̀ ntɛ-mukətʉ-súunə-ɔ̄ŋ fa leʼnə nufinəbə-ɔ̄ŋ? 55 Kaa vaa-kabənda nɔ fe? Yie ŋkwê-i kaa Mɛli fe? Bəliŋ-bi bələŋ bɔŋ-kə́-leʼ bɛ Jɛŋ, Jɔsɛ, Samu leʼnə Juda fe? 56 Bəliŋ-bi bəke kaa bʉʼʉ bɔŋ fɛ̄ŋ mɔʼɔ fe? Wo-ɔ̄ lʉ̀ nubə-ɔ̄ŋ inchəŋ fa ndʉʉmɛ?" 57 I byìi tʉʉ-yʉə, bɔŋ tɛ́ŋ ɔŋ. Bɔŋ Jiso ghɔ̀ŋ tʉ bɔŋ mbɔ, "B̃ə nɔ kɔ́ kuŋhə tʉ yʉkəŋgieNyii ndə yəŋbə inchəŋ yaʼkɛŋ mu lɔʼɔbə-ɔŋ leʼnə mu njaa-ɛ." 58 Ɔ kə fɔ̀ʼ nufinəbə chɔ yɔ́ŋyɔ́ŋ fɛ, bʉʼka ntɛ ndə bɔ̂ŋ kə gòʼ təmə mɔ̀ʼfyiihə-ʉə ndəŋ ɔŋ fɛ.