1 Jiso tíi vâafɔʼɔ-bi njuɔ bûu nə wuŋ mbʉə ɔ, kɔ́ ghʉəʼkə tʉ bɔŋ ndə məgìe hə kətʉ lyʉʉhəbʉəbʉəbə, mbɔ bɔ̂ŋ chʉʼ kə́ jə̀ŋ bɔŋleʼ kə́ chʉ́ʼ ntɛ-bəyɔʼ-hə inchəŋ ghɔŋbə mbʉə liŋnə. 2 Yie mbʉ bəlɔntəŋNyii* njuɔ bûu nə wuŋ nɔ bɛ Samu ndə ɔ bɛ fəŋ, bə kə́ leʼ tíi ɔ nə Bita leʼnə Andolo liŋ-iŋ, Jɛŋ vaa-Sabɛdi leʼnə Jɔŋ liŋ-iŋ, 3 Fili, Batolomiɛ, Tɔmɔ leʼnə Matia wo fí tashi, Jɛŋ vaa-Afio, leʼnə Tadio, 4 Samu ndə bə kə́ tíi ɔ nə tiɛŋ-lɔʼɔ, leʼnə Juda Iskalo ndə ɔ kə fɛ̀ŋ Jiso.

5 Jiso tə́ŋ vâafɔʼɔ-bɔ̄ŋ njuɔ bûu nə wuŋ kɔ́ mbi, kàhə bɔŋ mbɔ, "Kə bii mə gɛ̀ tʉ bʉə ndə bɔ̂ŋ gòʼ təmə bɛ bʉə-Juu fɛ, byuunɔ ŋíi mu kəyəŋkwɛʼtəŋ bʉə-Samalia fɛ, 6 b̈ii bɔŋ gɛ̀ bə tʉ binjyʉʉhə ndə bɔ̂ŋ nɔʼ bɛ́ mu bʉə-Isilɛ. 7 Ndə bii tʉʼ gɛ̀, b̈ii kə́ tòʼ lɔ̀ʼ mbɔ, ‘Sɔ́ʼ Fɔŋ Yuo la nɔʼ kə́ŋhə.’ 8 B̈ii chʉ́ʼ bʉə-bəyɔʼ, bʉ̀nə kóʼhə bʉə ndə bɔ̂ŋ nɔʼ kwútə, chʉ́ʼ bʉə-bəlɔ * bɔŋleʼ jə̀ŋ lyʉʉhəbʉəbʉəbə. Bii nɔ kie njʉnjʉ, nɔ, bii kie ndə məkɔ́ njʉnjʉ.

9 "Kə bii mə lʉ̀ kyʉə gɛ̀ nə yɔŋ fɛ, təkɔmə mbyu kabaa mu kwo bii. 10 Kə bii mə lʉ̀ kwo bɛ́ʼnə fɛ, təkɔmə ibɛʼ-yə ndyi mu mbʉə fɛ, təkɔmə ibɛʼ-yə takwubə fɛ, təkɔmə mbuu, bʉʼka wo-fɔ̀ʼ nɔ kie ndə məkie fɔbə ndə i bu tʉ́ʼ ɔ.

11 "Ndʉʉtəmiyɔŋ ndə bii ŋíi mu kəyəŋkwɛʼtəŋ təmiyɔŋ byuunɔ mu lɔʼɔ kətə̂ŋ nɔ, b̈ii gɛ̀ lɛ́nə wo ndə ɔ kʉ̀ʉ ndə məfì bii mu njaa-ɔ, b̈ii gɛ̀ kə́ chí bii bɔŋ, tə nə lɔ̀ hə chɔ. 12 Ndə bii ŋíi mu mbʉ njaa, b̈ii gìe tʉ bʉə mu njaa-ghɔ̄bə. 13 Kaʼ bʉə mu njaa-ghɔ̄bə bɛ́ŋ nchaʼtə-yii, n̈chaʼtə-yii káa tʉ bɔŋ. Bɔŋ kaʼ bɔ̂ŋ gòʼ təmə bɛ́ŋ nchaʼtə-yii fɛ, n̈chaʼtə-yii bʉ̀nə tʉ bii. 14 Bɔŋ kaʼ wo gòʼ təmə fí bii fɛ, byuunɔ, təmə yʉ́ ŋgiebə-ii fɛ, b̈ii kwètə bʉəkə kəwu-bii ndʉʉ ndə bii tʉʼ fyú hə mu mbʉ njaa byuunɔ mu mbʉ kəyəŋkwɛʼtəŋ. 15 Nɔʼ m̈ɔ shyíi bii nə shʉəŋ, i bu yi shʉ́ə tʉ bɔŋ ndəŋ chî-kwɛ̀-fɛʼɛ-kə tə chàa ndə i bu yi bɛ tʉ bʉə-Sodɔŋ ghɔŋbə Gomola.

16 "B̈ii nyíɛ, mɔ nɔ tʉʼ tə́ŋ bii nə binjyʉʉhə mu bəbuu, nɔ, b̈ii láa tə bɛ nə yɔhə bɔŋ búɔnə tə bɛ nə bətambʉətə. 17 B̈ii láa bʉəməsʉʉ, bʉʼka bɔ̂ŋ bu yá bii, gɛ̀ nə bii mu njaafɛ̀ʼ bɔŋleʼ gwúu bii mu njaagháaNyiihə-ʉə. 18 Bə bu dùu bii, gɛ̀ nə bii bəshʉ bəgɔməna ghɔŋbə bəfɔŋ bʉʼka mɔ. Ÿɔ̄ŋ-yə bɛ saa tʉ bii ndə məlɔ̀ʼ ntəŋjyujyu tʉ bɔŋ ghɔŋbə bʉə ndə gòʼ təmə bɛ bʉə-Juu fɛ. 19 Ndʉʉ ndə bə chɔ̀ʼhə bii kɔ́ kəghɔ-bɔŋ, kə bii mə kə́ lə̀ŋnə ndə ntɛ ndə bii bu kwə́ʼ, byuunɔ nukə ndə bii bu gìe fɛ, bʉʼka nukə ndə bii bu kwə́ʼ, bə bu kɔ́ tʉ bii ndə ndʉʉ-ghɔ̄. 20 Bʉʼka kaa mbəŋ-aŋ ndə a tʉʼ kwə́ʼ fɛ, nɔ bɛ bə Lyʉʉhə-Tie-a-kə ndə ɔ tʉʼ kwə́ʼ mu mbʉə-a.

21 "Bəliŋ bu chɔ̀ʼhə bəliŋ-bʉə kɔ́ bə yí, tie-vaa chɔ̀ʼhə vaa-ɛ kɔ́ bə yí, vâa bu dʉ̀ʼ ghɔbə-ʉə chu bətie-bʉə chɔ̀ʼhə bɔŋ kɔ́ bə yí. 22 Bʉə bənchəŋ bu bàa bii bʉʼka bii mɔ̀ʼfyiihə-ii ndəŋ mɔ. Bɔŋ wo ndə ɔ lyʉ̀ʉtə́nə tə gɛ̀ dàa ndə liʼ-i bu kie ŋkwaaNyii. 23 Kaʼ bə chɔ́ŋhə a mu yəŋkwɛʼtəŋkə imɔʼ, nyʉ́ʉ gɛ̀ mu ibɛʼ-yə, bʉʼka mbɔ ndə shʉəŋ bii mə yi tòʼ yə̀ŋ yəŋkwɛʼtəŋbə mu Isilɛ inchəŋ, təmə Vaa-Woməsʉʉ nɔʼ gwè fɛ.

24 "Vaa-sɛku mə láa chàa chicha-ɛ fɛ, təmə fʉə mə gʉ́ə chàa tiefɔʼ-ɛ fɛ. 25 I nɔ kʉ̀ʼnə tʉ vaa-sɛku ndə məkínə tə bɛ nə chicha-ɛ, fʉə bɔŋleʼ kínə tə bɛ nə tiefɔʼ-ɛ. Kaʼ bə tíi mbʉ tie-njaa nə Bɛsɛbu*, * bə bu dʉ̀ʉhə nchinjaa-ɛ ntyʉʉ təka?

26 "Nɔ, kə bii mə kə́ fàa bʉə ndə bɔ̂ŋ tʉʼ fyúhə shʉtə-ʉə tʉ bii fɛ, bʉʼka nubɛʼkə kaa ghɔ ndə bə tʉʼ bɔ̀ŋ, ndə i bu yi gòʼ təmə kɛ̀ʼnə fɛ, byuunɔ ndə i tʉʼ líi təmə bə bu nə kínə fɛ. 27 Nukə ndə mɔ shyíi bii chɔ mu kənjəŋ, b̈ii kwə́ʼ ntaa ndʉʉnəchî, bɔŋ nukə ndə bii leʼ yʉ́ bə chùŋ, b̈ii tə́nə kətʉ njaa buŋ lɔ̀ʼ.

28 "Kə bii mə kə́ fàa bʉə ndə bəkɔ bɔ̂ŋ yí ŋkwê mbʉə-yii təmə mə yí lyʉʉhəkə-ii fɛ. B̈ii fàa bə wo ndə bəkɔ ɔ yí lyʉʉhə-wo-kə ghɔŋbə mbʉə-e kɔ́ mu viʼi. 29 Bə tʉʼ fɛ̀ŋ bəghuunə ibûu ndə mbyu kabaa fe? Bɔŋ təmə mbyu imɔʼ mə gwù sê təmə Tie-yii kínə fɛ.Nyii nɔ tʉʼ buŋ lɛ́nə vâa-mənuɔ ghɔ 30 Bə bɔŋ nɔʼ buŋ súu nyu-kətʉ-hə-ii inchəŋ. 31 Kə bii mə kə́ fàa ndʉʉmɛ fɛ, bii nɔ gʉ́ə shʉ-ɔ chàa bəghuunə buŋmbi.

32 "Nɔ, wotəmiyɔŋ ndə ɔ kwɛ̀ŋ fyii-i te mɔ bəshʉ bʉəməsʉʉ, mbɔ ɔ bɛ vaafɔ̀ʼ-ɔ, mɔ bu kwɛ̀ŋ fyii-ɔ te ɔ ghɔ bəshʉ Tie-ɔ ndə ɔ bɛ yuo, mbɔ ɔ la bɛ vaafɔ̀ʼ-ɔ. 33 Bɔŋ wo ndə ɔ tɛ́ŋ mɔ bəshʉ bʉəməsʉʉ, mɔ bu tɛ́ŋ ɔŋ ghɔ bəshʉ Tie-ɔ ndə ɔ bɛ yuo.

34 "Kə bii mə kwɔ̀ʼtə mbɔ mɔ gwè nə fyiighʉ́ənə kəchisê fɛ. Mɔ gwè nə fyiighʉ́ənə fɛ, mɔ nɔ gwè nə setə-shùɔnə-kə.

35 Bʉʼka mɔ nɔ gwè ndə məchɔ̀ʼhə wo tʉ́ʼ ghɔŋ tie-e, chɔ̀ʼhə

vaabəke tʉ́ʼ ghɔŋ ŋkwê-i,

chɔ̀ʼhə vi vaa tʉ́ʼ ghɔŋ ŋkwê ləŋ-ɛŋ.

36 Bʉə bàa wo bu bɛ haʼ bʉə mu njaa-bi. *

37 "Wo ndə ɔ kʉ̀ʉ tie-e byuunɔ ŋkwê-i tə chàa mɔ, kʉ̀ʼnə ndə məgwè hə bɔ̌ŋ mɔ fɛ. Wo ndə ɔ kʉ̀ʉ vaa-ɛ vaabələŋ byuunɔ vaa-ɛ vaabəke tə chàa mɔ, kʉ̀ʼnə ndə məgwè hə bɔ̌ŋ mɔ fɛ. 38 Wotəmiyɔŋ ndə ɔ gòʼ təmə bɛ̀ʼ tyʉntɔɔnəkə-i gwè hə bɔ̌ŋ mɔ fɛ, kʉ̀ʼnə ndə məgwè hə bɔ̌ŋ mɔ fɛ. 39 Wo ndə ɔ tʉʼ kʉ́ʉ ndə məkwáa ŋkwiitʉ-e, bu bɛ́, bɔŋ wo ndə ɔ kɔ́ ŋkwiitʉ-e bʉʼka mɔ, bu kie ŋkwiitʉ-e.

40 "Wotəmiyɔŋ ndə ɔ lʉ̀ bii kɔ́ mbʉə-ɔ, nɔ lʉ̀ mɔ kɔ́ mbʉə-ɔ, bɔŋ wo ndə ɔ leʼ lʉ̀ mɔ kɔ́ mbʉə-ɔ, nɔ lʉ̀ mbəŋ-ɛŋ ndə ɔ tə́ŋ mɔ kɔ́ mbʉə-ɔ. 41 Wo ndə ɔ lʉ̀ yʉkəŋgieNyii kɔ́ mbʉə-ɔ bʉʼka mbɔ ɔ bɛ yʉkəŋgieNyii bu kie kɛŋ-yʉkəŋgieNyii-bə, wo ndə ɔ lʉ̀ wo ndə ɔ bɛ ndyʉndyʉ kɔ́ mbʉə-ɔ bʉʼka mbɔ ɔ bɛ wo ndə ɔ bɛ ndyʉndyʉ bu kie kɛŋbə ndə ĩ gwè tʉ wo ndə ɔ bɛ ndyʉndyʉ. 42 Buŋ wo ndə ɔ kɔ́ ndʉ̂ʉ muu ghʉ́ənə tʉ mbyu vaadyʉʼʉ vaa mu vâa-bɔŋ-bɔ̄ŋ bʉʼka mbɔ ɔ bɛ vaafɔ̀ʼ-ɔ, m̈ɔ shyíi bii nə shʉəŋ mbɔ nubɛʼkə kaa ghɔ ndə bəkɔ i chìi ɔ bɛ́ kɛŋbə-i fɛ."