1 Ndʉʉ ndə Jiso shíʼ hə ndəŋ kwɔŋ, nuɔ-bʉə buŋmbi kə́ gɛ̀ hə bɔ̌ŋ ɔŋ. 2 Kə kwɔnə nyíɛ, wo-kəlɔbɛʼ gwè kwíʼtə bəshʉ Jiso fʉ̀ʉtə ɔŋ ghɔ̀ŋ mbɔ, "Tiekətʉ kaʼ a kʉ̀ʉ, bəkɔ a chìi m̈ɔ tʉ́ʉnə." 3 Jiso dùhə ghɔkə-i kə̀ŋ wo-ghɔ̄ ghɔ̀ŋ mbɔ, "Mɔ nɔ kʉ̀ʉ, tʉ́ʉnə!" Haʼ ndʉʉmɛ, mbʉ kəlɔ fyú hə mbʉə-ɔ. 4 Ndʉʉmɛ, Jiso gìe tʉ ɔŋ mbɔ, "Kə a mə shyíi wo fɛ, fəŋ gɛ̀ dʉ̀ʼ ŋwɔŋ-aŋ tʉ wofɛ̀ʼndɛŋNyii* bɔŋleʼ fɛ̀ʼndɛŋ ndə Mushi kə kàhə, bʉə chʉʼ kínə mbɔ a bɛ tʉ́ʉnə."

5 Ndʉʉ ndə Jiso kə ŋíi mu Kabanu, wokwɛʼtəŋ-bəsɔge-ghyʉʉ gwè bəshʉ ɔ, kə́ fʉ̀ʉtə ɔŋ mbɔ, 6 "Tiekətʉ, vaafɔ̀ʼ-ɔ nɔ nʉ̀ʉ chunjaa nɔʼ kwú kəviakəmɔʼ bɔŋ-kə́-leʼ nyíɛ ŋgʉəʼ daa." 7 Ɔ gìe tʉ ɔŋ mbɔ, "Mɔ bu gwè chʉ́ʼ ɔ." 8 Bɔŋ mbʉ wokwɛʼtəŋ-bəsɔge bə̀ŋhə mbɔ, "Tiekətʉ, mɔ kʉ̀ʼnə wo ndə bəkɔ a gwè mu njaa-mɔ fɛ. Bɔŋ gìe mbʉ mbyu kəŋgie, vaafɔ̀ʼ-ɔ bu kie nchʉʼ. 9 Bʉʼka mbəŋ-ɔŋ ghɔ nɔ bɛ tɔʼɔ wokwɛʼtəŋ-ɔŋ, bɔŋ leʼnə bəsɔge tɔʼɔ mɔ. M̃ɔ nɔ gìe tʉ mbyu sɔge təmiyɔŋ mbɔ, ‘Gɛ̀!’ nɔ ɔ gɛ̀, tʉ ibɛʼ-yə mbɔ, ‘Gwè!’ nɔ ɔ gwè. Mɔ gìe tʉ vaafɔ̀ʼ-ɔ mbɔ, ‘Chìi mənɔ!’ ɔ chìi haʼ nɔ." 10 Ndʉʉ ndə Jiso yʉ́ yɔ̄ŋ-yə, i nɔ kə chíe chu-i, ɔ gìe tʉ bʉə ndə bɔ̂ŋ kə́ gwè hə bɔ̌ŋ ɔŋ mbɔ, "M̈ɔ shyíi bii nə shʉəŋ, mɔ chʉʼ nyíɛ wo ndə ɔ mɔ̀ʼfyii-i ndəŋ Nyii ndə wo-ɔ̄, mu Isilɛ fɛ. 11 Nɔʼ m̈ɔ shyíi bii, bʉə buŋmbi bu gwè hə kwii ndə chichi tʉʼ sɔ́ʼ chɔ leʼnə kwii ndə chichi tʉʼ sʉ́ʉ chɔ chusii-ɔ, kə́ yú fɔbə ghɔŋbə Ablahaŋ, Aisi leʼnə Jakɔ ndʉʉ ndə Fɔŋ Yuo tʉʼ sɔ́ʼ. 12 Bɔŋ vâa sê lɔʼɔ ndə mbʉ sɔ́ʼ Fɔŋ nə bɛ tʉ bɔŋ, bə bu mɛ̀ʼ bɔŋ mbi mu kənjəŋ. Mu kəyəŋ-ghɔ̄, gwia bu bɛ chɔ ghɔŋbə mbʉə liŋnə shʉ́əshʉ́ə." 13 Jiso gìe tʉ mbʉ wokwɛʼtəŋ-bəsɔge mbɔ, "Gɛ̀, bə fɔ̀ʼ tʉ a haʼ ndə ntɛ ndə a mɔ̀ʼfyii-a ndəŋ Nyii." Mbʉ vaafɔ̀ʼ kie nchʉʼ haʼ ndʉʉmɛ.

14 Ndʉʉ ndə Jiso kə ŋíi mu njaa Bita, ɔ nyíɛ naachi-i kə́ nʉ̀ʉ kəbɔ kəyɔʼ nə nchyʉʼkə. 15 Jiso kə̀ŋ kwii-i, mbʉ kənchyʉʼ fyú mbʉə-ɔ, ɔ lɔ̀ hə sê chʉ́ʉhə mətía ɔ.

16 Kʉ̂ʉ bɛ ndʉʉbuumbi yɔ̂ŋ-ghɔ̄, mbʉ bʉə gwè nə bʉə ndə lyʉʉhəbʉəbʉəbə tʉʼ chɔ́ŋhə bɔŋ, ɔ jə̀ŋ mbʉ bəlyʉʉhəbʉəbʉə nə mbyu kəŋgie bɔŋleʼ chʉ́ʼ bʉə bənchəŋ ndə bɔ̂ŋ kə́ yɔ́ʼyɔ́ʼ. 17 Yɔ̄ŋ-yə nɔ nə bɛ ndə məchìi nukə ndə Adaya yʉkəŋgieNyii kə gìe, i fyú shʉəŋ ndə ɔ kə ghɔ̀ŋ mbɔ, "Ɔ lʉ̀ mbʉə liŋnə-yaʼ, bɛ̀ʼ yɔʼbə-aʼa gɛ̀ nə yɔŋ."

18 Ndʉʉ ndə Jiso kə nyíɛ nuɔ-bʉə buŋmbi mbʉə ɔ, ɔ gìe tʉ vâafɔʼɔ-bi mbɔ ghɔŋ b̈ɔŋ la dàa gɛ̀ ndəŋ ibɛʼ-yə via-kətaanə-kəghəŋ-kə. 19 Wo dàhə nuʼ-Mushibɛʼ gwè ghɔ̀ŋ tʉ Jiso mbɔ, "Chicha, mɔ bu gwè hə bɔ̌ŋ aŋ ndə yəŋkə təmiyɔŋ ndə a tʉʼ gɛ̀ chɔ." 20 Jiso bə̀ŋhə mbɔ, "Bəsəŋyaŋgwo nɔ kie mbyuʼhə-ʉə ndə məchí chɔ, nuɔ-mbi-mə kie njaahə-ʉə, bɔŋ Vaa-Woməsʉʉ* kie yəŋ-mɔ̀ʼ-kətʉ-kə-i fɛ." 21 Ibɛʼ-yə mbyu vaafɔ̀ʼ bìʼ ghɔ̀ŋ tʉ ɔŋ mbɔ, "T̈iekətʉ, mɛ̀ʼtə mɔ fəŋ gɛ̀ tyúu tie-ɔ." 22 Jiso ghɔ̀ŋ tʉ ɔŋ mbɔ, "Gwè hə bɔ̌ŋ mɔ, mɛ̀ʼtə ŋkwu-bʉə-bə tyúu ŋkwu-bʉə-bʉə-bə."

23 Ndʉʉ ndə Jiso kə kóʼ mu kəbuu, vâafɔʼɔ-bi gɛ̀ hə bɔ̌ŋ ɔŋ. 24 Kə kwɔnə nyíɛ, fʉ̂əŋ ŋɛ̀nə mu mbʉ kətaanə-kəghəŋ, kə́ bɛ̀ʼ lɛɛŋhə-muu-bə kɔ́ mu mbʉ kəbuu tə i kə́ kʉ́ʉ bɛ́ mu muu, tʉ ɔ bɔŋ kə́ bɛ́ŋbɛ́ŋ. 25 Bɔ̂ŋ gɛ̀ yəŋ ɔŋ, ghɔ̀ŋ mbɔ, "Kwáa baʼa, Tiekətʉ, baʼa tʉʼ nə bɛ́!" 26 Ɔ ghɔ̀ŋ tʉ bɔŋ mbɔ, "Bii tʉʼ fàa ka, Oo bii ndə bii mɔ̀ʼfyiihə-ii ndəŋ mɔ məniʼ?" Ndʉʉmɛ, ɔ lɔ̀ sɔ́ʼ mbʉ kəfʉʉ ghɔŋbə mbʉ muu, yəŋbə yùtə. 27 I chàa bʉə bənchəŋ ndə bɔ̂ŋ kə bɛ chɔ, bɔ̂ŋ kə́ ghɔ̀ŋ mbɔ, "Bɛ ntɛ wo ka nɔ, tə fʉʉkə ghɔŋbə muu kə́ yʉ́ chu-i?"

28 Ndʉʉ ndə Jiso kə dàa gɛ̀ ndəŋ ibɛʼ-yə via-kətaanə-kəghəŋ-kə, lɔʼɔ Gadala, ɔ bìatə bʉəbɛʼbə bəbûu ndə lyʉʉhəbʉəbʉəbə bɛ mbʉə-bɔŋ. Bɔ̂ŋ kə́ fyú hə mu sětə ndə bə sáa ndəŋ ŋgoʼ, bɔ̂ŋ chyʉ́nə daa təmə wo mə bə̀ŋhə mbʉ fia fɛ. 29 Kə yʉ́, bɔ̂ŋ tíitə nə gyʉʉ-dədə-hə ghɔ̀ŋ mbɔ, "A tʉʼ kʉ́ʉ yì ka nə baʼa, VaaNyii? A gwè ndə məchɔ́ŋhə baʼa ŋgwɔʼmbi buŋ nə kʉ̀ʼnə mɛ?"

30 Nuɔ bəŋkwunyaabɛʼbə buŋmbi nɔ kə́ yú kəyəŋbɛʼ mbʉə ghɔ təmə dɔ̀ŋnə fɛ. 31 Mbʉ bəlyʉʉhəbʉəbʉə fʉ̀ʉtə ɔŋ ghɔ̀ŋ mbɔ, "Kaʼ a jə̀ŋ baʼa, ä sʉ́ʉhə baʼa mu mbʉə bəŋkwunyaa-bɔ̄ŋ."

32 Ɔ ghɔ̀ŋ tʉ bɔŋ mbɔ, "B̈ii gɛ̀." Ndʉʉmɛ, bɔ̂ŋ fyú gɛ̀ ŋíi mu mbʉə mbʉ bəŋkwunyaa. Kə kwɔnə nyíɛ, mbʉ nuɔ bəŋkwunyaa nyʉ́ʉ shíʼ hə ndəŋ ŋgwuu-mbʉ-kətaanə-kəghəŋ gwùtə mu muu, nú muu kwútə.

33 Mbʉ bənchyii-bəŋkwunyaa nyʉ́ʉ gɛ̀ nə wʉə, kʉ̂ʉ gɛ̀ mu kəyəŋkwɛʼtəŋ, shyíi bʉə nə nubə inchəŋ, kɛŋ nubə ndə i kə fyú tʉ mbʉ bʉə ndə lyʉʉhəbʉəbʉəbə kə bɛ mu mbʉə-bɔŋ le. 34 Kə nyíɛ, bʉə bənchəŋ ndə bɔ̂ŋ bɛ mu mbʉ kəyəŋkwɛʼtəŋ fyú ndə məgɛ̀ bìatə Jiso, bɔ̂ŋ kʉ̂ʉ nyíɛ ɔŋ, fʉ̀ʉtə ɔŋ mbɔ ɔ̈ la fyú hə mu bie-bɔŋ.