1 Nɔ nə bɛ ndʉʉ-ghɔ̄, Jɔŋ ndə ɔ̃ kɔ́ muu gwè kə́ lɔ̀ʼ ŋgieNyiikə mu kwɔŋkəyəŋnə* ndə i bɛ Judia, 2 kə́ ghɔ̀ŋ mbɔ, "B̈ii shìe liɛŋtə-ii hə ndəŋ bʉ̂ʼtə-ii bʉʼka ndʉʉ nɔʼ kʉ̀ʼnə tʉ Fɔŋ Yuo ndə məsɔ́ʼ."*, i nɔ bɛ haʼ ndə məghɔ̀ŋ mbɔ "Nyii nɔ tʉʼ sɔ́ʼ bʉəməsʉʉ." 3 Bʉʼka nɔ bɛ mbəŋ-ɛŋ nɔ ndə Adaya yʉkəŋgieNyii kə kwə́ʼ te ɔ ndʉʉ ndə ɔ kə ghɔ̀ŋ mbɔ,

"Gyʉʉ-wobɛʼ nɔ tʉʼ tíi mu kwɔŋkəyəŋnə kə́ ghɔ̀ŋ mbɔ,

‘B̈ii shʉ̀tə fia Tiekətʉ,

b̈ii shʉ̀tə fiatə-i, ï tə́nə ndyʉndyʉ.’ "*

4 J̃ɔŋ nɔ kə́ mɔ̀ʼ ndyi mbʉə-ɔ ndə bə túŋ nə nyu-nyaabɛʼ-hə ndə bə kə́ tíi ɔ nə kamɛ bɔŋleʼ kə́ kɔ́ʼ kwɔkə tʉʉ-ɔ ndə bə chìi nə gwo-nyaa, fɔyubə-i kə́ bɛ ŋgwehə leʼnə yʉʉ-mu-ŋkɔ-hə. 5 Ndʉʉmɛ, bʉə-Jɛlosalɛŋ ghɔŋbə bʉə bənchəŋ mu Judia leʼnə bʉə bənchəŋ ndə bɔ̂ŋ bɛ mbʉə ŋgwɛŋ Jodaŋ kə́ fyútə gwè tʉ Jɔŋ. 6 Bɔ̂ŋ kə́ fí muu kəghɔ-ɔ mu ŋgwɛŋ Jodaŋ, gwía fyùufyùu ndəŋ bʉ̂ʼtə-ʉə.

7 Bɔŋ ndʉʉ ndə ɔ nyíɛ buŋmbi bʉə-Falasi* ghɔŋbə bʉə-Sadusi* kə́ gwè ndə məfì muu kəghɔ-ɔ, ɔ gìe tʉ bɔŋ mbɔ, "Mbəŋ-yii ŋgwie kəfɛfɛ! Shyùu nda shyùu tyunəkə-ii mbɔ bii líi tʉʉbʉə Nyii-ɔ̄ŋ ndə i tʉʼ gwè nɔ? 8 B̈ii kʉ́ʉnə ntɔŋmə ndə mədʉ̀ʼ mbɔ bii nɔʼ shìe liɛŋtə-ii hə ndəŋ bʉ̂ʼtə-ii. 9 Kə bii mə buŋ kə́ kwɔ̀ʼtə ndə məghɔ̀ŋ tʉ ŋwɔŋtə-ii mbɔ, ‘Ablahaŋ nɔ bɛ tie-yaʼ ’ fɛ. Mɔ nɔ tʉʼ shyíi bii, bəkɔ Nyii chìi vâa tʉ Ablahaŋ hə ndəŋ ŋgoʼhə-ɔ̄ŋ. 10 Bə nɔʼ shʉ̀tə njɔŋ, tʉ́ʼ ndəŋ ghûu-bətyʉ-tə, tyʉkə təmiyɔŋ ndə i bu gòʼ təmə kʉ́ʉnə ntɔŋ-jyujyu-mə fɛ, bə bu gwìa mɔ̀ʼ sê, tɔ̀ŋ mu viʼi.

11 "Mɔ nɔ tʉʼ kɔ́ muu tʉ bii ndə mədʉ̀ʼ mbɔ bii nɔʼ shìe liɛŋtə-ii hə ndəŋ bʉ̂ʼtə-ii, bɔŋ wo tʉʼ gwè ndə ɔ bu shʉ́ə chàa mɔ, mɔ kʉ̀ʼnə ndə məbɛ̀ʼ takwubə-i fɛ. Ɔ bu kɔ́ muu tʉ bii, ndə bɛ LyʉʉhəNyiikə ghɔŋbə viʼi. 12 Baŋ fʉ́əʼ lɛshi nɔ kəghɔ-ɔ ndə məyʉ̀əʼ yəŋ-bʉ́ʼ-lɛshi-kə-i, ɔ bu byíi yʉʼ-i kə́ŋhə mu kwo, chə̀ŋtə fʉlʉlʉbə ghɔŋ vɛtə tɔ̀ŋ mu viʼi təmə i mə nə lʉ́əŋnə fɛ."

13 Jiso lɔ̀ hə Galili gwè ŋgwɛŋ Jodaŋ, ndə məfì muu kəghɔ-Jɔŋ ndə ɔ̃ kɔ́ muu. 14 Jɔŋ kə́ kʉ́ʉ mbɔ ɔ kwɛ́nə fyii-i, ndə məghɔ̀ŋ mbɔ, "Nɔ kie mbəŋ-aŋ ndə məkɔ́ muu tʉ mɔ, bɔŋ bʉ̀nə kə́ gwè a tʉ mɔ təka?" 15 Bɔŋ Jiso bə̀ŋhə tʉ ɔŋ mbɔ, "Ï bɛ haʼ nɔ nduɔ, bʉʼʉ nɔ kie ndə məfɔ̀ʼ nukə ndə Nyii kʉ̀ʉ." Ndʉʉmɛ, ɔ bɛ́ŋ. 16 Ndʉʉ ndə Jiso kə fí muu, haʼ ndʉʉmɛ ndə ɔ kóʼ muu, kə nyíɛ, yuo ŋɔ́ʼnə tʉ ɔŋ, ɔ nyíɛ LyʉʉhəNyiikə, ɔ kə́ shíʼ hə yuo ndə tambʉətə, kə́ gwè ndə mədùʼ ndəŋ ɔŋ, 17 kə yʉ́, gyʉʉ gìe hə yuo mbɔ, "Nɔ bɛ Vaa-ɔŋ nɔ ndə mɔ kʉ̀ʉ ɔ daa, ndə tʉʉ-ɔ bʉ̀ʉ ndəŋ ɔŋ jyujyu."