1 Chîlɔʼkə kʉ̂ʉ tíŋ, tə kʉ̂ʉ bɛ ndʉʉfiimbi ndə fəŋ kəchî mu vyii mbi, Mɛli Matalina ghɔŋbə ibɛʼ-yə Mɛli lɔ̀ gɛ̀ ndə məlɛ́nə mbʉ sě. 2 Kə kwɔnə nyíɛ, chisêkə ŋɛ̀nə shʉ́əshʉ́ə, bʉʼka wontəŋTiekətʉ nɔ nə shíʼ gwè hə yuo, gwè tʉ́ʉhə mbʉ ŋgoʼ dùʼ ndəŋ ghɔ. 3 Ɔ nɔ nə kə́ lèʼnə mbʉə-ɔ nə leʼnə-wyuu-kə, ndyihə-i kə́ fyùʼ nə kʉə-yuo-kə. 4 Bʉʼka mbɔ mbʉ bənchyii sě fàa ɔ, i chìi bɔ̂ŋ kə́ gwònə, tə bɛ nə ŋkwu-bʉə-bə.

5 Bɔŋ mbʉ wontəŋ ghɔ̀ŋ tʉ mbʉ bəke mbɔ, "Kə bii mə leʼ fàa fɛ, bʉʼka mɔ nɔ kínə mbɔ bii nɔ tʉʼ kʉ́ʉ Jiso ndə bə kə kwɛ̀ŋ ɔŋ yí le. 6 Ɔ kaa fɛ̄ŋ fɛ, ɔ nɔʼ bʉ̀nə kóʼ haʼ ndə ɔ kə gìe, b̈ii gwè nyíɛ yəŋkə ndə ɔ kə nʉ̀ʉ chɔ. 7 Ndʉʉmɛ, b̈ii bʉ̀nə gɛ̀ nəndʉʉnəndʉʉ gɛ̀ shyíi vâafɔʼɔ-bi mbɔ ɔ la nɔʼ bʉ̀nə kóʼ ndə ɔ kə kwú le. B̈ii nyíɛ! Ɔ tʉʼ gɛ̀ hə bəshʉ bii mu Galili, bii bu nyíɛ ɔŋ chɔ. B̈ii kə́ kwɛ́nə mbɔ mɔ nɔʼ shyíi bii." 8 Ndʉʉmɛ, bɔ̂ŋ lɔ̀ nəndʉʉ hə mbʉ chu-sě nə faa-kwu-kə ghɔŋbə tʉʉjyu shʉ́əshʉ́ə, nyʉ́ʉ gɛ̀ ndə məshyíi vâafɔʼɔ-bi. 9 Kə kwɔnə nyíɛ, Jiso bìatə bɔŋ ghɔ̀ŋ mbɔ, "M̈ɔ gìe tʉ bii." Bɔ̂ŋ kwɛ̀ʼtə gwè mbʉə ɔ, yá wubə-i, lə̀ʼtə ɔŋ. 10 Ndʉʉmɛ, Jiso ghɔ̀ŋ tʉ bɔŋ mbɔ, "Kə bii mə leʼ fàa fɛ, b̈ii gɛ̀, shyíi bəliŋ-bɔŋ mbɔ b̈ɔŋ gɛ̀ Galili, bɔ̂ŋ bu nyíɛ mɔ chɔ."

11 Ndə bɔŋ kə́ gɛ̀, kə́ nyíɛ, bəbɛʼbə mbʉ bʉə ndə bɔ̂ŋ kə́ chyìi mbʉ sě gɛ̀ mu kəyəŋkwɛʼtəŋ, gɛ̀ shyíi bətiefɛ̀ʼndɛŋNyii nə nubə inchəŋ ndə i nɔʼ fyú. 12 Mbʉ bətiefɛ̀ʼndɛŋNyii kʉ̂ʉ chə̀ŋtə ghɔŋbə bəntəŋbəshʉ, shyʉ̀ʉ gyʉʉ, kɔ́ kyʉə yɔ́ŋyɔ́ŋ tʉ mbʉ bəsɔge 13 gìe tʉ bɔŋ mbɔ, "B̈ii kə́ gìe tʉ bʉə mbɔ, ‘Vâafɔʼɔ-bi nɔ gwè ndʉʉbətyuʼ gwè lʉ́ʼ ɔ, baʼa kə́ bɛ́ŋbɛ́ŋ.’ 14 Kaʼ yɔ̄ŋ-yə dàa kətyunə-mbʉ-gɔməna baʼa lóʼtə ɔŋ, fyúhə tʉkə-ii chɔ." 15 Ndʉʉmɛ, bɔ̂ŋ fí mbʉ kyʉə fɔʼɔ haʼ ndə bə kə gìe tʉ bɔŋ. Nɔ bɛ ŋgiekə nɔ ndə i wɔ̀ʼnə mu bʉə-Juu tə gwè dàa laa.

16 Mbʉ vâafɔʼɔ njuɔ mɔʼ nə wuŋ lɔ̀ gɛ̀ Galili, kóʼ gɛ̀ ndəŋ kwɔŋ ndə Jiso kə gìe tʉ bɔŋ mbɔ b̈ɔ̂ŋ gɛ̀ chɔ. 17 Ndʉʉ ndə bɔ̂ŋ nyíɛ ɔŋ, bɔ̂ŋ lə̀ʼtə ɔŋ, bɔŋ bəbɛʼbə jínə.

18 Bɔŋ Jiso gwè, gìe tʉ bɔŋ mbɔ, "Nyii nɔʼ kɔ́ ghʉəʼkə tʉ mɔ inchəŋ ndə məsɔ́ʼ yuo ghɔŋbə chisêkə. 19 B̈ii gɛ̀ ndʉʉghɔfii, chìi vâafɔʼɔ-bɔŋ mu lɔʼ-bətə̂ŋ-tə inchəŋ, kɔ́ muu tʉ bɔŋ yie-mbʉ-Tie, yie-mbʉ-Vaa leʼnə yie-mbʉ-kəLyʉʉhəNyii, 20 kə́ dàhə bɔŋ ndə mətʉ́ʼ nubə inchəŋ ndə mɔ nɔʼ kàhə bii nə yɔŋ. B̈ii yʉ́, mɔ bu kə́ bɛ bʉʼʉ mɔʼɔ, tʉ wʉʉnəmbikə yi liʼ."