Jɔŋ 16

1 "Mɔ nɔʼ kwə́ʼ nubə-ɔ̄ŋ tʉ bii, ndə məyá bii tʉ́ʼ, mbɔ kə bii mə fɔ̀ʼ ŋwɔŋ-yii fyúhə ndə məmɔʼfyiihə-ii ndəŋ mɔ fɛ.

2 "Bə bu jə̀ŋ bii fyúhə mu-njaagháaNyii-hə. Bɔŋ ndʉʉ tʉʼ gwè ndə wotəmiyɔŋ ndə ɔ bu kə́ yítə bii, bu kwɔ̀ʼtə mbɔ ɔ la tʉʼ fɔ̀ʼ bə tʉ Nyii. 3 Bɔ̂ŋ bu kə́ chìi nubə-ɔ̄ŋ bʉʼka bɔ̂ŋ kínə mbʉ Tie fɛ, təkɔmə mɔ. 4 Bɔŋ mɔ nɔʼ kə shyíi bii nə nubə-ɔ̄ŋ mbɔ ndʉʉ-yʉə kʉ̂ʉ kə kʉ̀ʼnə nɔ, bii kwɛ́nə mbɔ mɔ nɔʼ kə shyíi bii nə yɔŋ. Mɔ kə shyíi bii nə nubə-ɔ̄ŋ lʉ̀ hə ndəŋ nchʉʉhə fɛ, bʉʼka bʉʼʉ nɔ nə bɛ mɔʼɔ.

Fɔʼɔ-kəLyʉʉhəNyii

5 "Bɔŋ nduɔ mɔ nɔ bɛ ndə məgɛ̀ nyíɛ wo ndə ɔ kə tə́ŋ mɔ təmə wo hə mu bii bíʼtə tʉ mɔ mbɔ, ‘A tʉʼ gɛ̀ fa?’ fɛ. 6 Bɔŋ nduɔ ndə mɔ gìe nubə-ɔ̄ŋ tʉ bii, i nɔʼ bə́ʼtə bii daa. 7 Bɔŋ ndə nɔ, mɔ kɛŋ shyíi bii nə shʉəŋ mbɔ məgɛ-ɔ nɔ bɛ ndə bʉʉ-yii, bʉʼka kaʼ mɔ gòʼ təmə gɛ̀ fɛ, mbʉ Wo Ghʉ́əhə Fyii gwè tʉ bii fɛ. Kaʼ mɔ bɔŋ bʉ̀nə gɛ̀, mɔ tə́ŋ ɔŋ tʉ bii. 8 Ndʉʉ ndə ɔ bu gwè nɔ, ɔ chìi wʉʉnəmbikə kínə mbɔ bɔ̂ŋ nɔ tʉʼ chìi bʉ̂ʼʉ, leʼ chìi bɔ̂ŋ kínə nukə ndə i bɛ ndyʉndyʉ leʼnə məchʉ̀ə ŋkwɛ ndə Nyii bu chʉ̀ə tʉ wʉʉnəmbikə, 9 te bʉ̂ʼʉ bʉʼka bɔ̂ŋ bɛ́ŋ mɔ fɛ, 10 te mə bɛ ndyʉndyʉ bʉʼka mɔ nɔ tʉʼ bʉ̀nə gɛ̀ tʉ mbʉ Tie, təmə bii bieleʼ nyíɛ mɔ fɛ, 11 te məchʉ̀ə ŋkwɛ bʉʼka wo ndə ɔ tʉʼ sɔ́ʼ wʉʉnəmbikə, bə nɔʼ chʉ̀ə ŋkwɛ-ɛ.

12 "Mɔ nɔ kie nubə buŋmbi ndə mə-bìʼ-shyíi bii chɔ, təmə bii bɔŋ məyá mu kətʉ-bii nduɔ fɛ. 13 Ndʉʉ ndə mbʉ kəLyʉʉhə shʉəŋ bu gwè nɔ, ɔ chìhə bii ndə məkínə mbʉ shʉəŋ inchəŋ ndə i gwè hə kəghɔ-Nyii, bʉʼka mbɔ ɔ tʉʼ kwə́ʼ nə yi-yə ghʉəʼkə fɛ, bɔŋ nukə təmiyɔŋ ndə ɔ̈ yʉ́, nɔ yɔŋ ndə ɔ bu kwə́ʼ, ɔ bu shyíi bii nə nubə ndə i bíe bəshʉ i buŋ yi gwè. 14 Ɔ bu kɔ́ kuŋhə tʉ mɔ, bʉʼka ɔ bu lʉ̀ nubə ndə bɛ yɔŋ-yə, núhə tʉ bii. 15 Nchəŋnchəŋ bəfɔ ndə mbʉ Tie kie nɔ bɛ yɔŋ-yə, nɔ chìi yɔŋ mɔ ghɔ̀ŋ mbɔ ɔ bu lʉ̀ nubə ndə i bɛ yɔŋ-yə, núhə tʉ bii.

Məvínə-yii bu bə̀ŋ tʉʉjyu

16 "Kʉʉkə məniʼ nɔ, təmə bii leʼ nyíɛ mɔ fɛ, bɔŋ-bu-leʼ bʉ̀nə bɛ kʉʉkə məniʼ nɔ, b̈ii nyíɛ mɔ."

17 Ndʉʉmɛ, vâafɔʼɔ-bi-bɛʼbə bíʼtə tʉ ŋwɔŋtə-ʉə mbɔ, "Yɔ̄ŋ-yə bɛ mbuka ndə ɔ tʉʼ gìe tʉ bʉʼʉ mbɔ, ‘Kʉʉkə məniʼ nɔ, təmə bii leʼ nyíɛ mɔ fɛ, bɔŋ-bu-leʼ bʉ̀nə bɛ kʉʉkə məniʼ nɔ, b̈ii nyíɛ mɔ,’ bɔŋleʼ ghɔ̀ŋ mbɔ, ‘Bʉʼka mɔ nɔ tʉʼ gɛ̀ tʉ mbʉ Tie’ mɛ?" 18 Nɔ, bɔ̂ŋ nɔ kə́ bíʼtə mbɔ, "I bɛ mbuka ndə məghɔ̀ŋ mbɔ, ‘Kʉʉkə məniʼ ’? Baʼa kínə nukə ndə ɔ tʉʼ gìe te yɔŋ fɛ." 19 Jiso nɔ nə kínə nukə ndə bɔ̂ŋ kə́ kʉ́ʉ bíʼtə tʉ ɔŋ, ndʉʉmɛ, ɔ ghɔ̀ŋ tʉ bɔŋ mbɔ, "Bɛ nukə nɔ ndə bii tʉʼ bíʼtə tʉ ŋwɔŋtə-ii mɛ, nukə ndə i bɛ ndə mɔ ghɔ̀ŋ mbɔ, ‘Kʉʉkə məniʼ nɔ, təmə bii leʼ nyíɛ mɔ fɛ, bɔŋ-bu-leʼ bʉ̀nə bɛ kʉʉkə məniʼ nɔ, b̈ii nyíɛ mɔ,’ mɛ? 20 M̈ɔ kɛŋ shyíi bii nə shʉəŋ, bii bu gwía bɔŋleʼ lí bɔŋ wʉʉnəmbikə kə́ kie tʉʉjyu. Bii bu vínə bɔŋ məvínə-yii bu bə̀ŋ tʉʉjyu. 21 Ndʉʉ ndə ỹɔʼ-Nyii-kə byùu woke nɔ, ɔ bɛ vínəvínə bʉʼka ndʉʉ-i nɔʼ gwè, bɔŋ ndʉʉ ndə ɔ bí nɔ, ɔ leʼ kwɛ́nə ŋgʉəʼ ndə ɔ kə tíŋ hə chɔ fɛ, bʉʼka tʉʉjyu mbɔ ɔ nɔ bí woməsʉʉ kəwʉʉnəmbi. 22 Nɔ bɛ haʼ nɔ, bii nɔ tʉʼ vínə nduɔ, mɔ bu yi bʉ̀nə nyíɛ bii nɔ, tʉʉtə-ii bʉ̀ʉ, təmə wo mə leʼ fí tʉʉjyu-yii kəghɔ-bii fɛ. 23 Kʉ̂ʉ yi bɛ yɔ̂ŋ-ghɔ̄ nɔ, təmə bii leʼ bíʼtə fɔkə bíʼtə tʉ mɔ fɛ. M̈ɔ kɛŋ shyíi bii nə shʉəŋ, fɔkə təmiyɔŋ ndə bii bíʼtə tʉ mbʉ Tie nə yie-ɔ, ɔ bu kɔ́ tʉ bii. 24 Tə gwè dàa nduɔ, bii chʉʼ bíʼtə fɔkə nə yie-ɔ fɛ. B̈ii bíʼtə, bii bu kie, tʉʉtə-i chʉʼ bʉ̀ʉ gɛ̀ kùu.

25 "Mɔ nɔʼ kə kwə́ʼ nubə-ɔ̄ŋ tʉ bii ndə fʉʼkənu. Ndʉʉ tʉʼ gwè ndə mɔ bu leʼ kə́ kwə́ʼ tʉ bii ndə fʉʼkənu fɛ, mɔ bɔŋ bu kə́ shyíi bii nə nubə te mbʉ Tie ntaa. 26 Kʉ̂ʉ yi bɛ yɔ̂ŋ-ghɔ̄ nɔ, bii bíʼtə nə yie-ɔ, mɔ tʉʼ ghɔ̀ŋ mbɔ mɔ bu bíʼtə tʉ mbʉ Tie yie-bii fɛ, 27 bʉʼka mbʉ Tie nə mbəŋ-ɛŋ nɔ kʉ̀ʉ bii, bʉʼka bii nɔʼ kə kʉ̀ʉ mɔ, bɛ́ŋ mɔ mbɔ mɔ la gwè hə bəshʉ-Nyii. 28 Mɔ nɔ nə gwè hə bəshʉ mbʉ Tie, nɔʼ gwè mu kəwʉʉnəmbi, bɔŋ nduɔ mɔ nɔ tʉʼ mɛ̀ʼtə wʉʉnəmbikə ndə məgɛ̀ tʉ mbʉ Tie."

29 Vâafɔʼɔ-bi ghɔ̀ŋ tʉ ɔŋ mbɔ, "Kəliʼ a nɔʼ kwə́ʼ nduɔ ntaa, təmə leʼ kə́ kwə́ʼ ndəŋ fʉʼkənu fɛ! 30 Baʼa nɔ kínə nduɔ mbɔ a nɔ kínə nubə inchəŋ təmə wo kie ndə məbíʼtə nukə tʉ a fɛ, nɔ chìi yɔŋ baʼa bɛ́ŋ mbɔ a nɔ gwè hə bəshʉ-Nyii." 31 Jiso bə̀ŋhə tʉ bɔŋ mbɔ, "Bii bɛ́ŋ nduɔ mɛ? 32 B̈ii nyíɛ, ndʉʉ tʉʼ gwè bɔŋ-nɔʼ-leʼ buŋ gwè, ndʉʉ ndə bə bu wɔ̀ʼhə bii nɔ, wo kə́ gɛ̀ chunjaa-ɔ mɛ̀ʼtə mɔ tətɛʼ mɔ. Təmə mɔ bɔŋ bu bɛ tətɛʼ mɔ fɛ, bʉʼka mbʉ Tie nɔ bɛ baʼa ɔ mɔ̀ʼɔ. 33 Mɔ nɔ gìe nubə-ɔ̄ŋ tʉ bii, mbɔ bii chʉʼ kie fyiighʉ́ənə tíŋ hə bɔ̌ŋ mə bɛ yʉʼʉ mɔʼɔ. Bə bu chɔ́ŋhə bii kəwʉʉnəmbi. B̈ii bɔŋ kie fyii, bʉʼka mbɔ mɔ nɔʼ ghɔ́ʼ wʉʉnəmbikə."