1 Ndʉʉ ndə Jiso kə́ tòʼ tíŋ, ɔ nyíɛ wobɛʼ ndə bə kə bí ɔ nə shʉ-i, i fʉ̀əŋtə. 2 Vâafɔʼɔ-bi bíʼtə tʉ ɔŋ mbɔ, "Chicha, kə chìi nda chìi bʉ̂ʼʉ, bɛ wo-ɔ̄ mɛ, kə bətie-bi ndə i chìi bə bí ɔ nə shʉ-i, i fʉ̀əŋtə?" 3 Jiso bə̀ŋhə mbɔ, "Kaa mbɔ wo-ɔ̄ chìi bʉ̂ʼʉ fɛ, təmə bətie-bi chìi bʉ̂ʼʉ fɛ, i nɔ bɛ nɔ mbɔ Nyii chʉʼ dʉ̀ʼ ghʉəʼkə-i, b̈ə nyíɛ mu məchimbi-i. 4 Bʉʼʉ nɔ kie ndə mə-yaʼ-fɔ̀ʼ fɔʼɔ mbəŋ-ɛŋ ndə ɔ tə́ŋ mɔ, mbi kə́ bíe ndʉʉnəchî, bʉʼka ndʉʉbətyuʼ tʉʼ gwè təmə wo mə leʼ fɔ̀ʼ fɔʼɔ fɛ. 5 Bɔŋ ndə mɔ leʼ bɛ mu kəwʉʉnəmbi, mɔ nɔ bɛ kɛʼɛ-kəwʉʉnəmbi." 6 Ɔ kʉ̂ʉ gìe nubə-ɔ̄ŋ inchəŋ lìʼ tyù ntɛmə sê, chìi chiabə nə ntɛmə-i. Ndʉʉmɛ, lʉ̀ mbʉ bəchia kùŋ shʉ mbʉ wo-ghɔ̄, 7 ghɔ̀ŋ tʉ ɔŋ mbɔ, "Gɛ̀, gɛ̀ sʉ̀ mu ghəŋ-Silɔŋ-kə" (ndə i bɛ mbɔ Ntəŋ). Ndʉʉmɛ, ɔ gɛ̀, sʉ̀, bʉ̀nə gwè kə́ nyíɛ yəŋkə.

8 Bʉə-kətoʼ-bi leʼnə bʉə ndə bɔ̂ŋ kə fəŋ nyíɛ ɔŋ kə́ bɛ wo-bəghaa, kə́ ghɔ̀ŋ mbɔ, "Kaa wo nɔ ndə ɔ kə́ dùʼ gháa fɔbə le fe?" 9 Bʉəbɛʼbə ghɔ̀ŋ mbɔ nɔ bɛ ɔ. Bəbɛʼbə ghɔ̀ŋ mbɔ, "Mbee, ɔ nɔ fínə ɔŋ fínə."

Bɔŋ ɔ kə́ lyʉ̀ʉ ghɔ̀ŋ mbɔ, "Mɔ nɔ bɛ mbʉ wo."

10 Ndʉʉmɛ, bɔ̂ŋ bíʼtə tʉ ɔŋ mbɔ, "A chìi təka nduɔ buŋ kə́ nyíɛ yəŋkə?"

11 Ɔ bə̀ŋhə mbɔ, "Wobɛʼ ndə bə kə́ tíi ɔ nə Jiso nɔ chìi chiabə kùŋ shʉmə-ɔŋ ghɔ̀ŋ mbɔ, ‘Gɛ̀ mu ghəŋ-Silɔŋ-kə gɛ̀ sʉ̀.’ Ndʉʉmɛ, mɔ gɛ̀, sʉ̀, chʉ́ʉhə kə́ nyíɛ yəŋkə."

12 Bɔ̂ŋ bíʼtə tʉ ɔŋ mbɔ, "Ɔ ba?"

Ɔ bə̀ŋhə mbɔ, "Mɔ kínə fɛ."

13 Bə gwè nə mbʉ wo-ghɔ̄ ndə shʉ-i nɔʼ kə fəŋ fʉ̀əŋtə le, tʉ bʉə-Falasi. 14 Nɔ kə bɛ ndəŋ Chîlɔʼkə ndə Jiso kə chìi mbʉ bəchia chɔ, ŋɔ́ʼhə shʉ wo-ghɔ̄ nə yɔŋ. 15 Mbʉ bʉə-Falasi bìʼ bíʼtə ntɛ ndə ɔ kə chìi buŋ bʉ̀nə nyíɛ yəŋkə. Ɔ ghɔ̀ŋ mbɔ, "Ɔ nɔ nə yóʼ chiabə shʉmə-ɔŋ, mɔ gɛ̀ sʉ̀, nyíɛ yəŋkə."

16 Bəbɛʼbʉə-Falasi ghɔ̀ŋ mbɔ, "Wo-ɔ̄ gwè hə bəshʉ-Nyii fɛ, bʉʼka ɔ tʉʼ tʉ́ʼ Chîlɔʼkə fɛ." Bɔŋ bəbɛʼbə ghɔ̀ŋ mbɔ, "Bəkɔ wo-bʉ̂ʼʉ chìi ntɛ nubəcheʼbə-ɔ̄ŋ təka?" Ŋkʉʉŋkʉʉ gwù mu bɔŋ.

17 Bɔ̂ŋ bʉ̀nə bìʼ gìe tʉ mbʉ fʉ̀əŋtəshʉ-ghɔ̄ mbɔ, "A kwɔ̀ʼtə mbuka te ɔ nduɔ ndə ɔ nɔʼ ŋɔ́ʼhə shʉ-a nɔ?" Ɔ bə̀ŋhə mbɔ, "Ɔ nɔ bɛ yʉkəŋgieNyii."

18 Təmə bʉə-Juu bɛ́ŋ mbɔ ɔ kə bɛ fʉ̀əŋtəshʉ buŋ bʉ̀nə kə́ nyíɛ yəŋkə fɛ, tə bɔ̂ŋ tíi bətie-mbʉ-wo-ghɔ̄ ndə ɔ nɔʼ bʉ̀nə nyíɛ yəŋkə le 19 bíʼtə tʉ bɔŋ mbɔ, "Bɛ vaa-yii nɔ, ndə bii ghɔ̀ŋ mbɔ bə bí ɔ, ɔ kə bɛ fʉ̀əŋtəshʉ le mɛ? Ɔ chìi təka buŋ kə́ nyíɛ yəŋkə nduɔ?" 20 Bətie-bi bə̀ŋhə mbɔ, "Baʼa nɔ kínə mbɔ nɔ bɛ vaa-yaʼ nɔ, kə kínə mbɔ bə nɔ kə́ bí ɔ, ɔ kə́ bɛ fʉ̀əŋtəshʉ. 21 Bɔŋ ntɛ ndə ɔ tʉʼ nyíɛ yəŋkə nduɔ baʼa kínə fɛ, təmə bɔŋ kínə wo ndə ɔ ŋɔ́ʼhə mbʉ shʉ fɛ. Bii bíʼtə tʉ ɔŋ, ɔ nɔ bɛ woghəŋ. Ɔ bu kwə́ʼ te ŋwɔŋ-ɛŋ." 22 Bətie-bi nɔ nə gìe nubə-ɔ̄ŋ bʉʼka bɔ̂ŋ nɔ kə́ fàa bəntəŋbəshʉ-bʉə-Juu, bʉʼka bɔ̂ŋ nɔʼ kə lìʼ mbɔ kaʼ wo ghɔ̀ŋ mbɔ Jiso bɛ mbʉ Wo ndə Nyii Kùŋ Tə́ŋ, bə jə̀ŋ ɔŋ fyúhə mu njaagháaNyii. 23 Nɔ bɛ luu-i nɔ ndə bətie-bi ghɔ̀ŋ mbɔ, "Ɔ nɔ bɛ woghəŋ, b̈ii bíʼtə tʉ ɔŋ."

24 Bɔ̂ŋ bìʼ tíi mbʉ wo-ghɔ̄ ndə shʉ-i nɔʼ kə fəŋ fʉ̀əŋtə le, ghɔ̀ŋ tʉ ɔŋ mbɔ, "Gìe shʉəŋ-aŋ kɔ́ kuŋhə tʉ Nyii. Baʼa nɔ kínə mbɔ wo-ɔ̄ nɔ bɛ wo-bʉ̂ʼʉ."

25 Ɔ bə̀ŋhə mbɔ, "Kə ɔ bɛ wo-bʉ̂ʼʉ təmə mɔ kínə fɛ. Mbyu kənu imɔʼ ndə mɔ kínə nɔ bɛ mbɔ mɔ nɔ nə bɛ fʉ̀əŋtəshʉ, bɔŋ nduɔ kə́ nyíɛ yəŋkə." 26 Ndʉʉmɛ, bɔ̂ŋ bíʼtə tʉ ɔŋ mbɔ, "Ɔ kə chìi ka nə naŋ? Ɔ kə ŋɔ́ʼhə shʉ-a ntɛ təka?" 27 Ɔ bə̀ŋhə tʉ bɔŋ mbɔ, "Mɔ nɔʼ kə shyíi bii təmə bii bɔŋ bɛ́ŋ ndə məyʉ́ fɛ. Bii tʉʼ kʉ́ʉ bìʼ yʉ́ bʉʼka ka? Bii tʉʼ kʉ́ʉ bɛ vâafɔʼɔ-bi ghɔ mɛ?" 28 Bɔ̂ŋ chɛ̀ŋtə ɔŋ, ghɔ̀ŋ mbɔ, "Nɔ bɛ a bɛ vaafɔ̀ʼ-ɛ, baʼa nɔ bɛ vâafɔʼɔ-Mushi. 29 Baʼa nɔ kínə mbɔ Nyii nɔʼ kə kwə́ʼ tʉ Mushi, bɔŋ wo-ɔ̄, baʼa kínə yəŋkə ndə ɔ lɔ̀ hə chɔ fɛ." 30 Mbʉ wo-ghɔ̄ bə̀ŋhə mbɔ, "Chìi ka! Yɔ̄ŋ-yə nɔ bɛ nu-ŋkwɔŋŋkwɔŋ-kə! Bii kínə yəŋkə ndə ɔ lɔ̀ hə chɔ fɛ, ɔ bɔŋ-nɔʼ-leʼ ŋɔ́ʼhə shʉ-ɔ. 31 Baʼa nɔ kínə mbɔ Nyii kyinə yʉ́ gwia-bʉə-bʉ̂ʼʉ fɛ, bɔŋ ɔ̃ nɔ yʉ́ wo ndə ɔ tʉʼ lə̀ʼtə ɔŋ, kə́ fɔ̀ʼ nukə ndə ɔ kʉ̀ʉ. 32 Wo chʉʼ nə yʉ́, lʉ̀ hə ndəŋ ŋgwunə-mbi mbɔ wobɛʼ ŋɔ́ʼhə shʉ-wo ndə bə bí ɔ, ɔ kə́ bɛ fʉ̀əŋtəshʉ fɛ. 33 Kaʼ wo-ɔ̄ kʉ̌ʉ gòʼ təmə gwè hə bəshʉ-Nyii fɛ, təmə ɔ mə chìi nubɛʼkə fɛ."

34 Bɔ̂ŋ bə̀ŋhə tʉ ɔŋ mbɔ, "Bə nɔ nə bí a mu fɔŋ təbʉ̂ʼ, a kə́ kʉ́ʉ kə́ dàhə baʼa mɛ?" Ndʉʉmɛ, bɔ̂ŋ tʉ́ʉhə ɔŋ, kɔ́ mbi.

35 Jiso yʉ́ mbɔ bə la nɔʼ tʉ́ʉhə ɔŋ mu njaagháaNyii kɔ́ mbi, ɔ kʉ̂ʉ nyíɛ ɔŋ, bíʼtə tʉ ɔŋ mbɔ, "A mɔ̀ʼfyii-a ndəŋ Vaa-Woməsʉʉ mɛ?" 36 Ɔ bə̀ŋhə mbɔ, "Ɔ buŋ bɛ nda, tie-ɔ, mɔ chʉʼ mɔ̀ʼfyii-ɔ ndəŋ ɔŋ?" 37 Jiso ghɔ̀ŋ tʉ ɔŋ mbɔ, "A nɔʼ nyíɛ ɔŋ, bɔŋ-kə́-leʼ bɛ ɔ ndə ɔ tʉʼ kwə́ʼ tʉ a nɔ." 38 Ɔ bə̀ŋhə mbɔ, "Tiekətʉ, mɔ bɛ́ŋ," bʉ́ʉnə sê lə̀ʼtə ɔŋ. 39 Jiso ghɔ̀ŋ mbɔ, "Məgwe-ɔ kəwʉʉnəmbi-fɛ̄ŋ nɔ tʉ́ʼ bʉə mu njaafɛ̀ʼ, mbɔ b̈ʉə ndə bɔ̂ŋ gòʼ təmə kə́ nyíɛ fɛ kə́ nyíɛ, bʉə ndə bɔŋ-tʉʼ-leʼ nyíɛ, s̈hʉtə-ʉə fʉ̀əŋtə." 40 Bʉə-Falasibɛʼbə ndə bɔ̂ŋ kə bɛ mbʉə ɔ, yʉ́ nubə-ɔ̄ŋ, gìe tʉ ɔŋ mbɔ, "Baʼa bɛ haʼ bəfʉ̀əŋtəshʉ ghɔ mɛ?" 41 Jiso ghɔ̀ŋ tʉ bɔŋ mbɔ, "Kaʼ shʉtə-ii kʉ̌ʉ bɛ ifʉ̀əŋtə, təmə bii mə gwù njɔ bʉ̂ʼʉ fɛ, bɔŋ nduɔ ndə bii ghɔ̀ŋ mbɔ, ‘Baʼa nɔ tʉʼ nyíɛ nɔ,’ bʉ̂ʼtə-ii nɔ káa ndəŋ bii."