Lucas 15

Mbyu binjyʉʉ bɛ́nə

1 Bʉə fí tashi ghɔŋbə bʉə-bʉ̂ʼʉ kə́ kə́nə mbʉə-Jiso ndə məyʉ́ nukə ndə ɔ bu gìe. 2 Bʉə-Falasi ghɔŋbə bʉə dàhə nuʼ-Mushi kə́ luŋtə ghɔ̀ŋ mbɔ, "Wo-ɔ̄ tʉʼ fí bʉə-bʉ̂ʼʉ, kə́ yú fɔbə ghɔŋ bɔŋ."

3 Ndʉʉghɔfii, Jiso mɔ̀ʼ chəŋkə-ɔ̄ŋ tʉ bɔŋ mbɔ, 4 "Kaʼ a kie binjyʉʉhə ghyʉʉ mbyu imɔʼ fɔ̀ʼ ŋwɔŋ-ɛŋ mu bɔŋ gɛ̀ bɛ́, a bu mɛ̀ʼtə bəʼ-njuɔ-bɔmɔʼ-nə-wuŋ-bɔmɔʼ-kə muŋkɔ, gɛ̀ hə bɔ̌ŋ mbyu imɔʼ-ɛ tə i gɛ̀ nyíɛ ɔŋ fe? 5 Ndʉʉghɔfii, a bu bɛ̀ʼ mbəʼhə-a nə tʉʉjyu gɛ̀ nə yɔŋ chunjaa. 6 A kʉ̂ʉ dàa chunjaa nɔ, chə̀ŋ bətieŋkɔŋ-ba ghɔŋbə bʉə-kətoʼ-ba, bii bɔŋ nʉ́ətə bʉʼka mbɔ a nɔʼ nyíɛ binjyʉʉ-a ndə ɔ kə bɛ́ le. 7 Nɔ bɛ haʼ nɔ ndə tʉʉjyu bu bɛ yuo daa, kaʼ mbyu wo-bʉ̂ʼʉ imɔʼ shìe liɛŋ-ɛŋ bʉ̀nə tʉ Nyii, tə chàa ndə i bɛ tʉ bʉə njuɔ bɔmɔʼ nə wuŋ bɔmɔʼ ndə bɔ̂ŋ bɛ bʉə-kəŋgie-shʉəŋ təmə nɔʼ fɔ̀ʼ ŋwɔŋ-yʉə ndəŋ fia-Nyii fɛ.

Kyʉə bɛ́nə

8 "Byuunɔ, kaʼ woke kie mbyu-kyʉə-hə wuŋ, mbyu imɔʼ bɛ́, ɔ chúʼ kɛʼɛ kʉ́ʉ tɔʼ-byûu-hə inchəŋ yʉ̀əʼ mu njaa tə yi nyíɛ fe? 9 Ndʉʉ ndə ɔ nyíɛ, ɔ bu tíi bəwoke-bi ghɔŋbə bʉə-kətoʼ-bi, ghɔ̀ŋ tʉ bɔŋ mbɔ, ‘B̈ii gwè b̈ʉʼʉ nʉ́ətə, bʉʼka mbɔ mɔ nɔʼ nyíɛ mbʉ kyʉə ndə i kə bɛ́ le.’ 10 Tʉʉjyu nɔ bɛ haʼ nɔ bəshʉ bʉəntəŋNyii ndʉʉ ndə mbyu wo shìe liɛŋ ndəŋ bʉ̂ʼʉ-e."

Vaa bɛ́nə

11 Jiso bìʼ gɛ̀ nə shʉbə ghɔ̀ŋ mbɔ, "Wobɛʼ nɔ nə kie vâabələŋ-bi bəbûu. 12 Vaa bɔ̌ŋ gìe tʉ tie-e mbɔ, ‘Baba, kɔ́ yɔŋ-yə via-bəfɔ-kə-a nduɔ.’ Ndʉʉmɛ, tie-yʉə gyʉ̀əhə fɔbə-bi kətʉ-bɔŋ bəbûu.

13 "Mbyu-bəchî-hə tíŋ məniʼ, vaa-bɔ̌ŋ-ɛ̄ŋ fɛ̀ŋ yi-via-bəfɔ-kə, lʉ̀ kyʉə-ɛ gɛ̀ lɔʼɔ kətə̂ŋbɛʼ dɔdɔ, gɛ̀ yú bʉ́əhə nə mbunə. 14 Ndʉʉ ndə mbʉ kyʉə mì, chyʉʉ gwù lɔʼɔ-ghɔ̄, ɔ chʉ́ʉhə mədùʼ nə jyʉʉ. 15 Ɔ gɛ̀ kʉ́ʉ fɔ̀ʼ kəghɔ-wobɛʼ, ɔ lʉ̀ ɔ ndəŋ vaafɔ̀ʼ-ɛ, kɔ́ ɔ, ɔ gɛ̀ kə́ yúʼ bəŋkwunyaa-bi, 16 təmə wo kə́ kɔ́ fɔkə tʉ ɔŋ fɛ. Jyʉʉ kɛŋ yɔ́ʼ vaa-ghɔ̄, tə ɔ kə́ fìnə fɔ-bəŋkwunyaa-bə nɔ, i kə́ lòʼnə ɔŋ ndə məyú. 17 Ɔ ghɔ̀ŋ tʉ ŋwɔŋ-ɛŋ mbɔ, ‘Nyíɛ! Mɔ dùʼ nɔ fɛ̄ŋ kə́ kwú jyʉʉ, vâafɔʼɔ tie-ɔ bənchəŋ kie fɔyubə tə kə́ byúu nu-chìi-kə nə yɔŋ. 18 Mɔ bu lɔ̀ hə sê bʉ̀nə gɛ̀ tʉ tie-ɔ ghɔ̀ŋ tʉ ɔŋ mbɔ, "Tie-ɔ, mɔ nɔʼ chìi bʉ̂ʼʉ tʉ Nyii ghɔŋbə mbəŋ-aŋ, 19 mɔ leʼ kʉ̀ʼnə ndə məbɛ vaa-a fɛ. Tie-ɔ, lʉ̀ mɔ ndə vaafɔ̀ʼ-a." ’

20 "Ndʉʉmɛ, ɔ lɔ̀ hə sê bʉ̀nə gɛ̀ nyíɛ tie-e, ɔ kʉ̂ʉ gɛ̀ tə dʉ̀ʼ tʉkə-i dɔdɔ, tie-e dùhə nyíɛ ndə ɔ tʉʼ gwè, ɔ kie tʉvyiikə nyʉ́ʉ gɛ̀ yá ɔ, bɔ́nə shyìitə ɔŋ. 21 Mbʉ vaa-ɛ gìe tʉ ɔŋ mbɔ, ‘Tie-ɔ, mɔ nɔʼ chìi bʉ̂ʼʉ tʉ Nyii ghɔŋbə mbəŋ-aŋ, mɔ leʼ kʉ̀ʼnə ndə məbɛ vaa-a fɛ.’

22 "Tie-e bʉ̀nə leʼ ghɔŋbə tʉ vâafɔʼɔ-bi mbɔ, ‘B̈ii chʉʼ gɛ̀ kɛŋ gwè nə yʉʼ ndyi mu njaa gwè mɔ̀ʼ mbʉə-ɔ, bɔŋleʼ gwè nə vaafyîi kɔ́ kəghɔ-ɔ leʼnə takwubə kɔ́ kəwu-ɔ. 23 Bɔŋleʼ yí yʉʼ vaa-naʼ yɔ́ʼhə. Bʉʼʉ bu yaʼ yú məgwe-e. 24 Bʉʼka mbɔ, vaa-ɔŋ-yɔ̄ŋ nɔʼ kə kwú bɔŋ nɔʼ bʉ̀nə kóʼ, ɔ nɔʼ kə bɛ́ bə bɔŋ nyíɛ ɔŋ.’ Ndʉʉghɔfii, bɔ̂ŋ chʉ́ʉhə məyú.

25 "Ndə bə tʉʼ fʉ̀ʼ le, fəŋ vaa-ɛ kə́ bɛ mutɔ fɔ̀ʼ fɔʼɔ. Ɔ kʉ̂ʉ bʉ̀nə tə kə́ kə́ŋhə chunjaa yʉ́ lyuukə ghɔŋbə ŋkʉʉkə. 26 Ɔ bíʼtə tʉ ibɛʼ-yə vaafɔ̀ʼ nə nukə ndə i bɛ sê. 27 Ɔ ghɔ̀ŋ tʉ ɔŋ mbɔ, ‘Liŋ-aŋ nɔʼ bʉ̀nə, tie-a yí yʉʼ vaa-naʼ yɔ́ʼhə kɔ́, bɔ̂ŋ kə́ yú ndə ɔ bʉ̀nə tʉ ɔŋ shʉ́əshʉ́ə.’

28 "Tʉʉ-i byʉ́ʼ, ɔ tɛ́ŋ məsʉ́ʉ mu njaa. Tie-e fyú mbi fʉ̀ʉtə ɔŋ. 29 Mbʉ fəŋ vaa bə̀ŋhə tʉ tie-e mbɔ, ‘Ndəŋ ŋgʉʼhə-ɔ̄ŋ inchəŋ, mɔ nɔʼ fɔ̀ʼ tʉ a shʉ́əshʉ́ə təmə nɔʼ nə chɔ́ʼ chu-a ndəŋ mbyu kənu imɔʼ fɛ. Ndəŋ ŋgʉʼhə-ɔ̄ŋ inchəŋ təmə a nɔʼ nə kɔ́ vaabi tʉ mɔ mbɔ baʼa bətieŋkɔŋ-bɔŋ leʼ yú chîmbikə chɔ fɛ. 30 Bɔŋ vaa-a-yɔ̄ŋ kʉ̂ʉ bʉ̀nə nɔʼ gɔ̀ kyʉə-a nə mbunə ghɔŋbə bəsɔkʉʉ, a yí yʉʼ vaa-naʼ yɔ́ʼhə-īŋ ndə mənʉ́ətə məbʉnə-i chɔ.’ 31 Tie-e bə̀ŋhə mbɔ, ‘Nyíɛ, ŋaʼ! Bâʼa nɔ bɛ mɔʼɔ, fɔbə-ɔŋ nchəŋnchəŋ-ɛŋ nɔ bɛ ya-yə. 32 Bɔŋ bâʼa nɔ kie ndə mə-yaʼ-yú chîmbikə-ɔ̄ŋ laa, liŋ-aŋ-yɔ̄ŋ nɔʼ kə kwú bɔŋ bʉ̀nə kóʼ! Ɔ nɔʼ kə bɛ́ bə bɔŋ nɔʼ nyíɛ ɔŋ nduɔ.’ "