1 Chîbə kə́ kʉ̀ʼnə gwè ndə bʉə-Juu yú Nchəŋtə ndə bə Kwó Bele təmə yî chɔ fɛ, bə kə́ tíi nə Yíɛʼsii. 2 Bətiefɛ̀ʼndɛŋNyii ghɔŋbə bʉə dàhə nuʼ-Mushi, nɔ kə́ kʉ́ʉ fia ndə məyí Jiso bɔ̌ŋbɔ̌ŋ bʉʼka bɔ̂ŋ kə́ fàa bʉə-bi.

3 Juda Iskalo, mbyu vaafɔ̀ʼ-Jiso mu vâafɔʼɔ-bi njuɔ bûu nə wuŋ, ké ŋwɔŋ-ɛŋ tʉ Sata, ɔ bʉ́ʉhə ɔŋ. 4 Ɔ gɛ̀ nyíɛ bətiefɛ̀ʼndɛŋNyii ghɔŋbə bʉəkwɛʼtəŋ bənchyii-mu-njaafɛ̀ʼndɛŋNyii, ndə məshʉ̀tə ghɔŋ bɔŋ nə yʉʼ fia ndə bəkɔ ɔ fɛ̀ŋ Jiso tʉ bɔŋ. 5 Tʉʉ-yʉə bʉ̀ʉ, bɔ̂ŋ kɔ̀ʼnə ndə məlɔ̀ʼ ɔ. 6 Ndʉʉghɔfii, ɔ bɛ́ŋ chʉ́ʉhə məkʉ́ʉ fia ndə məchɔ̀ʼhə Jiso kɔ́ tʉ bɔŋ, mbɔ bɔ̂ŋ chʉʼ yá ɔ bɔ̌ŋbɔ̌ŋ təmə bʉə buŋmbi chɔ fɛ.

7 Nduɔ, mbʉ bəchî nchəŋtə-ghɔ̄ kʉ̀ʼnə, Nchəŋtə ndə bə Kwó Bele təmə yî chɔ fɛ le, bɔŋleʼ kə́ bɛ chîkə ndə bə kie ndə məsíi vaabinjyʉʉ ndə məyú Yíɛʼsii nə yɔŋ. 8 Jiso tə́ŋ Bita ghɔŋ Jɔŋ bəshʉ, gìe tʉ bɔŋ mbɔ, "B̈ii gɛ̀ shʉ̀tə fɔ-Yíɛʼsii-bə, bʉʼʉ chʉʼ yú ndə məkwɛ́nə chî-Yíɛʼsii-kə."

9 Bɔ̂ŋ bíʼtə mbɔ, "A tʉʼ kʉ́ʉ mbɔ b̈aʼa gɛ̀ shʉ̀tə fa?"

10 Ɔ bə̀ŋhə mbɔ, "B̈ii yʉ́, ndə bii tʉʼ ŋíi mu Jɛlosalɛŋ, woləŋbɛʼ bu bìatə bii ndə ɔ bɛ̀ʼ təŋ-muu-kə, b̈ii gɛ̀ hə bɔ̌ŋ ɔŋ gɛ̀ ŋíi mu njaa ndə ɔ bu sʉ́ʉ chɔ. 11 B̈ii bɔŋleʼ gìe tʉ mbʉ ŋwɔ̌ŋ-njaa mbɔ, ‘Chicha nɔ tʉʼ bíʼtə tʉ a mbɔ, "Njəŋ-njaa-bʉə-mətòʼ ba, ndə bəkɔ mɔ yú fɔ-Yíɛʼsii-bə chɔ baʼabə vâafɔʼɔ-bɔŋ?" ’ 12 Ɔ bu dʉ̀ʼ njəŋ-njaakwɛʼtəŋ tʉ bii kweghɔʼ ndə bə nɔʼ shʉ̀tə mu-i, b̈ii shʉ̀tə chɔ tʉ bʉʼʉ".

13 Bɔ̂ŋ gɛ̀ mu mbʉ kəyəŋkwɛʼtəŋ-ghɔ̄, gɛ̀ nyíɛ nubə kɛŋ haʼ ndə Jiso kə shyíi bɔŋ. Bɔ̂ŋ shʉ̀tə mbʉ bəfɔ Yíɛʼsii chɔ.

14 Mbʉ ndʉʉ kʉ̂ʉ kʉ̀ʼnə, Jiso ghɔŋbə mbʉ bəlɔntəŋ-bi njuɔ bûu nə wuŋ chə̀ŋtə dùʼ mbʉə tebele. 15 Jiso ghɔ̀ŋ tʉ bɔŋ mbɔ, "Mɔ nɔ kɛŋ kə́ mʉ̀ʉ nə fyii-ɔ inchəŋ mbɔ bʉʼʉ bu chə̀ŋtə, yú nchəŋtə Yíɛʼsii, ŋgʉəʼ-ɔ buŋ chʉ́ʉhə. 16 Mɔ nɔ tʉʼ kʉ́ʉ shyíi bii nduɔ mbɔ, mɔ bieleʼ nə yú Yíɛʼsii fɛ, tʉ nukə ndə Yíɛʼsii bɛ yɔŋ nə fyú shʉəŋ ndʉʉ ndə Nyii bu kə́ sɔ́ʼ fɔŋ."

17 Ndʉʉghɔfii, ɔ lʉ̀ ndʉ̂ʉ-məndʉʼ kɔ́ ndɔ tʉ Nyii chɔ ghɔ̀ŋ mbɔ, "B̈ii kɔ́ yɔ̄ŋ-yə, gyʉ̀ətə mu bii. 18 M̈ɔ shyíi bii mbɔ mɔ bieleʼ nə nú ndʉʼmə-ɔ̄ŋ fɛ, tə Nyii nə sɔ́ʼ bʉə-bi nə fɔŋ."

19 Ɔ lʉ̀ bele, kʉ̂ʉ kɔ́ ndɔ tʉ Nyii chɔ, bə́ʼtə kɔ́ tʉ bɔŋ ghɔ̀ŋ mbɔ, "Nɔ bɛ mbɔʼ mbʉə-ɔ nɔ ndə mɔ fɛ̀ʼndɛŋ chɔ yie-bii. B̈ii kə́ chìi yɔ̄ŋ-yə ndə məkwɛ́nə mɔ." 20 Ndʉʉ ndə b̈ɔ̂ŋ yú fɔ-ndʉʉbuumbi-bə liʼ, Jiso lʉ̀ ibɛʼ-yə ndʉ̂ʉ-məndʉʼ ghɔ̀ŋ mbɔ, "Ndʉʼmə-ɔ̄ŋ nɔ bɛ ŋkaa-fefe-mə ndə bə kɔ́ʼ nə fɔbʉəkə-ɔŋ ndə mɔ tyù bʉʼka bii.

21 "B̈ii nyíɛ! Bɔŋ wo ndə ɔ bu fɛ̀ŋ mɔ tʉ bʉə-bàa-bɔŋ nɔ tʉʼ yú baʼa ɔ ndəŋ tebele-fɛ̄ŋ. 22 Vaa-Woməsʉʉ nɔ kie məkwú bʉʼka Nyii nɔʼ kə shʉ̀tə nɔ, bɔŋ ŋgʉəʼ kətʉ wo ndə ɔ bu fɛ̀ŋ ɔŋ!"

23 Mbʉ vâafɔʼɔ-bi chʉ́ʉhə kə́ bíʼtə tʉ ŋwɔŋtə-ʉə nə wo ndə bəkɔ ɔ chìi ntɛ-kənu-ɔ̄ŋ mu bɔŋ.

24 Ndə bɔ̂ŋ tʉʼ kwə́ʼ gɛ̀ le, bəŋʉʉ chʉ́ʉhə mu bɔŋ te wo ndə ɔ bu bɛ fɔŋ wokwɛʼtəŋ. 25 Jiso shyíi bɔŋ mbɔ, "B̃əfɔŋ-kəwʉʉnəmbi-bɔ̄ŋ nɔ sɔ́ʼ bʉə-bʉə nə kwɛ̀ŋhə. Bɔŋ mbʉ bəfɔŋ-kəwʉʉnəmbi kə́ leʼ kʉ́ʉ mbɔ b̈ə kə́ tíi bɔŋ nə bʉə-buuŋjyu. 26 Bii bɔŋ kie ndə məbɛ nɔ fɛ, wokwɛʼtəŋ mu bii nɔ kie ndə məlʉ̀ ŋwɔŋ-ɛŋ nə vaambuɔ, wo ndə ɔ tʉʼ sɔ́ʼ bii, kie ndə məlʉ̀ ŋwɔŋ-ɛŋ nə vaafɔ̀ʼ. 27 Ndə ŋkɛŋ kənu, t̃iefɔʼ nɔ dùʼ ndəŋ tebele, vâafɔʼɔ mɔ̀ʼ fɔbə kɔ́ tʉ ɔŋ. Ndə nɔ, bʉʼʉ nɔ bɛ fɛ̄ŋ, mɔ kə́ bɛ ndə vaafɔ̀ʼ mu bii.

28 "Nɔ bɛ bii, ndə bii kə káa mbʉə mɔ lʉ̀ hə ndʉʉ ndə mɔ kə́ nyíɛ ŋgʉəʼ 29 haʼ ndə Nyii nɔʼ kə kɔ́ ghʉəʼkə tʉ mɔ ndə məbɛ fɔŋ, mbəŋ-ɔŋ nɔ tʉʼ kɔ́ ghʉəʼkə tʉ bii, 30 mbɔ bʉʼʉ yi kə́ yú mɔʼɔ vɛʼ ndə mɔ bu yi bɛ fɔŋ. Mɔ nɔ chìi yɔ̄ŋ-yə mbɔ bii bu dùʼtə ghɔ ndəŋ yetəbə, kə́ sɔ́ʼ lɔŋ-Isilɛ-bə njuɔ bûu nə wuŋ."

31 Jiso tíi Bita mbɔ, "Samu, Samu! Sata nɔʼ gháa fia ndə məyúotə bii, kwètə bii ndə bə kwètə baakə le. 32 Mɔ bɔŋ nɔʼ gháaNyii yie-a mbɔ məmɔʼfyii-a ndəŋ Nyii mə gwù fɛ. A kʉ̂ʉ bʉ̀nə lɔ̀ gwè tʉ mɔ nɔ, kwáa bəliŋ-ba, kɔ́ ghʉəʼkə tʉ bɔŋ."

33 Bita bə̀ŋhə tʉ bɔŋ mbɔ, "Tiekətʉ, mɔ nɔʼ shʉ̀tə ŋwɔŋ-ɔŋ ndə məgɛ̀ njaa-chaŋ baʼa a, tə buŋ kwú baʼa a!"

34 Jiso bə̀ŋhə mbɔ, "Bita, nɔʼ m̈ɔ shyíi a, ŋkʉəʼə bu yi kə tʉ́ʉ laa nɔ, tʉ a nɔʼ kɔ́tuu a vɛʼ tia mbɔ a la kínə mɔ fɛ."

35 Jiso bíʼtə mbɔ, "Mɔ kə tə́ŋ bii ndə məgɛ̀ kwə́ʼ ŋgieNyiikə təmə kwo-kyʉə fɛ, təmə kwo fɛ, təmə takwubə fɛ le, tʉ bii kia byúu ka?"

Bɔ̂ŋ bə̀ŋhə mbɔ, "Fɔkə fɛ."

36 Jiso ghɔ̀ŋ tʉ bɔŋ mbɔ, "Bɔŋ nduɔ kaʼ bii kie kyʉə, b̈ii lʉ̀, lʉ̀ bəkwo-bii, kaʼ bii gòʼ təmə kie setəkə fɛ, b̈ii fɛ̀ŋ ndyi-fəʼə-hə-ii, nyúɔ chɔ. 37 Bʉʼka mbɔ ndʉʉ nɔʼ kʉ̀ʼnə ndə nukə ndə bə nə nyɔ̀ʼ mu ŋwɔʼnə-Nyii te mɔ bu fyú shʉəŋ, bə ghɔ̀ŋ mbɔ, ‘Bə nɔ súu ɔ mu bʉə-bʉ̂ʼʉ.’ Ɔŋ! Nukə-ɔ̄ŋ bu fyú shʉəŋ."

38 Bɔ̂ŋ tíi ɔ mbɔ, "Tie-yaʼ, baʼa nɔ kie setəbə ibûu!"

Ɔ ghɔ̀ŋ mbɔ, "I nɔʼ kʉ̀ʼnə."

39 Jiso shíʼ nduɔ kóʼ gɛ̀ ndəŋ Kwɔŋ-bəTyʉ-Oli, haʼ ndə ɔ̃ chìi nɔ təvɛʼtəvɛʼ, vâafɔʼɔ-bi kə́ gɛ̀ hə bɔ̌ŋ ɔŋ. 40 Ndə bɔ̂ŋ bɛ ndəŋ ghɔ, ɔ gìe tʉ bɔŋ mbɔ, "B̈ii gháaNyii bʉʼka bii mə yi gwù mu nubə ndə i mùutə wo mbɔ ɔ̈ gwù mu bʉʼʉ."

41 Ɔ kwɛ̀ʼtə mbʉə bɔŋ tə kɔ́ kʉʉkə, kwíʼtə sê, kə́ gháaNyii, 42 ghɔ̀ŋ mbɔ, "Tie-ɔ, kaʼ tʉʉ-a kʉ̀ʉ, ä fí ndʉ̂ʉ ŋgʉəʼ-ɔ̄ hə kəghɔ-mɔ. Mɔ bɔŋ bu fɔ̀ʼ yi ndə tʉʉ-a kʉ̀ʉ, kaa ŋkʉʉnə-tʉʉ-ɔ fɛ." 43 Ndʉʉghɔfii, wontəŋNyii gwè hə yuo, gwè kɔ́ ghʉəʼkə tʉ ɔŋ. 44 Ŋgʉəʼ kɛŋ dìenə mbʉə-Jiso, ɔ bìʼ gháaNyii shʉ́əshʉ́ə tə lyʉʼnə-i kə́ chə́ŋtə sê nə ŋwia-kəfɔbʉə-mə.

45 Ndʉʉ ndə ɔ lɔ̀ hə ndə məgháaNyii, ɔ bʉ̀nə gɛ̀ nyíɛ vâafɔʼɔ-bi, kə gɛ̀ nyíɛ bɔŋ, bɔ̂ŋ kə́ bɛ́ŋbɛ́ŋ, nɔʼ káa bʉʼka bɛʼkə ndə i dìenə liɛŋ-bɔŋ. 46 Jiso bíʼtə tʉ bɔŋ mbɔ, "Bii tʉʼ bɛ́ŋ ka? B̈ii lɔ̀ hə sê kə́ gháaNyii bʉʼka bii mə yi gwù mu nubə ndə i mùutə wo mbɔ ɔ̈ gwù mu bʉʼʉ."

47 Ndə ɔ kə́ bíe kwə́ʼ, nuɔ-bʉə fyú tʉ ɔŋ, wo ndə bə kə́ tíi ɔ nə Juda mu vâafɔʼɔ-bi njuɔ bûu nə wuŋ, tə́nə bəshʉ kə́ dʉ̀ʼ fia tʉ bɔŋ. Ɔ kwɛ̀ʼtə gwè mbʉə-Jiso ndə məbɔ́nə ɔŋ gìe tʉ ɔŋ. 48 Jiso bíʼtə tʉ ɔŋ mbɔ, "Juda, bɛ nə məbɔ́nə ndə a bu fɛ̀ŋ Vaa-Woməsʉʉ mɛ?"

49 Ndə vâafɔʼɔ-Jiso nyíɛ nukə ndə i bɛ bəshʉ gwè, bɔ̂ŋ ghɔ̀ŋ mbɔ, "Tie-yaʼ, b̈aʼa gwúu nə setəbə mɛ?" 50 Ndʉʉghɔfii, mbyu vaafɔ̀ʼ-Jiso síi tyunə-fʉə-tiefɛ̀ʼndɛŋkwɛʼtəŋNyii-kə kwiimɔʼnə chʉ̀ə.

51 Bɔŋ Jiso bə̀ŋhə mbɔ, "Mɔ mə leʼ nyíɛ fɛ!" Ɔ kə̀ŋ tyunə-wo-ghɔ̄-kə, i yə́ŋ.

52 Ndʉʉmɛ, Jiso ghɔ̀ŋ tʉ bətiefɛ̀ʼndɛŋNyii ghɔŋbə bʉəkwɛʼtəŋ bənchyii-njaafɛ̀ʼndɛŋNyii leʼnə bəntəŋbəshʉ ndə bɔ̂ŋ kə́ gwè tʉ ɔŋ mbɔ, "Bii tʉʼ gwè tʉ mɔ nə setəbə ghɔŋbə mbuuhə təka fi nə bii tʉʼ gwè tʉ lʉʼ shùɔ wo? 53 Ndʉʉ ndə mɔ nə kə́ bɛ bʉʼʉ mɔʼɔ mu chunjaafɛ̀ʼndɛŋNyii bəchibəchi təmə bii yá mɔ fɛ. Bɔŋ nduɔ nɔ bɛ yii-yə ndʉʉ bʉʼka njəŋkə tʉʼ sɔ́ʼ mbi."

54 Ndʉʉmɛ, bənchyii-njaafɛ̀ʼndɛŋNyii yá Jiso gɛ̀ nə nɔŋ mu njaa-tiefɛ̀ʼndɛŋkwɛʼtəŋNyii. Bita kə bɛ dɔdɔ gɛ̀ hə bɔ̌ŋ bɔŋ. 55 Bɔ̂ŋ kʉ̂ʉ dyì viʼi ntəŋntəŋ sêfu, chə̀ŋtə chɔ kə́ yóʼ, Bita gwè dùʼ chɔ ghɔŋ bɔŋ. 56 Vaabəkebɛʼ ndə ɔ bɛ vaafɔ̀ʼ-wo, nyíɛ ɔŋ ndə ɔ dùʼ mbʉə viʼi. Ɔ tʉ́ʼ shʉ-i ndəŋ ɔŋ, ghɔ̀ŋ mbɔ, "Wo-ɔ̄ nɔ nə bɛ ghɔŋ Jiso!"

57 Bita kɔ́tuu i, ghɔ̀ŋ mbɔ, "Vaabəke, mɔ kínə ɔŋ fɛ!"

58 Kʉʉkə məniʼ, ibɛʼ-yə wo nyíɛ ɔŋ, ghɔ̀ŋ mbɔ, "A le bɛ haʼ ibɛʼ-yə mbyu wo-ghɔ̄!"

Bita bə̀ŋhə mbɔ, "Woləŋ, laa yɔŋ!"

59 Ŋgwɔʼmbi kʉ̂ʉ kwɛ̀ʼtə tə bɛ ndə chí imɔʼ, ibɛʼ-yə wo gwè kwə́ʼ shʉ́əshʉ́ə ghɔ̀ŋ mbɔ, "Leʼ shʉəŋ, wo-ɔ̄ ghɔ nɔ kə bɛ ghɔŋ Jiso mɔʼɔ, bʉʼka nɔ bɛ wo-Galili ghɔ!"

60 Bita bə̀ŋhə mbɔ, "Woləŋ, mɔ kínə nukə ndə a tʉʼ gìe fɛ̄ŋ fɛ!"

Haʼ ndʉʉmɛ, ndə ɔ kə́ bíe kwə́ʼ, ŋkʉəʼə tʉʉ. 61 Mbʉ Tiekətʉ kíahə shʉ-i lɛ́nə Bita. Ndʉʉmɛ, Bita kwɛ́nə nukə ndə Tiekətʉ nɔʼ kə shyíi ɔ mbɔ, "Ŋkʉəʼə bu yi kə tʉ́ʉ laa nɔ tʉ a nɔʼ kɔ́tuu a vɛʼ tia mbɔ a la kínə mɔ fɛ." 62 Bita fyú gɛ̀ mbi kɛŋ gɛ̀ gwía nə shʉəŋ.

63 Bʉə ndə bɔ̂ŋ kə́ chyìi Jiso, bɔ̂ŋ chʉ́ʉhə mədʉ̀ʉhə ɔŋ bɔŋleʼ gwúu ɔ. 64 Bɔ̂ŋ bɔ̀ŋ shʉ-i kə́ bíʼtə tʉ ɔŋ mbɔ, "Tɔ wo ndə ɔ kwɔ̀ŋ aŋ!" 65 Bɔ̂ŋ bìʼ kɔ́ nchɛŋhə kətʉ-ɔ yɔ́ŋyɔ́ŋ.

66 Ndʉʉ ndə mbi lɛ́ɛŋ sê, bəntəŋbəshʉ-bʉə-Juu ghɔŋbə bətiefɛ̀ʼndɛŋNyii leʼnə bʉə dàhə nuʼ-Mushi chə̀ŋtə mu kaŋsotə, bə gwè nə Jiso bəshʉ bɔŋ. 67 Bɔ̂ŋ gìe tʉ ɔŋ mbɔ, "Kaʼ a bɛ Wo ndə Nyii Kùŋ Tə́ŋ, shyíi baʼa."

Jiso bə̀ŋhə mbɔ, "Kaʼ mɔ shyíi bii, bii bɛ́ŋ fɛ. 68 Mɔ bɔŋ bíʼtə tʉ bii, bii bə̀ŋhə fɛ. 69 Lʉ̀ hə nduɔ gɛ̀ nə shʉbə Vaa-Woməsʉʉ bu dùʼ kwiiləŋ Nyii wo shʉ́əshʉ́ə."

70 Bɔ̂ŋ bənchəŋ bíʼtə mbɔ, "Le bɛ mbɔ a bɛ VaaNyii mɛ?" Jiso bə̀ŋhə mbɔ, "I nɔ kʉ̀ʼnə haʼ ndə bii ghɔ̀ŋ nɔ." *22:70 I nɔ dʉ̀ʼ mbɔ Jiso nɔ bɛ́ŋ nukə ndə bɔŋ gìe təmə bɔŋ bɛ́ŋ nə sɔ́ʼ fɛ.

71 Bɔ̂ŋ bənchəŋ ghɔ̀ŋ mbɔ, "Bʉʼʉ tʉʼ kʉ́ʉ leʼ yʉ́ ka nduɔ kəghɔ-bəbɛʼbʉə te ɔ? Bʉʼʉ nɔʼ yʉ́ ndəŋ yi-yə wuochukə."