13 Bale chə̀ŋ bətiefɛ̀ʼndɛŋNyii ghɔŋbə bʉəkwɛʼtəŋ leʼnə bʉə-lɔʼɔ, 14 ghɔ̀ŋ tʉ bɔŋ mbɔ, "Bii nɔ gwè nə wo-ɔ̄ mbɔ ɔ la tʉʼ dàhə bʉə, bɔ̂ŋ kə́ kwɛ̀ŋhə, mɔ nɔʼ tyúutə ɔŋ bəshʉ bii təmə bɔŋ nyíɛ nukə ndə bii ghɔ̀ŋ mbɔ ɔ chìi fɛ. 15 Təkɔmə Hɛlo ghɔ, bii le tʉʼ nyíɛ, ɔ nɔ byʉ̀hə ɔŋ kɔ́ tʉ bʉʼʉ, bʉʼka ɔ chʉʼ chìi nu-mɔ̀ʼmbɛ-kə ndə bəkɔ bə yí ɔ bʉʼka yɔŋ fɛ. 16 Mɔ bu gwúu ɔ, mɛ̀ʼtə ɔŋ, ɔ̈ gɛ̀ nə wi." 17 [Ɔ nɔ kə kie ndə mə-yaʼ-fyúhə mbyu wo-imɔʼ chaŋ, ndəŋ chî-nchəŋtə-Yíɛʼsii-kə.]
18 Bɔ̂ŋ bənchəŋ tíi vɛʼ mɔʼɔ mbɔ, "Yí ɔ! Fyúhə Balaba kɔ́ tʉ baʼa!" 19 Bə nɔ nə fʉ̀əŋ Balaba mu njaa-chaŋ bʉʼka ɔ gwè nə ntɔŋntɔŋ mu kəyəŋkwɛʼtəŋ tə nɔʼ yí wo. 20 Bale bìʼ fʉ̀ʉtə mbʉ bʉə, bʉʼka ɔ nɔ kə́ kʉ́ʉ yɔ̀ʼ ghɔkə ndəŋ Jiso. 21 Bɔ̂ŋ bìʼ tíi haʼ mbɔ, "Kwɛ̀ŋ ɔŋ ndəŋ tyʉntɔɔnəkə, kwɛ̀ŋ ɔŋ yí!"
22 Ɔ bìʼ kwə́ʼ tʉ bɔŋ ndə vɛʼ tia, kə́ bíʼtə mbɔ, "Bʉʼka ka? Ɔ nɔ̂ʼ chìi ka? Mɔ nyíɛ nu-mɔ̀ʼmbɛ-kə ndə ɔ nɔ̂ʼ chìi tə bə kə́ yí ɔ fɛ. Mɔ bu gwúu ɔ, yɔ̀ʼ ghɔkə-ɔŋ hə ndəŋ ɔŋ, ɔ̈ gɛ̀."
23 Bɔ̂ŋ bìʼ lyʉ̀ʉ tíi nə ghʉəʼkə mbɔ b̈ə la kwɛ̀ŋ ɔŋ ndəŋ tyʉntɔɔnəkə. Bale yʉ́ gwia-yʉə. 24 Bale bɛ́ŋ nukə ndə bɔ̂ŋ tʉʼ bíʼtə tʉ ɔŋ. 25 Ɔ fyúhə wo ndə bə fʉ̀əŋ ɔŋ mu njaa-chaŋ bʉʼka məbyùutə yəŋbə ghɔŋbə məyí wo, kə́ bɛ wo ndə bɔ̂ŋ kə́ bíʼtə, bɔŋ ɔ leʼ kɔ́ bə Jiso mu kəghɔ-bɔŋ.
Bə kwɛ̀ŋ Jiso yí
(Matia 27:32-44; Mak 15:21-32; Jɔŋ 19:17-27)