Lucas 24

Məkoʼ-Jiso

1 Kʉ̂ʉ bɛ ndəŋ fəŋ kəchî mu vyii mbi, mbʉ bəke lɔ̀ ndʉʉsɛŋkə bətyuʼbətyuʼ, lʉ̀ ŋgwo-lùŋ-mə ndə bɔ̂ŋ nɔʼ kə shʉ̀tə, gɛ̀ nə yɔ̄ŋ-yə chu-mbʉ-sě. 2 Bɔ̂ŋ gɛ̀ nyíɛ tʉ bə nɔʼ tʉ́ʉhə mbʉ ŋgoʼ ndə bə kə chíe chu-mbʉ-sě nə yɔŋ. 3 Bɔ̂ŋ kʉ̂ʉ shíʼ muŋgɔ təmə nyíɛ ŋkwu-Jiso-Tiekətʉ-kə fɛ. 4 Ndə bɔ̂ŋ tʉʼ yie yɔ̄ŋ-yə, kə kwɔnə nyíɛ, bʉə bəbûu fyú tʉ bɔŋ, mɔ̀ʼ ndyi-leʼnə-hə tə́nə mbʉə bɔŋ. 5 I fɛ̀ŋhə mbʉ bəke, bɔ̂ŋ bʉ́ʉnə bəshʉ bɔŋ kə́ lɛ́nə sê, mbʉ bʉə-ghɔ̄bə ghɔ̀ŋ tʉ bɔŋ mbɔ, "Bii tʉʼ kʉ́ʉ wo ŋɛnə mu bəŋkwusê təka? 6 Ɔ kaa fɛ̄ŋ fɛ, ɔ nɔʼ kóʼ! B̈ii kwɛ́nə ndə ɔ kə shyíi bii vɛʼ ndə bii bɔŋ kə bɛ mɔʼɔ Galili le, 7 ‘Bə bu yaʼ kɔ́ Vaa-Woməsʉʉ mu kəghɔ-bʉə bʉ̂ʼʉ, bɔ̂ŋ kwɛ̀ŋ ɔŋ yí, kʉ̂ʉ bɛ chîbə itia nɔ ɔ bʉ̀nə bìʼ kóʼ.’ "

8 Ndʉʉmɛ, bɔ̂ŋ kwɛ́nə ŋgie-bi. 9 Bɔ̂ŋ kʉ̂ʉ bʉ̀nə kəyəŋ sě-ɔ, núhə nubə-ɔ̄ŋ inchəŋ tʉ bəʼ-bʉə-njuɔ-mɔʼ-kə nə wuŋ ghɔŋbə bəbɛʼbʉə nchəŋtə. 10 Nɔ kə bɛ Mɛli Matalina, Juana, Mɛli ŋkwê-Jɛŋ leʼnə bəbɛʼbəke ndə ghɔŋ bɔŋ kə́ núhə nubə-ɔ̄ŋ tʉ bəlɔntəŋNyii. 11 Təmə bɔ̂ŋ mə bɛ́ŋ nukə ndə bəke-ghɔ̄bə tʉʼ gìe fɛ, bʉʼka kwəʼ-yʉə nɔ nə bɛ kwə́ʼ bənɔ̌ʼɔ tʉ bɔŋ. 12 Bita lɔ̀ hə sê, nyʉ́ʉ gɛ̀ ndəŋ mbʉ sě, gɛ̀ bʉ́ʉnə lɛ́nə mu-i, nyíɛ mbʉ ndyihə ndə bə kə tyúu ɔ nə yɔŋ kə́ nʉ̀ʉ tətɛʼ ɛ. Ɔ lɔ̀ gɛ̀ kə́ tòʼ kwɔ̀ʼtə tʉkə-i ndəŋ nukə ndə i nɔʼ tíŋ.

Fia Emau

13 Haʼ yɔ̂ŋ-ghɔ̄, vâafɔʼɔ-bi bəbûu lɔ̀ kə́ gɛ̀ lɔʼbɛʼ bə kə́ tíi nə Emau ndə i bɛ nə ŋkɔŋ-bəghǔu-hə itaa nə bəghǔu təghyʉʉ tətaa ndə məlɔ̀ hə chɔ gɛ̀ dàa Jɛlosalɛŋ. 14 Bɔ̂ŋ kə́ tòʼ kwə́ʼ tʉ ŋwɔŋtə-ʉə te nubə ndə i nɔʼ tíŋ. 15 Ndə bɔ̂ŋ tʉʼ tòʼ kwə́ʼ bɔŋleʼ jìʼtə nubə-ɔ̄ŋ mu bɔŋ, Jiso nə mbəŋ-ɛŋ gwè bìa bɔŋ ghɔŋ bɔ̂ŋ kə́ tòʼ. 16 Bɔŋ tʉ bə nɔʼ chíe shʉtə-ʉə ndə məchèʼnə ɔŋ. 17 Ɔ bíʼtə tʉ bɔŋ mbɔ, "Bii tʉʼ tòʼ kwə́ʼ ka gɛ̀ tə dɔ̀ŋnə muŋgɔ nɔ?"

Bɔ̂ŋ tə́nə kəyəŋ kəmɔʼ, nə mbʉəhə-ʉə idìenə. 18 Mbyu wo mu bɔŋ yie-e kə́ bɛ Kolioba, bíʼtə tʉ ɔŋ mbɔ, "A bɛ haʼ mbyu ntoʼŋgwe imɔʼ mu Jɛlosalɛŋ fɛ̄ŋ, təmə kínə nubə ndə i nɔʼ tíŋ ndəŋ chîbə-ɔ̄ŋ fɛ mɛ?"

19 Ɔ bíʼtə mbɔ, "Ŋgwɔ ka?"

Bɔ̂ŋ bə̀ŋhə mbɔ, "Te Jiso ndə ɔ lɔ̀ hə Nasalɛ. Ɔ nɔ kə bɛ yʉkəŋgieNyii, shʉ́ə ndə kwəʼ-ɛ ghɔŋbə njʉnə-i bəshʉ-Nyii leʼnə bʉə bənchəŋ. 20 Bətiefɛ̀ʼndɛŋNyii ghɔŋbə bəntəŋbəshʉ-baʼa chɔ̀ʼhə ɔŋ kɔ́ mbɔ b̈ə yí ɔ, bɔ̂ŋ kwɛ̀ŋ ɔŋ yí. 21 Bɔŋ tʉ baʼa nɔʼ nə kə́ yʉ́əʼnə ndəŋ ɔŋ mbɔ ɔ nɔ bu chʉ̀ʼ tʉ-bʉə-Isilɛ-bə. Ndə məbìʼ chɔ, nɔ chîbə nduɔ itia ndə nubə-ɔ̄ŋ tíŋ. 22 Bɔŋ bəbɛʼbə bəke-baʼa bɔŋleʼ gìe fɔŋ ɛŋ tʉ baʼa laa. Bɔ̂ŋ nɔ gɛ̀ ndəŋ mbʉ sě ndʉʉfiimbi laa, 23 bɔŋ təmə nyíɛ ŋkwukə-i fɛ. Bɔ̂ŋ gwè gìe tʉ baʼa mbɔ bɔ̂ŋ la nyíɛ bʉəntəŋNyii, bɔ̂ŋ ghɔ̀ŋ mbɔ ɔ la bɛ ŋɛnə. 24 Bəbɛʼbʉə nuɔ-baʼa lɔ̀ gɛ̀ ndəŋ mbʉ sě, gɛ̀ nyíɛ kɛŋ haʼ ndə mbʉ bəke-ghɔ̄bə kə gìe le, bɔŋ təmə nyíɛ ɔŋ fɛ."

25 Jiso ghɔ̀ŋ tʉ bɔŋ mbɔ, "Bii nɔ bɛ bənɔ̌ʼɔ, fyiihə-ii shʉ́ə ndə məbɛ́ŋ nukə nə bʉəyʉkəŋgieNyii nɔʼ kə gìe. 26 Wo ndə Nyii Kùŋ Tə́ŋ kie ndə mənyíɛ ŋgʉəʼ ndəŋ nubə-ɔ̄ŋ, buŋ ŋíi mu məgʉə-e fe?" 27 Ɔ chʉ́ʉhə ndəŋ Mushi gɛ̀ tə dàa ndəŋ bʉəyʉkəŋgieNyii bənchəŋ, fʉ̀ʼtə nubə ndə ŋwɔʼnə-Nyii nɔʼ kə́ gìe te mbəŋ-ɛŋ.

28 Bɔ̂ŋ kʉ̂ʉ gɛ̀ tə kə́ kə́ŋhə mbʉə lɔʼɔ ndə bɔ̂ŋ kə́ gɛ̀ chɔ, Jiso chìi fí ndə ɔ bu bìʼ gɛ̀ nə shʉbə. 29 Bɔ̂ŋ fʉ̀ʉtə tʉ ɔŋ shʉ́əshʉ́ə mbɔ, "B̈ʉʼʉ chí fɛ̄ŋ, ndʉʉbuumbi nɔʼ kə́ŋhə mbi nɔʼ tʉʼ jʉ́." Ɔ gɛ̀ chí ghɔŋ bɔŋ. 30 Ɔ kʉ̂ʉ dùʼ ghɔŋ bɔŋ ndəŋ tebele lʉ̀ bele kɔ́ ndɔ chɔ, bə́ʼtə gyʉ̀ə tʉ bɔŋ. 31 Ndʉʉmɛ, shʉ-yʉə ŋɔ́ʼnə, bɔ̂ŋ chèʼnə ɔŋ, ɔ tuŋ bɛ́ shʉ-bɔŋ.

32 Bɔ̂ŋ bíʼtə tʉ ŋwɔŋtə-ʉə mbɔ, "Kaa nukə nɔ ndə i kə chìi tʉʉtə-ʉʼʉ kə́ bʉ̀ʉ vɛʼ ndə bʉʼʉ bɔŋ kə́ gwè hə sêfia, ɔ ŋɔ́ʼhə shʉ-yʉʼʉ ndəŋ nukə ndə i bɛ mu ŋwɔʼnə-Nyii fe?" 33 Bɔ̂ŋ lɔ̀ hə sê haʼ ndʉʉmɛ bʉ̀nə gɛ̀ Jɛlosalɛŋ, kəyəŋ ndə bɔ̂ŋ kə nyíɛ mbʉ vâafɔʼɔ-bi chɔ njuɔ mɔʼ nə wuŋ, ghɔŋbə bʉə ndə bɔ̂ŋ kə bɛ chɔ kə́ chə̀ŋtə kəyəŋ kəmɔʼ. 34 Bɔ̂ŋ ghɔ̀ŋ tʉ mbʉ b̈ʉə bəbûu mbɔ, "Nɔ shʉəŋ! Mbʉ Tiekətʉ nɔʼ kóʼ dʉ̀ʼ ŋwɔŋ-ɛŋ tʉ Samu."

35 Ndʉʉmɛ, mbʉ b̈ʉə bəbûu fʉ̀ʼtə nukə ndə i fyú sêfia, ghɔŋbə ntɛ ndə bɔ̂ŋ chèʼnə mbʉ Jiso, ndʉʉ ndə ɔ kə bə́ʼtə bele.

Jiso fyú tʉ vâafɔʼɔ-bi

36 Ndʉʉ ndə bɔ̂ŋ kə́ bíe kwə́ʼ, kə kwɔnə nyíɛ, Jiso kə́ tə́nə mu bɔŋ ghɔ̀ŋ tʉ bɔŋ mbɔ, "B̈ii kie fyiighʉ́ənə." 37 I fɛ̀ŋhə bɔŋ, bɔ̂ŋ gwùʼtə kə́ kwɔ̀ʼtə mbɔ bɔ̂ŋ la nɔʼ nyíɛ ŋkwusêkə. 38 Ɔ ghɔ̀ŋ tʉ bɔŋ mbɔ, "Bii tʉʼ fàa ka, chìi ka təmə bii mə bɛ́ŋ mbɔ mɔ nɔʼ kóʼ fɛ? 39 B̈ii lɛ́nə ghɔkə-ɔŋ ghɔŋ wukə-ɔŋ. Nɔ bɛ mbəŋ-ɔŋ! B̈ii kə̀ŋ mɔ nyíɛ, ŋkwusêkə kie mbɔʼ ghɔŋ ghʉəʼ-mbʉə-kə ndə mɔ kie nɔ fɛ." 40 Ndʉʉ ndə ɔ kə gìe yɔ̄ŋ-yə, ɔ dʉ̀ʼ ghɔbə-i tʉ bɔŋ ghɔŋbə wubə-i.

41 Vɛʼ ndə i bíe chàa bɔŋ, tʉʉ-yʉə bɔŋ kə́ bʉ̀ʉ, ɔ bíʼtə tʉ bɔŋ mbɔ, "Bii kie fɔkə fɛ̄ŋ ndə məyú mɛ?" 42 Bɔ̂ŋ kɔ́ ŋkwutə-mbɔʼ-tɔ̀ŋnə-kə tʉ ɔŋ. 43 Ɔ fí kwó bəshʉ bɔŋ, 44 ghɔ̀ŋ tʉ bɔŋ mbɔ, "Nɔ nukə nɔ ndə mɔ kə shyíi bii, nubə inchəŋ ndə bə nyɔ̀ʼ te mɔ mu ŋwɔʼnə-nuʼ-Mushi ghɔŋbə bʉəyʉkəŋgieNyii leʼnə Ŋwɔʼnə-təLyuu bu yaʼ fyú shʉəŋ." 45 Ndʉʉmɛ, ɔ ŋɔ́ʼhə ndaahə-ʉə ndə məkínə ŋgieNyiikə. 46 Ɔ ghɔ̀ŋ tʉ bɔŋ mbɔ, "Nɔ nukə nɔ ndə bə kə nyɔ̀ʼ mbɔ mbʉ Wo ndə Nyii Kùŋ Tə́ŋ bu nyíɛ ŋgʉəʼ kwú, kʉ̂ʉ bɛ chîbə itia nɔ, ɔ bʉ̀nə kóʼ. 47 Bə bu lɔ̀ʼ yie-maa-ɔ̄ŋ mu lɔʼ-bətə̂ŋ-tə inchəŋ chʉ́ʉhə Jɛlosalɛŋ mbɔ b̈ʉə shìe liɛŋtə-ʉə ndəŋ bʉ̂ʼtə-ʉə, Nyii chʉʼ sʉ̀fyii-i hə ndəŋ bɔŋ. 48 Nɔ bu nú bii nú gwù kənu-ɔ̄ŋ.

49 "Mɔ bu tə́ŋ LyʉʉhəNyiikə ndə Tie-ɔ nɔʼ kə kɔ̀ʼnə tʉ bii. B̈ii bɔŋ káa Jɛlosalɛŋ tə b̈ə yi kɔ́ ghʉəʼkə tʉ bii ndə i gwè hə yuo."

Jiso kóʼ gɛ̀ yuo

50 Ɔ kʉ̂ʉ lʉ̀ bɔŋ fyú gɛ̀ nə bɔŋ Bɛtani, chɔ̀ʼhə ghɔkə-i ghɔʼ túu bʉ̀ʉ kɔ́ tʉ bɔŋ. 51 Ndʉʉ ndə ɔ tʉʼ túu bʉ̀ʉ ndə məkɔ́ tʉ bɔŋ, ɔ mɛ̀ʼtə bɔŋ, bə lʉ̀ ɔ gɛ̀ nə nɔŋ yuo. 52 Ndʉʉmɛ bɔ̂ŋ lə̀ʼtə ɔŋ bʉ̀nə gɛ̀ Jɛlosalɛŋ nə tʉʉjyu yɔ́ŋyɔ́ŋ. 53 Bɔ̂ŋ gɛ̀ káa mu njaafɛ̀ʼndɛŋNyii kə́ lə̀ʼtə Nyii gɛ̀gɛ̀.