28 Chîbə kʉ̂ʉ tíŋ fɔ̂ŋ, ndə Jiso gìe nubə-ɔ̄ŋ, ɔ lʉ̀ Bita ghɔŋbə Jɔŋ leʼnə Jɛŋ, ghɔŋ bɔŋ kóʼ gɛ̀ ndəŋ kwɔŋ ndə məgháaNyii. 29 Ndə ɔ kə́ gháaNyii mbe-shʉ-i kwɛ́nə, ndyi-i kwɛ́nə kə́ leʼnə, nə leʼnə-wyuu-kə. 30 Kə kwɔnə nyíɛ, bʉə bəbûu, Mushi ghɔŋ Ɛlaja, fyú kə́ kwə́ʼ ghɔŋbə Jiso. 31 Bɔ̂ŋ fyú hə mu məŋwɔʼmə-ʉə, kə́ kwə́ʼ ghɔŋbə Jiso te kwu-i ndə i bu fyú shʉəŋ Jɛlosalɛŋ, haʼ ndə Nyii nɔʼ kə shʉ̀tə.
32 Bita ghɔŋbə bʉə-nuɔ-bi nɔ nə kə́ bɛ́ŋbɛ́ŋ, bɔŋ ndʉʉ ndə bɔ̂ŋ gwùʼtə bɔ̂ŋ nyíɛ məgʉə-e ghɔŋbə bʉə-ghɔ̄bə bəbûu kə́ tə́nə mɔʼɔ. 33 Ndʉʉ ndə bʉə-ghɔ̄bə tʉʼ gɛ̀ nə wʉə, Bita ghɔ̀ŋ tʉ Jiso mbɔ, "Tiefɔʼ-ɔ, i nɔ bʉ̀ʉ ndə bâʼa bɛ fɛ̄ŋ nɔ. B̈âʼa fʉ̀ə lɛʼbə itia, imɔʼ tʉ a, imɔʼ tʉ Mushi leʼnə imɔʼ tʉ Ɛlaja." Ɔ kə kínə nukə ndə ɔ kə́ gìe fɛ. 34 Bɔŋ ndə ɔ kə́ bíe gìe, mbɔʼkə shíʼ kwóhə bɔŋ, faakə yá bɔŋ ndə bɔ̂ŋ kə ŋíi mu mbʉ kəmbɔʼ.
35 Gyʉʉ gìe mu mbʉ kəmbɔʼ mbɔ, "Nɔ bɛ Vaa-ɔŋ nɔ ndə mɔ Séʼ, b̈ii yʉ́ chu-i." 36 Ndʉʉ ndə mbʉ gyʉʉ liʼ, bɔ̂ŋ nyíɛ mbɔ Jiso nɔ nə tə́nə tətɛʼ ɔ. Mbʉ vâafɔʼɔ-bi káa nə yɔ̄ŋ-yə bətɔ-bɔŋ, bɔŋ təmə shyíi wo nə yɔŋ fɛ, tə i chí dɔ̀ŋnə.
Jiso chʉ́ʼ vaabələŋ ndə ɔ kie lyʉʉhəbʉəbʉəkə mu mbʉə-ɔ
(Matia 17:14-18; Mak 9:14-27)