1 Nɔ nyɔ̀ʼ mbəŋ-ɔŋ Bɔɔ ndə mɔ bɛ vaafɔ̀ʼ Klai Jiso nyɔ̀ʼ ŋwɔʼnə-ɔ̄ŋ, ndə bə tíi mɔ ndə məbɛ lɔntəŋ-ɛŋ, Nyii bɔŋleʼ chìi mɔ bɛ ŋkʉ̂ʉ ndə məgɛ̀ lɔ̀ʼ ntəŋjyujyu-i. 2 Nyii nɔ kə kɔ̀ʼnə mbʉ ntəŋjyujyu tíŋ hə bɔ̌ŋ bʉəyʉkəŋgie-bi lʉ̀ hə ŋgʉʼŋgʉʼhə, haʼ ndə bə kə nyɔ̀ʼ mu ŋwɔʼnə-Nyii ndə i bɛ ŋkʉʉ. 3 Mbʉ ntəŋjyujyu nɔ bɛ te vaa-ɛ, Jiso Klai, Tiekətʉ-yʉʼʉ ndə woməsʉʉ bə nɔ kə bí ɔ kəlɔŋ-Fɔŋ-Dɛbi. 4 Bɔŋ ndʉʉ ndə ɔ kə bʉ̀nə kóʼ hə ndəŋ kwu nə ghʉəʼ-kəLyʉʉhəNyii-kə yɔ̄ŋ-yə dʉ̀ʼ mbɔ ɔ nɔ kə bɛ VaaNyii. 5 Tíŋ hə bɔ̌ŋ mbəŋ-ɛŋ, Nyii dʉ̀ʼ buuŋjyu-i tʉ mɔ ndə məbɛ lɔntəŋNyii yie-m̃bʉ-Klai, ndə dʉ̀ʼ ɔ dʉ̀ʼ fia tʉ bʉə mu lɔʼ-bətə̂ŋ-tə inchəŋ ndə məmɔʼfyiihə-ʉə ndəŋ ɔŋ ndə i bu chìi bɔŋ kə́ yʉ́ chu-i.

6 Mbəŋ-yii ndə bii bɛ Luŋ nɔ bɛ haʼ ghɔ muŋgɔ, ndə Nyii nɔʼ tíi bii ndə məbɛ tʉ Jiso Klai. 7 Mɔ nɔ tʉʼ nyɔ̀ʼ tʉ bii bənchəŋ ndə bii bɛ mu Luŋ ndə Nyii kʉ̀ʉ bii bɔŋ-nɔʼ-leʼ tíi bii ndə məbɛ bʉə-bi ndə bɔ̂ŋ bɛ ŋkʉʉ.

Tə buuŋjyu ghɔŋbə fyiighʉ́ənə bɛ yi-yə ndə i gwè hə kəghɔ-Nyii Tie-yʉʼʉ ghɔŋbə mbʉ Jiso Klai Tiekətʉ.

8 Nɔʼ m̈ɔ fəŋ kɔ́ ndɔ Nyii-ɔŋ tíŋ hə bɔ̌ŋ Jiso Klai yie-bii bənchəŋ, bʉʼka bə nɔ tʉʼ lɔ̀ʼ ntɛ məmɔ̀ʼfyii ndə bii mɔ̀ʼfyiihə-ii ndəŋ Nyii, yə̀ŋ wʉʉnəmbikə inchəŋ. 9 Nyii ndə mɔ tʉʼ fɔ̀ʼ tʉ ɔŋ nə vaafyii-ɔ imɔʼ ndə mətéʼ ntəŋjyujyu-vaa-ɛ, nɔ bu nú gwù ɔ mbɔ mɔ nɔ tʉʼ tíi yie-yii təmə kə́ káa fɛ, 10 ndʉʉtəmiyɔŋ ndə mɔ tʉʼ gháaNyii. Mɔ nɔ tʉʼ gwía tʉ ɔŋ mbɔ kaʼ bɛ ŋkʉʉnə tʉʉ-i, yi kə lìʼtə nduɔ nɔ, ɔ chìi ndə bəkɔ mɔ gwè mətòʼ tʉ bii ndə vaa kəkʉʉ mbi. 11 Mɔ nɔ tʉʼ mʉ̀ʉ yɔ́ŋyɔ́ŋ daa ndə mənyíɛ bii, mbɔ mɔ chʉʼ kɔ́ mbyu-kəkɔ-hə tʉ bii ndə i gwè hə kəghɔ-LyʉʉhəNyiikə i chʉʼ chìi bii shʉ́ə. 12 Nukə ndə mɔ tʉʼ gìe nɔ bɛ mbɔ bʉʼʉ chʉʼ kwèʼhə ŋwɔŋtə-ʉʼʉ ndə məmɔʼfyiihə-ʉʼʉ ndəŋ Nyii. M̈ɔ kwèʼhə bii, b̈ii bɔŋleʼ kwèʼhə mɔ.

13 Mɔ nɔ tʉʼ kʉ́ʉ mbɔ, bəliŋ-bɔŋ, b̈ii kínə mbɔ mɔ nɔ nə kə́ shʉ̀tə təvɛʼtəvɛʼ ndə məgwè nyíɛ bii, nukə bɔŋ kə́ chíe mɔ ndə məchìi nɔ, tə gwè dàa nduɔ. Mɔ nɔ tʉʼ kʉ́ʉ mbɔ mɔ fɔ̀ʼ mu bii ndə mə-chʉʼ-leʼ-kie bʉə ghɔ ndə bɔ̂ŋ nɔʼ bɛ́ŋ Nyii haʼ ndə mɔ nɔʼ kə kie mu bʉə ndə bɔ̂ŋ gòʼ təmə bɛ bʉə-Juu fɛ mu bəbɛʼyəŋbə. 14 Mɔ nɔ bɛ wo ŋkwo bʉə ndə mbi nɔʼ súunə tʉ bɔŋ ghɔŋbə bʉə ndə mbi gòʼ təmə nɔʼ súunə tʉ bɔŋ fɛ, tʉ bʉə-shʉ-súunə ghɔŋbə bənɔ̌ʼɔ ndə məlɔ̀ʼ ntəŋjyujyu tʉ bɔŋ. 15 Nɔ, fyii-ɔ nɔ tʉʼ ŋɔ̀ʼtə ndə məlɔ̀ʼ ntəŋjyujyu tʉ bii ghɔ ndə bii bɛ Luŋ.

16 Tʉkə-ɔŋ tʉʼ vyíi ndə mətéʼ ntəŋjyujyu fɛ, bʉʼka nɔ bɛ ghʉəʼ-Nyii-kə ndə məgwè nə ŋkwaa tʉ wotəmiyɔŋ ndə ɔ bɛ́ŋ, fəŋ kə́ bɛ bʉə-Juu, biitəkə kə́ bɛ bʉə ndə bɔ̂ŋ gòʼ təmə bɛ bʉə-Juu fɛ. 17 Bʉʼka ñtəŋjyujyu-ɔ̄ nɔ kɛ̀ʼ ntɛ ndə Ñyii chìi bʉə bɔ̂ŋ bɛ ndyʉndyʉ shʉ-ɔ. Ĩ nɔ gwè hə bɔ̌ŋ məmɔ̀ʼfyii ndəŋ Nyii lʉ̀ hə ndəŋ nchʉʉhə tə gɛ̀ dàa liʼ-ghɔ̄. Haʼ ndə bə nyɔ̀ʼ mu ŋwɔʼnə-Nyii mbɔ, "W̃o ndə ɔ bɛ ndyʉndyʉ tʉ Nyii, nɔ chí mbi bə nə məmɔʼfyii-i ndəŋ Nyii."

18 Bʉʼka Nyii nɔʼ kɛ̀ʼ tʉʉbʉə-e hə yuo tʉ bʉə ndə bɔ̂ŋ gòʼ təmə kə́ fàa ɔ fɛ ghɔŋbə bʉə ndə bɔ̂ŋ gòʼ təmə bɛ ndyʉndyʉ fɛ, bɔ̂ŋ nɔ tʉʼ jìehə shʉəŋ sê tíŋ hə bɔ̌ŋ ndə bɔ̂ŋ gòʼ təmə bɛ ndyʉndyʉ fɛ. 19 Bʉʼka nubə ndə bəkɔ bə kínə te Nyii nɔ bɛ ŋgwʉʉnə tʉ bɔŋ, bʉʼka Nyii nɔ chìi i bɛ súunə tʉ bɔŋ. 20 Bʉʼka lʉ̀ hə ndə Nyii nə chìi wʉʉnəmbikə, ɔ chìi nubə ndə bə kə mənyíɛ te ɔ fɛ kə́ bɛ ghʉəʼkə-i təmə liʼ-i ghɔ fɛ leʼnə ntɛ-wo-hə ndə ɔ bɛ yɔŋ nə Nyii bə nyíɛ ntaa ndə fɔbə ndə ɔ nɔʼ kə chìi. Nɔ, bʉə-bɔ̄ŋ kie nukə ndə mə túu chu-yʉə nə yɔŋ ndə luu ndə bɔ̂ŋ gòʼ təmə kínə Nyii fɛ. 21 Bɔ̂ŋ bɔŋ kínə Nyii, təmə bɔŋ kə́ lə̀ʼtə ɔŋ fɛ tə buŋ kɔmə, mə kɔ́ ndɔ ɛ fɛ. Buŋ ŋkwɔʼtə-yʉə bɔŋleʼ bɛ bə bənɔ̌ʼɔ, mu-kətʉ-hə-ʉə buŋ leʼ bɛ bə ilə́ŋnə nə njəŋkə. 22 Bɔ̂ŋ kə́ lʉ̀ ŋwɔŋtə-ʉə mbɔ bɔ̂ŋ la kie ndaa bɔŋ kə́ bɛ bənɔ̌ʼɔ, 23 bʉʼka bɔ̂ŋ kíahə məgʉə-Nyii ndə ɔ mə kwú fɛ bʉ̀nə leʼ kə́ kɔ́ bə tʉ fɔ-kɔ́ŋ-bə nə bʉəməsʉʉ ndə b̃ɔ̂ŋ kwú leʼnə nuɔmə, nyaahə leʼnə nyaahə ndə bɔ̂ŋ ŋɔ̀ɔnə sê.

24 Nɔ, Nyii nɔʼ ké bʉə-ghɔ̄bə ndə mə-kə́-fɔ̀ʼ nu-bʉəbʉə-bə ndə fyiihə-ʉə kʉ̀ʉ, ndə nu-nyàatəŋwɔŋ-bə. Bɔ̂ŋ kə́ chìi nu-kətʉvyiinə-bə nə ŋwɔŋtə-ʉə. 25 Bʉʼka bɔ̂ŋ tɛ́ŋ ndə məbɛ́ŋ shʉəŋ te Nyii, séʼ bə ndə məbɛ́ŋ lɛɛŋkə. Bɔ̂ŋ kə́ buŋ leʼ lə̀ʼtə bɔŋleʼ fɔ̀ʼ bə tʉ fɔbə ndə Nyii chìi, hə ndə mbʉ Nyii ndə ɔ chìi bɔŋ, wo ndə bə kie ndə mə-kə́-lə̀ʼtə ɔŋ təmə liʼ-i ghɔ fɛ! Ï bɛ haʼ nɔ.

26 Bʉʼka nubə-ɔ̄ŋ, Nyii nɔ kə ké bɔŋ ndə məkie jyʉʉ ndə mə-kə́-chìi nu-kətʉvyiinə-bə. Buŋ bəke-bʉə nɔ kə kíahə ŋkɛŋ məchí ghɔŋbə bələŋ ndə Nyii nə mɔ̀ʼ, kə́ chí bə nə bəke bəʼkə-ʉə. 27 Bələŋ ghɔ kíahə ŋkɛŋ məchí ghɔŋbə bəke ndə Nyii nə mɔ̀ʼ kə́ kie bə jyʉʉ ndə ŋwɔŋtə-ʉə. Bələŋ kə́ fɔ̀ʼ nu-kətʉvyiinə-bə ghɔŋbə bəbɛʼbə bələŋ, kə́ chìi yɔ̄ŋ-yə gwè nə ŋgʉəʼ kətʉ-bɔŋ ndə lɔʼɔbə-ʉə bʉʼka bʉ̂ʼtə-ʉə.

28 Bʉʼka bʉə-bɔ̄ŋ kə tɛ́ŋ ndə məbɛ́ŋ shʉəŋ te Nyii, ɔ ké bɔŋ ndəŋ fia-bʉəbʉə-tə-ʉə, mbɔ bɔ̂ŋ kə́ chìi nubə ndə b̈ɔ̂ŋ gòʼ təmə kie ndə məchìi fɛ. 29 Fyiihə-ʉə nɔ bɛ ilə́ŋnə nə ntɛ-bənu-hə ŋkʉʉŋkʉʉ ndə i gòʼ təmə bɛ ndyʉndyʉ fɛ, kʉ̀ʉ ndə məfɔ̀ʼ buuŋbʉə, kʉ̀ʉ ndə məkie fɔbə inchəŋ, kʉ̀ʉ ndə məbàa shʉ bəbɛʼbʉə, kʉ̀ʉ ndə məbàabʉʉ bəbɛʼbʉə, kʉ̀ʉ ndə məyítə bəbɛʼbʉə, kʉ̀ʉ ndə məchìi ntɔŋntɔŋ, kʉ̀ʉ ndə məfə́ʼhə bʉə, kʉ̀ʉ ndə mətyú bʉ̂ʼʉ nə bʉ̂ʼʉ, kʉ̀ʉ ndə mətíi yie-wo bɔ̌ŋbɔ̌ŋ, 30 kʉ̀ʉ ndə məgìe nu-bʉəbʉə-bə yie-wo, bàa yie-Nyii, kʉ̀ʉ ndə məchɛ̀ŋtə bəbɛʼbʉə, kʉ̀ʉ ndə məŋàʼtə, kʉ̀ʉ ndə məkwɛ̀ŋ fyii, bɔ̂ŋ kə́ kwɔ̀ʼtə haʼ fia-fefe-tə ndə məchìi bʉ̂ʼʉ, kə́ kwɛ̀ŋhə tʉ bətie-bʉə, 31 byuu-ndaa-kə, təmə kə́ gìe shʉəŋ fɛ, təmə kə́ kie ŋkʉ̂ʉ fɛ, təmə bɔŋleʼ kə́ kie tʉvyiikə tʉ bəbɛʼbʉə fɛ. 32 Buŋ ndə bɔ̂ŋ kínə mbɔ nuʼ-Nyii nɔ gìe mbɔ bʉə ndə bɔ̂ŋ tʉʼ chìi nubə-ɔ̄ŋ, nɔ kie ndə məkwú, təmə bɔ̂ŋ bɔŋ kə́ chìi bə haʼ yɔŋ fɛ, bɔ̂ŋ kə́ leʼ bɛ́ŋ kɔ́ tʉ bʉə ndə bɔ̂ŋ tʉʼ fɔ̀ʼ ntɛ-bənu-hə-ɔ̄ŋ.