1 Ndʉʉghɔfii, wo-Juu kie nubɛʼkə ndə bəkɔ i chìi ɔ chàa wo ndə ɔ gòʼ təmə bɛ wo-Juu fɛ chɔ mɛ? Byuunɔ, məfɔ̀ʼ wo bʉ̀ʉ hə ndə ka? 2 I nɔ bʉ̀ʉ ndə nubə buŋmbi! Fəŋ nɔ bɛ mbɔ Nyii nɔ kə kɔ́ ŋgiekə-i kəghɔ-bʉə Juu.

3 I bu bɛ təka, kaʼ bəbɛʼbə mu bɔŋ gòʼ təmə tʉ́ʼ mbʉ kəŋgieNyii fɛ lɛ? A kwɔ̀ʼtə mbɔ mə gòʼ təmə tʉ́ʼ mbʉ kəŋgieNyii fɛ, bu byùutə Nyii ndə mətʉ́ʼ ŋgiekə-i mɛ? 4 I mə nə bɛ nɔ fɛ! Nyii nɔ kie ndə məbɛ haʼ Nyii-shʉəŋ, kaʼ kʉ̀ʉ bʉəməsʉʉ bənchəŋ bɛ bʉə-kəlɛɛŋhə. Haʼ ndə ŋwɔʼnə-Nyii ghɔ̀ŋ mbɔ,

"Ndʉʉtəmiyɔŋ ndə a kwə́ʼ bə nyíɛ ŋgiekə-a ndə məbɛ kʉ̀ʼnə, a yú fɛʼɛ-a ndʉʉ ndə bə gɛ̀ nə aŋ mu njaafɛ̀ʼ."*

5 Bɔŋ kaʼ məgoʼ-yʉʼʉ təmə bɛ ndyʉndyʉ fɛ, tʉʼ kwáa ndə mədʉ̀ʼ mbɔ Nyii bɛ ndyʉndyʉ, bʉʼʉ kie ndə məghɔ̀ŋ mbuka ndʉʉmɛ? Bəkɔ bʉʼʉ ghɔ̀ŋ mbɔ Nyii nɔʼ mɔ̀ʼ bɛ́ ndʉʉ ndə ɔ gwúu bʉʼʉ mɛ? (Təmə mɔ nɔ tʉʼ kwə́ʼ bə ndə kwə́ʼ bʉəməsʉʉ.) 6 I mə nə bɛ nɔ fɛ! Kaʼ i bɛ nɔ, Nyii nə kwɛ̀ sɔ́ʼ kəwʉʉnəmbi təka? 7 Kaʼ mɔ kə́ chʉ̀ə lɛɛŋkə, i kwáa ndə mədʉ̀ʼ ntaa mbɔ Nyii nɔ bɛ wo-shʉəŋ ndə i bu gwè nə məgʉ́ə tʉ ɔŋ, bu chìi ka bə kə́ bíe chʉ̀ə ŋkwɛ-ɔ bʉəbʉə ndʉʉmɛ, mbɔ mɔ bɛ wo-bʉ̂ʼʉ? 8 Chìi ka ndʉʉmɛ, təmə b̈ʉʼʉ mə ghɔ̀ŋ mbɔ, "B̈ʉʼʉ kə́ fɔ̀ʼ bʉ̂ʼʉ i chʉʼ gwè nə nu-jyujyu-bə." Bəbɛʼbʉə nɔʼ chɛ̀ŋtə baʼa, mɔ̀ʼ nukə kətʉ-baʼa mbɔ baʼa la gìe nukə-ɔ̄ŋ. Nyii bu chʉ̀ə ŋkwɛ-yʉə haʼ ndə bə kie ndə məchʉ̀ə.

9 Bʉʼʉ bu ghɔ̀ŋ mbuka ndʉʉmɛ? Mbɔ baʼa bʉə-Juu bʉʉ chàa bʉə ndə bɔ̂ŋ gòʼ təmə bɛ bʉə-Juu fɛ mɛ? Mbee, i mə nə bɛ nɔ fɛ. Mɔ nɔʼ dʉ̀ʼ mbɔ bʉə-Juu ghɔŋbə bʉə ndə bɔ̂ŋ gòʼ təmə bɛ bʉə-Juu fɛ, bʉ̂ʼʉ nɔ tʉʼ gìe hə kətʉ-bɔŋ. 10 Haʼ ndə bə nyɔ̀ʼ mu ŋwɔʼnə-Nyii mbɔ,

"Wo kaa ghɔ ndə ɔ bɛ ndyʉndyʉ fɛ,

buŋ laa tə laa mbyu imɔʼ.

11 Mbyu wo kaa ghɔ imɔʼ ndə ɔ kie ndaa fɛ,

mbyu wo kaa ghɔ imɔʼ ndə ɔ tʉʼ kʉ́ʉ ndə məbɛ ghɔŋ Nyii fɛ.

12 Bɔ̂ŋ bənchəŋ nɔʼ shìe liɛŋtə-ʉə tʉ Nyii,

bɔ̂ŋ bənchəŋ leʼ kwáa nubɛʼkə fɛ.

Wo kaa ghɔ ndə ɔ tʉʼ dʉ̀ʼ nuʼ jyujyu fɛ,

buŋ laa tə laa mbyu imɔʼ."*

13 "Bəyihə-bʉə nɔ byʉ́ʼ tə bɛ nə yɔ̂ʼkə ndə i tʉʼ kóʼ hə mu sětə ndə i bɛ ighʉ́ʉnə,

tʉ-kəlɛɛŋhə-kə-ʉə nɔ bɛ ilə́ŋnə nə fə́ʼhə bʉəbʉə."*

"Kʉʼ yɔ bʉəbʉə nɔ tʉʼ chyíitə ndəŋ wuochubə-ʉə."*

14 "Chutə-ʉə nɔ bɛ ilə́ŋnə nə mətúu ndɔŋ kɔ́ kətʉ bʉə leʼnə kechʉʼ mu fyii-bɔŋ."*

15 "B̃ɔ̂ŋ nɔ chʉʼ lə̀ŋnə ndə mələ́ŋhə bʉə, yí bɔŋ.

16 Yəŋkə təmiyɔŋ ndə bɔ̂ŋ gɛ̀ chɔ, bɔ̂ŋ bʉ́əhə bʉə, mɔ̀ʼ ŋgʉəʼ kətʉ-bɔŋ.

17 Bɔ̂ŋ kínə nukə ndə ĩ gwè nə ŋkɛŋ fyiighʉ́ənə fɛ."*

18 "Bɔ̂ŋ kínə məfàa Nyii fɛ."*

19 Nduɔ, bʉʼʉ nɔ kínə mbɔ nubə nchəŋnchəŋ ndə nuʼ-Nyii ghɔ̀ŋ nɔ bɛ tʉ bʉə ndə nuʼ-Nyii bɛ tʉ bɔŋ, mbɔ wo mə bɛ ghɔ ndə ɔ kie nukə ndə məlíi bɔ̌ŋ ghɔ fɛ bɔŋleʼ chìi mbɔ Nyii kwɛ̀ sɔ́ʼ kəwʉʉnəmbi inchəŋ. 20 Bʉʼka wo mə bɛ ndyʉndyʉ shʉ-Nyii mbɔ ɔ tʉ́ʼ nuʼ-Nyii fɛ, bʉʼka nuʼ nɔ bɛ haʼ ndə məŋɔ́ʼhə shʉ bʉə ndə məkínə bʉ̂ʼʉ.

21 Bɔŋ nduɔ, ndə mətʉ́ʼ nuʼ bɔ̌ŋ, Nyii nɔʼ kɛ̀ʼ fia tʉ bʉʼʉ ndə i chìi bʉə, bɔ̂ŋ bɛ ndyʉndyʉ bəshʉ ɔ. Buŋ ndə nɔ, mbʉ nuʼ-Mushi ghɔŋbə bʉəyʉkəŋgieNyii nɔ nú gwù kənu-ɔ̄ŋ. 22 Ñyii nɔ chìi bʉə ndə məbɛ ndyʉndyʉ tʉ ɔŋ tíŋ hə bɔ̌ŋ məmɔ̀ʼfyii ndəŋ Jiso Klai. Bəkɔ bʉə bənchəŋ kie ŋkwaaNyii tíŋ hə bɔ̌ŋ məmɔʼfyiihə-ʉə ndəŋ Jiso Klai, bʉʼka Nyii kínə túhə shʉ fɛ.

23 Bʉʼka bʉə bənchəŋ nɔʼ chìi bʉ̂ʼʉ, dɔ̀ŋnə mbʉə məgʉə-Nyii. 24 Bɔŋ bʉʼka buuŋjyu-Nyii ndə ɔ̃ kɔ́ njʉnjʉ, ɔ nɔ chìi bʉə bənchəŋ ndə məbɛ ndyʉndyʉ tʉ ɔŋ tíŋ hə bɔ̌ŋ Klai Jiso, ndə ɔ kə chʉ̀ʼ tʉkə-ʉə. 25 Nyii nɔ kə tə́ŋ Klai Jiso ndə məgwè nə fɔ-fɛ̀ʼndɛŋ-kə mbɔ tíŋ hə bɔ̌ŋ fɔbʉəkə-i bə chʉʼ sʉ̀fyii hə ndəŋ bʉ̂ʼtə-ʉʼʉ, tʉʉ-Nyii bɔŋleʼ bʉ̀nə biʼ bʉ̀ʉ tʉ bʉʼʉ. Bʉʼʉ nɔ kie nubə-ɔ̄ŋ tíŋ hə bɔ̌ŋ məmɔ̀ʼfyii ndəŋ ɔŋ. Nyii nɔ kə chìi yɔ̄ŋ-yə ndə mədʉ̀ʼ mbɔ ɔ nɔ bɛ ndyʉndyʉ bʉʼka ɔ nɔ kə yá fyii-i təmə kɔ́ ŋgʉəʼ tʉ bʉə ndə bɔ̂ŋ kə chìi bʉ̂ʼʉ lʉ̀ hə bəshʉ fɛ. 26 Ɔ nɔ kə chìi yɔ̄ŋ-yə ndə mədʉ̀ʼ mbɔ ɔ bɛ ndyʉndyʉ ndə mbi-ɔ̄ laa, bɔŋ mbɔ ɔ chʉʼ bɛ kʉ̀ʼnə, bɔŋ-kə́-leʼ chìi bʉə ndə bɔ̂ŋ mɔ̀ʼfyiihə-ʉə ndəŋ Jiso ndə məbɛ ndyʉndyʉ.

27 Bɛ ka ndʉʉmɛ, ndə bəkɔ bʉʼʉ kwɛ̀ŋ fyiihə-ʉʼʉ chɔ? Fɔkə fɛ. Yɔ̄ŋ-yə bɛ mɔ̀ʼ luu-i mbuka? Bɛ mbɔ bʉʼʉ tʉ́ʼ nuʼ-Nyii mɛ? Mbee! Nɔ bɛ bʉʼka bʉʼʉ mɔ̀ʼfyiihə ndəŋ Jiso Klai. 28 Bʉʼʉ nɔ yá mbɔ w̃o nɔ bɛ ndyʉndyʉ tʉ Nyii tíŋ hə bɔ̌ŋ məmɔ̀ʼfyii ndəŋ Jiso Klai, kaa bə bʉʼka mətʉ́ʼ nuʼ-Nyii fɛ.

29 Ndə nchəŋnchəŋ, Nyii bɛ haʼ Nyii-bʉə-Juu mɛ? Ɔ kaa Nyii-bʉə ndə bɔ̂ŋ gòʼ təmə bɛ bʉə-Juu ghɔ fɛ fe? Ɔŋ, ɔ nɔ bɛ Nyii-yʉə ghɔ, 30 bʉʼka mbyu Nyii nɔ bɛ haʼ imɔʼ, ɔ bu chìi bʉə-Juu bɔ̂ŋ tə́nə ndyʉndyʉ ndʉʉ ndə bɔ̂ŋ mɔ̀ʼfyiihə-ʉə ndəŋ ɔŋ, bɔŋleʼ chìi bʉə ndə bɔ̂ŋ gòʼ təmə bɛ bʉə-Juu fɛ ndə məbɛ ndyʉndyʉ ndə bɔ̂ŋ məmɔʼfyiihə-ʉə ndəŋ ɔŋ. 31 I dʉ̀ʼ ndʉʉghɔfii mbɔ b̈ʉʼʉ tyʉ́əŋhə mbʉ nuʼ-Nyii mɛ̀ʼ bɔ̌ŋ nə məmɔʼfyii-ɔ̄ mɛ? I mə bɛ nɔ fɛ! Bʉʼʉ bɔŋ bʉnəleʼ yá mbʉ nuʼ-Nyii, yá tʉ́ʼ.