1 Ndə məgìe mbʉ shʉəŋ kə́ fàa Klai, mɔ tʉʼ chʉ̀ə lɛɛŋkə fɛ. Ŋkwɔʼtə kətʉ-ɔ nɔ tʉʼ nú gwù ɔ nə ghʉəʼ-kəLyʉʉhəNyii-kə mbɔ mɔ nɔ tʉʼ gìe shʉəŋ, 2 mbɔ kaʼ mɔ shyíi bii nə ntɛ ndə mɔ tʉʼ vínə shʉ́əshʉ́ə, leʼnə məchɔ́ŋhə ndə mu fyii-ɔ tʉʼ chɔ́ŋhə mɔ təmə liʼ-i ghɔ fɛ 3 bʉʼka bʉə-bɔŋ, bəliŋ-bɔŋ bʉə-Juu, mɔ kʉ́ʉ mbɔ n̈dɔŋ-Nyii bɛ kətʉ-mɔ fɛ. B̈ə fyúhə mɔ mbʉə-Klai bʉʼka bɔŋ, kaʼ bɛ mbɔ maa-yɔ̄ŋ bu chìi bɔŋ kie ŋkwaaNyii. 4 Bɔ̂ŋ nɔ bɛ bʉə-Isilɛ ndə Nyii kə séʼ bɔŋ ndə məbɛ vâa-bi. Ɔ kɛ̀ʼ məgʉə-e tʉ bɔŋ, gwìa ŋkaamə ghɔŋ bɔŋ, mɔ̀ʼ nuʼ-i tʉ bɔŋ, dʉ̀ʼ tʉ bɔŋ ndə bɔ̂ŋ kie ndə mələ̀ʼtə ɔŋ nə shʉəŋ, ɔ bɔŋleʼ kɔ́ bəŋkɔʼnə-bi tʉ bɔŋ. 5 Ablahaŋ, Aisi leʼnə Jakɔ nɔ nə bɛ bətietiekwɛʼtəŋ-bʉə-Hibulu, Klai nə woməsʉʉ nɔ kə lɔ̀ hə kəlɔŋ-bɔŋ. Klai-ɔ̄ nɔ bɛ Nyii ndə ɔ tʉʼ sɔ́ʼ bʉə bənchəŋ, b̈ə lə̀ʼtə ɔŋ təmə liʼ-i ghɔ fɛ! Ï bɛ haʼ nɔ.

6 I bɔŋ kaa bə mbɔ ŋgieNyiikə nɔʼ bɛ́ njʉnjʉ fɛ, bʉʼka kaa bə bʉə bənchəŋ ndə bə bí bɔŋ kəlɔŋ Isilɛ ndə bɛ bʉə-Nyii fɛ. 7 Bʉʼʉ nɔ kínə mbɔ vâa ndə bə bí kəlɔŋ-Ablahaŋ kaa vâa-Nyii bənchəŋ fɛ, bʉʼka Nyii nɔ kə ghɔ̀ŋ tʉ Ablahaŋ mbɔ, "Nɔ tíŋ hə bɔ̌ŋ Aisi ndə a bu kie ŋgwie-wo ndə mɔ kə kɔ̀ʼnə tʉ a." 8 Yɔ̄ŋ-yə nɔ dʉ̀ʼ mbɔ kaa vâa-Ablahaŋ bənchəŋ ndə bə tʉʼ súu ndə məbɛ vâa-Nyii fɛ. Bɔŋ nɔ bɛ haʼ vâa ndə bə kə kɔ̀ʼnə tʉ ɔŋ tíŋ hə bɔ̌ŋ Aisi ndə bɛ ŋkɛŋ vâa-bi. 9 Bʉʼka mbʉ ŋkɔʼnə-Nyii nɔ kə ghɔ̀ŋ mbɔ, "Mɔ bu bʉ̀nə shyʉʉndʉʉ mənɔ shyʉʉnə, Sala bí vaabələŋ."

10 Lí haʼ yɔ̄ŋ-yə fɛ, ndʉʉ ndə Lɛbɛka ghɔ kə kie vâabələŋ bəbûu ndə tie-yʉə kə bɛ Aisi, tietie-yʉʼʉ. 11,12 Buŋ ndə bə kə gòʼ təmə nɔʼ bí bɔŋ fɛ, təmə bɔ̂ŋ nɔʼ kə kínə nu-jyujyu-kə byuunɔ nu-bʉəbʉə-kə fɛ, Nyii ghɔ̀ŋ tʉ ɔŋ mbɔ, "Fəŋ vaa bu nə fɔ̀ʼ tʉ vaa bɔ̌ŋ." Ñyii nɔ nə kə chìi yɔ̄ŋ-yə ndə mədʉ̀ʼ mbɔ nɔ séʼ ɔ, séʼ bʉə. Nɔ, nukə ndə Ñyii nɔʼ nə shʉ̀tə bu kə́ gɛ̀ nə shʉbə bə bʉʼka fɔʼɔ ndə bə fɔ̀ʼ tʉ ɔŋ fɛ bɔŋ bʉʼka nɔ tíi ɔ, tíi bɔŋ. 13 Haʼ ndə bə nyɔ̀ʼ mu ŋwɔʼnə-Nyii mbɔ, "Mɔ nɔ kə kʉ̀ʉ Jakɔ bɔŋ bàa Ɛso."

14 Bʉʼʉ bu ghɔ̀ŋ mbuka ndʉʉmɛ? I dʉ̀ʼ mbɔ Nyii tʉʼ kwɛ̀ nubə ndyʉndyʉ fɛ mɛ? I mə nə bɛ nɔ fɛ! 15 Bʉʼka ɔ nɔ nə gìe tʉ Mushi mbɔ,

"Mɔ bu dʉ̀ʼ tʉvyiikə tʉ wo ndə mɔ kʉ̀ʉ ndə mədʉ̀ʼ tʉvyiikə tʉ ɔŋ,

mɔ bɔŋ-bu-leʼ kie tʉvyiikə tʉ wo ndə mɔ kʉ̀ʉ ndə məkie tʉvyiikə tʉ ɔŋ."*

16 Nɔ, nɔ bɛ ŋkʉʉnə-tʉʉ-Nyii ndə mədʉ̀ʼ tʉvyiikə-i. Woməsʉʉ mə séʼ byuunɔ fɔ̀ʼ ndə məchìi tʉ-Nyii-kə vyíi ndəŋ ɔŋ fɛ.

17 Bʉʼka mu ŋwɔʼnə-Nyii, Nyii nɔ kə ghɔ̀ŋ tʉ Fɛlo mbɔ, "Mɔ nɔ kóʼhə a ghɔʼ bʉʼka luu-ɔ̄, mbɔ mɔ chʉʼ dʉ̀ʼ ghʉəʼkə-ɔŋ mu məchimbi-a, b̈ə bɔŋleʼ lɔ̀ʼ yie-ɔ yə̀ŋ chisêkə fúu." 18 Nɔ ndʉʉmɛ, Ñyii nɔ kie tʉvyiikə ndə wotəmiyɔŋ ndə ɔ kʉ̀ʉ, kə́ shʉ́əhə fyii wotəmiyɔŋ ndə ɔ kʉ̀ʉ.

19 Mbyu wo mu bii bu bíʼtə tʉ mɔ mbɔ, "Kaʼ bɛ nɔ, bəkɔ Nyii bàa wo təka ndʉʉmɛ? Bəkɔ chɔ́ʼ nda chɔ́ʼ nukə ndə Nyii kʉ̀ʉ mbɔ ï bɛ tʉ ɔŋ?"

20 A bɛ nda Oo woməsʉʉ ndə bəkɔ a bə̀ŋhə chu-Nyii? Bəkɔ fɔkə ndə bə bɔ́ŋbɔ́ŋ, mə gìe tʉ wo ndə ɔ bɔ́ŋ ɔŋ mbɔ, "Chìi ka a chìi mɔ mənɔ mɛ?" 21 Buŋ ndə nɔ, wo ndə ɔ tʉʼ bɔŋ kyʉʉtə nɔ kie ghʉəʼkə ndə məfɔ̀ʼ nə ghɔŋkə ndə ɔ kʉ̀ʉ, ndə məbɔ́ŋ kyʉʉtə ibûu ndə mbəʼ-kəghɔŋ-kə imɔʼ, chìi mbyu kyʉʉ imɔʼ i bɛ ndə yi-ŋgwuŋ-yə, chìi ibɛʼ-yə ndə kyʉʉ njʉnjʉ. 22 Nɔ bɛ haʼ nɔ ghɔ, buŋ ndə Nyii kie ghʉəʼkə ndə mədʉ̀ʼ tʉʉbʉə-e bɔŋleʼ chìi bə kínə ghʉəʼkə-i, ɔ nɔ tʉʼ lyʉ̀ʉ yá fyii-i te kyʉʉtə ndə tʉʉbʉə-e kie ndə məshíʼ ndəŋ bɔŋ, ndə bə nɔʼ nə shʉ̀tə bɔŋ tʉ́ʼ ndə məkwú bɛ́. 23 Ɔ nɔ chìi yɔ̄ŋ-yə ndə məchìi fɔŋ məgʉə-e báa ndəŋ bʉə ndə ɔ nɔʼ dʉ̀ʼ tʉvyiikə-i tʉ bɔŋ ndə bə nɔʼ kə shʉ̀tə tʉ́ʼ ndə məgʉ́ə, 24 buŋ təkɔmə bʉʼʉ ndə ɔ nɔʼ tíi bʉʼʉ, təmə bɛ haʼ bə mu bʉə-Juu fɛ, bɔŋ hə mu bʉə ndə bɔ̂ŋ gòʼ təmə bɛ bʉə-Juu fɛ.

25 Haʼ ndə ɔ gìe mu ŋwɔʼnə Hosia mbɔ,

"Bʉə ndə bɔŋ gòʼ təmə bɛ bʉə-bɔŋ fɛ,

mɔ bu tíi bɔŋ nə bʉə-bɔŋ,

Mɔ bɔŋ bu kʉ̀ʉ bʉə

ndə mɔ kə gòʼ təmə fəŋ kʉ̀ʉ bɔŋ fɛ."*

26 "Bɔŋ haʼ mu yəŋkə ndə bə kə ghɔ̀ŋ chɔ tʉ bɔŋ mbɔ,

‘Bii kaa bʉə-bɔŋ fɛ.’

"Chɔ, bə bu tíi bɔŋ nə,

‘Vâa-Nyii ndə ɔ bɛ ghɔ.’ "*

27 Adaya nɔ nə gwía te bʉə-Isilɛ mbɔ,

"Buŋ ndə bʉə-Isilɛ yɔ́ŋ tə bɛ nə sɛkə ŋgwuu-muu,

nɔ bɛ haʼ mbyuhə məniʼ ndə bɔ̂ŋ kie ŋkwaaNyii.

28 Bʉʼka nukə ndə Tiekətʉ gìe, nɔ bɛ yɔŋ ndə ɔ bu fɔ̀ʼ kəchisê tə mìʼtə təmə kwìhə fɛ."*

29 Ndə Adaya gìe ndə ibɛʼ-yə yəŋkə i buŋ fyú sê mbɔ,

"Kaʼ Tiekətʉ ndə ɔ kie ghʉəʼkə kəghɔ-ɔ inchəŋ

kə gòʼ təmə yʉ́ʼnə ghɔkə-i hə ndəŋ mbyu-bʉə-hə ndə mətʉ́ʼ ŋgwie-yʉʼʉ fɛ,

təmə bə nɔʼ kə yʉ̀əʼ bʉʼʉ bənchəŋ nə Sodɔŋ ghɔŋbə Gomola."*

30 Bʉʼʉ bu ghɔ̀ŋ mbuka ndʉʉmɛ? Mbɔ bʉə ndə bɔ̂ŋ gòʼ təmə bɛ bʉə-Isilɛ fɛ, gòʼ təmə kə́ kɔ̀ɔtə ndə məbɛ ndyʉndyʉ fɛ, kia kə bʉ̀nə bɛ ndyʉndyʉ la, kə́ bɛ məbɛ ndyʉndyʉ ndə ĩ gwè hə ndə məmɔ̀ʼfyii ndəŋ Nyii, 31 bɔŋ bʉə-Isilɛ ndə bɔ̂ŋ kə́ kɔ̀ɔtə bɔ̌ŋ nuʼ-Nyii ndə məbɛ ndyʉndyʉ tʉ Nyii, kia kə kɔ̀ɔtə kəŋkaa ndə məfɔ̀ʼ la? 32 Chìi ka? Bʉʼka bɔ̂ŋ nə kə́ kɔ̀ɔtə ndə məmɔ̀ʼfyii ndəŋ Nyii fɛ, bɔ̂ŋ nɔ kə́ kɔ̀ɔtə bə nə nubə ndə bɔ̂ŋ kə́ fɔ̀ʼ. Nɔ, bɔ̂ŋ wɔ̀tə ndəŋ ŋgoʼ ndə ĩ chìi bʉə wɔ̀tə. 33 Haʼ ndə bə kə nyɔ̀ʼ mu ŋwɔʼnə-Nyii mbɔ,

"B̈ii nyíɛ, mɔ bu mɔ̀ʼ ŋgoʼ Sayɔŋ ndə ĩ chìi bʉə wɔ̀tə,

lɔkɔʼ ŋgoʼ ndə i bu chìi bʉə gwùtə.*

Bɔŋ wotəmiyɔŋ ndə ɔ bɛ́ŋ ɔŋ,

bə kʉʉnə mɔ̀ʼ tʉvyiikə-i fɛ."*