1 Batom aYeso ni ishɛrɛp bafi ikuus fɛ́ ba se ni mben aJudiya fok, fok Ícɛn-iduk mi shan ifɛ̀ Adakunom bà. 2 Nek anɔng, izen fɛ́ aBitrus bun sak ni aRushelima, bayɔng fɛ́ ba tees naton nggɔn iya katse ku te ashon, 3 ba fɛ̀, <<Ngɔn tsi nɔɔs na nasa Ícɛn-iduk, bayɔng fɛ́ ba se dang iya katse, i tsi iyas gung ni iba.>>

4 ABitrus kpa ka ba taas ikyɛng fi ite, nkum itumung e, sak ni igang e: 5 <<Imi kin se ni wɔp aJopa, in tsin ra awon, in di abes, in wat in di ba tsin tisik ni ikyɛng ikak fɛ́ ba rosom atsok anaas e, ba tik ide sak narɔ fi imi kin di se. 6 In yɛrɛ kayɛt ko, in di nzam inyam azatse, ifɛ́ ayit, ni idɔng fi i kɔk nafa lee aben nɛ nanon aza. 7 Wat in fok kutɔ fɛ̀ ni imi, <Dorok, aBitrus. Tsɛɛt ina, da ya.>

8 <<Imi fɛ̀ ni kutɔ me, <ATisa, ko ni kuro, imi da kyem in ya awo! Neme fi in di se, ikyɛng fi i se gbɛk-gbɛk kɛ igbiridik e man nɔ nanu hom awo.>

9 <<Kutɔ azanɛn e ti ku fɛrɛng ifɛ́ afaa ye, <I bi yes ikyɛng fɛ́ Adakunom nye igbɛk-gbɛk kɛ ifɛ́ arik awo.> 10 Ikyɛng e deng te anɔng, ite kataat, ama anɔng, ba kɔrɔk iko sak naton.

11 <<Ni izen e yɔng, banet bataat fɛ́ ba bɛ́ ne na aKaisariya se ni nyeseng natitu ari yɔng fi imi di se. 12 Kabik e fɛ̀ ni imi ye da in bi ramin dang in kaba kuus mo awo, nek itonong fok akak se zɛɛt awo. Baruneng karataat kin tse gung ni imi, ngma yit in nɔ yit ari anet e. 13 A ki tak yit kpaf fɛ́ a di atomaza ni nyeseng ari wu, fɛ́ a fɛ̀ ni wu, <Tom sak na aJopa, ba da yes aSiman ayɔng fɛ́ ba ku yes aBitrus. 14 A da ka bɛ́ ni itom fi i da sak ngɔn nɛ bafɛ́ ari ngɔn ngma kusum di ki sɛ isheshek.>

15 <<Ni izen fi in kpa cɛɛt, Kabik aJɛrɛ tik naton ba, kyɔn tɛ ka kin di tik naton yit ni itumung e. 16 Wat kuyiring di bɛ́ naton ikyɛng fɛ́ aTisa kin man fɛ̀ ye: <aYohana kin ras abatisma ne ashi, awɛt iyin ba bi ki ra yin abatisma ne Kabik aJɛrɛ.> 17 Ke Adakunom ka ba nɔk kunang kpaf ni kuyɔng fɛ́ a kin ki nɔɔk yit, iyit bayɔng fi in nɔɔk yit atsak na aTisa aYeso Kristi. Ki i se anɔng, imi yet angan fi i da tɛnɛng Adakunom ɛ?>>

18 Ni izen fɛ́ ba fok anɔng, nanan ba wat na nyeseng, ba tere Adakunom na ba nye, <<Árɔ, pet ni Ícɛn-iduk, Adakunom mi tarak irèn ifi itirik iwosong inɛn sak isɛs kutset.>>

19 Ama ifɛt aIstifanus, ba kpa tang bafi ikuus iyɔm makiyi. Nek anɔng, ba ka na shara yik-yik sak na narɔ zizɛɛt-zizɛɛt. Bakak tseng sak na aFinikiya nɛ aSayipurus, nɛ Antakiya. Ba teng ba shara ifɛ̀ aYeso sak na baYahuda kyɛk. 20 Bakak ayɛt bafi ikuus e na aSayipurus nɛ aSirin, ba tse na Antakiya, ba tse ba shara ifɛ̀ itek aYeso sak na BaGirik. 21 Kubɔk aTisa kin se gung ni iba, banet dot nɔɔk atsak ni ifɛ̀ bá, ba tirik, ba wosong inɛn bá, ba sot bafɛ́ aTisa.

22 Kucɛɛt ikyɛng fi ite me nɔ na ato bafi ikuus fɛ́ ba se na aRushelima, nek anɔng, ba tom aBarnabas sak na Antakiya. 23 Ni izen fɛ́ a tse a ta azɔng, a di itek fɛ́ Adakunom mi nye, a shining ni itɛrɛk iyɛ, a bang ka ba te gbagba ni kucɛɛt ye na ba ya kashon inesek atsak na aTisa ni iyɛ izining. 24 ABarnabas kin yet anet nhwyɛ, ayɔng fɛ́ Kabik aJɛrɛ mi ku shining, anet fɛ́ a bɛ̀ agap ni inɔɔk atsak. Banet dot di barang ni inɔɔk atsak na aTisa.

25 Ama anɔng, aBarnabas tseng sak na aTarsus nek itsɛt aShawulu. 26 Ni izen fɛ́ a ku sɛ, a tseng ni iwu sak na Antakiya. Ngma ba, ba sot azɔng na bafi ikuus iyɛ burang, na ba tees kudyɛng banet kucɛɛt atsak. Na Antakiya wu fɛ́ ba kin tumung iyes bafi ikuus aYeso ye bafi ikuus Anet-Isheshek.

27 Ni izen e yɔng, batan bakak nes na aRushelima ba tisik sak na Antakiya. 28 Azining ayɛt ba fɛ̀ ba kin ku yes Agabus, a dorok tsik ni inyim ba ikak, ayɛt kushining abik, a tak ibes iduk nzong fi i da kpa kazatse ngma kusum. (Ibes e shining ni izen fɛ́ aKalaudiyus se ni iya igwɔm.) 29 Nek anɔng, bafi ikuus fɛ́ ba se na Antakiya tɔ fok ba da nye itom nkyɔrɔk fi nda kyɛk kudaam sak na bafi ikuus fɛ́ ba se na aJudiya, kaangan da nɔɔk kpaf na agap wu. 30 Ba kin ra anɔng e, ba ma yirik ba aBarnabas na aShawulu na ares e, nɔng ba bin tse ba nɔɔk bashɔn bafi ikuus fɛ́ ba se na aRushelima.