1 Ni izen fɛ́ ba mi won fok in da wɔk yit sak na aItaliya, ba nabak aBulus, ni isherep bafi inyang e ni bɔk agbat batsom akak fɛ́ ba ku yes ye aJuliyɔs, azining ayɛt kudyɛng Agustus. 2 In nɔ yit kukyɛ ashi fi ku ne ni wɔp Adaramitiyum, fi ku da gosok ni nwɔp anu ashi na fi mben Asiya, in kpa wɔk yit ayɛt ashi. Aristakus anet aTesaloni na anet aMasedoniya kin se gung ni iyit.

3 Akatson, in tsin ta yit na aSidon. AJuliyɔs tonong aBulus ishim, a ku won a tse narɔ bafidang nɔng ba bin ku nɔk ikyɛng fɛ̀ a shim. 4 In dorok yit azɔng, in wɔk yit ayɛt ashi nek áwun fɛ́ a tɛnɛsɛ kutseet e, in tsin gorok yit abak izek aSayipurus nek kuwun e ra se lɛɛ abak kayɔng. 5 Ni izen fi in mi tat yit kukyɛk fi ku se bakat ni mben aKilikiya nɛ aPamfiliya, in tsin ta yit na aMera ni mben aLikiya. 6 Azɔng wu fɛ́ agbat batsom e sɛ kukyɛ ashi fi ku ne na Alekzandiriya fi ku da tseng sak na aItaliya, a ki te yit ayɛt ko. 7 In wɔk yit hwyɛ ni ko nnom dot, ni mgbang in da ni tsin ta yit bakat na aKinidus. Ni izen fi kuwun e ki gaat yit iya kashon, in tin tirik yit sak abak karɔ fi kuwun e ra se lɛɛ, in gorok yit abak izek aKirit bakat ne aSalmoni. 8 In woso bɔrɔng yit hwyɛ anɔng, in da tsin ta yit narɔ fɛ́ ba yes ika ye karɔ ifɔɔn katek, bakat ni kuwɔp aLasiya.

9 Nek izen fi in beseng yit ni irèn, kutseet akyɛ-ashi mi sot ikyɛng nnyim, nek izen e yɔng iyɛ ngmash ni igang, na amok ifuut anɛn mi tsang got, wat aBulus ka ba nɔk itabak, 10 ye, <<Ábaruneng, in di fok kutseet kang da bɛ́ na kawɛy gyet awo sak ni kukyɛ ashi me nɛ acet e, ngma sak ni ntset yit.>>

11 Awɛt agbat batsom e, rawu dang fok itabak aBulus, a wees ato ni ifɛ̀ anet ikɔk kukyɛ ashi me, nɛ atek kukyɛ ashi me ningya. 12 Nek izen awun azɛng bɛ bakat, nek anɔng, imak se gyat na ba saas akyɛ-ashi na a fɔrɔng azɔng awo. Nek anɔng, banet dot nɔɔk itabak fok ni in ya yit kashon ni kutseet, nyan in tsin in ta yit na aPinikis, nɔng in da fɔɔn yit azɔng ma ikos got. APinikis me bɛ́ karɔ inyeseng akyɛ-ashi na aKirit fɛ́ ka yere kabace fɛ́ abatin nɛ kabatin fɛ́ abace.

13 Ni izen fi kuwun fi ku ne abatin kpa fɛsɛm hwyɛ, banet e nye nyan kudaam bà mi gang, nek anɔng, ba kɔrɔk kutsɔm fi ku nyeseng ni kukyɛ ashi me, ba kpa di kuus kufam izek e, bakat ni ice ibanang izek aKirit e. 14 Dang nin tse yik-yik, áwun iririm fɛ́ ba yes ina, <<awun abace afi iwurukunom>> a ne ni izek e. 15 Ni izen fɛ́ awun e nyiming kukyɛ ashi me, fɛ̀ a sak kukyɛ ashi me gaat iserek, in won yit kuwun e ki yirik yit sak narɔ fi kushim kyɛk. 16 Fi in tsin gorok yit ama kizek kakak fɛ́ ba yes iye izek aKauda, narɔ fi kuwun e ra se lɛɛ, ni mgbang fi in di kɔrɔk yit kabankyɛ ashi ni fam kuratek e.

17 Ama fɛ́ ba mi kɔrɔk kabaane me, ba te ika ayɛt kukyɛ ashi me, ba karam kukyɛ ashi me ni ndun kɔn ku bi sarak. Ba tisik ni kutsɔm fi ku kyɛɛs kutseet kukyɛ ashi me, nɔng kuwun e ni ku yirik kukyɛ ashi me nek ikɔk e ka ba gaat. Ba nye anɔng, nek ba fok nnyim kɔn kukyɛ ashi me bi tsi ku fo ni iba ayɛt izek aSirtis. 18 Ashi me ya kashon ni inye fuu, nek anɔng, akatson, ba kpa bara acet e ayɛt ashi. 19 Ni kunom kufɛ́ ataat, ba bara ares itomong kukyɛ ashi me ni nbɔk bá ayɛt ashi. 20 Fin sok yit nnom gaan vit idi kunom ke, ádat ayi, ni itsombos e woso kuren gyet awo, in nɔɔk yit nwaa kutset yit.

21 Ama fɛ́ banet e mi sok nkɔs dot dang kuyak, aBulus dorok tsik nate ba, a fɛ̀ ni ba, <<Ábaruneng, i fi di kuus yin itabak hom, fin fɛ̀ da nin dorok ni in wosong yin aKirit awo, ke kawɛy kang ni ibeseng yeng ki sɛ yin awo. 22 Ngma na anɔng, in shim in fɛ̀ ni iyin, di barang yin agap iyɛ, nek vit anet azining fɛ́ a da wey ayɛt yin, nkum kukyɛ ashi me ko kyek fi ku da wey. 23 Nek natuk kang atomaza Adakunom fin in yet afu, ayɔng fi in yɛɛt asam wu, a nyeseng ni fam in, 24 a fɛ̀ ni mi, <ABulus, i bi fok nnyim awo. I se gbing ngɔn da tsi i nyeseng ni ishɔt ashon aKaisar, di nek itek Adakunom sak ni ngɔn, a mi da nɔk kutset banet bang ngma fɛ́ ba se na ashi gung ni ngɔn.> 25 Nek anɔng, ábaruneng di barang yin agap iyɛ, nek imi bi inɔɔk atsak na Adakunom fok i da te kpaf anɔng ti iwu di fɛ̀ ni imi. 26 Ngma na anɔng, in da tsin carak yit mben ni kizek kakak.>>

27 Natuk kafi kusɔk abe anaas, ba ren se ni i ki tirisi yit na izek aMeditereniya, bakat kate atuk, bafi ikɔk kukyɛ ashi me yes gyan ngmash nin sɛ yit mben. 28 Ba mara kutsik ashi me, ba sɛ kutsik e se atak anakat azining ni nsɔk nfaa. Ama ki izen gyet, ba tɛ ba sok imaas e ba sɛ nsɔk agyɛng azining. 29 Nek nnyim fok kɔng in bi tsin in nyim yit na ata, nek anɔng, ba tik na anyin atsɔm anaas fɛ́ arɔ ni kutseet ama kukyɛ ashi me. Ba ra awon mok mgbey ni in se.

30 Nek itsɛt irèn ihwyet, bafi ikɔk kukyɛ ashi me, tik na kabankyɛ me ayɛt ashi, na ba nye tɛ ba shim ba bang tik na anyin atsɔm ama kukyɛ ashi me. 31 ABulus fɛ̀ na agbat batsom e, ni isherep batsom me, <<Ke da banet bang sot ayɛt kukyɛ ashi me awo, vit anet fɛ́ a da sɛ kutset.>> 32 Nek anɔng, batsom e tɛsɛng ndun kabankyɛ ashi me, ba won ika ka kpa azika.

33 Na kadiding tsin tsɛt ka te gbey, aBulus di ban ni ba fok na ba yas, a fɛ̀ ni iba, <<Nkɔs kusɔk abe anaas atut, i se yin na ayɛ gak, vit ite ikyɛng nanu, i rayin kuyak. 34 Nek anɔng, in tsin ra awon ni yin, yas yin nek kukyang irɔm yin. Vit azining yin fɛ́ a da bit kukwey ice wu.>> 35 Ama fɛ́ a mi gang kucɛɛt, a sok akpam, a di ra awon na Adakunom azɔng ashon bà. A but iwu, a kpa iya me. 36 Na anɔng, ba di sɛ agap iyɛ, ba kpa yas ice ba. 37 Ngma yit in kin se yit banet anakat afaa ni nsɔk nkara ina karataat ayɛt kukyɛ ashi me. 38 Ama fɛ́ ba mi yas na ka ba kyem, ba bang kyɛɛs kunanang fi kukyɛ ashi sok, ba bara ica kuyak sak ayɛt ashi.

39 Ni izen fɛ́ kadiding te gbey, ba kyem ba rēn mben awo, ba di kawɔ ni izɛk, ba shim ba da nɔ ni kukyɛ ashi me azɔng ke ba da kyem. 40 Ba tɛsɛng ndun fɛ́ ba di rosom atsɔm fɛ́ a yit kukyɛ ashi me, ba won ina ayɛt ashi, ba wat tɛsɛng ndun ikyɛng fi i tirisi kukyɛ ashi me. Ama anɔng, ba tarak nkpin fi in se ashon kukyɛ ashi me kpaf abak fi kuwun di nes, ba wɔk sak ni nzɛk. 41 Awɛt kukyɛ ashi me tsi ku carak ázék, ku di berem sak ayɛt ázék e. Kashon e nɔ meel vit iserek. Kukyɛ ashi me kpa sarak ama nek kuren ashi.

42 Batsom me tsɛt ke ba fɛs nnon inyang e, kɔng akak ba bi wɔk ayɛt ashi na hwyet. 43 Awɛt nek agbat batsom me shim aBulus na sot ni kutset, a ka ba ro mo inye ikyɛng fɛ́ ba shim inye me. A sak bayɔng fɛ́ ba rēn iwɔk na ba tung furu sak amatse, na ba tse ba ta ni mben. 44 Nsherep e da ne ba wɔk naton afak-fak ákon, nɛ naton acɛk irɔm kukyɛ ashi me. Na anɔng wu, kaangan di tasak ni mben.Kutseet ishara ifɛ́ itek aBulus kufɛ anaas