Ntomong Batom 23

1 ABulus di sak ayisi na bashɔn azumung e, a fɛ́ ni iba, <<Ábaruneng, kayɛt iyɛ hom se cɛ́l naton kutseet hom ashon Adakunom sak atut ana.>> 2 Ni ifok anɔng, agbat-agbat àware Ananiyas sak bayɔng fɛ̀ ba nyeseng bakat ni iwu na ba ku carak kanu. 3 ABulus fɛ́ ni wu, <<Adakunom bi da carak ngɔn, ngɔn anet nanu nafaa! Ngɔn sonong azɔng ni di ras ishɔt ni irèn ntsi, ni ngɔn ice ngɔn tsin beseng ntsi me fok ba di carak!>>

4 Bayɔng fɛ́ ba nyeseng bakat na aBulus e, ba fɛ̀ ni wu, <<Ngɔn shim i tosong agbat-agbat àware Adakunom ɛ?>> 5 ABulus fɛ̀ ni iba, <<Ábaruneng, da imi rēn fok iwu wu a yet agbat-agbat àware awo, nek i se ni ijɛk fok, <I bi nye amaan fɛ sak na akɔk-ashon banet ngɔn awo.>*23:5 Ban di yin: Iwuruk 22:28.>>

6 Ni izen fɛ́ aBulus di fok kazumung e bɛ́ BaFarasi nɛ BaSadusi, a ta kutɔ nate kazumung e, <<Ábaruneng, imi yet aFarasi, arim aFarasi, nek anɔng wu ba tsin di ra ishɔt nek ite iyɛ fi in bɛ́ nek idoro bafaben.>>

7 Nkum fɛ́ a fɛrɛng anɔng, nanan dorok nate BaFarasi nɛ BaSadusi me, kazumung e wat ka te shangaring, 8 nek BaSadusi nye fok vit idoro bafaben, vit batomaza, vit kabik, awɛt na BaFarasi nye ngma nkyɔrɔk e yɔng di se.

9 Iwɔng dorok makiyi, bafi itees ntsi me bakak fɛ́ ba yet BaFarasi, dorok ba kpa nanan na agap ye, <<Iyit sɛ yit anet yong ni inɛn ikikak awo. Iyin rēn yin anɛ nyen kabik ke atomaza ayi mi cɛɛt ni wu anɛ?>> 10 Nanan e dorok cuut ni kuren fi isak agbat-agbat batsom e fok nnyim fok nyɛn ba da cɛkɛt aBulus icɛk-icɛk e. Nek anɔng, a sak batsom e, na ba tik, na ba tenat aBulus ni bɔk ba, na ba nɔ ni iwu ni iwɔp batsom.

11 Natuk e yɔng, aTisa nyeseng ni fam aBulus, a fɛ̀ ni wu, <<I bi fok nnyim awo! Kyɔn ti fi i kin di shara ifɛ̀ hom ni aRushelima, i da tsi i nye kpaf anɔng na aRoma.>>

Ba moon kanu ba da fɛt aBulus

12 Akatson baYahuda moon kanu, ba sok kushii, vit iba ni kuyak, vit iba ni isɔ ikikak ma ba sok kutset aBulus ninyɛn. 13 Banet kin wat nsɔk nnaas fɛ́ ba kin moon kanu me. 14 Ba tse ba sɛ ágbat-ágbat áware nɛ bashɔn, ba fɛ̀ ni iba, <<Iyit mi sok yit kushii, vit ikyɛng fi i da nɔ nanu yit ma in sok yit kutset aBulus ninyɛn. 15 Nek anɔng, won iyin nɛ kazumung karatek da tsɛɛt yin irèn na agbat-agbat batsom, i da ku wɔrɔk yin fok na i ki bɛ yin na aBulus ishim ibang fok yin kucɛɛt wu me. Iyit mi kana nye yit in da sok yit kutset wu dang na a ta azeng.>>

16 Awɛt izen fɛ̀ arim anganeng aBulus fok ikyɛng fi i tsin tseng, a di berem ni wɔp batsom e, a tse a tak aBulus.

17 Nek anɔng, aBulus yes akɔk batsom e akak, a fɛ̀ ni wu, <<Tsi tsa acam yo narɔ agbat-agbat batsom, a bi ikyɛng fɛ́ a shim a ku tak.>> 18 Nek anɔng, a tse ni ika narɔ agbat batsom e.

Akɔk batsom e, fɛ̀, <<Afi inyang aBulus sak ba di yes, a fɛ̀ ni imi in da bɛ́ na acam yo, nek a bi ikyɛng fɛ́ a shim a fɛ̀ ni ngɔn.>>

19 Agbat batsom e, yit kubɔk kacam e, a ka ka kɔrɔk ni fam, a ka ka rip ye, <<Akyɛ de fi i shim i di tak ɛ?>>

20 Acam e fɛ̀ ni wu, <<baYahuda mi moon kanu fok ba da ka wɔrɔk, ni i ka ba bɛ́ na aBulus na kazumung karatek natson ye fok ba shim ba bang fok ifɛ̀ wu gyatgyat. 21 I bi fok ifɛ̀ ba awo, nek banet waat nsɔk nnaas fɛ́ ba mi nɛsɛk ni itsɛt nek iwu. Ba mi sok kushii fok vit kuyak, ni isɔ ikikak ma ba sok kutset wu ninyen. Ba mi kana nye, ba tsin tot ngɔn ni i fɛ̀ ey ni ifɛ́ ba kyɛk.>>

22 Agbat-agbat batsom e te acam e ni irèn, a fɛ̀ ni ika, <<Ngɔn bi tak akak fok ngɔn mi te kukun e ni imi awo.>>

Ba tseng na aBulus na aKaisariya

23 Ama anɔng, agbat-agbat batsom e, yes bakɔk batsom wu bafaa, a fɛ̀ ni iba, <<Tsi moon yin batsom anakat afaa, bafi isɔkɔ nsɔk kanakataat afaa, nɛ bafi ikɔrɔng nɛ ákon anakat afaa fɛ́ ba da tsɛ na aKaisariya ni itsɔm bɔk agyɛng azining afɛ́ atuk atut. 24 Nye yin ítsáp fɛ́ aBulus da ngarak, nɔng ba da tse ni iwu narɔ agwɔmna aFeliks vit ice song.>>

25 A ku jɛk kufumung ane:

26 Imi aKalaudiyus aLisiyas wu in jɛk kufumung kang sak na aZɔk agwɔmna aFeliks:

In da te show.

27 Anet yɔng, baYahuda kin ku tekap, ba kin shim ba sok kutset wu, awɛt imi ne nɛ batsom in, in bi in ku shan yit, nek in fok fok a yet nggon mben aRoma. 28 In tsɛt in rēn inɛn fɛ́ a ka ba nye ne, nek anɔng fi in di tse ni wu na kazumung karatek bá. 29 Ikyɛng fi in sɛ yet fok inɛn e se naton nrisim azaton ntsi bá, awɛt vit inɛn ikak fɛ́ a ra fi i kyem ba di sok kutset wu ke na ba ku te ni nyang ayi. 30 Ni izen fi in fok imoon anu fɛ́ ba mi nye naton anet e, In sak ba da bɛ́ ni wu vit ibeseng izen. In mi te bafi nkun wu na ba bɛ́ ba te kukun inɛn fɛ́ a ra ashon ngɔn.

31 Nek anɔng, batsom e nye ikyɛng fɛ́ ba ka ba sak mo, ba sok aBulus gung ni iba natuk sak ni wɔp Antipatiris. 32 Akatson, ba won bafi isɔkɔ tsɛng ni iwu, awɛt iba tɛ ba bun sak ni wɔp batsom. 33 Ni izen fɛ́ bafi isɔkɔ me tse ba ta na aKaisariya, ba nabak aGwɔmna kufumung e ngma nɛ aBulus e. 34 Ama fɛ́ a fa kufumung e, a ku rip fok iwu ne na akyɛ mben ɛ. Ni izen fɛ́ a rēn fok a ne na aKilikiya, 35 aGwɔmna me fɛ̀ ni wu, <<In bi fok ifɛ̀ ngɔn ki bafi nkun ngɔn ta azeng.>> A sak fok na ba fam aBulus ari inyang agwɔm aHiridus.