Ntomong Batom 28

ABulus na aMalta

1 Ama fi in tat yit kyang, in bin rēn yit fok ba yes izek e aMalta. 2 Banet izek e ki tonong yit nggɔn ntek makiyi. Ba fɛp kurong, ba ki yes yit nin in fok yit nek ba kin se ni iza, karɔ me shirim. 3 ABulus tusung kusom nkon, na tsin te me ni irong, afɔ tun amazɛrɛ ayɛt irong e, a ku te shɛng ni bɔk. 4 Ni izen fɛ́ banet izek e di fi ihwyen e di te shɛng ni bɔk wu, ba kpa cɛɛt wɔɔn ba ye, <<Na atsak e, anet yong yet afi ifɛɛs banet. Ngma ni ihwyet fɛ́ a nye na ashi, di ishɔt ku won a hwyet awo.>> 5 Awɛt aBulus tanang kubɔk, ihwyen e kpa ni irong, vit ice isong fi i ku sɛ. 6 Banet e di te ayisi fok a da kpa mos ke kukom wu da kpa aben ayi, awɛt ama fɛ́ ba woso tot, da ba di ikikak te ni wu awo, ba shesheng kuyiring bà, ba fɛ̀ a yet kaban-nnom.

7 Ikɔ akak kin se bakat azɔng fɛ́ a yet afɛ́ aPɔbiliyus, akɔk-ashon izek e. A ki shan yit ni mbɔk nfaa ayɛt ari wu, a sok nkɔs ntat na ya ni iyit. 8 Ada aPɔbiliyus kin se na meneng ni irɔk, a kin bɔrɔng ni ifes ni kutang. ABulus nɔ a tse a ku di, ama ku ra awon, a di sak mbɔk naton wu, a ku te kyang. 9 Ama fi ikyɛng e te anɔng, ishɛrɛp bafi nrɔk fɛ́ ba se ni izek e, bɛ́ ba ka ba te kyang. 10 Banet e ki nesek yit iratek ni irèn zizɛɛt, fi izen itseet yit nye, ba ki tusung yit nkyɔrɔk fi in shim yit.

In ta yit na aRoma

11 Ama nfɛn ntat, in nɔ yit ni kukyɛ ashi fi ku ya ikos azɔng ni izek e. Kukyɛ ashi me yet kufɛ́ Alekzandiriya fɛ̀ ba di maat nabanrɔm nnom nafɛrɛs e fɛ́ ba yes ina aKasto na Apolos. 12 In tsi in ta yit ni iwɔp aSirakus, in nye yit nkɔs ntat azɔng. 13 In won yit azɔng, in tsin ta yit ni iwɔp aRijiyum. Ama kukɔs kuzining, awun fɛ́ a ne abatin a kpa fesem, akatson in tsin ta yit ni wɔp aPutiyoli. 14 In tsi in sɛ yit bafi ikuus azɔng fɛ́ ba ki rini yit ni in nye yit nkɔs kanakataat azɔng ni iba. Na anɔng wu in tsi in di ta yit na aRoma. 15 Bafi ikuus fɛ́ ba se azɔng fok yi in se yit ni rèn, ba nes yik-yik, ba tse ba ku shan sak na aZere Apiyus, nɛ sak na atu batsen ataat. Ni izen fɛ́ aBulus di ta ayisi ni bafi ikuus e, a nɔɔk ifeng sak na Adakunom, a bang sɛ agap. 16 Ni izen fi in tsin ta yit na aRoma, ba nɔɔk aBulus kutu aziwu, na afi itsom azining fɛ́ a da kuyɛrɛ.

ABulus shara ifɛ̀ na aRoma

17 Ama nkɔs ntaat, a sak ba ku tusung bakɔk-ashon baYahuda. Ama fɛ́ ba mi nyim, aBulus fɛ̀ ni ba, <<Ábaruneng, imi nye ikikak imaan e sak na banet yit awo, da imi beseng nggɔn badakop yit awo, ngma na anɔng, ba di tekab na aRushelima, ba di nabak ni bɔk aRoma. 18 Ama fɛ́ ba di nyes nrisim zizɛɛt, ba shim ke ba di won, nek vit inɛn fɛ́ ba di sɛ ni ide fi i kyem ba di sok kutset hom. 19 Awɛt fɛ́ baYahuda raba fok da ba di won awo, i di sot gbing ni in tos kanak aKaisar di fok, da iyet fok imi bin ite kukun banet hom awo. 20 Nek anɔng fi i sak, in tsɛt ku di yin, ni ncɛɛt yit. Ayet fok nek ite iyɛ aIsrela wu fɛ́ ba di te mo anyang nang.>>

21 Wat iba fɛ̀ ni wu, <<Iyit mi sɛ yit kufumung kukak fi ku ne na aJudiya azaton ngɔn awo, ama anɔng, vit akak ayɛt baruneng yit fɛ́ ba ne azɔng, fɛ́ a mi te kukun ke a ki tak yit ikikak imaan e azaton ngɔn awo. 22 Awɛt iyit di yit i se gyat ni in rēn yit akyɛ yet kuyiring ngɔn ɛ, nek in rēn in fok banet kaakyɛ nyes aduk icɛɛt naton irèn ifas e.>>

23 Ba sak kunom kukak fɛ́ ba bi di nyim na aBulus, atuk e yɔng, ba tse narɔ fi iwu di se, banet e wat bayɔng fɛ́ ba kin tsang tse. Nkum kadiding sak kahwyɛ, a ka ba bis e, na ka shara ifɛ̀ igwɔm Adakunom, a tsɛt a shesheng kuyiring bá naton aYeso ni irèn ikyɛng fɛ́ afumung aMusa nɛ afɛ́ Batan jɛk. 24 Bakak ayɛɛt ba shesheng kuyiring e, awɛt bakak raba inɔɔk atsak. 25 Nanan nɔ nate ba, ba kpa tsees ama fɛ́ aBulus mi gang kucɛɛt ka, <<Kabik aJɛrɛ kin tak atsak na badakop yin, ni kucɛɛt fi ku ne nanu atan aIshaya fok:

26 << <Tsi tak banet bang, <<I da foos yin awɛt i da rēn yin awo, i da ya yin kashon ni iyɛrɛ yin awɛt i da di yin awo.>>

27 << <Nek ayɛ banet bang mi te kashalang, i ka ba se gbang na ba foos na ato bà, ba mi famasa ayisi bà, ke da anɔng awo, ke ba di di na ayisi me, ke ba foos na ato bà, ke ayɛ bà irērēn ikyɛng fi ise, ke ba tirik, ni imi ka ba te mo kyang.> 28 Nek anɔng, in shim ni i rēn fok Adakunom mi tom isheshek wu sak ni Ícɛn-iduk; iba di ki wes ato ni de.>>*28:28 Afumung akak afɛ́ ashon fɛ́ ba kin jɛk ni mbɔk bɛ̀ ibyat ifɛ́ 29 ane: Ama fɛ̀ a fɛrɛng anɔng, baYahuda kana kam, ba woso ra nanan wɔɔn ba.

30 ABulus nye ayɛ afaa azɔng nitu isot wu, na shashan bayɔng fɛ́ ba shim ku di wu. 31 Na shara ifɛ̀ igwɔm Adakunom na agap iyɛ, vit ikyɛng itɛnɛng, na tees banet ifɛ̀ aTisa aYeso Kristi.