5 Awɛt na aBitrus resek mo ari inyang e, bafi ikuus ra awon makiyi nek iwu.
Ba nye aBitrus isheshek ayɔɔt ari inyang
6 Natuk akatson fɛ́ aHiridus bi tsɛɛt aBitrus ishɔt, a se ni nda, ba mi ku rosom na anyang afaa nate batsom bafaa. Na batsom e bakak se ni itot katisi kari inyang e. 7 Ni izen izining, kari inyang e wat ka ron gbey, atomaza bɛ́ a nyeseng ashon aBitrus. Atomaza me ku bamang mok na a shemeng, a fɛ̀ ni iwu, <<Dorok, ziri ziri!>> Anyang e wat a tik jerek ni mbɔk wu. 8 Wat atomaza me fɛ̀ ni wu, <<Te ares ngɔn, te akpatak ngɔn>> Ama fɛ́ a nye anɔng, atomaza me fɛ̀ ni wu, <<Te kukpin amatse ngɔn, di kuus mo.>>
9 ABitrus dorok a di rosok atomaza me ba won kari inyang e. Iwu yes gyan a tsin rasak nabos. A kyem a rēn fok ikyɛng fi i tsin te yet atsak awo. 10 Ba bɛ́ ba got bafi itosok imɛsɛng e, ne bafɛ́ afaa me, izen fɛ́ ba bɛ́ ba ta na katisi ari inyang kafi igang e sak ayɛt iwɔp fɛ́ ba nye ika na atsom, katisi me wat ka tarak ikyɛng ka. Nek anɔng ba di tatɔk, ba kpa tseng na agbat irèn iwɔp e. Izen fɛ́ ba se na anɔng, wat aBitrus fɛ́ di atomaza me mi te bit, a ku won aziwu.
11 Ni izen e yɔng wu aBitrus bun ni nhwyɛ wu, a fɛ̀, <<Ikyɛng e yet atsak, aTisa tom atomaza wu, na a di sheshek ni bɔk aHiridus, na a di tun ni ikyɛng fɛ́ baYahuda tsɛt na ba nye ni imi!>>
12 Ama fɛ́ a di anɔng, a yit irèn sak ari aMarya, nggɔ aYohana fɛ́ ba ku yes aMarkus, karɔ fɛ́ banet mi kana tusung dot ba se na awon.