1 Ama anɔng, aBulus won kuwɔp Atena, a tseng sak na aKorinti. 2 A tse a sɛ aYahuda akak fɛ́ ba ku yes Akwila, afɛ́ aPɔntus. Akwila nɛ abining wu aPrisila mɛsɛng ne ni mben aItaliya sak ni mben aPɔntus, nek kucɛɛt fɛ́ ada mben aRoma aKalaudiyus kin nye fok kaakyɛ anet aYahuda na a won kayɛt iwɔp aRoma. ABulus tse a di ba Akwila me. 3 Nek kutomong ibɔk wu yet kuri me kuzining ni iba, a sot gung ni iba ba ra kutomong, kutomong ba yet kufi ibat abut. 4 Kaakye kunom aSabat, aBulus tses na tɔ ni iba, a shim isɔ ice baYahuda nɛ BaGirik.

5 Ni izen fɛ́ aSilas nɛ aTimoti ne na aMasedoniya, aBulus nɔɔk kuhwyɛ wu ni ishara ifɛ̀ Adakunom, na tonoso baYahuda dɛdɛt fok aYeso wu a yet Anet-Isheshek me. 6 Awɛt fɛ́ ba ya nanan, ni itok fɛ́ ba ku nye ne, a waat kukpin wu,*18:6 Ban di yin: ALuka 9:5. ama fɛ̀ ni iba, <<Nasok yin na na sot na ace yin! Imi mi wusup mbɔk hom. Nkum atut sak ashon, imi da tirik sak ni Ícɛn-iduk.>>

7 Ama anɔng, a won azɔng, a tseng sak ari anet akak fɛ́ ba ku yes aTitiyus aJustus, afi nnyim Adakunom. Kari wu se bakat ne karɔ inyis baYahuda. 8 AKirispus, anet fɛ́ a yet akɔk-ashon karɔ inyis baYahuda me, nɔɔk atsak ne aTisa, gung nɛ banet ari wu. Banet aKorinti dot fɛ́ ba fok ifɛ̀ aBulus, ba shan atsak, ba ka ba ra abatisma.

9 Ama anɔng, aTisa aYeso fɛ̀ ne aBulus atuk kak na nabos, ye, <<Ngɔn bi fok nnyim awo, ya kashon ni kucɛɛt, i bi te yuu awo, 10 nek imi se gung ni ngɔn, vit ayɔng fɛ́ a da ka ra kɛ a da man, nek in bɛ̀ banet dot ni wɔp kang fɛ́ ba yet banaan.>> 11 Nek anɔng, a bang sot azɔng iyɛ izining ni ibit, na ka ba tees ifɛ̀ Adakunom.

12 Ni izen e yɔng, na aGaliyo tsin yet agwɔm mben Akaya, baYahuda moon mbɔk naton aBulus, ba tse ni wu na azumung ishɔt, 13 ba tse ba fɛ̀, <<Anet yɔng di bang ne banet fok na ba kuus Adakunom ni irèn ikak fi da ntsi fɛ̀ awo.>>

14 Awɛt izen fɛ́ aBulus kpa cɛɛt, aGaliyo fɛ̀ ne baYahuda, <<Ke anet yong fɛ́ a beseng ntsi nkak kɛ a nye ikyɛng ikak imaane ayi, ki in sonong in da fok kukun yin. 15 Awɛt ayet fi ifɛ̀ me se naton kucɛɛt nɛ ayerek, ni ntsi yin kyɛk, tsi nye yin ifɛ̀ me ikyɛng yin. Imi ramin ifok kukun ti kuyɔng.>> 16 A sak ba ka ba tun na azumung ishɔt e. 17 Awɛt ba di ta mbɔk na aSostenes akɔk-ashon karɔ inyis baYahuda me, ba ku karang itsot azɔng ashon azumung ishɔt e. Awɛt aGaliyo rawu dang te kuhwyɛ wu ni ikyɛng fɛ́ ba se ne.

18 Ama anɔng, aBulus bang nye nnom gaan azɔng, a da ne te a tɔ na bafi ikuus, a da ne nɔ kukyɛ ashi sak na aSiriya, ba tseng gung nɛ aPrisila nɛ Akwila. Ni iba resek na aKɛnkɛrɛya, aBulus kot ice wu azɔng, nek a mang sok kushi. 19 Ba tse ba ta na Afisa, aBulus won ba aPrisila nɛ Akwila azɔng, iwu tse a nɔ narɔ inyis baYahuda, a tɔ na baYahuda azɔng. 20 Iba fɛ̀ ni iwu na a bang nye nkɔs gaan azɔng ni iba, iwu rawu a ya kashon ni kutseet. 21 Ni izen fɛ́ a se ni ite a tɔ ni ba, a fɛ̀ ni ba, <<Ke Adakunom shim, in bi ting bun azeng,>> a tɛ a nɔ kukyɛ ashi a won Afisa. 22 Ni izen fɛ́ a tse a ta na aKaisariya, a ngarak, ama fɛ́ a mi te show bafi ikuus, a tɛ bun sak na Antakiya.

23 Ama fɛ́ a nye nnom nkak azɔng, a won azɔng, a yit irèn nkum kuwɔp kuka sak ni kuya ni mben aGalati ni mben aFirijiya, a teng a di barasa bafi ikuus agap.

24 Ni izen e yɔng, aYahuda akak fɛ́ ba ku yes Apolos, afi iwɔp Alekzandiriya, bɛ ni wɔp Afisa. Ayet anet fɛ́ a rēn kucɛɛt gyet awo, a bi i rēn kufumung Adakunom gyet awo. 25 Ba kin man ku tees mo naton irèn ikuus aTisa aYeso. Tɛ anet fɛ́ kabik ku sɛs mo, a cɛɛt na di tees banet gyatgyat ifɛ̀ aYeso, ngma na anɔng, irēn wu gang nkum na abatisma aYohana kyɛk. 26 A kpa kucɛɛt vit nnyim narɔ inyis baYahuda, awɛt fɛ́ aPrisila nɛ Akwila wes ato ni wu, ba ku sok, ba tse ba bang ku tees mo ifɛ̀ Adakunom yɛt-yɛt.

27 Ni izen fɛ́ a shim a tat sak ni mben Akaya, bafi ikuus Afisa ku gbinding, ba jɛk kaban fumung sak na bafi ikuus ye, na ba ku shan ni mbɔk nfaa. Ni izen fɛ́ a tse a ta azɔng, a di sɛ bayɔng fɛ́ ba tsang shan atsak nek ízɔk Adakunom, 28 nek iwu kɔk nanan na agap nɛ baYahuda nate banet. A ka ba tonoso narɔ zizɛɛt-zizɛɛt ni ifumung Adakunom fɛ́ na tonong fok aYeso wu ayet Anet-Isheshek me.