1 Wat agbat-agbat àware me rip aIstifanus e ye, <<Kukun kang fɛ́ ba mi nye naton ngɔn, ku yet atsak ɛ?>>

2 AIstifanus e ka ba bun ni ifɛ̀ ye, <<Ábaruneng nɛ bada, fok yin ikyɛng fi in da fɛ̀. Adakunom Azɔk-Bazɔk, kin tonong ice wu sak na adakop yit aIbrahim ni iwu rēn resek mo ni mben aMesopotamiya, dang na a bun ni kusot na aHaran. 3 Adakunom fɛ̀ ni wu, <Won mben ngɔn, na banet ngɔn, tseng sak ni mben fi in da ka tonong.>*7:3 Ban di yin: Imɛsɛng 12:1.

4 <<Nek anɔng, adakop yit e, a won mben aKaldiya, a tse a sonong na aHaran. Ama iku ada wu, Adakunom ku tom sak ni mben nang fi iyin di se yin yɔkɔnɔng. 5 Ngma na anɔng, Adakunom tsang ku nɔɔk iya itekari mben e awo, ko kutak kuzining ngma awo. Awɛt Adakunom kin ku nye kushii fok, iwu ni nnon wu fɛ́ na bi ne ama wu, mben e bi sot nfuba. Ngma ni fi i yet, aIbrahim kin se dang nggon ni izen e yɔng. 6 Adakunom fɛ̀ ni wu ane: <Izít ngɔn, bi sot batsen ni mben fi da ku yet kufuba awo, ba bi sot basam, ba bi sɔ izot nfɛ́ ayɛ anakat anaas. 7 Awɛt in bi tabak banet fɛ́ ba ka ba nesek izot e, ama anɔng, ba bi wuruk ni mben e yɔng, ba bi di ya ntong azeng narɔ kang.>*7:7 Ban di yin: Imɛsɛng 15:13,14.

8 <<Ama anɔng, Adakunom nɔɔk aIbrahim amok iya katse fi i da sot ikyɛng iyiring irosom kushi me. Na anɔng aIbrahim di sot ada aIshaku, a ku ya katse ni kunom kufi nkara ama kutes wu. Ama anɔng, aIshaku bɛ́ a sot ada aYakub, aYakub bɛ́ a sot ada badakop yit kusɔk abe afaa.

9 <<Nek naman fɛ́ badakop yit kin bɛ̀ sak na aYusufu, ba ku rɛp tɛ asam sak na aMasat. Awɛt Adakunom kin se gung ni iwu, 10 a ku sheshek naton ngma ndaam wu. Adakunom kin nɔɔk aYusufu kutsitsɛng kutsik, fi ku sak a di sɛ itek ashon aFirauna agbat agwɔm aMasat. AFirauna sak aYusufu sot agwɔm mben aMasat, a ya igwɔm naton banet ari aFirauna ngma kusum.

11 <<Ama anɔng, aduk izong ikak kpa ni mben aMasat nɛ aKanan, nzong e bɛ́ ni izot makiyi, badakop yit kyem ba sɛ nayak awo. 12 Ni izen fɛ́ aYakub fok fok nayak di se na aMasat, a tom badakop yit ni kutseet kufi imɛsɛng. 13 Ni ku tse bá kufɛ́ afaa, aYusufu tonong ice wu sak barunyining, na anɔng wu aFirauna di rēn izit aYusufu. 14 Ama anɔng, aYusufu sak na ba tse ba bɛ́ na ada wu aYakub ni ishɛrɛp banet ari wu ngma kusum, ba kin se nsɔk kanakataat ina ntoon. 15 Ne anɔng wu aYakub dorok sak ni mben aMasat, azɔng fi iwu nɛ badakop yit di ku. 16 Ba kin kok nkom bá, ba tse na ba nɛsɛk na aShekem, ni irɛk fi aIbrahim kin shan ni itsɔm ni bɔk nnon aHamor na aShekem.

17 <<Fi izen bɛ́ bakat fɛ́ Adakunom da shining kushi fɛ́ a kin nye ne aIbrahim, kudot banet yit na aMasat di barasa makiyi. 18 Ba bɛ́ ba nye agbat agwɔm akak fɛ́ da a rēn ikikak naton aYusufu awo, a kpa ya igwɔm na aMasat. 19 A kpa nyes banet yit anyas makiyi, a di nyeseng na badakop yit, a ka ba te mo gbing-gbing na ba bara nabin nnon fɛ́ ba tes nɔng na da bin kus.

20 <<Kpaf izen e yɔng wu fɛ́ ba kin di tes aMusa, aMusa kin yet abɛrɛ nggon awo. Ba sok nfɛn ntaat na ba tsin ku nɛsɛk ari ada wu. 21 Ama fɛ́ ba ku tun amatse, angas aFirauna tse a di tetuk ni wu, a rasak narɔ wu ti nggon wu. 22 Ba kin tees aMusa kutsitsɛng bafɛ́ aMasat. A dorok na agap ni irēn icɛɛt makiyi.

23 <<Ni izen fɛ́ aMusa shining ayɛ nsɔk nnaas, a nye kuyiring a tse di bafi izit wu nnon aIsrela. 24 Fɛ́ a tse a ta azɔng, a sɛ anet aMasat akak na tsin nesek afi aIsrela mgbang, fɛ́ a tse a ku shan mo, a fɛt anet aMasat e. 25 AMusa nye gyan, banet wu bafi aIsrela da rēn fok Adakunom tsin ra kutomong a ka ba tun ayit isam. Awɛt banet e kyem ba di anɔng awo. 26 Akatson, aMusa bɛ́ a sɛ bafi aIsrela ba tsin kɔn wɔɔn ba. A tsɛt inye kusot ba, a fɛ̀ ni iba, <Ábaruneng, iyin yet yin baruneng! Akyɛ sak fi i tsin ra yin imaane wɔɔn yin ɛ?>

27 <<Awɛt ayɔng fɛ́ a se ni inyɔ afidang e, a wobok aMusa ni ifam, a fɛ̀ ni wu, <Angan da te ni isot agwɔm, fi i da ki tsɛɛt yit ishɔt ɛ? 28 Ngɔn shim i di fɛt imi, ti fi i di fɛt anet aMasat yɔng nire yɛ?>*7:28 Ban di yin: Iwuruk 2:14. 29 Ni izen fɛ́ aMusa fok anɔng, a teng sak ni mben aMidiyan, a tse a sonong azɔng tɛ atsen. Abining wu ku tes nnon namatek e nafaa na aMidiyan e.

30 <<Ama ayɛ nsɔk nnaas, atomaza tonong ice wu sak na aMusa ti kurong fi ku tsin ya kuci natse bakat ni Ihwyanang aSinai. 31 Ni izen fɛ́ aMusa di anɔng, a ku te yɔɔt ni ikyɛng fɛ́ a tsin yɛrɛ. A serek bakat, a da ban di, a fok kutɔ aTisa: 32 <Imi yet Adakunom badakop ngɔn, Adakunom afɛ́ aIbrahim, ni aIshaku, nɛ aYakub.>*7:32 Ban di yin: Iwuruk 3:6. Nkum fi kurɔm aMusa ka tiim, a kyem a sɛ iyɛ ting a di ya kashon ni iyɛrɛ me awo.

33 <<Adakunom ma fɛ̀ ni wu, <Tun akpatak ngɔn; nek karɔ fi i di nyeseng se jɛrɛ. 34 Di! In mi di mgbang banet hom na aMasat. In mi fok irus bá, nek anɔng in tik, in bi in ka ba bisik. Bɛ́ in da tom sak na aMasat e.>

35 <<Iwu aMusa me yong fɛ́ ba mang ku raba ni ifɛ̀ anu ye, <Angan da te agwɔm, fi i da ki tsɛɛt yit ishɔt ɛ?> Adakunom ice wu fɛ́ a ku tom na a sot agwɔm bà nɛ anet itun bà, itom ne nanu atomaza fɛ́ a tonong ice wu tɛ kayit fɛ́ ka tsin ya kurong. 36 AMusa wu a kin ka ba tun na aMasat ama fɛ́ a mi nye nkyɔrɔk ajingjing ni ntomong abes na aMasat, ni ikyɛng fɛ́ a nye ni Kugbat Kukyɛk Kuseng, a tseng ni iba nate ayit ayɛ nsɔk nnaas.

37 <<Iwu aMusa me yong fɛ́ a kin fɛ̀ ni nnon aIsrela yɛ, <Adakunom bi ki tom yin atan akak ti imi fɛ́ a bi ne nate yin.>*7:37 Ban di yin: Iyɛrɛk Ntsi 18:15. 38 Iwu kin tusung ngma banet aIsrela ayɛt ayit. A kin se azɔng gung na badakop yit ni izen fɛ́ atomaza kin cɛɛt ni wu ni Ihwyanang aSinai; iwu fɛ́ a kin shan ifɛ̀ fi inesek kutset fɛ́ a ki nabak yit ne.

39 <<Awɛt badakop yit raba dan wes ato ni wu, ba raba dan ku fok ifɛ̀. Ba shim ba tɛ ba bun na aMasat. 40 Ba fɛ̀ na aHaruna ye, <Ki nye yit nabannom fɛ́ na da ki kɔk yit kashon. AMusa yɔng fɛ́ a ka ka tse a ki tun yit na aMasat, iyit rēn yit ikyɛng fi ite ni wu awo!>*7:40 Ban di yin: Iwuruk 32:1. 41 Ni izen e yɔng wu fɛ́ ba nye nabannom ti ki nyak. Ba bɛ́s ni nabak-akuce bá sak ni ka, ba woso ira amok sak ni ikyɛng fi iba nye ni mbɔk bá. 42 Nek anɔng, Adakunom ka ba tirik kama, a ka ba wosong na ba ya ntong sak na ádat. Anɔng e se kpaf ni ikyɛng fɛ́ batan Adakunom ki mang jɛk ni fumung yɛ,

<Iyin nnon aIsrela,

ni izen fi i kin se yin

natse ayɛ nsɔk nnaas,

iyin kin di bes yin

ni nabak-akuce,

ni inesek yin ɛ?

43 Iyin kin kok yin

kubut ntsi aMolek,

nɛ àdat kaban-nnom yin na fɛ́ aRifan,

nabannom fi iyin kin nye yin,

nek i ka na ya yin ntong.

Nek anɔng, imi bi ki tsa yin

ni isam sak ashon aBabila.>

44 <<Ni izen fɛ́ badakop yit kin se natse, ba kin bɛ̀ Kubut fi ku tonong kusɛ Adakunom nate ba. Ba kin nye iko kpaf tɛ Adakunom di tak aMusa, a nye iko kpaf ni ikyɛng fɛ́ ba ku tonong. 45 Ama fɛ́ badakop yit shan kubut e, ba bereng iko gung ni iba sak ni mben nang fɛ́ Adakunom ro Ícɛn-iduk na yisi bá, a ka ba nɔk mo iko ni izen fɛ́ aJoshuwa tsin ka ba kɔk. Kubut e ya kashon ni isot azɔng sak izen aDauda. 46 ADauda sɛ awɛng ashon Adakunom, a ra awon nɔng a da nok karɔ isot Adakunom, adakop yit aYakub ntong. 47 Awɛt arim wu aSolomon wu a kin ne a nok Adakunom kari me.

48 <<Ngma na anɔng, Azɔk-Bazɔk da a sosok na nasa fɛ́ banet nos awo. Kpaf tɛ atan di fɛ̀,

49 <Adakunom fɛ̀,

<<Kazanɛn kaa ka yet

kuta igwɔm hom,

kazatse yet karɔ isaas atak hom.

Akyɛ kuri kari fi iyin

di ki nok yin ne yɛ?

Akɛ wu a yet karɔ ifɔn min ɛ?

50 Imi wu in nye ngma nkyɔrɔk

yɔng ni mbɔk yin awɛ?>> >

51 <<Iyin ágbarak ánet, bafɛ́ kɔnggɔt ayɛ, ánet fɛ́ da a foos ifɛ̀ awo! I se yin kpaf tɛ badakop yin: I rayin dan nesek yin Kabik aJɛrɛ kawat kaaki izen! 52 Akyɛ atan fɛ́ badakop yin kin won dan ku nesek iyɔm ɛ? Ba kin fɛɛs gung na bayɔng fɛ́ ba tak ibes kubɛ́ Anet Atsak e. Awɛt iyin ba i yet yin bafi irɛp e ni ifɛt e. 53 Iyin fɛ́ ba kin ki nɔk yin ntsi fi in ne ni bɔk batomaza, awɛt i di ra yin kutomong ni ina awo.>>

54 Fɛ́ bashɔn azumung e fok anɔng, a ka ba te fuu ni ibeseng iyɛ makiyi, ba ros anyi nek iyɛ beseng sak ni wu. 55 Awɛt aIstifanus ayɛt ishining Kabik aJɛrɛ, a cet ayisi sak azanɛn, a di ízɔk Adakunom, na aYeso ni inyeseng ni bɔk iyak Adakunom. 56 A ma fɛ̀, <<Di yin, in tsin yɛrɛ kazanɛn piyot nɛ Arim Anet ni inyeseng ni bɔk iyak Adakunom.>>

57 Ni ifok anɔng, ba famasa ato, ba kpa tang nkun na agap, ba di ngarak naton wu, 58 ba kpa ku sam sak ama iwɔp, ba kpa ku bara na ata. Kpaf izen e yɔng, bafi inɔɔk anu me, tusung ares bà ashon acam akak fɛ́ ba ku yes ye aShawulu.

59 Ni izen fɛ́ ba se ni i ku bara na ata, aIstifanus e ra awon ye, <<ATisa AYeso! Shan kutset hom.>> 60 A te akuut aben, a fɛrɛng ne agap ye, <<ATisa Adakunom, i bi sak inɛn deng naton ice bá awo.>> Ama fɛ́ a fɛrɛng anɔng, a men nda.