1 AShawulu run kama ifɛt aIstifanus.

Atuk e yɔng, izot iratek kpa naton bafi ikuus fɛ́ ba se ni aRushelima. Kaangan te washash sak ni mben aJudiya, bakak sak na aSamariya, nkum batom-aYeso kyɛk fɛ́ ba di weseng ni aRushelima. 2 Bayɔng fɛ́ ba di fit ni irèn ikuus, tse ba nɛt kukom aIstifanus, ba ku tos makiyi. 3 Awɛt aShawulu shim a wey na bafi ikuus gbindis. A teng a kuus nasa-nasa, na kok bamatek nɛ banyining sak ari inyang.

4 Bafi ikuus fɛ́ ba te shangaring e, ba shara ifɛ̀ me ngma na narɔ fɛ́ ba di sɛs ace bá. 5 AFilibus tik sak ni wɔp aSamariya, a tse a shara ifɛ̀ Anet-Isheshek azɔng. 6 Ni izen fi kudyɛng banet e fok kucɛɛt aFilibus, ba di ikyɛng ajingjing fɛ́ a se ni nye me, ba bang di nɔɔk nhwyɛ ni kucɛɛt wu. 7 Itséng wuru ni irɔm banet dot, ni i tang nkun na agap, bayɔng fɛ́ áduru irɔm bá mang kus nɛ ámerek banet sɛs kukyang irɔm. 8 Nek anɔng, banet iwɔp e nye iyɛ ikan makiyi.

9 Anet akak fɛ́ ba ku yes aSiman a se ni wɔp e, a mi fɔɔn na abok azɔng ni wɔp e, banet iwɔp aSamariya ngma kusum ayɔɔt ka ba yisik nek kabes yɔng fɛ́ aSiman ras. A tsosok kugwɔm fok iwu kyem makiyi, 10 ngma banet iwɔp e, baratek nɛ babane, ba ku nesek izen bá, ne ba nye, <<Anet yong, bɛ̀ kukyem fi ku nes narɔ Adakunom fɛ́ ba yes iko Kukyem Kuratek.>> 11 Banet e teng ba ku kuus mo nek a mi sok izen na ka ba tes ayɔɔt ni kuborok wu me. 12 Awɛt nkum fɛ́ ba di nɔɔk atsak ni ifɛ̀ itek ifi igwɔm Adakunom, ni ifi iyerek aYeso Kristi fɛ́ aFilibus ka ba shara ide, ba ka ba ra abatisma bamatek nɛ banyining. 13 ASiman ice wu a nɔɔk atsak, ba ku ra abatisma. A teng a di kuus aFilibus kaakyɛ fɛ́ a di tse, a ku tes yɔɔt makiyi fɛ́ a yɛrɛ nzam ntomong ajingjing ni ibes fɛ́ aFilibus ras.

14 Ni izen fɛ́ batom aYeso fɛ́ ba se ni aRushelima fok ye banet aSamariya mi shan ifɛ̀ Adakunom, ba tom ba aBitrus nɛ aYohana sak azɔng ni ba. 15 Ni izen fɛ́ ba tse ba ta azɔng, ba ra awon sak na Adakunom naton ba, nɔng ba bin shan Kabik aJɛrɛ. 16 Nek sak izen e yɔng, Kabik aJɛrɛ rēn resek dang di tik natoon ba, nkum abatisma fɛ́ ba ras ni iyerek aTisa aYeso wu kyɛk fɛ́ ba mi tsang ka ba ra ne. 17 Wat aBitrus nɛ aYohana di saas mbɔk natoon ba, ba wat ba sɛ Kabik aJɛrɛ me.

18 Fɛ́ aSiman di banet ses Kabik ama fɛ́ batom aYeso di saas mbɔk natoon ba, aSiman sok itsɔm a nɔɔk ba aBitrus nɛ aYohana, 19 a fɛ̀ ni iba, <<Di nɔk yin kukyem e kang bà, nɔng kaakyɛ anet fi imi di sak kubɔk ni wu, a da sɛ Kabik aJɛrɛ me bà.>>

20 Wat aBitrus fɛ̀ ni wu, <<Won itsɔm ngɔn ni ibeseng gung ni ngɔn, nek ngɔn di ti i da kyem ishan kunang Adakunom ni itsɔm! 21 Kubɔk ngɔn di se ayɛt kutomong kang awo ko gyeet, nek iyɛ ngɔn se tsik ashon Adakunom awo. 22 Tirik, wosong anɛn ngɔn, ra awon sak na aTisa Adakunom, nyan a da ka fuut inɛn aduk kuyiring yɔng fi i bɛ̀ ni iyɛ ngɔn. 23 Nek imi mi di aduk ifup ni iyɛ ngɔn ni irosom fi inɛn mi da nye ne.>>

24 Wat aSiman tɛ a ku bun ni ifɛ̀ ye, <<Ra awon na aTisa nek imi! Kɔng ikyɛng fi ngɔn mi fɛ́ bi te ni imi.>>

25 Ama fɛ́ ba mi taas, ba shara ifɛ̀ aTisa sak na banet, ba aBitrus nɛ aYohana tɛ ba bun sak ni aRushelima, ba teng ba shara ifɛ̀ itek e na naban wɔp aSamariya.

26 Ama anɔng, atomaza aTisa bɛ́ a fɛ̀ na aFilibus, <<Dorok, di kuus irèn katse fi i ne na aRushelima itisik sak na aGaza.>> 27 AFilibus dorok, a kpa ne sak azɔng, a nat a nyim na anet aItopiya fɛ́ ayet amaring, anet itomong igwɔm fi iwu wu a yɛrɛ ngma ímyɛ aKandas, afɛ́ azɛnɛ fɛ́ a ya igwɔm mben aItopiya. Anet e kin tse a ya Adakunom ntong ni aRushelima, 28 a se ni ibun sak ari, a mi sonong ayɛt kubut-atak itsees ni itsaap, a se ni ifa kufumung atan aIshaya. 29 Kabik aJɛrɛ fɛ̀ ne aFilibus, <<Tse bakat ni kubut-atak itsees ni itsaap e, nyeseng bakat azɔng.>>

30 Wat aFilibus rumung i tsi sak narɔ kubut-atak itsees ni itsaap e, a tse a fok a se ni ifa kufumung atan aIshaya. AFilibus ku rip ye, <<Ngɔn yɔng i rēn ikyɛng fi i tsin fa me yɛ?>>

31 Agbat anet e fɛ̀ ni wu, <<In da tsa anɛ fi in da rēn ɛ? In fɛ̀ kɛ ma akak di tees mo awɛ?>> Wat a fɛ̀ na aFilibus na ngarak, na a sonong gung ni iwu.

32 Amaring e kin se ni ifa karɔ ka,

<<Ba kin ku ta ashon ti kitsamang

fɛ́ ba tse ba tsɛɛt,

a di wey yuu tɛ katuruk

ni bɔk anet ikot akwyi ka

a sot yuu anɔng,

vit itarak kanu.

33 Nek ibyɛs, ba raba dan ku

tsɛɛt ishɔt atsak.

Angan da kyem na cɛɛt

naton izit wu yɛ?

Nek ba kin sok kutset wu azatse.>>*8:33 Ban di yin: AIshaya 53:7,8.

34 Amaring e rip aFilibus ye, <<Kabɔk di tak, atan Adakunom e se ni icɛɛt na angan ɛ? Ni ice wu a? Kɛ na akak ɛ?>> 35 Wat aFilibus sok nkum kufumung kuyɔng e, a di kpa ku shara mo ifɛ̀ itek naton aYeso.

36 Ba se ni kutseet naton irèn, ba wat ba sɛ ashi, amaring e fɛ̀ na aFilibus, <<Di ashi na, akyɛ da ro na ba di ra abatisma yɛ?>>*8:36 Afumung akak fɛ́ ba jɛk ni kubɔk yame a bɛ̀ ibyat ifɛ́ 37 ane: aFilibus fɛ̀ ye, <<Ki ngɔn nɔɔk atsak ni iyɛ izining, in da kyem in da ra abatisma.>> Amaring e fɛ̀, <<Ey, in nɔɔk atsak, aYeso Kristi yet Arim Adakunom e.>> 38 A ma fɛ̀, na ba nyeseng ni kubut-atak itsees ni itsaap e. AFilibus nɛ amaring e, ba nɔ ayɛt ashi me gung, wat aFilibus ku ra abatisma. 39 Ni izen fɛ́ ba wuruk ayɛt ashi me, Kabik aTisa wat ka ta aFilibus fyew, ka tseng ni wu, agbat anet e tɛ a ku di awo, a ya kashon ni kutseet wu ayit iyɛ ikan. 40 AFilibus tse a sɛ ice wu ne Azotus, a ya kashon ni ishara ifɛ̀ itek e ni nwɔp ngma ma a tse a di ta na aKaisariya.