BaFisa 1

Inesek ifeng nɛ awon

15 Nek anɔng, nkum izen fi imi kin fok inɔɔk atsak yin na aTisa aYeso, ni ishim fi iyin bɛ̀ yin sak na banet Adakunom ngma, 16 in mi won inesek ifeng nek iyin awo, ni in yiring ni iyin ayɛt awon hom, 17 in woso ra awon fok Adakunom aTisa yit aYeso Kristi, Ada Azɔk-Bazɔk, ki nɔɔk yin kutsitsɛng abik*1:17 Ke: Kabik aJɛrɛ ayi. ni itarak ice abik, nɔng i da ku rēn yin mo yɛɛt-yɛɛt.

18 In ras awon fok, Adakunom na ki tarak yin ayisi iyɛ yin, nɔng i da bin rēn yin ite iyɛ fɛ́ ba ki yes yin nek iye, i da rēn yin kurúm ízɔk iya itekari fɛ́ ba mi sak nek banet Adakunom*1:18 Ke: Banet Adakunom yet iya itekari Adakunom ayi., 19 ni rēn yin kugap wu fi ku got agap imara fi ku se ayɛt bayɔng fɛ́ ba nɔɔk atsak. Kukyem e yɔng yet kuzining ni kugap e 20 fɛ́ Adakunom kin di ra kutomong na Anet-Isheshek ni izen idonong wu ni irɛk, a ku nɔk karɔ isonong ni bɔk iyak wu azanɛn, 21 kashon hwyeng-hwyeng ne bágwɔm ngma nɛ bafi kukyem nɛ bafɛ́ agap nɛ bátisa. Iyerek fɛ́ Anet-Isheshek bɛ̀, se kashon na akaakyi iyerek fɛ́ ba nesek, da nkum ni kuzam ku kang kyɛk awo, ngma ni kuyɔng fi ku bi bɛ́. 22 Adakunom mi sak kaakyɛ na átas atak wu, a mi ku sak na a sot ice naton kaakyɛ nek ngma bafi ikuus, 23 fɛ́ a yet kurɔm wu, ishining wu, fɛ́ a shining kaakyɛ ngma kusum.