1 Kufumung kang ne ni bɔk aBulus, atom Anet-Isheshek aYeso ni ishim Adakunom, sak ne bafi ikuus fɛ́ ba se ne Afisa*, bayɔng fɛ́ ba mi nyeseng tsìk ni kuus Anet-Isheshek aYeso:

2 Won itek, ni kukyang fi ku nes na Ada yit Adakunom, nɛ aTisa aYeso Kristi, ni ku sot gung ni yin.

3 Itere ni i yet ifɛ̀ Adakunom, ada aTisa yit aYeso Kristi, iwu yɔng fɛ́ a mi ki te yit awɛng, ne akaakyi kuri awɛng abik fɛ́ a se naton aza, nek kusot yit ayɛt Anet-Isheshek. 4 Nek iwu mang ki kasa yit ayɛt Anet-Isheshek dang na nye kazatse, nɔng in da sot yit jɛrɛ, vit inɛn anu ashon wu. Nek ishim wu, 5 Adakunom mang sak gyam, ni in sot yit nnon wu nek ikyɛng fɛ́ aYeso Kristi nye. Anɔng e se kpaf ni ikyɛng fi iwu shim.

6 A nye anɔng, nek in di tere yit ízɔk itek wu, fɛ́ a ki nɔɔk yit ninang, ayɛt Ari wu fɛ́ a shim. 7 Ni wu ba mi ki bisik yit nek inosong nasok wu, in sɛ yit ifuut anɛn, kpaf ni kurúm itek fɛ́ Adakunom bɛ̀, 8 fɛ́ a mi ki nɔɔk yit shɛrɛk, ngma ni kutsitsɛng makiyi ni irēn nkyɔrɔk.* 9 Nek iwu shim nin rēn yit, Adakunom mi ki tonong yit kushim wu fi ku tsang se ni nɛt, kuyɔng fi ku mi sɛ ishining ayɛt Anet-Isheshek. 10 Ikyɛng fɛ́ Adakunom mi sak e, bi shining ni izen fi i se kpaf: a bi moon ngma nkyɔrɔk fi i se azanɛn, ni nyɔng fi in sɛ azatse, ni ice anet azining, fɛ́ ayet Anet-Isheshek.

11 Ayɛt wu fɛ̀ Adakunom ki kasa yit mo, ni in sot yit banet ice wu. A ki myak yit gyam nek anɔng fɛ́ a kin sak, na a nye kaakyi ikyɛng ni tseng kpaf ni kushim wu, 12 nɔng iyit fi in yet yit bafi imɛsɛng ayɛt ite iyɛ na Kristi, in da sot yit bafi itere ízɔk Adakunom. 13 Iyin se yin ayɛt Anet-Isheshek bà, nek izen fi i kin fok yin ifɛ̀ atsak, ifɛ̀ itek fi i nesek isheshek, ama fi i di nɔɔk yin atsak, ba ki te yin izizɔ nagang wu, Kabik aJɛrɛ fɛ́ ba kin nye kushii me. 14 Kabik aJɛrɛ me yet ikyɛng fin tsin tin bamang yit, nfi ngma iya itekari fɛ́ Adakunom mi ki nɔɔk yit fɛ́ a tonoso gbing-gbing fok in bi ya yit ide, ma izen fɛ́ Adakunom bi bisik ngma nnon wu, sak itere ízɔk wu.

15 Nek anɔng, nkum izen fi imi kin fok inɔɔk atsak yin na aTisa aYeso, ni ishim fi iyin bɛ̀ yin sak na banet Adakunom ngma, 16 in mi won inesek ifeng nek iyin awo, ni in yiring ni iyin ayɛt awon hom, 17 in woso ra awon fok Adakunom aTisa yit aYeso Kristi, Ada Azɔk-Bazɔk, ki nɔɔk yin kutsitsɛng abik* ni itarak ice abik, nɔng i da ku rēn yin mo yɛɛt-yɛɛt.

18 In ras awon fok, Adakunom na ki tarak yin ayisi iyɛ yin, nɔng i da bin rēn yin ite iyɛ fɛ́ ba ki yes yin nek iye, i da rēn yin kurúm ízɔk iya itekari fɛ́ ba mi sak nek banet Adakunom*, 19 ni rēn yin kugap wu fi ku got agap imara fi ku se ayɛt bayɔng fɛ́ ba nɔɔk atsak. Kukyem e yɔng yet kuzining ni kugap e 20 fɛ́ Adakunom kin di ra kutomong na Anet-Isheshek ni izen idonong wu ni irɛk, a ku nɔk karɔ isonong ni bɔk iyak wu azanɛn, 21 kashon hwyeng-hwyeng ne bágwɔm ngma nɛ bafi kukyem nɛ bafɛ́ agap nɛ bátisa. Iyerek fɛ́ Anet-Isheshek bɛ̀, se kashon na akaakyi iyerek fɛ́ ba nesek, da nkum ni kuzam ku kang kyɛk awo, ngma ni kuyɔng fi ku bi bɛ́. 22 Adakunom mi sak kaakyɛ na átas atak wu, a mi ku sak na a sot ice naton kaakyɛ nek ngma bafi ikuus, 23 fɛ́ a yet kurɔm wu, ishining wu, fɛ́ a shining kaakyɛ ngma kusum.