1 Iyin áshɔp ánet aGalati, angan ki ya yin ni nkut ɛ? I man ki tonong yin wɛshɛk fok ba man tekak aYeso Kristi ni kum. 2 Won in ki nye yin ku rip kazizining kang kyɛk. I kin shan yin Kabik aJɛrɛ nek i nye yin ikyɛng ntsi fɛ̀ yɛ? Kɛ nek inɔɔk atsak ni ikyɛng fi i kin fok yin ɛ? 3 Iyin yet yin áshɔp fɛ́ ama fi i mi tumung yin ayɛt abik, iyin shim yin i ti bun yin ni irɔm ɛ? 4 Ngma mgbang fi i tsang sɔ yin, in mi sot abap yɔng ɛ? 5 Adakunom kin ki nɔɔk yin Kabik wu, a ras ntomong abes nate yin nek i inyes ikyɛng fi ntsi fɛ̀ yɛ? Kɛ nek inɔɔk yin atsak ni ikyɛng fi i kin fok yin ɛ?

6 Yiring yin ni aIbrahim, <<A kin nɔɔk atsak na Adakunom, ba ku te mo i sot kusot kutabat ashon Adakunom.>> 7 In shim ni i rēn yin fok, bayɔng fɛ́ ba nɔɔk atsak, iba ba ba yet nnon aIbrahim. 8 Ifɛ̀ Adakunom man tsang di fok Adakunom kanang Ícɛn-iduk ni irèn inɔɔk atsak, nek anɔng fɛ́ a kin di tak ifɛ̀ itek e nanu aIbrahim gyam fok, <<Ngma icɛ́n azatse bi sɛ awɛng nek ngɔn.>> 9 Nek anɔng, ngma bayɔng fɛ́ ba nɔɔk atsak na Adakunom, ba da sɛ awɛng gung ni aIbrahim, iwu fɛ́ a kin nɔɔk atsak.

10 Ngma bayɔng fɛ́ ba nye yɛndɛng ni ikuus ntsi, ba se na awey, nek i se ni ijɛk fok, <<Kawɛy se naton ayɔng fɛ́ da a kyem a nye ngma ikyɛng fi i se ni ijɛk ni fumung ntsi awo.>> 11 I se wɛshɛk fok, vit anet fɛ́ a kyem a se kusot kutabat ashon Adakunom nek inye ikyɛng fi ntsi fɛ̀, nek, <<Bafi kusot kutabat da ta ice nek inɔɔk atsak.>> 12 Vit ikyɛng fi imoon ntsi ni inɔɔk atsak, ti i di se ni jɛk ye, <<Ngma ayɔng fɛ́ a nyes ikyɛng fi ntsi fɛ̀, iwu da sot nek ina.>> 13 AKristi mi ki bisik yit ni bɔk awey fi ntsi bɛ́s e, nek iwu shan kawɛy e akuce yit, nek i se ni ijɛk fok, <<Ngma ayɔng fɛ́ ba ku tekak ni kum, a mi sot afɛ́ awey.>> 14 Anet-Isheshek ki bisik yit, nɔng awɛng fɛ́ ba kin nɔɔk aIbrahim, da bin sot afi Ícɛn-iduk ni irèn Anet-Isheshek aYeso, nɔng nek inɔɔk atsak yit in di sɛ yit kunang Abik fɛ́ Adakunom kin nye kushii me.

15 Ábaruneng, won in cɛɛt ni iyin naton ikyɛng fi i mi di mɛɛ yin, ke anet tak nsong wu, vit azining akak fɛ́ a kyem na a wobok kucɛɛt e, kɛ na di barang ikikak natoon e ayi, idɔng i se kpaf anɔng. 16 Di yin, Adakunom kin nye kushii me nang sak ni aIbrahim ni ijaa wu. Da kufumung ijɛk e kin fɛ̀ ye, <<Sak ni ijaa>> se nek na banet dot awo, tit <<Sak ni ijaa ngɔn,>> fi itonong fok i se naton anet azining kyɛk, anet e yet Anet-Isheshek. 17 Ikyɛng fi i mi tsin tonong e yet, ntsi me nang fɛ́ ba kin ne ba tonong ama ayɛ anakat anaas ni nsɔk ntaat, in da kyem in wobok irosom kushii fɛ́ Adakunom kin tsang te iko ni ifam awo, in da kyem in yirik kushii me awo. 18 Nek ki iya itekari me fi i se nek ikuus ntsi, ki ikikak ne ni kushii awo, awɛt Adakunom ayɛt itek wu, nɔɔk aIbrahim ide ni irèn kushi.

19 Wat ki i se anɔng, akyɛ sak ba bɛ́ ni ntsi me yɛ? Ba di barang nek ba di tun ikyɛng fi i yet inɛn wɛshɛk sak ni izen fi ijaa fɛ́ ba kin nye kushii me nek iwu bɛ́. Fok yin, batomaza ba ba kin bɛ́ ni ntsi me, ni irèn anet fɛ́ a kin nyeseng nate Adakunom ne banet. 20 Anet inyeseng nate, a nyeseng nek kabak kazining kyɛk awo, Adakunom kin nyeseng aziwu.

21 Anɔng sot fok, ntsi se ni ifa ni kushii fɛ́ Adakunom nye yɛ? Koba! Nek ki kubɛ́ ntsi kin fi ku bɛ́s ni kutset, ki kusot kutabat ashon Adakunom nes ni ntsi. 22 Awɛt ifɛ̀ Adakunom tonong fok, kazatse kusum ka se na ngamang inɛn, nɔng Adakunom di ki nɔɔk bayɔng fɛ́ ba nɔɔk atsak na aYeso Kristi, ikyɛng fi iwu man nye kushii me.

23 Ni inɔɔk atsak tsin rèn resek dang bɛ́, in tsang se yit gak nawop ntsi, ni te kpaf sak izen fɛ́ ba di tonong inɔɔk atsak e. 24 Nek anɔng, ntsi na fi in sot anek fɛ́ a da ki tsa yit narɔ Anet-Isheshek, nɔng in da bin sɛ yit kusot kutabat ni rèn inɔɔk atsak. 25 Yɔkɔnɔng fi irèn inɔɔk atsak mi bɛ́, in ti se yit ni ínek ntsi kong awo.

26 Ngma yin i yet yit nnon Adakunom, ni rèn inɔɔk atsak na Anet-Isheshek aYeso, 27 nek ngma yin fɛ́ ba mi ki ra yin abatisma gung na Anet-Isheshek, i mi sok yin nggɔn Anet-Isheshek yɔng. 28 Nek anɔng, ke na a yet afɛ́ aYahuda, kɛ afɛ́ aGirik, ke asam, ke ayɔng fɛ́ a se washak ayi, ke amatek e, ke abining e ayi, nek ngma yit in yet yit bazining ayɛt Anet-Isheshek aYeso. 29 Nek i yet yin bafɛ́ Anet-Isheshek, i sot yin izít aIbrahim yɔng, nɛ bafi iya itekari ikyɛng fɛ́ ba ku nye kushii me.