1 Ama anɔng, aYeso tseng sak nɛ aRushelima nek amok akak afɛ́ baYahuda. 2 Azɔng ayɛt iwɔp aRushelima, bakat ne katisi ibón, kudúng ashi kukak, se azɔng fɛ́ ba yes iko ni ilem Aram ye, aBetesda, kudúng e bɛ̀ narɔ inɔs natoon. 3 Azɔng fɛ́ banet nrɔk zizɛɛt di sosok; bakpatong, nɛ bakun, nɛ bayɔng fi nrɔm man sɔrɔk.* 5 Anet akak azining azɔng, mi sok ayɛ nsɔk ntaat ina nkara (38) ne bɔrɔng ni kurɔm. 6 Izen fɛ́ aYeso ku di nɛ meneng azɔng, ni iwu mi rēn kudot izen fɛ́ anet e mi sok nɛ bɔrɔng ni kurɔm e, aYeso fɛ̀ ni wu, <<Ngɔn shim a da te kyang ɛ?>>

7 Anet irɔk e fɛ̀ ni wu, <<Akɔk-ashon, vit imi nɛ anet fɛ́ a di ki sɛ mo, a di sɔɔn sak ayɛt ashi me. Izen fi in da fi in te nyɛk in tsin nɔ, nɛ kak tin nɔ ashon yin.>> 8 AYeso fɛ̀ ni wu, <<Dorok tsik, sok kushit ngɔn, da yit irèn!>>

9 Ni izen izining, anet e wat a sɛ kukyang; a sok kushit wu, a tseng.

Kunom e yɔng, fi ikyɛng deng kin te, kin yet kunom aSabat (kunom ifɔɔn baYahuda). 10 Nek anɔng, bágwɔm ntsi baYahuda fɛ̀ nɛ anet fɛ́ ba ku te kyang e, <<Atut yet aSabat; ntsi fɛ̀, da i bi sok kushit ngɔn awo.>>

11 Awɛt anet e fɛ̀ ni iba, <<Anet e yɔng fɛ́ a di te kyang, iwu wu fɛ́ a fɛ̀ ni mi, <Sok kushit ngɔn, da tseng.> >>

12 Ba fɛ̀ ni wu, <<Angan yɔng a yet ayɔng, fɛ́ a fɛ̀ ni ngɔn yɛ ni sok iko, i da tseng ɛ?>>

13 Anet fɛ́ ba ku te kyang e, da a nɛ rēn anet fɛ́ a ku te kyang e awo, nek aYeso mi tsang nɔ, ayɛt banet.

14 Ama izen ikak, aYeso ku sɛ narɔ iya Adakunom ntong, a fɛ̀ ni wu, <<Di, fi ngɔn mi te kyang. Won iras inɛn, kɔn ikyɛng fi igot ideng imaan e, bi ti i da sɛ.>> 15 Anet e ma tsɛ tsɛt bágwɔm ntsi baYahuda me, a fɛ̀ ni ba, yɛ, aYeso wu fɛ́ a kin ku te kyang.

16 Nek aYeso raas ntomong nang atuk aSabat, bágwɔm ntsi baYahuda ku te ashon. 17 AYeso fɛ̀ ni iba, <<Ada min ren se ni kutomong sak atut, nek anɔng fi imi tsin di ra me bà.>> 18 Nek anɔng wu, fɛ́ bágwɔm ntsi baYahuda ba ban tsɛt ice fɛ́ ba da ku fɛt mo; ba fɛ̀, <<Da a beseng ntsi kunom ifɔɔn kyɛk kong awo, a yɔng a nye yɛ Adakunom yet Ada wu, nɛ tes ice wu nagbɔng nɛ Adakunom.>>

19 AYeso tɛ a fɛ̀, <<Won in ki tak yin atsak, nggon e kyem ka nye ikikak i fi ice ka awo, tit ikyɛng fɛ́ ka di Atek tsin ras e, nek ngma ikyɛng fɛ́ Ada me ras, ide de Ari me ras. 20 Nek Ada me shim Ari me, a ku tonoso ngma ikyɛng fɛ́ a ras. A da ku tonoso nkyɔrɔk fi in wat nnang fi in da ki te yin kpɔrɔk. 21 Nek kpaf anɔng fɛ́ Ada me di donoso bafaben, nɛ ka ba nesek kutset, kpaf anɔng fɛ́ Ari me di nesek kutset sak nɛ ayɔng fi iyɛ wu shim. 22 Ama anɔng, da Atek e ra akak ishɔt awo, a mi nɔɔk Ari me kukyem ira kaakyɛ ishɔt, 23 nɔng kaangan bin nɔɔk Ari me iratek, kpaf tɛ fɛ́ ba di nesek Ada me. Ngma ayɔng fɛ́ a rawu dan nesek Ari me iratek, a rawu dan nesek Ada me yɔng fɛ́ a ku tom iratek.

24 <<In ki tak yin atsak, ngma ayɔng fɛ́ a foos ifɛ̀ hom, na nesek atsak ne ayɔng fɛ́ a di tom, a bɛ̀ kutset vit igang. Ba bi ku ra ishɔt awo; a mi shorop iku, sak isɛ kutset. 25 In tsin ki tak yin atsak, izen bi bɛ́, iyeng i mi nye, fɛ bafaben da fok kutɔ Arim Adakunom, bayɔng fɛ́ ba fok da sɛ kutset. 26 Kpaf tɛ fɛ́ Ada me di nesek kutset, anɔng fɛ́ a mi nɔɔk Ari wu kukyem inesek kutset bà. 27 A mi ku nɔk ice ira ishɔt azatse kusum, nek iwu yet Arim Anet.

28 <<Ayɔɔt bi ki yit yin nek ideng awo, nek izen bi nye fɛ́ ngma bayɔng fɛ́ ba bi se ayɛt arɛk, ba bi fok kutɔ wu 29 yɔng ba bi wuru, bayɔng fɛ́ ba nye itek, ba bi doro bafaben sak i sɛ kutset, nɛ bayɔng fɛ́ ba kin ra imaan e, ba bi doro bafaben sak ni ishɔt. 30 Imi bɛ̀ agap ira ikyɛng ikak azimin awo; imi raas ishɔt kpaf ti in di foos, ishɔt yin yet ifɛ́ atsak, nek in raas kushim ice min awo, tit ifɛ́ ayɔng fɛ́ a di tom.

31 <<Wo imi fi ncɛɛt naton ice min kyɛk, ki kucɛɛt hom bɛ̀ atsak awo. 32 Akak di se, fɛ́ a tsin cɛɛt naton hom, imi rēn fok kucɛɛt fɛ́ a cɛɛt naton hom, ku yet atsak.

33 <<Iyin, mi tom yin banet sak narɔ aYohana, iwu mi ki tak yin atsak e. 34 Imi da in shashang kanu ifɛ̀ anet awo, in tsin fɛrɛng anɔng, gyan i di sɛ yin isheshek. 35 AYohana kin yet agaramun, fɛ́ a ya kurong ne nesek mgbɛy, iyin kin shan yin mgbɛy wu ni iyɛ ikan nfi kizen hyiit.

36 <<Imi bɛ̀ ifɛ̀ dɔng fi iwat idɔng, fɛ́ aYohana kin nɔk naton hom. Nek kutomong yɔng fɛ́ Ada di nɔk ira me, sak igang e, fi in se ni ra me, iko ko, ku tonoso fok Ada me wu fɛ́ a di tom. 37 Iwu Ada fɛ́ a di tom e, iwu mi nɔɔk kanu ifɛ̀ naton hom. Vit akak yin fɛ́ a ki mang fok kutɔ wu, kɛ fɛ́ a ki mang di nse wu ayi, 38 vit ifɛ̀ wu ayɛt ayɛ yin, nek iyin ra yin inɔɔk atsak ne ayɔng fi iwu tom e. 39 Iyɔng i nye yin nyɛk ifá yin* Afumung Adakunom nek iyiring yin fok, i da sɛ yin kutset vit igang ayɛt na. Afumung Adakunom e yɔng cɛɛt naton hom, 40 ngma nɛ anɔng, ni ra yin dan bɛ́ yin ni mi nɔng da sɛ yin kutset.

41 <<Da imi shashang itere fi ines nɛ banet awo, 42 nek imi ki rēn yin, imi rēn fok vit iyin ni ishim Adakunom ayɛt ayɛ yin. 43 Imi bɛ́ ni iyerek Ada min, iyin ra yin dan i di shan yin, wɛt kɛ akak bɛ́ ni iyerek wu, i da ku shan yin. 44 Na anɛ fi i da nɔɔk yin atsak ama fi i tsin tsɛsɛk yin itere na bafidang ɛ, da i ti daam yin ni i sɛ yin itere fi ines narɔ Adakunom aziwu awo*?

45 <<I bi di yin, ti imi wu in bi tse ni kukun yin, ashon Adakunom awo. Ayɔng fɛ́ a bi te kukun yin, yet aMusa, ayɔng fi i di te yin iyɛ. 46 Ki i kin fi nɔɔk yin atsak ne aMusa, ki i nɔɔk yin atsak ni mi, nek iwu kin jɛk naton in. 47 Ayet i rayin dan nɔɔk yin atsak ni ikyɛng fi iwu man jɛk, nɛ anɛ fi i da nɔɔk yin atsak ni ikyɛng fi in fɛ̀ yɛ?>>