1 Izen fɛ́ aYeso se ni igot, a di akpatɔn fɛ́ ba ku tes anɔng. 2 Bafi imɛɛs wu ku rip yɛ, <<Anet Itees, angan wu a nye inɛn, anet yo kɛ batek fi i sak ba ku tes akpatɔn ɛ?>>

3 AYeso fɛ̀ ni iba, <<Ayet nek inɛn wu, kɛ i fɛ́ batek awo, i te anɔng mok ba di tonong kutomong Adakunom ni kutset wu. 4 Nɛ karɔ ren resek mo gbɛy, i se gbing-gbing ni in ra yit kutomong ayɔng fɛ́ a di tom. Katuk kang ka wuruk, fɛ́ vit anet fɛ́ a da kyem a ra kutomong. 5 Ni imi mo azeng azatse, Imi wu in yet mgbɛy azatse me.>>

6 Ama fɛ́ a fɛ̀ anɔng, a cik ncicɛ aben, a di gyɔrɔp irɔp, a di bas ide na ayisi anet e. 7 A da ma fɛ̀ ni iwu, <<Tseng tsi so ni kudung aSilom.>> (ASilom yet Atom.) Nek anɔng, anet e tsɛ a so, a bun ari na yɛrɛ gyat.

8 Bayɔng fɛ́ ba se bakat ni iwu, nɛ bayɔng fɛ́ ba ku rēn tɛ anet awon, kpa cɛɛt wɔɔn ba, yɛ, <<Anet e yong fɛ́ a sosok nɛ ras awon awɛ?>> 9 Bakak ba fɛ̀, iwu yɔng, nɛ bakak nye, <<Awɛy, ayong e tas ayɔng e.>>

Wɛt nɛ anet e di fit inye, <<Ye imi yɔng.>>

10 Nek anɔng ba ku rip, <<Wat na anɛ fɛ́ ayisi ngɔn di tarak ari?>>

11 A fɛ̀ ni iba, <<Anet e yɔng, fɛ́ ba ku yes aYeso, wu fɛ́ a moon irɔp, a di bas e na ayisi, a ma fɛ̀ ni mi, <Tseng sak ni dung aSilom, i da tsi so.> Imi tsi in so, in wat in yɛrɛ gyat!>>

12 Ba fɛ̀ nɛ anet e, <<Anet e si kɛ?>>

A fɛ̀ ni iba, <<Imi rēn awo.>>

13 Nek anɔng, ba ku ta ashon sak narɔ BaFarasi. 14 Kunom e yɔng fɛ́ aYeso kin di gyɔrɔp irɔp e, a di te anet e kyang, kin yet aSabat. 15 Nek anɔng BaFarasi risim anet e ngma ikyɛng fi ite. Iwu, a ka ba tak yɛ, <<A bas irɔp e na ayisi hom, in tsin kanang, yɔkɔnɔng in yɛrɛ.>>

16 Bakak ayɛt BaFarasi me fɛ̀ yɛ, <<Anet yong, nɛ narɔ Adakunom awo agyaa, di yin fɛ́ a rawu dan saas kunom aSabat.>>

Bakak ayɛt ba fɛ̀, <<Nɛ anɛ fɛ́ anet inɛn da kyem a raas ntomong ajingjing ti nnang ɛ?>> Nek anɔng, ikaba nɔ nate ba.

17 Ba ma tɛ ba tirik sak nɛ akpatɔn e, ba ku rip, <<Ngɔn fɛ̀, anet e da tarak ayisi, akyɛ fi ngɔn da fɛ̀ naton wu ɛ?>>

Anet e fɛ̀, <<Iwu yet atan.>>

18 Bakɔk-ashon baYahuda me raba dan nɔɔk atsak, fok a tsang yet akpatɔn, a nɛ sɛ ayisi. Nek anɔng ba tom ba kaba yes batek. 19 Ba kaba rip yɛ, <<Ari yin yong ɛ? Iwu me yɔng fi i ku tes yin akpatɔn ɛ? Wɛt akyɛ te, fɛ́ a yɛrɛ yɔkɔnɔng ɛ?>>

20 Batek e fɛ̀ ni ba, <<Iyit rēn yit a yet ari yit, fi in ku tes yit vit ayisi akabes, 21 awɛt da iyit, ni in rēn yit, nɛ anɛ fɛ́ a di sɛ ayisi ke anet fɛ́ a ku tarak ina awo. A yong, ku rip yin, ayɛ wu mi kyem, fɛ́ a da fɛrɛng na kanu wu kɔ.>> 22 Batek e cɛɛt anɔng nek ba foos nnyim bakɔk-ashon baYahuda me, nek bakɔk-ashon e mi nyeseng ifɛ̀, fok ngma ayɔng fɛ́ a fɛ̀, fok aYeso yet Anet-Isheshek e, ba da ku ro narɔ inyis. 23 Anɔng wu a sak batek e di fɛ̀, <<Ayɛ wu mi kyem kɔ; Ku rip yin.>>

24 Ba tɛ ba yes anet fɛ́ a tsang yet akpatɔn e iyes ifɛ́ faa, ba fɛ̀ ni wu, <<Nɔk Adakunom iratek. Nek iyit rēn yit aYeso yet anet inɛn.>>

25 Anet e tɛ fɛ̀ ni ba, <<Ke a yet anet inɛn a, kɛ awɛy ya, imi rēn idɔng awo. Ikyɛng izining fi imi rēn yet, imi tsang yet akpatɔn, in yɛrɛ yɔkɔnɔng!>>

26 Ba tɛ ba ku rip, yɛ, <<Akyɛ fɛ́ a da nye ne ɛ? Na anɛ fɛ́ a da tarak mo ayisi me ɛ?>>

27 Anet e fɛ̀ ni ba, <<Imi mi ki tak in ayame, i tsin wes yin ato awɛ? Akyɛ sak fi i shim i ti fok yin ɛ? Kɛ iyin shim i sot yin bafi ikuus wu bá yɛ?>>

28 Ba kpa ku korok itok yɛ, <<Ngɔn wu i yet afi ikuus anet yong! Iyit yet yit bafi ikuus aMusa. 29 Iyit rēn yit fok Adakunom kin cɛɛt nɛ aMusa, anet yong, iyit rēn yit karɔ fɛ́ a di ne ngma awo.>>

30 Anet e fɛ̀ ni ba, <<In mi di ikyɛng ayɔɔt atut! I fɛ̀ yin da i rēn yin karɔ fɛ́ a di ne awo, ngma nɛ anɔng, a mi di tarak ayisi. 31 Iyit rēn yit fok Adakunom foos bafi inɛn awo. A foos anet fɛ́ a bi nnyim wu, fɛ́ a raas ishim wu. 32 Neeme ni itumung kazatse, vit akak fɛ́ a ki mang fok, yɛ ba tarak ayisi anet fɛ́ ba ku tes ni iton. 33 Kɛ anet yong, fɛ́ a ne narɔ Adakunom awo, kɛ a kyem a nye ikyɛng ti ideng awo.>>

34 Nek anɔng ba fɛ̀ ni wu, <<Ngɔn fɛ́ ba da tes, i rasak ayɛt anɛn; itsɛt, i da ki tees yit, iyit ɛ?>> Nek anɔng, ba ku ro Nitu Iya Adakunom Ntong.

35 AYeso fok yɛ, ba mi ro anet e. Izen fɛ́ a ku sɛ, aYeso ku rip yɛ, <<Ngɔn nɔɔk atsak ni Arim Anet ɛ?>>

36 Anet e ku rip yɛ, <<Atekari, arim anet e yet angan ɛ? Di tak, akɔk-ashon, gyang in di nɔɔk atsak ni ka.>>

37 AYeso fɛ̀ ni wu, <<Ngɔn mi ku di yɔkɔnɔng, ayɛt atsak, iwu fɛ́ a tsin cɛɛt ni ngɔn kyɔrɔng!>>

38 Anet e fɛ̀, <<Atekari, imi nɔɔk atsak!>> A kpa ku ya ntong.

39 AYeso fɛ̀, <<Imi bɛ́ azatse kang nek ira ishɔt, nɔng bakpatɔn da sɛ ayisi, nɔng bayɔng fɛ́ ba yɛrɛ da sot bakpatɔn.>>

40 BaFarasi fɛ́ ba se azɔng, fok ikyɛng fɛ́ a fɛ̀, ba ku nye irip, <<Akyɛ? Iyit yet yit bakpatɔn bá yɛ?>>

41 AYeso fɛ̀ ni iba, <<Ki i fi yet in bakpatɔn, ki i bɛ̀ yin inɛn awo, awɛt yɔkɔnɔng fi i nye yin, fok iyɛrɛ yin, anɛn in resek gung ni iyin.