12 Nek anɔng, i bi won yin inɛn ni i ya igwɔm ayɛt nrɔm yin fi in kus awo, ni inɛn e ki sas yin ni ras yin nggɔn ishim nrɔm yin. 13 Da i bi nasap yin nkap nrɔm yin ni iras inɛn awo, ni in sot ares itomong anyas awo, tit ni nasap yin ace yin na Adakunom, tɛ bayɔng fɛ́ ba mi ka ba tirik ni iku sak ni isɛ kutset. Nasap yin nkap nrɔm yin na Adakunom, tɛ ares ntomong ntek. 14 Nek inɛn da ti i sot atekari yin awo, nek da i ti se yin na ngamang ntsi awo, tit na ngamang itek Adakunom.

15 Akyɛ fi in da fɛ̀ yit ɛ? In da ras yit inɛn nek da in se yit na ngamang ntsi awɛ? Kɛ nek in se yit na ngamang itek Adakunom ɛ? Kaa, awey yo! 16 Iyin rēn yin fok ngma ayɔng fi i ku nabak yin ace yin na awop wu, ni foos yin ifɛ̀ wu tɛ basam, i mi sot yin basam, ayɔng fi i ku foos yin e awɛ? Ke ni sot yin basam sak ni inɛn, fi ibɛ́s ni iku, kɛ ni i sot yin basam ni ifoos ifɛ̀ Adakunom, fi ibɛ́s ni kusot kutabat. 17 Won ifeng ni i sot ifɛ́ Adakunom, nek ngma fi i tsang yet yin basam inɛn yame, awɛt yɔkɔnɔng i mi sot yin bafi ifoos ifɛ̀ Adakunom na ayɛ yin ngma kusum naton nkyɔrɔk fɛ́ ba mi ki tees yin ina. 18 Ba mi ki bisik yin washak ni inɛn, i mi sot yin basam kusot kutabat.