1 Logapulute ago, Nahashi, mndewa wa Waamoni nakabagama, mwanage yalinguchemigwa Hanuni, nakalongoza honhu ha heye. 2 Mndewa Daudi nakalonga, "Ndomditila Hanuni igano lya kwimilila, mwana wa Nahashi kota mhaza wa heye vyoyanditile." Lelo Daudi nakalajiza wasenga kumhilichila ulamso wa kumhembuliza kwa chiwalo cha kubagama kwa mhaza wa heye. Wasenga wa Daudi lowafichile isi ya Waamoni, 3 vilongozi wa Waamoni nawamuuza mkulu wa hewo Hanuni, "Ndaze! Kwangijesa kota Daudi nakamtogola mhaza wa hegwe kwa kuwalajiza wasenga woye kukuhembuliza? Ndaze, Daudi hawalajize wanhu wano kwa hegwe leka yaupugajize muji uno leka hamba yauhole?"

4 Lelo Hanuni nakawebata wasenga awo wa Daudi na kubeya nusu ya lulevu lwa chila yumwe wa hewo na kuzidadula nguwo za hewo hagati ha madako, hamba nakawaleka walute. 5 Wasenga awo nawona soni lukami kuhiluka kaye. Mndewa Daudi loyalonjelwe mbuli azo nakawalajiza wanhu leka kuwabochela. Mndewa nakawalonjela, "Mikale kuli muji wa Yeliko mbaka lulevu lwa hemwe holukota ndo mhiluche kaye."

6 Waamoni lowawene kota nawamzudiza Daudi, nawalanda wamizi Waalamu elufu makumi meli (20,000) walingujenda kwa magulu kulawa Beti-lehobu na Soba na wamizi elufu kumi na mbili (12,000) kulawa Tobu na mndewa wa Maaka yawele na wamizi elufu imwe (1,000). 7 Daudi loyahuliche mbuli azo, nakamlajiza Yoabu yalute na wamizi weng'ha wazidahe. 8 Waamoni nawalawa na kiwika goya hali lwizi lwa muji wa Laba, muji ukulu wa hewo. Waalamu kulawa Soba na Lehobu na wanhu kulawa Tobu na Maaka nawali waliyeka hali honhu hazelu.

9 Yoabu loyawene kota wang'honyo wa heye wangugana kitowa na heye kumwando na kumbele, nakawahagula wamizi wa Waisilaeli wazidahe ng'hatu kitowa ngondo nakawawika wetowe na Waalamu. 10 Wala wamizi wanji wasigale, Yoabu nakawawika hali ulongozi wa Abishayi, mng'holoze, naye Abishayi nakawawika goya kwa chiwalo cha kitowa na Waamoni. 11 Yoabu nakamlonjela Abishayi, "Wone Waalamu wowa na mong'ho lukami konhanza, ila wone Waamoni wawe na mong'ho lukami nani ndokuya kukutanza. 12 Ila wikangaze nhumbula gwegwe baho. Titowe kwa nhumbula ikangale kwa chiwalo cha wanhu wa hetwe na kwa chiwalo cha miji ja Nguluwi wa hetwe. Mkulu Nguluwi wa hetwe kotuditila linojile hali meho ga heye."

13 Lelo Yoabu na wamizi wawele hali ulongozi wa heye nawaluta habehi kitowa na Waalamu mbaka Waalamu nawabilima. 14 Waamoni lowawawene kota Waalamu wangubilima, nawo nawambilima Abishayi, na kwinjila kuli muji. Yoabu nakaleka kitowa na Waamoni, nakahiluka Yelusalemu. 15 Hamba Waalamu lowawene kota nawasumigwa na Waisilaeli, nawekungajiza hamwe. 16 Hadadeseli nakalajiza Waalamu wawele kumwambu mwa lwanda lwa Eyufulate wegaligwe, wahilikwe ako Helamu leka walongozwe na Shobaki, chilongozi wa wamizi wa Hadadeseli. 17 Daudi loyapegwe mbuli ayo, nakawakungajiza hamwe Waisilaeli weng'ha, nakaloka lwanda lwa Yolodani na kuluta mbaka Helamu. Nawo Waalamu nawewika goya kitowa na Daudi. Nawaluka kitowa na heye, 18 ila Waalamu nawawabilima Waisilaeli. Daudi nakawakopola Waalamu miya saba (700) walingwendesa mituka ja ngondo na wakwina falasi elufu makumi gane (40,000). Shobaki, chilongozi wa chilundo cha wamizi cha hewo, nakalumizwa na kubagama bahala.

19 Hamba wandewa weng'ha wawele womkolela mijito Hadadeseli lowawene kota nawasumigwa na Waisilaeli, nawadita ilagano lya kikala goya na Waisilaeli, nawo nawawa vitumagwa wa isi ya Isilaeli. Lelo Waalamu nawadumba kuwatanza kahi Waamoni.