1 Uwu ndo ulonzi wa kuduma wa Daudi, mwana wa Yese. Usenga wa munhu yawele Nguluwi nakamdita yawe mkulu. Nguluwi wa Yakobo nakambakaliza mafuta Daudi yawe mndewa na ulonzi wa heye Waisilaeli nawasangalala kwimba.

2 "Muhe wa Mkulu Nguluwi naulonga kwa kukolela heni,

nakawika ulonzi wa heye kuli mlomo wa heni.

3 Nguluwi wa Isilaeli nakalonga,

Italawe lya Isilaeli nakandonjela,

‘Munhu hoyowalongoza wanhu kwa hachi,

yalingulongoza kwa kumdumba Nguluwi,

4 heye ndo kota lumuli lwa mitondo,

isanya holilawa mitondo kulihela ng'hungugu,

ena, kota nhonya ilingwambuza mizuchila kota kuli misanga.’

5 "Ahyo ndo Nguluwi vyoyalutambichize lukolo lwa heni,

mina nakadita ilagano lya mazuwa gose na heni,

ilagano lyenele na limile nzinzili.

Naye kozidita mbuli za heni zeng'ha zilutilile goya na kumha heni geng'ha gondilingugana.

6 Ila wehile, weng'ha ndo kota miwa jilingutagwa hela,

mina hajiweza kuholigwa kwa moko,

7 ila igana kutumiya chuma ama chaka cha igoha kujusa.

Ajo jangudumigwa ng'hatu kwa chiluli."

8 Aga ndo matagwa ga wazidahe wawele nawali wa Daudi. Yoshebu-bashebeti, Mtakimoni, nayali mng'hangala wa wakulu wa wamizi. Heye naketowa kwa igoha lya heye na kuwakopola wanhu miya nane (800) kuli ngondo imwe. 9 Yawinzile hali wala wazidahe Wadatu, nayali Eleasali, mwana wa Dodo, wa lukolo lwa Mwahohi. Zuwa limwe, Eleasali nayali hamwe na Daudi lowawalijile Wafilisti wowawele wekungajize kwa chiwalo cha kitowa ngondo. Wamizi wa Waisilaeli nawawabilima wamizi wa Wafilisti, 10 ila Eleasali nakema nzinzili na kitowa na Wafilisti mbaka moko wa heye loutochile, naupona uwele ubatilile ipanga lya heye. Zuwa alyo, Mkulu Nguluwi nakambuza kusumya kukulu. Hamba Waisilaeli nawahiluka honhu hoyawele Eleasali na kiholela vinhu vya hihi hela kulawa kwa Wafilisti wakopoligwe. 11 Wa kadatu nayali Shama, mwana wa Agee, Mhalali. Wafilisti nawekungajiza ako Lehi, honhu houwele mgunda wa mpanda winji, nawo Waisilaeli nawawabilima wamizi wa Wafilisti, 12 ila Shama nakema nzinzili hagati ha mgunda wula leka kuulewela na kuwakopola Wafilisti. Mkulu Nguluwi nakambuza kusumya kukulu.

13 Hamba, mhela wa mbena wazidahe wadatu hali wakulu makumi gadatu nawaluta kwa Daudi na kumfika kuli mhalika ya Adulamu. Mhela awo wamizi wa Wafilisti nawali wawichile kambi kuli ibindi lya Lefaimu. 14 Mhela awo Daudi nayali kuli ngome, wamizi wa Wafilisti nawali kuli muji wa Betelehemu. 15 Daudi nakalonga kwa maya lukami, "Ndangugana ng'hatu kunwa mazi ga kunwa kulawa kuli izimbo lya habehi na lwizi lwa Betelehemu!" 16 Wala wazidahe wa heye wadatu nawalawa na kukola hagati ha wamizi wa Wafilisti. Nawaluta kudeha mazi kuli ideho lya Betelehemu liwele habehi na lwizi lwa muji, nawamigalila Daudi. Ila Daudi nakalema kunwa, nakagabohola hanyi kota nhambiko kwa Mkulu Nguluwi, 17 nakalonga, "Gwa Mkulu Nguluwi, ndahela hachi ya kunwa mazi aga. Ndaze, aga hagawele kota danda ya wala welavile ukomu wa hewo kigala mazi aga?" Ahyo, Daudi nakalema kunwa mazi gala. Azo ndo mbuli zowaditile wala wazidahe wadatu.

18 Abishayi, mdodowe Yoabu, mwana wa Seluiya, nayali chilongozi wa wamizi wazidahe makumi gadatu. Heye naketowa na wanhu miya zidatu (300) kwa igoha lya heye. Nakawakopola na kiholela itagwa kota wala wazidahe Wadatu. 19 Lelo, nayali na lutogo ng'hatu kusinda wala wazidahe makumi wadatu, mbaka nayali chilongozi wa hewo, ila hawele yumwe wa wala wazidahe Wadatu. 20 Benaya, mwana wa Yehoyada, kulawa Kabuseeli, nayali mwamizi yazidahe yawele nakadita mbuli nyinji za vinduzanduza. Nakawakopola wazidahe weli kulawa Moabu. Zuwa limwe mhela wa seluji nakadulika na kulikopola isimba kuli isimo. 21 Nakamkopola kahi Mmisili yawele ng'wemang'wema na mkulu ng'hatu. Mmisili ayo nayali na igoha ila Benaya nakamlutila yawele na nyhimbati, nakamsukula igoha alyo na kumkopola Mmisili ayo kwa igoha lya heye yuye. 22 Benaya, mwana wa Yehoyada, nakadita mbuli azo na nakawa na lutogo kota wala wazidahe Wadatu. 23 Ahyo Benaya nayali na lutogo ng'hatu kusinda wala wazidahe makumi gadatu, hanga hawazigwe hamwe na wala wazidahe wadatu. Daudi nakamuwika yawe chilongozi wa wamizi wa kumwamila heye.

24 Asaheli mdodowe Yoabu, nayali yumwe wa wazidahe makumi gadatu. Wazidahe wanji wa Daudi nawali Elihanani, mwana wa Dodo, kulawa Betelehemu 25 na Shama, Mhalodi na Elika, Mhalodi 26 na Helesi, Mpaliti na Yila, mwana wa Ikeshi, kulawa Tekowa 27 na Abieseli, kulawa Anatoti na Mebunayi, Mhushahi 28 na Salimoni, Mwahohi na Mahalayi, Mnetofahi 29 na Helebu, mwana wa Baana, Mnetofahi na Itayi, mwana wa Libayi kulawa Gibeya ya Benjamini. 30 Nakwali kahi na Benaya, Mpilatoni na Hidayi wa nzanda za Gaashi 31 na Abi-aliboni, Mwalibati na Asimaweti, Mbahulimu 32 na Eliaba, Mshaaliboni na wana wa Yasheni na Yonatani 33 mwana wa Shama, Mhalali na Ahiamu, mwana wa Shalali, Mhalali 34 na Elifeleti, mwana wa Ahasibayi, Mmaakati na Eliamu, mwana wa Ahitofeli, Mgiloni 35 na Hesilo, Mkalimeli na Paalayi, Mwalibi 36 na Igali, mwana wa Natani, Msoba na Bani, Mgadi 37 na Seleki, Mwamoni na Nahalayi, Mbeeloti yawele nayali yopapa vinhu vya kitowela ngondo vya Yoabu, mwana wa Seluiya 38 na Ila, Mwaitili na Galebu, Mwaitili 39 na Uliya, Mhiti.

Weng'ha hamwe, nawali wazidahe makumi gadatu na saba.