1 Daudi nakawatowa na kuwasumya Wafilisti. Nakauhola muji wa Metegi-ama kulawa kuli mmoko mwa Wafilisti. 2 Nakawasumya kahi Wamoabu. Nakawawika kuli misitali jidatu wanhu awo na kuwawasiliza hasi. Nakalonga wala wawele kuli misitali mili wakopoligwe na wala wa msitali wa kadatu walechigwe wakomu. Ahyo Wamoabu nawali vitumagwa wa heye na nawali womigalila kodi.

3 Daudi kahi nakamsumya Hadadeseli mwana wa Lehobu, mndewa wa Soba. Daudi nakaluta kuhilula kahi ulongozi wa heye kuli honhu ha lwanda lwa Eyufulate. 4 Daudi nakawahola kulawa kwa Hadadeseli, wakwina falasi elufu imwe na miya saba (1,700) na wamizi wa kujenda kwa magulu elufu makumi meli (20,000). Hamba Daudi nakadumula midanha ja magulu ga kumbele ja falasi weng'ha wa mituka, ila nakawaleka falasi wa mituka miya imwe (100). 5 Waalamu wa muji wa Damasiko lowalutile kumtanza Hadadeseli, mndewa wa Soba, Daudi nakawatowa na kuwakopola wamizi elufu makumi meli na mbili (22,000). 6 Hamba Daudi nakawika kambi za wamizi kuli isi ya Alamu kuli muji wa Damasiko. Lelo Waalamu nawali vitumagwa wa heye, nawali womha kodi. Mkulu Nguluwi nakamha Daudi mong'ho wa kusumya kweng'ha koyalutile kitowa.

7 Daudi nakazihola ngawo za zahabu ziwele nazali za vilongozi wa wamizi wa Hadadeseli na kuzihilika Yelusalemu. 8 Nakahola kahi shaba nyinji lukami kulawa kuli miji ja Beta na Belotayi, ziwele kuli miji ja Hadadeseli.

9 Towu, mndewa wa Hamati, loyahuliche kota Daudi nakawasumya wamizi weng'ha wa Hadadeseli, 10 nakamlajiza mwanage yalinguchemigwa Yolamu kwa mndewa Daudi leka yamlamse na kumtogola kwa kumsumya mndewa Hadadeseli kuli ngondo, kwa vila Hadadeseli nayali yetowile ngondo na Towu mala nyinji. Yolamu nakamhilichila Daudi vinhu vya sendi na zahabu na shaba. 11 Daudi nakaviwika vinhu avyo viwe vya chiuyeng'ha kwa chiwalo cha kumfugamila Mkulu Nguluwi, ndolendole azo ndo hamwe na sendi na zahabu ziwele nakazihola kulawa kuli isi zeng'ha yazisumile, 12 ziwele ndo Edomu na Moabu na Amoni na Filistiya na Amaleki, hamwe na vinhu vyeng'ha vyoyaholile kulawa kwa mndewa Hadadeseli, mwana wa Lehobu, mndewa wa Soba.

13 Lelo Daudi nakonjeza kuzeleka kwa heye loyawele yohiluka kuwakopola Waedomu elufu kumi na nane (18,000) kuli Ibindi lya Mwino. 14 Nakawika kambi za wamizi kuli Edomu yeng'ha. Waedomu weng'ha wa ako nawawa vitumagwa wa Daudi. Mkulu Nguluwi nakamha Daudi kusumya kweng'ha koyalutile. 15 Ahyo Daudi nakalongoza Isilaeli yeng'ha, nakawaditila hachi wanhu wa heye weng'ha. 16 Yoabu, yawele mayake nayali yochemigwa Seluiya, nayali chilongozi mkulu wa wamizi. Yehoshafati mwana wa Ahiludi, nayali yalingwandika kukumbuchila. 17 Sadoki, mwana wa Ahitubu na Ahimeleki, mwana wa Abiatali nawali watambika na Selaya nayali yalingwandika. 18 Benaya, mwana wa Yehoyada nayali chilongozi wa Wakeleti na Wapeleti wawele nawali womwamila Daudi. Wana wa Daudi nawali watambika.